Mariap maligassiaa qanoq ilinniarfigisinnaagipput

Suliassinneqarnerit imaluunniit ilimaginngisannik aalajangersimasumik akisussaaffilerneqarnerit pissutigalugu sapilersutut misiginikuuit? Pissaqarniarnerit ullut tamaasa sorsuutigiuartariaqarakku qasuit? Immaqa inunnut millionilinnut qimaasutut nunaminnik qimatsisariaqarnertik pissutigalugu paatsiveerusimaarlutillu annilaangasunut ilaavutit. Kialu arlatta misiginikuunnginnerpaa qamuuna naalliungaarneq imaqanngissuserlu asasap toquneratigut pilersartoq?

MARIA, Jiisusip anaanaa, tamakkorpassuarnik unamminiagaqarsimasoq nalunngiliuk? Tamakkualu misigiinnarnagit aamma anigorluarsimavai! Maligassiaa qanoq ilinniarfigisinnaavarput?

Inuit silarsuarmiut tamarmik Maria pillugu tusagaqarsimapput. Tamannalu tupinnanngilaq, Guutimmi siunertaata naammassineqarnerani pingaarutilimmik inissisimaffeqarpoq. Allaat inuit millionillit taanna ataqqisorujussuuaat. Ilagiit katuullit taanna ataqqivaat Anaanatut asasatut uppernikkut, neriunnikkut, ajunngitsuliornikkullu maligassatut. Inuppassuit ilinniartinneqarsimapput Maria inunnik Guutimut siulersuisinnaasoq.

Illit Jiisusip anaanaa qanoq isigaajuk? Sulilu pingaarnerusumik, Guutip taanna qanoq isigaa?

Suliassaq nalinginnaanngitsoq

Maria Elip panigaa Judap naggueqatigiissortaanut ilaasoq. Taanna siullerpaamik Biibilimi eqqaaneqarpoq pisimasumut immikkut ittumut atatillugu. Taanna inngilimit ima oqartumit pulaarneqarpoq: “[Jehovap] najorpaatit saammaassaasutit uumaa!” Mariap tamanna aarleritsaatigaa, ‘isumaliutigaalu ilassinnissut tamanna qanoq isumaqarnersoq’. Taamaattumik inngilip taanna oqaluttuuppaa Guutip erneranik ilumioqalersussatut, ernisussatut isumassuisussatullu qinerneqarsimasoq, tamannalu suliassaavoq asseqanngilluinnartoq pimoorusassapilussuarli. — Lukasi 1:26-33.

Akisussaafferujussuaq arnamut inuusuttumut aappaqanngitsumut taassumunnga tunniunneqarpoq. Taanna qanoq periarpa? Mariap qanoq pisoqarsimanera oqaluttuariguniuk upperineqassanerluni eqqarsaatigisimassavaa. Taamatut naartunini pissiaminit Josefimit asaneqarunnaarnerminik imaluunniit tamanit kanngunarsagaanerminik kinguneqassava? (5 Mosesi 22:20-24) Mariali suliassap pingaaruteqartup tamatuma naammassinissaanut tunuarsimaanngilaq.

Taassuma upperluarnini Guutimi Jehovap piumasaanut naalatsigitissinnaanngussutigaa. Qularinngilluinnarpaa taassuma isumassorumaaraani, taamaammallu ima oqarpoq: “[Jehovap] kiffaraanga. Oqaatsisit malillugit pineqarlanga.” Maria unamminiarnartut aqqusaarnissaannut kajumippoq, taassumami pingaartippaa immikkut  pisinnaatitaaffik angingaartoq Guutip imminut tunniussaa. — Lukasi 1:38.

Mariap naartunerminik oqaluttuummani, Josefip pissiariinnertik taamaatilersaaleraluarpaa. Tamatuma nalaani taakku marluullutik artornartorsiorsimassaqaat. Biibilimi allassimanngilaq piffissaq qanoq sivisutigisoq ingerlasimanersoq, Marialli Josefillu Jehovap inngiliata Josefimut saqqummernera oqiliallaatigisimassaqaat. Guutimit oqariartortitap taassuma nassuiarpaa Mariap nalinginnaanngitsumik naartulersimanera, Josefilu peqquaa taanna nuliartaareqqullugu. — Matthæusi 1:19-24.

