1. Imermut morsutsitaanissamut suut pissutaal­luarsin­naappat?

 JEHOVA, inuunermik ajunngitsorpas­suarnillu allanik ilinnut tunnius­sisimasoq, asaviuk? Asallugu takutik­kusuppiuk? Pitsaanerpaamik takutis­sinnaavat taassumunnga tunniul­luinnarnikkut imermullu morsutsitaanikkut. Taamaalioruit Jehovap ilaqutariissuanut ilaalissaatit. Tassa taassumannga pigineqaleravit Ataatatut Ikinngutitullu isumassus­savaatit aqqutis­siuullutillu. (Tuss 73:24; Es 43:1, 2) Tunniul­luinnarlutillu imermut morsutsitaaguit naassaan­ngitsumik inuunissamik neriuuteqalissaatit. – Pet 1. 3:21.

2. Allaaserisami matumani suna sammissavarput?

² Immaqa arlaannik peqquteqarlutit suli imermut morsutsitaasiman­ngilatit. Amerlasuut ilittut misigisaqarsimapput. Inuit millionillit imermut morsutsitaasin­naaqqullutik iliuutsimikkut eqqarsar­taatsimikkullu allannguisariaqarsimapput. Maannalu nuannaarlutik aallussil­luarlutillu Jehovamut kiffartorput. Kristumiut siulliit nalaanni imermut morsutsitaasimasut qanoq ilinniarfigisin­naavigit? Taakku qaanger­tariaqak­kaminnik sunik akornuteqarsimanersut qanorlu ilinniarfigisin­naanerigut sammissavarput.

SAMAARIAMIUT IMERMUT MORSUTSITAAPPUT

3. Samaariamiut imermut morsutsitaanis­saminnut suut akornutigisin­naavaat?

³ Samaariamiut Jiisusip nalaani upperisarsioqatigiiupput. Amerlanerit Judiiap avannaani, illoqarfiit Siikemmip Samaariallu qanittuanni, najugaqarput. Samaariamiut imermut morsutsitaasin­naaqqullutik Guutip oqaasia annertunerusumik ilisimaler­tariaqarpaat. Biibilip atuagartai siulliit tallimat, tassa Mosesimik allakkat, kisiisa immaqalu Josvamik allakkat Guutimeersuunerat akueraat. Guutilli neriorsuutaa Mosesimik allakkat tallimaat 18:18, 19-imilu allaatigineqartoq tunngavigalugu Missiarsip  tikiunnissaa ilimagaat. (Joh 4:25) Imermut morsutsitaaniarunik Jiisusip Missiarsiunera akuerisariaqarpaat. Samaariamiorpassuillu taamaaliorput. (Joh 4:39) Samaariamiut akornanni juutinut siumut isummius­sereerneq nalinginnaavoq, kristumiorpassuillu juutiummata ilagiinnut ilaaniarunik taamatut isiginnit­taaseqarun­naartariaqarput. – Luk 9:52-54.

4. Apustilit Suliaat 8:5, 6, 14-ilu naapertorlugit Fiilippip oqaluussinera Samaariamiut ilaannit qanoq qisuariarfigineqarpa?

⁴ Samaariamiut imermut morsutsitaanis­saminnut suna iluaqutigaat? Fiilippi iivangkiiliulersaartoq Kristusi pillugu oqaluussimmat Samaariamiut ilaasa Guutip oqaasiata ilumoornera upperilerpaat. (Apustilit Suliaat 8:5, 6, 14 atuakkit). Naak Fiilippi juutiugaluartoq itigartin­ngilaat. Immaqa Samaariamiut Guutip kinaassusersior­tuunngin­neranik Mosesimik allakkaniittut eqqaamasimavaat. (Mos 5. 10:17-19) Kristusi pillugu Fiilippip oqaasii tusarnaaq­qissaarpaat Guutimillu aallartitaaneranut uppernarsaatit ersaaril­luartut takusin­naallugit. Fiilippi aamma amerlasuunik tupinnar­tuliortarpoq, ilaatigut napparsimasunik ajorunnaarsitsisarluni anersaapilunnillu anisitsisarluni. – ApS 8:7.

