Ataqqinnittumik pissusilersornikkut Jehova ataqqiuk

„Ataqqinangaarsuseq alutornassuserlu atisaraatit [Jehova].“ — TUSSIAAT 104:1.

1, 2. (a) Oqaaseq „ataqqinassuseq“ qanoq nassuiassaviuk? (b) Apeqqutit suut allaaserisami matumani sammineqassappat?

MADISON qulinik ukiulik qinnuigineqarami oqaatsip ’ataqqinartup’ isumaa nassuiaqqullugu ingerlaannaq akivoq: „atisarissaartoq“. Niviarsiaqqap taassuma immaqa naluaa Guuti pillugu Biibilimi allassimasoq taassuma ’ataqqinangaarsuseq atisarigaa’. (Tussiaat 104:1) Inunnut tunngatillugu ataqqinassuseq, imaluunniit ataqqinninneq, atisarissaarnermut atassuserneqarsinnaavoq. Assersuutigalugu apustilip Paulusip kissaatigaa arnat kristumiut „isornaatsunik perroorniutaanngitsunillu atisaqassasut, nutsat eqqumiikajaamik kusassagaasut, kuultit sapanngallu atisalluunniit akisuut pinnagit“. (1 Timotheusi 2:9) Ataqqinnittumilli pissusilersorneq Jehovap ’ataqqinangaarsusianik alutornassusianillu’ ataqqinaatissiisoq atisarissaarnermuinnaq tunnganngilaq. — Jobi 40:10.

² Biibilimi hebræerit oqaasiat „ataqqinassuseq“-mik nutserneqartartoq aamma „alutornassuseq“-mik, „angingaarsuseq“-mik, „naalannassuseq“-mik „ataqqinaat“-millu nutserneqarsinnaavoq. Oqaatsinik qinerlerfissiaq naapertorlugu ataqqinassuseq tassaavoq „(arlaannut) naleqqulluarneq, qinngaqqunnanngissuseq“ aamma „ajunngissuseq, pitsaalluinnassuseq, akimaneq, nersornarneq“. Oqaatsit taakkua qilammi nunamilu Kisimi Oqartussaasup, Jehovap Guutip, inissisimaffianut tulluupput, allamillu taassumannga ataqqineqarnerunissamut nersorneqarnerunissamullu naleqqulluartoqanngilaq. Taamaattumik taassumunnga kiffaagatta tunniulluinnarsimasut oqaatsitsigut pissusilersornitsigullu ataqqinninnermik ersersitsisariaqarpugut. Sunaliuna inuit ataqqinnittumik pissusilersorsinnaannguutigisaraat? Jehovap ataqqinangaarsusia alutornassusialu qanoq takuneqarsinnaappat? Guutip ataqqinangaassusia uagutsinnut qanoq sunniuteqartariaqarpa? Allanik ataqqinnittumik pinninneq pillugu Jiisusip Kristusip sumik ilinniartissinnaavaatigut? Aamma qanoq ililluta kristumiutut ataqqinnittumik pissusilersorsinnaavugut?

Sooq inuit ataqqinnittumik pissusilersorsinnaasut

3, 4. (a) Ataqqinassusilerneqarnerput qanoq periarfigisariaqarparput? (b) Tussiaat 8:6-10-mi kina siulittuutigineqarpa? (Takuuk ilanngussaq.) (c) Kikkut itsaq Jehovamit ataqqineqarpat?

³ Inuit tamarmik Guuti assilillugu pinngortitaagamik ataqqinnittumik pissusilersorsinnaapput. Jehovap inuk siulleq ataqqinaatissippaa pinngortitarsuarmut nunarsuarmiittumut tunngatillugu akisussaaffilerneratigut. (1 Mosesi 1:26, 27) Jehovap inuit naammalluinnartuujunnaareeraluartut nunarsuarmut tunngatillugu akisussaaffeqarnerat oqaatigeqqippaa. Taamaalilluni Guuti inunnik suli ataqqinassusermik ’niaqorusiisarpoq’. (Atuaruk Tussiaat 8:6-10.) * Jehovap uagutsinnik  ataqqinassusiliinera ataqqinnittumik periarfigineqartariaqarpoq — tassa aqqa angingaartoq mianerinnilluta unnersiutigisariaqarparput.

