Pisuussutit taassumani ‘isertugaasut’ nanikkit
Pisuussutit taassumani ‘isertugaasut’ nanikkit
“Ilisimassutsikkut paasinninnikkullu pisuussutit tamarmik isertugaaffigisaat.” — KOLOSSEMIUT 2:3.
1, 2. (a) 1922-mi suut nassaarineqarpat, maannalu sumiippat? (b) Inuit tamarmik Guutip oqaasiani sunissamut kajumissaarneqarpat?
ERLINNARTUUTIT, imaluunniit pisuussutit, toqqorneqarsimasut nassaarineqaraangata nutaarsiassani pingaarnerpaat ilagisarpaat. Assersuutigalugu 1922-mi itsarnisarsiooq tuluk Howard Carter ukiuni qulikkuutaani arlalinni avatangiisini imaannaanngitsuni sulereerluni maluginiarnarluinnartunik nassaarpoq. Faraop Tutankamonip ilerra, 5000-ingajannik pequtilik, innarlerneqanngilluinnangajassimasoq nassaaraa.
2 Carterip nassaava uitsatigineqaraluaqisoq pequtit atortullu nassaarineqartut amerlanersaat katersugaasivinniilerput inunnilluunniit ataasiakkaanit katersugaatigineqalersimallutik. Imaassinnaavoq oqaluttuarisaanikkut pingaaruteqartut eqqumiitsuliatulluunniit naleqartut, taakkuali ulluinnarni inuunitsinnut sunniuteqarnerat killeqartorujussuuvoq. Guutilli oqaasiani kajumissaarneqarpugut pisuussutinik uagutsinnut pingaaruteqavissunik ujaaseqqulluta. Tamanna inunnut tamanut kajumissaarutaavoq, akissarsiassarlu erlinnartuutinit allanit tamanit naleqarnerungaarpoq. — Atuaruk Ussatit 2:1-6.
3. Pisuussutit Jehovap uagutsinnut ujaqqusai qanoq iluaqutaappat?
3 Erlinnartuutit Jehovap kiffaminut ujaqqullugit kajumissaarutigisaasa nalingat eqqarsaatigeriaruk. Erlinnartuutinut taakkununnga ilaapput ‘Jehovamik mianerinninneq’ ulluni navianartoqaqisuni makkunani illersuutigisinnaasarput. ‘Guuti pillugu ilisimasaqalernerup’ kingunerisaanik inummut ataqqinaataanerpaasoq manna anguneqarsinnaavoq: Qutsinnerpaamut qanittumik attaveqarneq. Aamma ilisimassuseq, ilisimasaqarneq naliliisinnaassuserlu Guutimeersut erlinnartuupput ajornartorsiutit ulluinnarni nalaattakkatta naammagalugit atornissaannut iluaqutissavut. (Ussatit 9:10, 11) Pisuussutit taakku qanoq ililluta nanisinnaavavut?
Anersaakkut pisuussutit sumi nanissagivut
4. Pisuussutit Guutip neriorsuutigisai qanoq ililluta nanisinnaavavut?
4 Itsarnisarsiuutut ilisimatuutullu, nalilinnik nassaarumallutik piffissap sivisuup ingerlanerani sumiiffippassuarni ujaasisariaqartutut, pinnata uagut anersaakkut pisuussutit sumerpiamiinnersut nalunngilarput. Guutip oqaasia, erlinnartuutit sumiiffiannik paasissutissiillunilusooq, pisuussutit Guutip uagutsinnut neriorsuutigisaasa sumiiffippiaannut uagutsinnik siulersuisarpoq. Apustili Paulusi Kristusi pillugu ima allappoq: “Ilisimassutsikkut paasinninnikkullu pisuussutit tamarmik isertugaaffigisaat.” (Kolossemiut 2:3) Tamanna atuaratsigu immaqa ima eqqarsarpugut: ‘Sooq pisuussutit taakku ujassavavut? Kristusimi ‘isertugaanerat’ qanoq paasisariaqarami? Aamma qanoq ililluta nanisinnaavavut?’ Apeqqutit akissutisisinnaavavut apustilip oqaasiinik misissuinitsigut.