5. Samaariamiut qanoq ilinniarfigisin­naavagut?

⁵ Samaariamiut Fiilippip juutiunera pissutigalugu imaluunniit ilinniar­titsissutai aatsaat tusaramikkit itigartis­simasin­naagaluarpaat. Taamaaliun­ngillalli. Samaariamiut Fiilippip ilinniar­titsissutaasa ilumoornerat qulakkeeramikku piumaataarnatik imermut morsutsitaapput. Biibilimi ima allassimavoq: “[Angutit] arnallu Fiilippi, Guutip kunngeqarfia aamma Jiisusip Kristusip atia pillugit nutaarsiassanik nuannersunik oqaluussisoq, upperileramikku imermut morsutsitaapput.” (ApS 8:12) Illit Guutip oqaasiata ilumoor­tuunera upperiviuk? Uppernarsinikuuiuk Jehovap Nalunaajaasuisa kristumiut ilumoortut ilisarnaataannik asaqatigiinnerat? (Joh 13:35) Taamaappat imermut morsutsitaanissat nangaas­sutigeqinagu. Ilimagil­luinnarsinnaavat Jehovap ikiussagaatit.

6. Ruben qanoq ilinniarfigisin­naaviuk?

⁶ Ruben Tysklandimeersoq ilaqutariinni Nalunaajaasuusuni peroriartorpoq. Taamaallunili Jehovap piviusuunera qularutigilerpaa. Qularnini qanoq qaangerpaa? Ilisimasakip­pallaarnini paasigamiuk aalajangerpoq iliuuseqarfiginiarlugu. Ima oqaluttuarpoq: “Nalorniun­naarumallunga atuaqqis­saarninni qularutiga misissoq­qissaar­tariaqarpara. Arlaleriarlunga pinngoriar­tuaarsimaneq pillugu misissueq­qissaar­tarpunga.” Atuagarlu Findes der en Skaber som interesserer sig for os? atuaramiuk uppernikkut nakussatsis­sutigeqaa. Eqqarsalerpoq: “Kaar, Jehova piviusuuvoq!” Taamaalluni qullersaqarfipput takornariarpaa. Uppernarsivaalu qanoq tupinnar­tigisoq Jehovap nunarsuaq tamakkerlugu inuit anersaakkut ilaqutariis­suartut ataatsimoor­tissinnaammagit. Rubenilu Tysklandimut angerlarami 17-inik ukioqarluni imermut morsutsitaavoq. Illit ilikkakkavit arlaannik qularisaqaruit tamanna iliuuseqarfigiuk atuagas­siaatitta misissoq­qissaar­nerisigut. Eqqoqqis­saartumik paasisimasaqalernikkut qularneq qaanger­neqarsinnaavoq. (Ef 4:13, 14) Aamma tusaraangakku Jehovap kiffaasa nunani allani asaqatigiinnerat ataasioqatigiin­nerallu piviusuusoq, illillu nammineq ilagiinni misigigukku, naleqar­tingaar­nerulissavat Jehovap nunarsuaq tamakkerlugu anersaakkut ilaqutariis­suaqarnera.

SAULUSI TAARSUSIMIU IMERMUT MORSUTSITAAVOQ

7. Saulusip eqqarsar­taatsini qanoq allanngor­tittariaqarpaa?

⁷ Saulusi Taarsusimiu eqqarsaatigeriaruk. Ilinniarluarsimasuuvoq juutillu akornanni qaffasissumik inissisimaf­feqarluni. (Gal 1:13, 14; Flp 3:5) Taamani juuterpassuit kristumiut  tunussisutut isigaat. Saulusillu kristumiut uumissorlugit malersugarivai. Isumaqaraluarpoq Guutip piumasaatut iliorluni, kukkulluin­narporli. (ApS 8:3; 9:1, 2; 26:9-11) Jiisusi upperilis­saguniuk imermullu morsutsitaassaguni eqqarsar­taatsiminik allannguerujus­suartariaqarpoq malersugaanissanilu piareersimaf­figisariaqarlugu.