⁴ Jehovap illernartumik imminut kiffartortut immikkut ataqqinassusilertarpai. Abeli ataqqinnittumik pivaa pilliutaanik akuerinninnermigut, taassumali qatanngutaata Kainip pilliutaa akueriumanngilaa. (1 Mosesi 4:4, 5) Mosesi peqquneqarpoq Josvamik, Israelikkunnut siulersuissatut imminik kingoraarsisussamik, ataqqinneqqullugu. (4 Mosesi 27:20) Daavip ernera Salomo pillugu Biibilimi ima allassimasoqarpoq: „Israelikkut tamarmik takkuanni [Jehovap] Salomo pissaanilissuanngortippaa tunillugulu kunngisut alutornassusermik [ataqqinassusermik, 1990] siornatigut Israelimi kunngiusartut piginngisaannarsimasaannik.“ (1 Nalunaarsuutit 29:25) Kristumiut tanitat makititaasimasut Guutip ’kunngeqarfiata alutornangaassusianik’ aalajaallutik oqaluussissutiginnissimasut, Jehovamit ataqqineqangaassapput. (Tussiaat 145:11-13) Jiisusillu ’savaatai allat’ amerliartuinnartut Jehovamit aamma ataqqineqarput, taassuminnga unnersiutiginninnermik immikkut pisinnaatitaaffilerneqarlutik. — Johannesi 10:16.

Jehovap ataqqinangaarsusia alutornassusialu

5. Jehova qanoq ataqqinangaarsuseqartigaa?

⁵ Guutip angingaassusiata inuillu suunngissusiata assigiinngissutaat ersersillugu tussiaasiortoq Daavi ima erinarsorpoq: „[Jehova] Naalagarput! Naalannangaarpoq aqqit nunarsuarmi tamarmi, illit alutornassutsinnik [ataqqinangaassutsinnik, NV] qilammut ivertitsisutit!“ (Tussiaat 8:2) Naassaanngilluinnartumik — ’qilaap nunallu’ pinngortinneqannginneranniilli Jehovap nunarsuarmut paratiisiusumut inuiannullu naammalluinnartunut siunertaata naammassineqarnissaata nuanningaartussap kingornata tungaanut — Jehova Guuti qilammi nunamilu Kisimi Oqartussaasuuvoq ataqqinangaarsuseqarnerpaallunilu alutornassuseqarnerpaaq. — 1 Mosesi 1:1; 1 Korinthimiut 15:24-28; Saqqummersitat 21:1-5.

6. Sooq tussiaasiortup Jehova ataqqinangaarsusermik atisaqarnerarpaa?

⁶ Tussiaasiortup Guutimik mianerinnittup unnuap allaaqqilluni ulloriarpassuallip nipaatsup angingaassusianik, qilammik ujaqqatut erlinnartuutitut ittunik uisorilasulimmik, qimerluuinini killinneqaatigisimassavaa. Jehovap ’qilammik tupertut siaarsisimanera’ tupigusuutigingaarlugu tussiaasiortup Jehova pinngortitsisinnaassusia asseqanngitsoq pillugu ataqqinangaarsusermik atisaqartutut oqaluttuaraa. (Atuaruk Tussiaat 104:1, 2.) Pinngortitsisup takussaananilu ajugaqanngitsup ataqqinangaarsusia alutornassusialu pinngortitaani takussaasuni erseqqilluinnarpoq.

7, 8. Jehovap ataqqinangaarsusianut alutornassusianullu uppernarsaatit suut qilammi takusarpavut?