5. Sooq Paulusi anersaakkut pisuussutit pillugit allappa?
5 Paulusip oqaatsit taakku uppeqatiminut Kolossemiittunut allakkamini allappai. Allappoq taakku pillugit ilungersorluni “uummatimikkut tuppallersarneqaqqullugit asaqatigiinnikkullu ataqatigiileqqullugit”. (Atuaruk Kolossemiut 2:1, 2). Sooq taama isumaalugitigai? Paulusip ilisimasimannguatsiarpaa qatanngutit Kolossemiittut grækerit isumaliutersuutaannik siuarsaasunit imaluunniit Mosesip inatsisaanik maleruaaqqilertariaqarneraasunit sunnerneqarsimasinnaanerat. Ilungersorluni ima mianersoqquai: “Mianersoritsi napitinneqaqqunasi ilisimaqqissaarniutinik salloqittaatinillu piunngitsunik, taakku tunngaveqarmata inuit kingornussassiissutaannik silarsuullu pissaanerinik, Kristusimit pisuunngitsunik.” — Kolossemiut 2:8.
6. Sooq Paulusip siunnersuutai soqutigisariaqarpavut?
6 Tamatumunnga assingusumik ullumikkut uagut Saatanimit taassumalu pissutsinik aaqqissuussineranit ajortumit sunnerneqartarpugut. Silamiut isumaliutersuutaat, ilaatigut Guuteqannginneraaneq pinngoriartuaarsimaneraanerlu, inuit eqqarsartaasiannik, ileqquinik, anguniagaannik inooriaasiannillu sunniisarput. Upperisarsiorneq eqqunngitsoq nalliuttorpassuit nalliuttorsiutigineqarnerannut pissutaaqataasupilussuuvoq. Aliikkusersuutit inuit naammalluinnanngitsut pilerissusipalaavinut pilerisaarisarput; internettimilu siumorneqarsinnaasut ilarparujussui kikkuugaluartunulluunniit, inuusuttunullu utoqqarnullu, navianaateqarput. Tamakkuninnga ileqqunillu silamiorpaluttunik navianartorsiortinneqartuarutta Jehovap uagutsinnut siunnersuutaanut isiginnittaaserput sunnerneqariaannaavoq aamma inuunivik tigulluartitaarunnaarsinnaavarput. (Atuaruk 1 Timotheusi 6:17-19). Taamaattumik Saatanip napiaaniutaanut napitissanngikkutta Paulusip Kolossemiunut allagaanik paasinninnissarput siunnersuutaanillu malinninnissarput pingaaruteqarpoq.
7. Paulusip oqaasii naapertorlugit Kolossemiut iluaqutigisinnaasaat marluk suuppat?
7 Paulusip Kolossemiunut oqaasii uterfigeqqikkutsigit maluginiassavarput isumakulunnini ersersereeramiuk tuppallersarneqarnissamut asanninnikkullu ataasioqatigiinnissamut iluaqutigiumaagaat marluk uparuarai. Siullermik eqqaavai ‘nakimajuissuseq paasisimasaqassuserlu naammangaartut’. Allakkanik eqqortumik paasinninnertik qularutiginngilluinnartariaqarpaat, uppernertik tunngavissaqarluaqqullugu. (Hebræerit 11:1) Taava eqqaavaa ‘Guutip anngigisaanik ilisarinnilernissaq’, tassa imaappoq Guutip anngigisaanik eqqorluartumik ilisimasaqalernissaq. Sallusuissut pillugu qarsupittuinnarmik ilisimasaqarneq naammagiinnarsinnaanngilaat; Guutip itissusiinik paasinnilluarsimasariaqarput. (Hebræerit 5:13, 14) Tamanna Kolossemiunut — aamma uagutsinnut ullumikkut inuusunut — siunnersuutaavoq pitsak! Qanorli ililluta taamatut paasisimasaqalerlutalu eqqorluartumik ilisimasaqalersinnaavugut? Paulusip tamanna akivaa Jiisusi Kristusi pillugu pingaarutilimmik ima allalluni: “Ilisimassutsikkut paasinninnikkullu pisuussutit tamarmik isertugaaffigisaat.”