Piffissaq ilungersunartorsiorfiusoq

Ullumikkut anaananngortussat ilarpassui qaammatini arlalinni meerartaarnissaminnut piareersartarput, qularnanngilarlu Maria aamma taamaaliorsimassasoq. Aammami taanna meerartaaqqaatigisussaavaa. Pissutsinilli atoruminaallisitsisunik naatsorsuutigineqanngitsunik pisoqarpoq. Kaasari Augustusi peqqusivoq inuit kisinneqassasut, inuillu tamarmik illoqarfimmi inunngorfigisaminni allatsissasut. Tamanna pissutigalugu Josefip Maria qaammatit qulingiluassaannik naartusoq, qularnanngitsumik siutituumi qimussertillugu, 150 kilometerisut ungasitsigisumut ingerlappaa! Betlehemimut pimmata illoqarfik inunnik ulikkaarpoq. Maria erniffissatut naleqquttumik inissarsisariaqarpoq, inigisinnaasatuaalli tassaavoq nersutit inaat. Inimi taamaattumi erninissaq Mariamut imaannaasimanavianngilaq. Qularnanngitsumik peqqusiileqillunilu annilaangasimassaaq.

Aamma qularnanngitsumik Mariap taamatut ilungersunartorsiornermi nalaani uummammiuni Jehovamut aniatittarpai, taassuma imminik meeqqaminillu isumaginninnissaa qularinagu. Kingusinnerusukkut savanik paarsisut takkupput naalungiaq takorusussuataarlugu. Taakku oqaluttuarput inngilit meeraq taasimagaat ‘annaassisumik; taanna Kristusiunerarlugu, Naalagaq’. Nangillunilu ima allassimasoqarpoq: “[Mariap] tamakku tamaasa uummamminut toqqorpai eqqarsaatigalugillu.” Aap, Mariap savanik paarsisut oqaaserisimasaat eqqarsaatigeqqissaarpai, tamannalu nakussatsissutigaa. — Lukasi 2:11, 16-19.

Uagummi? Ilimanarluinnarpoq ilungersunartunik misigisaqassasugut. Aammattaaq Biibilimi ersersinneqarpoq ‘piffissamit nalaatsornikkullu pisunit’ (NV) tamatta eqqorneqarsinnaasugut, tamannalu assigiinngitsunik ajornartorsiuterpassuaqalerlunilu unamminiagassaqalernermik kinguneqarsinnaavoq. (Oqaluussisartup oqaasii 9:11) Taamatut pisoqassappat Guuti tamakkununnga pisuutillugu narrutsassaagut? Pitsaanerussanngila Mariap isiginnittaasia ilaarutsigu Guutimullu qaninnerusumik attaveqalerluta taassuma oqaasiani, Biibilimi, allassimasut paasiniarneratigut kingornalu ilinniarsimasatta eqqarsaatiginerisigut? Qularnanngitsumik tamanna annikilliuutit nikallujuilluta atornissaannut iluaqutigissavarput.

 Piitsoq qimaasorlu

Maria ajornartorsiutinik aamma allanik nalaataqarpoq — ilaatigut piitsuullunilu nunagisaminit qimaasariaqaleriataarpoq. Illit assingusunik misigisaqarsimavit? Nalunaarusiaq naapertorlugu “silarsuarmi inuit affaasa — inuit 3 milliardingajaat — ullormut 10 krone ataallugu inuussutigisussaasimavaat”, millionillillu allat naammattusaariniarlutik ilungersorput, naak nunani pigissaarnerusunik taaneqartartuni najugaqaraluarlutik. Illimmi? Ilaquttavit nerisassaqarnissaat, atisassaqarnissaat inissaqarnissaallu isumaginiarlugu ullut tamaasa ilungersornerit pissutigalugu qasusarpit? Ilaannikkut sapersisilluinnarneqartutut misigisarpit?

Biibilimi allassimasut naapertorlugit Josefi Marialu piitsuusimarpasipput. Tamanna qanoq ililluta nalunnginnatsigu? Aap, paasissutissamininnguit iivangkiiliuniittut — Matthæusimit, Markusimit, Lukasimit Johannesimillu allanneqarsimasut — naapertorlugit takuneqarsinnaavoq Josefi Marialu Mariap erninerata kingorna ullut 40-t qaangiummata naalaffiliaqatigiittut piumasarineqartutut pilliiartorlutik — ‘tuinik quluartartunik marlunnik imaluunniit tuinik piaqqanik marlunnik’. * (Lukasi 2:22-24) Savaaqqamik pilliuteqarnissaminnut piitsuuallaartut kisimik tamatuminnga pilliuteqarnissaminnut akuerisaapput. Taamaammat naammattusaarinissaq Josefimut Mariamullu qularnanngitsumik ilungersunarsimavoq. Taamaakkaluartoq ilaqutariittut asanninnermik siuarsaasinnaasimapput, qularnanngivipporlu taakkua Guutimik pallorfiginninneq pingaarnerpaatikkaat. — 5 Mosesi 6:6, 7.