⁷ Assersuutigalugu eqqarsaatigeriaruk galakse Qilaap Sillia. Avataarsuani tamatumani ulloriaqarlunilu planeteqarlunilu seqineqarfilimmi Nunarsuaq sioqqatut ataatsitut sissami naaffeqanngitsuusaamiittutut pingaaruteqanngippasitsigaaq. Galakse taannaannaq 100 milliardinik ulloriaqarpoq! Ulloq unnuarlu uninngivillutit sekundimut ulloriaq ataaseq kisittarlugu ullorissanik kisitsisuuguit, ullorissat 100 milliardit ukiuni 3000-inik sinneqartuni kisissagaluarpatit.

⁸ Qilaap Silliata galakseennaa 100 milliardinik ulloriaqarpat, taavami avataarsuata sinnerani qassinik ulloriaqassava? Ullorissanik ilisimatuut naatsorsorsimavaat Qilaap Silliata saniatigut 50 milliardit 125 milliardillu akornanni amerlassuseqartunik allanik galakseqarsinnaasoq. Avataarsuani tamarmi qassinik ulloriaqarpa? Amerlangaarmata apeqqummut tamatumunnga akissut paasisinnaanngilarput. Jehovalli „ullorissat qassiussusissaat aalajangerpaa tamaasalu immikkut aqqisigut taasarlugit“. (Tussiaat 147:4) Jehova ataqqinangaarsutsimik alutornassutsimillu taamatut atisisimasoq takugaangakku, aqqa angingaartoq unnersiutigerusulertarpaat, ilaa?

9, 10. Iffiaq Pinngortitsisup ilisimassuseqangaarneranut qanoq uppernarsaataava?

⁹ Qilannit angingaartunit inuussutissanut nalinginnaalluinnartunut nooriarta. Jehova tassaaginnanngilaq ’qilammik nunamillu pinngortitsisoq’; aammattaarli ’kaattunut nerisassiisarpoq’. (Tussiaat 146:6, 7) Guutip ataqqinangaarsusia alutornassusialu suliaani angingaartuni ersersinneqartarpoq; assersuutigalugu karreqartippaa iffiuutigineqarsinnaasunik. (Atuaruk Tussiaat 111:1-5.) Jiisusip ajoqersukkani ima qinunissaannik ilinniartippai: „Inuussutissatsinnik ullumi tunisigut.“ (Matthæusi 6:11) Itsaq inuiaat amerlanersaasa, aamma Israelikkut, iffiaq inuussutissaraat pingaarneq.  Iffiaq inuussutissatut pisariunngitsutut isigineqaraluarluni akuutissaalunnguit pingaarnerusut atorlugit iffianngortarnera mamartoq imaannaanngilluinnarpoq.

¹⁰ Biibilip allanneqarnerata nalaani Israelikkut qajuusat suaasiassalluunniit imilerlugit iffiuutigisarpaat. Ilaannikkut seernarsaat iffiornermi atorneqartarpoq. Akuutissat pingaarnerit taakkua tupaallannartumik amerlaqisunik kemiskiusunik atassuteqalersitsisarput imminnut sunniuteqartunik. Stoffit kemiskiusut taakku imminnut qanorpiaq atassuteqartarnerat ilisimaqqissaarneqanngilaq. Aammattaaq allamik imaannaanngitsumik tupinnartumillu pisoqartarpoq, tassa timip iffiamik aqajaqqumi uutsisarnera. Tupinnanngilaq tussiaasiortoq ima erinarsormat: „Amerlangaarput pinngortitatit, [Jehova]! Pinngortippatit tamaasa ilisimasuullutit.“ (Tussiaat 104:24) Aamma illit Jehova unnersiutigerusulertarpiuk?

Guutip ataqqinangaarsusia alutornassusialu ilinnut qanoq sunniuteqarpat?

11, 12. Guutip pinngortitarsuanik eqqarsaatiginneqqissaarneq uagutsinnut qanoq sunniuteqarsinnaava?