8. (a) Saulusip imermut morsutsitaanis­saminut suna iluaqutigaa? (b) Apustilit Suliaat 22:12-16 naapertorlugit Ananiap Saulusi qanoq ikiorpaa? (Aamma asseq takuuk).

⁸ Saulusip imermut morsutsitaanis­saminut suna iluaqutigaa? Jiisusip qilammiit oqaluummani Saulusi qaamanersuarmit tappiil­lisinneqarpoq. (ApS 9:3-9) Ullut pingasut nerinanilu iminngilaq, pinngitsooranilu misigisani eqqarsaatigeq­qissaarsimassavaa. Aap, Saulusip Jiisusip Missiarsiunera kristumiullu Guutip piumasaanik iliortuusut upperil­luinnalerpaa. Steffaanusip toqutaanera iluarisimagamiuk ilerasuutigisimassaqaa! (ApS 22:20) Ullut pingasut qaangiummata ilinniartitap Ananiamik atillip Saulusi alakkarpaa. Tupinnar­tuliornikkut isigisaqaq­qissinnaatilerpaa asannit­tumillu kajumis­saarlugu piumaataarnani imermut morsutsitaanissaanut. (Apustilit Suliaat 22:12-16 atuakkit). Saulusi maniguulluni ikiorneqarumavoq nutaamillu inooriaaseqalerluni. – ApS 9:17, 18.

9. Saulusi qanoq ilinniarfigisin­naavarput?

⁹ Saulusip isiginnittaasia ilinniarfigil­luarsin­naavarput. Makitaneq inunnullu qununeq imermut morsutsitaanis­saminut akornutigisimasin­naagaluarpai. Taamaaliun­ngilarli. Kristusi pillugu ilumoortoq paasigamiuk maniguulluni inooriaatsini allanngor­tilluinnarpaa. (ApS 26:14, 19) Malersor­neqartus­saalluni nalunngik­kaluarlugu Saulusi kristumiun­ngorusuppoq. (ApS 9:15, 16; 20:22, 23) Imermut morsutsitaanerminiilli assigiin­ngitsunik misilin­neqarnissamini Jehovap ikiorumaaraani upperiuarpaa. (Kor 2. 4:7-10) Illittaaq Nalunaajaasun­ngorlutit imermut morsutsitaaguit ilimanarpoq uppernikkut misilin­neqassasutit. Ikiortis­saqarputilli! Ilimagil­luinnarsinnaavat Jehovap Jiisusillu ikiussaq­qaaraatsit. – Flp 4:13.

10. Anna qanoq ilinniarfigisin­naavarput?

 ¹⁰ Anna Europap Kangisissuani ilaqutariinni kurderiusuni peroriartorpoq. Anaanaa Nalunaajaasun­ngorpoq, Annalu qulingiluanik ukioqarluni Biibilimik misissuerusummat ataataata akueraa. Eqqarliisali najugaqataasa tamanna nuannarin­ngilaat. Siuaasamik upperisaat qimakkaangassuk kanngunar­torujus­suartut isigisarpaat. Annap aqqaneq-marlunnik ukioqarluni ataatani aperaa imermut morsutsitaasin­naanerluni. Ataataata paaserusuppaa nammineq aalajangigarineraa pinngitsaalineqar­nersorluunniit. Annap oqarfigaa: “Jehova asavara.” Imermullu morsutsitaanissaa ataataata akueraa. Tamatuma kingorna eqqarliisa Anna qinngasaar­tuarpaat ajortumillu pisarlugu. Taakkua ilaat allaat oqarpoq: “Nalunaajaasuunermit pitsaanerus­sagaluarpoq inuunerlut­tuuguit pujortar­tarlutillu.” Annap tamanna qanoq naammagalugu atorpaa? Ima oqarpoq: “Jehovap nakussatsit­tarlungalu ikiortarpaanga. Aamma anaanama ataatamalu tapersersorluar­tarpaannga.” Annap Jehovamit ikiorneqarnini malugigaangamiuk allattarpaa, atuaqqit­tarpaalu Jehovap qanoq ikiorsimaneraani puigorusun­nginnamiuk. Akerlilersor­neqarnissat annilaan­ngatigigukku eqqaamajuk Jehovap aamma illit ikiussaq­qaaraatit. – Hebr 13:6.