Pisuussutit Kristusimi ‘isertugaasut’
8. Oqaatsit Kristusimi ‘isertugaasut’ qanoq paasisariaqarpat?
8 Allassimammat ilisimassutsikkut paasinninnikkullu pisuussutit tamarmik Kristusi isertugaaffigigaat, imaanngilaq taakku paasiuminaatsuullutillu naniuminaatsuusut. Imaaginnarpoq pisuussutit taakku ilangiiffigiumallugit ilungersortariaqartugut Jiisusilu Kristusi tunaarisariaqaripput. Tamanna Jiisusip imminut pilluni oqaasiinut ukununnga naapertuuppoq: “Uanga aqqutaavunga sallusuissutaallungalu inuussutaallungalu; uakkuinnaq Ataatamut pisoqarsinnaavoq.” (Johannesi 14:6) Guuti pillugu ilisimasaqalerumalluta Jiisusimit ikiorneqartariaqarlutalu siulersorneqartariaqarpugut.
9. Jiisusip ‘aqqutaallunilu sallusuissutaallunilu inuussutaanera’ qanoq paasisariaqarpa?
9 Jiisusi ‘aqqutaaginnanngilaq’, aammali ‘sallusuissutaallunilu inuussutaavoq’. Tamatumani erserpoq taanna tassaaginnanngitsoq Ataatamut qanillinissamut iluaqutigisinnaasarput. Aamma sallusuissutinik Biibilimiittunik paasinninnissamut naassaanngitsumillu inuusinnaalernissamut pingaaruteqangaarpoq. Aap, anersaakkut pisuussutit nalissaqanngitsut Biibilimik peqqissaarlutik atuaqqissaartartunit nanineqarnissaminnut utaqqiinnartut Jiisusi isertugaaffigaat. Pisuussutit naleqangaartut taakku siunissatsinnut Guutimullu attaveqarnitsinnut pingaaruteqarluinnartut ilaat sammeriartigit.
10. Kolossemiut 1:19 aamma 2:9 aallaavigalugit Jiisusi pillugu suut paasisinnaavavut?
10 “[Taassumani] Guutiussutsip tamarmiussusia iluunngarmi ineqarpoq timeqarluni.” (Kolossemiut 1:19; 2:9, 1936) Jiisusip Ataatani qilammiusoq ukiuni kisissaanngitsuni qilammeeqatigigamiuk kinaassusia piumasaalu allanit tamanit nalunnginnerpaavai. Jiisusip Ataataminit ilikkakkani nunarsuarmi kiffartornermini allanut ilinniartitsissutigai, aamma pissutsit Ataatani najortillugu pigiliussimasani iliuutsimigit ersersippai. Taamaattuminguna Jiisusi ima oqarsinnaasimasoq: “Uannik takunnittup Ataataq takuaa.” (Johannesi 14:9) Guutip ilisimasaasa paasisimasaasalu tamarmik Kristusi isertugaaffigaat, imaluunniit taakku Kristusimiipput, Jehovalu pillugu pitsaanerpaamik ilinniarsinnaavugut sapinngisarput tamaat peqqissaarlutalu Jiisusi pillugu ilinniarnitsigut.
11. Jiisusi siulittuutillu Biibilimiittut imminnut qanoq attuumassuteqarpat?
11 “[Jiisusimik] nalunaajaat tassaavoq pruffiitisut siulittuutip anersaava.” (Saqqummersitat 19:10) Oqaatsini taakkunani erserpoq Jiisusi siulittuuterpassuit Biibilimiittut eqquunneranni pingaarnersaasoq. Aatsaat Jiisusip naalagaaffimmi Missiarsikkoortumi inissisimaffianik paasinnissimagaanni siulittuutinik Biibilimiittunik, 1 Mosesi 3:15-imiittuniit takorruukkanut alutornartunut Saqqummersitaniittunut, eqqortumik paasinnittoqarsinnaavoq. Taamaammat paasinarpoq sooq inuit Jiisusimik Missiarsitut akuerinninngitsut siulittuutinik Allakkani Hebræerisuuniittunik paatsuunganartitsinersut. Aamma paasinarpoq sooq inuit Allakkanik Hebræerisuunik, Missiarsi pillugu siulittuuterpassuarnik imalinnik, pingaartitsinngitsut Jiisusi inuinnaasimasorigaat. Jiisusi pillugu ilisimasaqarneq Guutip innuttaasa siulittuutit Biibilimiittut suli eqquutinngitsut qanoq paasisariaqarnerannik paasinninnissamut iluaqutigaat. — 2 Korinthimiut 1:20.
12, 13. (a) Jiisusip ‘silarsuarmut qaammaqqutaanera’ qanoq paasisariaqarpa? (b) Kristusip ajoqersugaasa anersaakkut taartumit aniguisitaagunik suna pisussaaffigaat?