¹¹ Unnuakkut qilak tupigusuutiginiarlugu ullorissanik ilisimatuujusariaqarnataluunniit iffiartorneq nuannaarutiginiarlugu kemikeriusariaqanngilagut. Pinngortitsisulli angingaassusianik alutornassusianillu pingaartitsisinnaajumalluta assaasa piliaannik eqqarsaatiginneqqissaarnissamut piffissaqartariaqarpugut. Taamatut eqqarsaatiginneqqissaarneq uagutsinnut qanoq sunniuteqarsinnaava? Jehovap suliaanik allanik eqqarsaatiginneqqissaarnerup sunniutaatut sunniuteqartarpoq.

¹² Jehovap innuttami iluaqutissaannik suliai angingaartut pillugit Daavi ima erinarsorpoq: „Ataqqinangaarsutsit naalannassutsillu eqqartorpaat, tupinnartuliatit erinarsuutigissavakka [isumaliuutigissavakka, 1900].“ (Tussiaat 145:5) Suliaanik taakkuninnga eqqarsaatiginnittarluta ersersittarparput Biibilimik atuaqqissaartarnitsigut atuakkatsinnillu eqqarsaatiginninnissamut piffissaqartarnitsigut. Taamatut eqqarsaatiginneqqissaarneq qanoq sunniuteqartarpa? Guutip ataqqinangaarsusianik alutornassusianillu pingaartitsinerulertarpugut. Taava qularnanngilluinnartumik Daavitut Jehovamik unnersiutiginninnissamut killinneqassaagut imalu oqarluta: „Angingaarsutsit oqaluttuarissavara.“ (Tussiaat 145:6) Jehovap tupinnartuliaanik eqqarsaatiginneqqissaarneq Pinngortitsisumut attaveqarluarnerulissutigissavarput, aamma angorniorluta aalajangersimalluinnarlutalu taassuma allanut oqaluttuarinissaanut kajumississutigissavarput. Aallussilluarlutit nutaarsiassaq nuannersoq oqaluussissutigisarpiuk allallu Jehovap Guutip ataqqinangaarsusianik alutornassusianillu angingaartunik pingaartitsinissaannut ikiortarlugit?

Jiisusip Guutip ataqqinangaarsusia naammalluinnartumik ersersippaa

13. (a) Danieli 7:13, 14 naapertorlugu Jehovap ernini sumik tunivaa? (b) Guutip kunnginngortitaata, Jiisusip Kristusip, innuttani qanoq pisarpai?

¹³ Guutip ernerata, Jiisusip Kristusip, nutaarsiassaq nuannersoq aallussilluarluni oqaluussissutigaa Ataatanilu qilammiusoq angingaartoq ataqqinaatissillugu.  Jehovap ernituani immikkut ataqqinassusilerpaa „naalagaassusermik kunngiussusermillu“ tunillugu. (Atuaruk Danieli 7:13, 14.) Taamaakkaluartorli Jiisusi makitananilu mersernartuunngilaq. Kunngiuvorli misiginneqataasoq innuttami pisinnaasaasa killeqarnerannik paasinnittoq taakkuninngalu innimiginnillunilu ataqqinnittartoq. Jiisusip Guutip kunnginngortitaata inunnik naapitaminik, ingammik sussarineqanngitsunik asaneqanngitsunillu, qanoq pinnittarneranik oqaluttuaq ataaseq sammeriartigu.

14. Itsaq Israelimi pupissut qanoq isigineqarpat?

¹⁴ Itsaq pupissut amerlanertigut naalliunnaqisumik kigaatsuararsuarmik toqujartortarput. Napparsimasup avatai aajartuaartarput. Pupissumik ajorunnaarsitsinissaq toqusimasumik makititsinissatulli ajornakusoortigisutut isigineqarpoq. (4 Mosesi 12:12; 2 Kunngit 5:7, 14) Pupissut minguttuutut isigineqartarlutillu innuttaaqatigiinnit anisinneqartarput. Allat qanillileraangamikkit mianersoqqusillutik ima suaartartartussaapput: „Minguttuuvunga, minguttuuvunga!“ (3 Mosesi 13:43-46) Pupissoq uumagaluarluni toqungasutut ippoq. Rabbinerit nalunaarsugaat naapertorlugit pupissup inuit allat 2 meterisungajak ungasitsigisartussaasimavai. Upperisarsiornikkunngooq siuttup aalajangersimasup pupissoq ungasissumiikkaluartorluunniit takugaangamiuk qanilleqqunagu ujaqqanik milloortarsimavaa.