Jiisusip inunngornerata kingorna sivitsunngitsoq Mariap inuunera allanngorluinnaqqippoq. Inngilip Josefi oqarfigaa ilaquttani ilagalugit Egyptenimut qimaassasoq. (Matthæusi 2:13-15) Aappassaanik Mariap angerlarsimaffini qimattariaqalerpaa, tamatumuunali nunamut allamut aallartariaqarpoq. Juuterpassuit Egyptenimi najugaqarput, taamaammat immaqa Mariakkut Josefilu inuiaqatimik akornanni najugaqarsimapput. Taamaakkaluartoq nunami allami najugaqarneq unamminiarnarlunilu paatsiveerusimaarnarsinnaavoq. Illit ilaquttatillu inuit millionilippassuit nunartik qimallugu, immaqa meeqqatik atugarissaarneruniassammata imaluunniit isumannaatsumiinniassammata, aallarsimasut ilagaasi? Taamaappat Mariap Egyptenimi ajornartorsiutigisimasinnaasai paasisinnaalluassavatit.

Nuliaasoq anaanaasorlu tunniusimasoq

Maria iivangkiiliuni Jiisusip inunngorneranut meeraaneranullu atatillugu eqqaaneqarnerata saniatigut imatorsuaq oqaluttuarineqanngilaq. Nalunngilarpulli Maria Josefilu minnerpaamik arfinilinnik allanik meeraqartut. Tamanna tupaallaatigaajuk? Misissoriartigu iivangkiiliuni qanoq allassimasoqarnersoq.

Josefi Mariap Guutip erneranik ernertaarnermik immikkut pisinnaatitaaffianik ataqqinningaarpoq. Taamaammat taassuma Jiisusip inunngoreernissaanut Maria atoqatiginaveersaarallarpaa. Matthæusi 1:25-mi ima allassimavoq: ‘Ernertaartinnagu tutinneq ajorpaa.’ Versimi tamatumani uiguummi “-tinnagu”-mi erserpoq Jiisusip inunngornerata kingorna Josefi Marialu aappariittut kinguaassiuutitigut nalinginnaasumik inooqatigiissimasut. Iivangkiiliuni oqaluttuarineqartut naapertorlugit tamatuma kingunerisaanik Maria Josefilu meeqqiorput, nukappiaqqanik niviarsiaqqanillu. Jaaku, Josefi, Siimuut Judasilu Jiisusip affarmik qatanngutigai, aamma Maria minnerpaamik marlunnik panissaarpoq. (Matthæusi 13:55, 56) Meeqqat taakkua tamarmik nalinginnaasumik naartugineqalerput. *

 Maria anersaakkut ittunik pingaartitsisuusimavoq. Arnat Jerusalemimut poorskisioriartortarnissaat Inatsisini peqqussutigineqanngikkaluartoq, Mariap Josefi ukiumoortumik taqqavunnaraangat angalaqatigisarpaa. (Lukasi 2:41) Katillugit 300 kilometeringajannik isorartutigisumut angalasarput — ilaqutariinniittut suli amerliartorneranni! Angalanerilli taakkua qularnanngitsumik ilaqutariinnut nuannersuusimassapput.

Ullumikkut arnarpassuit Mariap maligassiuilluarnera malippaat. Biibili naapertorlugu akisussaaffimminnik naammassinninniarlutik namminissarsioratik suleruloorput. Nuliaasut imminut pilliutigeriaannaasut taakku amerlanertigut naammagittartorujussuullutillu pinertoorujussuullutillu maniguuttorujussuusarput. Taakku Mariap isiginnittaasianik eqqarsaatiginninnertik namminneq ilorrisimaarnissamik aliikkusersornissamillu kissaatigisatik pingaarnerutinnagit anersaakkut ittunik pingaarnerutitsinissaminnut iluaqutigisarpaat. Soorlu Mariap qularnanngitsumik nalunngikkaa, nalunngilaat Guutimik pallorfiginneqatigiinneq ilaqutariit nakussatsissutigisarlugulu ataasiussuseqalissutigisaraat.