12 “Uanga silarsuarmut qaammaqqutaavunga.” (Atuaruk Johannesi 8:12; 9:5). Jiisusip nunarsuarmi inunngornera sioqquterujussuarlugu pruffiiti Esaja ima siulittuivoq: “Inuiaat taarsiorlutik angalaartut qaamasorsuaq takussavaat; qaamasup qinngorfigai taarsiorfimmi najugaqartut.” (Esaja 9:1) Apustilip Matthæusip nassuiarpaa Jiisusip siulittuut taanna eqquutitikkaa oqaluussisalerami ima oqarluni: “Allamik isumataaritsi, Qilaap Naalagaaffia qanillimmat.” (Matthæusi 4:16, 17) Jiisusip oqaluussineratigut inuiaat anersaakkut qaammarsarneqarput upperisarsiornikkullu ajoqersuutinut eqqunngitsunut inussiaataanermit aniguisitaallutik. Jiisusi ima oqarpoq: “Silarsuarmut pivunga qaammaqqutaallunga uannut uppertoq kinaluunniit taartumiiginnaqqunagu.” — Johannesi 1:3-5; 12:46.
13 Ukiorpassuit tamatuma kingorna apustilip Paulusip uppeqatini ima allaffigai: “Siornatigut taarmiugaluarassi maanna Naalakkami qaamasormiuvusi. Taava inuugitsi qaamasup qitornaasut.” (Efesosimiut 5:8) Kristumiut anersaakkut taartumi inussiaataanermit aniguisitaagunik qaamasup qitornaasut inuunissartik pisussaaffigaat. Tamanna Jiisusip qaqqami oqaluutsimini ajoqersukkaminut oqaasiinut ukununnga naapertuuppoq: “Qaamasorsi qaamali inunnut, suliasi ajunngitsut taakkununnga takoqqullugit Ataatarsilu qilanniittoq unnersiutigeqqullugu.” (Matthæusi 5:16) Illit anersaakkut pisuussutit Jiisusimi nanisimasatit ima pingaartitsigaagit oqaatsikkut kristumiutullu pissuserissaarnikkut allanut unnersuussutigerusullugit?
14, 15. (a) Savat uumasullu allat Biibilip nalaani pallorfiginninnermut ilumoortumut qanoq ilaappat? (b) Sooq Jiisusi ‘Guutip savaaraatut’ nalissaqanngila?
14 Jiisusi tassaavoq “Guutip savaaraa”. (Johannesi 1:29, 36) Biibilimi allaatigineqarajuppoq savat ajortulianik isumakkeerfiginninnermut Guutimullu qanillinermut tunngatillugu atorneqartarnerat. Aaperaat Iisaamik pilliutiginnikkumanerminik ersersitsereermat oqarfigineqarpoq taassuminnga pinerleeqqunagu, savamillu angutivissamik pilliutissaqartinneqarpoq. (1 Mosesi 22:12, 13) Israelikkut Egyptenimit aniguisitaagamik savamik toqutseqquneqarput, matumuuna ‘Jehovamut poorskisiornermut’ tunngatillugu. (2 Mosesi 12:1-13) Mosesillu inatsisai naapertorlugit uumasut assigiinngitsut, soorlu savat savaasallu, pilliutitut atorneqarsinnaapput. — 2 Mosesi 29:38-42; 3 Mosesi 5:6, 7.
15 Pilliutit taakkua ilaannaalluunniit — aap, inunnit pilliutigineqartut suulluunniit — ajortimit toqumillu ataavartumik aniguisitaassutaasinnaanngillat. (Hebræerit 10:1-4) Jiisusili tassaavoq “Guutip savaaraa silarsuup ajortaanik nammattoq”, tamannalu erlinnartuutinit tigussaasunit nanineqarsimasunit immini naleqarnerungaarpoq. Taamaattumik utertitsissut pillugu ajoqersuutip misissoqqissaarnissaanut piffissaqartariaqarpugut ersersillugulu aaqqissuussaq asseqanngitsoq tamanna upperalugu. Taamaaliorutta neriuuteqassaagut nuanningaartumik pilluaqqusaanissamik akissarsisinneqarnissamillu — ‘savarpannguit’ Kristusi peqatigalugu qilammi naalannassuseqarlunilu ataqqinaateqarnissamik, ‘savallu allat’ nunarsuarmi paratiisiusumi naassaanngitsumik inuunissamik. — Lukasi 12:32; Johannesi 6:40, 47; 10:16.