15. Jiisusip pupissoq naapitani qanoq pivaa?

¹⁵ Maluginiariarulli Jiisusi qanoq pinersoq pupissup ornimmani ajorunnaarseqqullunilu qinnuigimmani. (Atuaruk Markusi 1:40-42.) Jiisusip pupissoq peeqqunagu misiginneqatigalugulu ataqqinnittumik pivaa. Jiisusip takuaa inuk nallinnartoq iluaallatsinneqarnissaminik pisariaqartitsisoq. Jiisusi qamuuna attortippoq iliuuseqarnermigullu misiginneqataanini ingerlaannaq ersersillugu. Assani isaappai, pupissoq attorlugu ajorunnaarsillugulu.

16. Jiisusip allanik pinnittarnera qanoq ilinniarfigisinnaavarput?

¹⁶ Jiisusip Ataatami ataqqinassusianik ersersitsinera uagut taassumunnga ajoqersukkatut qanoq ililluta ilaarsinnaavarput? Ilaatigut inuit tamarmik — taakkua inissisimaffiat, peqqissusiat qassinillu ukioqarnerat apeqqutaatinnagu — naleqquttumik ataqqineqartariaqarnerat akueralugu. (1 Petrusi 2:17) Akisussaaffillit, soorlu uiusut, angajoqqaat utoqqaanertallu, isumassukkamik, taakkua imminut ataqqiuarnissaannut ikiorlugit, ataqqinnittumik pisarnissaat immikkut pisussaaffigaat. Biibilimi erseqqissarneqarpoq tamanna kristumiunut tamanut piumasaqaataasoq, imami allassimavoq: „Qatanngutigiittut asaqatigiillusi ungageqatigiigitsi, ataqqeqatigiigitsilu immissinnut akimorniullusi.“ — Romamiut 12:10.

Pallorfiginninnermi ataqqinnittumik pissuseqarneq

17. Jehovamik pallorfiginninnermut tunngatillugu ataqqinnittumik pissuseqarnissaq pillugu Biibili sumik ilinniarfigisinnaavarput?

¹⁷ Pallorfiginninnitsinnut tunngatillugu ataqqinnittumik pissuseqarnissarput immikkut eqqumaffigisariaqarparput. Oqaluussisartup oqaasii 5:1-imi allassimavoq: „Guutip illuanukaraangavit mianersorlutit pisarniarit.“ Mosesi Josvalu peqquneqarput nunami illernartumiikkaangamik aloqutitik peertassagaat. (2 Mosesi 3:5; Josva 5:15) Taamaaliortartussaapput ataqqinninnertik mianerinninnertilluunniit  ersersinniarlugu. Palasit Israelikkuusut ilupaassiassanik qarleqartartussaasimapput ’angutaassutiminnut assiaqutissaminnik’. (2 Mosesi 28:42, 43) Taamaalillutik palasit pilliivimmi kiffartoraangamik isornaatsuujuartarput. Palasip ilaqutaasa tamarmik pallorfiginninnermut tunngatillugu ileqqussatigut najoqqutassianik qutsissunik ataqqinassusermillu aalajangiusimanninnissartik pisussaaffigaat.