Ilaanni Mariap Josefillu nalliuttorsiornerup kingorna Jerusalemimit angerlartillutik — qularnanngitsumik arlalinnik meerartaqarlutik — paasilerpaat Jiisusi aqqaneq-marlunnik ukiulik peqanngitsoq. Takorloorsinnaaviuk Maria qanoq ernumasimatigissasoq annilaangalluni ulluni pingasuni ernerminik ujaasinerminni? Taassuma Josefillu Jiisusi naalaffimmiittoq kiisami nassaarimmanni ima oqarpoq: “Nalugassiuk Ataatanniittariaqartunga?” Oqaluttuarineqartumi ersersinneqaqqippoq Mariap ‘oqaaserineqartut tamaasa uummamminut toqqoqqissaarai’; tamanna  taassuma anersaakkut ittunik assut pingaartitsisuuneranut takussutissaavoq suli alla. Mariap Jiisusip inuunerani pisut eqqarsaatigeqqissaarpai. Ukiorpassuit tamatuma kingorna qularnanngitsumik pisimasoq tamanna Jiisusillu meeraanerani pisimasut allat iivangkiiliumik allattunut takorlooruminartumik oqaluttuarisinnaasimassavai. — Lukasi 2:41-52.

Naalliuutit annaasaqarnerlu naammagalugit atorpai

Josefi, Jiisusip ataatarsiaa, qanoq piva? Jiisusip meeraanerani pisimasumut aatsaannguaq eqqartorneqartumut atatillugu naatsumik eqqaaneqarpoq, tamatumali kingorna iivangkiiliuni eqqaaneqaqqinngilaq. Ilaat isumaqarput tamanna takussutissaasoq Josefip Jiisusip kiffartornerminik aallartitsinnginnerani toqusimaneranut. Qanorluunniit pisoqarsimagaluarpat Maria Jiisusip kiffartornerata naalernerani uillarninngorsimagunarpoq. Jiisusip toqunngitsiarnermini apustili Johannesi Mariamik isumaginnittussanngortippaa. (Johannesi 19:26, 27) Josefi suli uumasimagaluarpat taamaaliorsimassanngikkaluarpoq. *

Maria Josefilu amerlaqisunik misigisaqaqatigiissimapput. Inngilinit pulaarneqarsimapput, naalakkersuisumit naqisimannittumit qimaasimapput, arlaleriarlutik nuuttariaqarsimapput meerarpassuillu perorsarsimallugit. Unnuit amerlasuut issiaqatigiittarsimassapput Jiisusi oqaloqatigiissutigalugu siunissamilu qanoq misigisaqarumaarnera isumaliutigalugu, eqqortumik perorsarnerlugu piareersarnerlugulu isumakuluutigalugu. Ullulli ilaanni Maria kisimiileriataarpoq.

Aappannik toqukkut annaasaqarnikuuit? Ukiorpassuit qaangiutereeraluartut annaasaqarnerpit kingunerisaanik naalliungaarneq imaqanngissuserlu misigisarpigit? Mariap qularnanngitsumik upperisani toqusunillu makititsisoqarumaarneranik ilisimanninnini tuppallersaatigaa. * (Johannesi 5:28, 29) Eqqarsaatilli tuppallernartut taakku ajornartorsiutaanut aaqqiissutaanngillat. Ullumikkut anaanat kisermaarpassuit  pisimanerattut Mariap uimit ikiorneqarani tapersersorneqaranilu meeqqanik isumassuineq unamminiagaraa.

Josefi toqummat Jiisusip ilaqutariit timikkut pisariaqartitaannik isumaginninniarluni pilersuisunngorsimasorinissaanut pissutissaqarpoq. Jiisusip nukai inersimasunngoriartortillutik ilaqutariinnut akisussaaqataasinnaapput. Jiisusip ‘30-it missiliorlugit ukioqarluni’ ilaquttani qimappai kiffartorninilu aallartillugu. (Lukasi 3:23) Angajoqqaat amerlanersaat ernertik panitsilluunniit angerlarsimaffimminnit nuukkaangat tulluusimaarlutillu aliasuttarput. Piffissarujussuaq nukippassuillu misigissuserpassuillu meeqqaminnut atornikuugamikkit, aallaraangata maqaasisorujussuusarput. Erneqarpit paneqarpilluunniit anguniakkatik angusinnaajumallugit nuussimasunik? Tulluusimaarutigivigit, immaqali aamma kissaatigalugu qaninnerulaartumi najugaqarnissaat? Taamaappat takorloorsinnaavat Maria qanoq misigisimassasoq Jiisusi nuummat.