16, 17. Sooq Jiisusip ‘uppernerup aqqutissiuussisuatut naammassisitsisuatullu’ inissisimaffianik paasinninnissarput pingaaruteqarpa?
16 Jiisusi tassaavoq “uppernerup aqqutissiuussisua naammassisitsisualu”. (Atuaruk Hebræerit 12:1, 2). Hebræerinut allakkani kapitali 11-miippoq Paulusip upperneq pillugu nassuiaataa torrallataq; ilaatigut isumasiueqqissaarinertaqarpoq upperluartullu soorlu Noa, Aaperaat, Sara Rahabilu tassani allattorneqarsimallutik. Tamakku tamaasa eqqarsaatigalugit Paulusip uppeqatini kajumissaarpai ‘uppernerup aqqutissiuussisuanik naammassisitsisuanillu Jiisusimik tunaarinneqqullugit’. Sooq?
17 Angutit arnallu aalajaatsut Hebræerit 11-mi eqqaaneqartut Guutip neriorsuutaanik upperinnilluaraluarlutik sukumiisumik ilisimanngilaat Guutip neriorsuutini Missiarsi naalagaaffillu aqqutigalugit qanoq eqquutitikkumaarnerai. Aap, allaat angutit Jehovap Missiarsi pillugu siulittuuterpassuarnik allatsitaasa allatamik isumaat paasilluinnanngilaat. (1 Petrusi 1:10-12) Taamaallaat Jiisusi aqqutigalugu upperneq tunngavissaqarlualersinnaavoq. Taamaattumik Jiisusip ‘uppernerup aqqutissiuussisuatut naammassisitsisuatullu’ inissisimaffianik paasinnilluarnissarput akuerinninnissarpullu pingaaruteqarluinnarpoq.
Ujarlertuarit
18, 19. (a) Anersaakkut pisuussutinik Kristusimi isertugaasunik allanik eqqaasaqarit. (b) Sooq Jiisusi anersaakkut pisuussutinik ujarlerfigiuartariaqarparput?
18 Jiisusip Guutip inuiaat annaanneqarnissaannut aaqqissuussaanut atatillugu inissisimaffianut pingaaruteqangaartumut tunngasut ikittunnguit sammereerpavut. Anersaakkut pisuussutit suli allarpassuit Kristusi isertugaaffigaat. Taakkuninnga nanisineq nuannaarutaallunilu pilluaqqussutaassaaq. Assersuutigalugu apustilip Petrusip Jiisusi ‘inuunerup naalagaaneranik’ ‘qaasiummillu’ nuisumik taavaa. (Apustilit Suliaat 3:15; 5:31; 2 Petrusi 1:19) Aamma oqaaseq “Amen” Jiisusimut tunngatillugu Biibilimi atorneqarpoq. (Saqqummersitat 3:14) Oqaatsit taakku qanoq paasisariaqarnersut nalunngiliuk? Soorlu Jiisusi oqartoq: “Ujarleritsi [Ujarlertuaritsi, NV], nanisissaasi taava.” — Matthæusi 7:7.
19 Inuit oqaluttuarisaaneranni Jiisusitut taama pingaaruteqartigisumik naassaanngitsumillu pilluarnissatsinnut taama attuumassuteqartigisumik inuusoqarsimanngilaq. Taassumaniipput anersaakkut pisuussutit uummatikkut iluunngarluni ujaraanni naniuminartut. Qanortoq pisuussutinik taassumani ‘isertugaasunik’ nanisineq nuannaarutigalugulu pilluaqqusaassutigigiuk!
Eqqaamavigit?
• Erlinnartuutinik sunik kristumiut ujarleqquneqarpat?
• Sooq Paulusip Kolossemiunut siunnersuutai ullumikkut uaguttaaq iluaqutigisinnaavavut?
• Anersaakkut pisuussutit Kristusimi ‘isertugaasut’ ilaannik eqqaasaqarit qanorlu paasisariaqarnerat nassuiarlugu.
[Atuaqqissaarnermi apeqqutit]
[Qupp. 13-mi assiliartaq]
Biibili erlinnartuutit sumiiffiannik paasissutissiillunilusooq pisuussutinut Kristusimi ‘isertugaasunut’ uagutsinnik siulersuivoq