18. Jehovamik pallorfiginninnermi qanoq ililluta ataqqinninnermik ersersitsisarpugut?

¹⁸ Jehovamik pallorfiginnittuugatta inuunitsinni sutigut tamatigut ataqqinnittumik pissuseqartariaqarpugut. Ataqqineqarumagutta uagut nammineq ataqqinnittuusariaqarpugut. Ataqqinninnerput atisatut atisakkatut peertakkatullu qallikkut ittuinnaassanngilaq. Inuit takusinnaanngisaannut sorlanittariaqarpoq uummaterpullu — Guutip takusinnaasaa — ilusilersorlugu. (1 Samueli 16:7; Ussatit 21:2) Ataqqinninneq inuttut pissutsitsinnut ilaasariaqarpoq pissusilersornitsinnullu, isummatsinnut, allanut attaveqarnitsinnut, allaallu imminut qanoq isiginitsinnut sunniuteqartariaqarluni. Aap, oqaatsivut iliuuserisavullu tamarmik tamatigut ataqqinninnermik ersersitsisariaqarput. Pissusilersornitsinnut, isummatsinnut, atisalersoriaatsitsinnut isikkorissariaatsitsinnullu tunngatillugu apustilip Paulusip oqaasii ukua uummammiuliuppavut: „Sumilluunniit naakkiuffissiiniartanngilagut kiffartuutigisarput tusaamanerlunneqaleqqunagu. Tamatigulli Guutimit kiffarineqartutut takutinniartarpugut.“ (2 Korinthimiut 6:3, 4) „Guutip annaassisitta ajoqersuutaanut tamatigut [pinnersaataarusuppugut]“. — Titusi 2:10.

Kristumiutut ataqqinninnermik ersersitsiuarit

19, 20. (a) Qanoq ililluta allanik naleqquttumik ataqqinnissinnaavugut? (b) Pissutsitsinnut tunngatillugu suna aalajangiusimasariaqarparput?

¹⁹ Kristumiut tanitat, ’Kristusi sinnerlugu oqariartortitaasut’, ataqqinnittumik pissusilersortarput. (2 Korinthimiut 5:20) ’Savat allat’, ilumoorfiginnillutik taakkuninnga tapersersuisut, naalagaaffimmit Missiarsikkoortumit aallartitaapput naleqqulluartut. Aallartitaq naalakkersuisut sinniisuuffigisani sinnerlugit nakimaalluni ataqqinnillunilu oqaluttarpoq. Taamaattumik Guutip naalakkersuineranik, naalagaaffianik, illersuigaangatta ataqqinnilluta nakimanatalu oqaluttariaqarpugut. (Efesosimiut 6:19, 20) Aamma allat ’nalunaarummik nuannersumik aatsivigigaangatsigit’ ataqqisarpavut, ilaa? — Esaja 52:7.

²⁰ Guutip ataqqinangaarsusianik ersersitsisumik pissuseqarnitsigut taassuminnga ataqqinninnissarput aalajangiusimasariaqarparput. (1 Petrusi 2:12) Guutimik, pallorfiginninnermik uppeqatitsinnillu tamatigut ataqqinningaarta. Aamma qanortoq Jehovap, ataqqinangaarsusermik alutornassusermillu atisaqartup, imminik ataqqinnittumik pallorfiginninnerput nuannaarutigiliuk.

[Quppernerup ataani ilanngussaq]

Qanoq akissavit?

• Jehovap ataqqinangaarsusianik alutornassusianillu pingaartitsinerput uagutsinnut qanoq sunniuteqassava?

• Jiisusip pupissumik pinninnera sumik ilinniarfigisinnaavarput?

• Jehova qanoq ataqqisinnaavarput?

[Atuaqqissaarnermi apeqqutit]

[Qupp. 16-mi assiliartaq]

Jehovap qanoq ililluni Abeli ataqqivaa?

[Qupp. 18-mi assiliartaq]

Jehovap suliai angingaartut allaat iffiamut tunngatillugu ersertarput

[Qupp. 19-mi assiliartaq]

Jiisusip pupissumik pinninnera ataqqinninneq pillugu sumik ilinniarfigisinnaavarput?

[Qupp. 20-mi assiliartaq]

Ataqqinnittumik pallorfiginninneq Jehovamut ataqqinaataavoq