Naatsorsuutiginngisamik misilinneqarnerit

Maria aamma naatsorsuutiginngisaannarunakkaminik misilinneqarpoq. Inuppassuit Jiisusi oqaluussisoq tusareerlugu taanna malilerpaat — taassumali nammineq qatanngutai malinninngillat. Biibilimi ima allassimavoq: “Qatanngutaasaluunniimmi upperfiginngilaat.” (Johannesi 7:5) Qularnanngilaq Mariap taakku oqaluttuussimassagai inngilip qanoq oqarsimanera pillugu — tassa Jiisusi “Guutip erneranik” taaneqartoq. (Lukasi 1:35) Jaakulli Josefillu, Siimuup Juutarsillu Jiisusi angajumittut isigiinnarpaat. Tassa Mariap qanigisai upperisarsiornikkut assigiinngitsunik isumaqarput.

Taanna tamanna pissutigalugu nikallorpa neriuutaarullunilu? Naamerluinnaq! Ilaanni Jiisusi Galilæami oqaluussitilluni illut ilaannut neriartorpoq. Inuppassuit tusarnaarniarlugu katersuupput. Kikkut silataaniippat taanna ujarlugu? Maria Jiisusillu qatanngutai. Tassa Jiisusi ilaqutariit angerlarsimaffiata qanittuaniikkaangat Mariap taanna malittarpaa, meeqqanilu allat ilagisarsimannguatsiarpai, immaqa neriuutigalugu taakkua Jiisusimut isiginnittaasertik allanngortissagaat. — Matthæusi 12:46, 47.

Aamma illit ilaquttavit ilaat allat Jiisusimik malinnikkusunngitsut illit Jiisusimik malinninniarsuataarpit? Taamaappat nikalloqinak neriuutaaruteqinallu. Inuppassuit Mariap pisimaneratulli allannguisoqartinnagu ukiorpassuit ingerlaneranni naammagittarlutik ilaquttamik ilaannik kajumissaarisarsimapput. Guutip taamatut naammagittartoqartarnera pingaartingaarpaa, inuit isumaminnik allannguippata allannguinngikkaluarpataluunniit. — 1 Petrusi 3:1, 2.

Misilinneqaatit artornarnersaat

Biibilimi oqaluttuarineqartut naapertorlugit Mariap misilinneqarnera kingulleq  qularnanngitsumik misilinneqarnerisa annernarnersaraat. Taanna ernermi asasami inuiaqatiminit ajattugaareerluni naalliungaarluni toquneranik takunnittuuvoq. Qitornamik toqukkut annaasaqarneq allaaserineqarsimavoq “annaasaqarnerit annersaattut”, “toqukkut annaasaqarnerit ajornersaattut”, qitornaq qassinilluunniit ukioqaraluarpat. Ukiut qulikkaat tamatuma siorna siulittuutigineqartutut, Maria nammineq panamik kapineqartutut misigisimassaaq. — Lukasi 2:34, 35.

Taamatut naggataamik misilinneqarnini Mariap misigissutsikkut sapililissutigaa? Jehovamut uppernikilliva? Naagga. Mariap tullissaanik Biibilimi eqqaaneqarami Jiisusip ajoqersugai ‘qinusarnerminnik aalajangiusseqatigai’. Aamma kisimiinngilaq. Ernini allat angajuminnik upperinnikkiartulersimasut ilagai. Tamanna Mariamut tuppallersaataangaarsimassaaq! * — Apustilit Suliaat 1:14.

Mariap inuunera imaqarluarlunilu nalerisimaarnartuusimavoq, aamma nuliaallunilu anaanaasimavoq Guutimik mianerinnittoq. Anersaakkut pisuunnguallannartunik amerlasuunik misigisaqarsimavoq, aamma misilinneqarnerit atugarliuutillu qassiit anigorpai. Ilimaginngisatsinnik allanik ajornartorsiuteqalerutta imaluunniit ilaqutariinni ajornartorsiutit pissutigalugit isumakulukkutta, Mariap aalajaannera pinertuneralu ilinniarfigisinnaavavut. — Hebræerit 10:36.

Marialli pallorfigineqartarnera pillugu qanoq oqartoqarsinnaava? Biibilimi Mariamik oqaluttuat taassuminnga pallorfiginninnissamut pissutissaqalersitsippat?

[Quppernerup ataani ilanngussat]

[Qupp. 6-mi ungalusaq/​assiliartaq]

Jiisusi qatannguteqarsimava?

Aap, qatannguteqarsimavoq. Teologit ilaat taamaannginneraallutik tunngavilersuiniarsarisimagaluarput, iivangkiiliuni tamanna arlaleriarluni erseqqissumik allaatigineqaraluartoq. (Matthæusi 12:46, 47; 13:54-56; Markusi 6:3) Biibilimilli misissueqqissaartut Mariap allanik qitornartaarsimannginneranik isumaliutersuutinut tunngatillugu marlunnik erseqqissaapput. Siullermik, isumaliutersuutit taamaattut immikkut ittumik pissuteqartarput — tassa ajoqersuut kingusinnerujussuakkut pilersoq, Mariap inuunini naallugu niviarsiaajuarsimaneranik ajoqersuut, taperserniarlugu. Aappassaanik, isumaliutersuutit taakku misissoqqissaaraanni tunngaveqarluarneq ajorput.

Assersuutigalugu isumaqartoqarpoq ‘nukkat’ eqqartorneqartut tassaasut Jiisusip qatanngutissai — Josefip nuliaminit siullermit erneri — Biibilimik nutsikkani allani oqaaseq ‘qatanngutit’ atorneqarmat. Isuma tamanna tunngavissaqanngilaq, taamaassimassagaluarpammi Jiisusi inatsisit tunngavigalugit angajulliliatut Daavip kunngeqarfianik kingornussisinnaassanngikkaluarpoq. — 2 Samueli 7:12, 13.

Isumaliutersuummi allami nukkat eqqaaneqartut Jiisusimut illorisorineqarput, naak Allakkani Grækerisuuni taaguutit “nuka”, “illoq” aamma “eqqarleq” tamarmik immikkut oqaaseqartinneqaraluartut. Taamaattumik Biibilimik misissueqqissaartartoq Frank E. Gaebeleinip isumaliutersuutit teologiimut tunngasut taakku piviusorpalunnginnerarpai. Isummerporli ‘nukkat’ eqqaaneqartut qularnanngitsumik tassaasut Mariap Josefillu erneri taamaattumillu Jiisusip affarmik qatanngutai.

[Qupp. 7-mi ungalusaq]

Allamik upperisaqalernissaminut sapiissuseqarpoq

Maria ilaqutariinni juutiusuni inunngorpoq juutillu upperisaat malillugu inuulluni. Taanna illoqarfimmi najukkamini juutit pallorfiginnittarfiannut synagogimukartarpoq, aamma Jerusalemimiittumut naalaffimmukartarpoq. Marialli Guutip siunertaanik paasinninnerujartortilluni paasilerpaa siuaasami ileqqutoqaat Guutimit akuerisaajunnaartut. Juutit upperisarsiornikkut siuttuisa taassuma ernera, Missiarsi, toqutaatippaat. Taamatut pisoqannginnerani Jiisusi taakkununnga ima oqarsimavoq: “Illorsi ilissinnut qimagaassaaq inuerullugu.” (Matthæusi 23:38) Upperisaq Mariap perorsarneqarfia Guutimit pilluaqqusaajunnaarpoq. — Galatiamiut 2:15, 16.

Ilagiit kristumiut tunngavilerneqarmata Maria immaqa 50-it missaanni ukioqarpoq. Qanoq iliussava? Isummissava juutisut peroriartorsimagami siuaasami ileqqutoqaat ilumoorfigiuarumallugit? Allamik upperisaqalernissaminut utoqqaavallaalersimanerarpa? Naamerluinnaq! Mariap paasivaa maanna ilagiit kristumiut Jehovap pilluaqqugai, taamaattumillu allamik upperisaqalernissaminut uppissuseqarlunilu sapiissuseqarpoq.

[Qupp. 5-mi assiliartaq]

Egyptenimut qimaasut

[Qupp. 8-mi assiliartaq]

Anaanaasup misigisinnaasaasa ajornersaat