KORNIILIUSI IMERMUT MORSUTSITAAVOQ

11. Korniiliusip imermut morsutsitaanis­saminut suna akornutigisimasin­naagaluarpaa?

¹¹ Korniiliusi pingaarutilimmik ilinniarfigisin­naavarput. Romamiut sakkutuuinut 100-nut naalagaavoq. (ApS 10:1) Tassa angutaavoq pissaanilik inuiaqatigiinni qaffasissumik inissisimaf­feqartoq. Biibilimi aamma oqaluttuarineqarpoq ‘upperluartuusoq piitsunullu amerlasuunik tunissuteqartartoq’. (ApS 10:2) Jehovap apustili Petrusi Korniiliusimut aallartippaa nutaarsiassanik nuannersunik tusarleeq­qullugu. Korniiliusip qaffasissumik inissisimaf­feqarnini pissutigalugu imermut morsutsitaanissani nangaas­sutigaa?

12. Korniiliusip imermut morsutsitaanis­saminut suna iluaqutigaa?

¹² Korniiliusip imermut morsutsitaanis­saminut suna iluaqutigaa? Biibilimi allassimavoq ‘illuaniittullu tamarmik Guutimik mianerin­nittuusut’ aamma Korniiliusi ‘Guutimut qamannga pisumik qinukulasartoq’. (ApS 10:2) Petrusimit pulaarneqar­nerminni nutaarsiassat nuannersut paasigamikkit Korniiliusip ilaqutaasalu Jiisusi upperilerpaat imermullu morsutsitaallutik. (ApS 10:47, 48) Ilaqutariittut Jehova guutisiorfiginias­sagamikku Korniiliusi kajumilluni pisariaqartunik allannguivoq. – Jos 24:15; ApS 10:24, 33.

13. Korniiliusi qanoq ilinniarfigisin­naavarput?

¹³ Korniiliusip qaffasissumik inissisimaf­feqarnini kristumiun­ngornis­saminut akornutigisimasin­naagaluarpaa. Kisianni Saulusitulli taamaaliunngilaq. Illimmi, imermut morsutsitaasin­naaqqullutit allannguerujus­suartariaqarpit? Taamaappat nalussanngilat Jehovap ikiorusukkaatit. Kiffartorfiginissaa Biibilimilu najoqqutassiat maleruar­nissaat aalajangiukkukkit pilluaq­qussavaatit.

14. Tsuyoshi qanoq ilinniarfigisin­naavarput?

¹⁴ Tsuyoshi Japanimi najugalik imermut morsutsitaassaguni suliffimminut tunngatillugu allannguisariaqarpoq. Naasunik eqqumiitsuliornermik ilinniarfimmi tusaamasaal­luartumi, Ikenobomi, ilinniar­titsisuunermut ikiortaavoq. Ilinniar­titsisuuneq ilaannikkut ilisinernut naasunik piareersaasarpoq buddhistillu ileqqulersuutaannut peqataasarluni. Ilinniar­titsisuuneq pisinnaan­ngikkaangat Tsuyoship taartaalluni isumagisarpai. Tsuyoshilli toqu pillugu ilumoortoq ilikkaramiuk paasivaa buddhistit ileqqulersuutaannut peqataasin­naanani. Imermullu morsutsitaasin­naaqqulluni  aalajangerpoq peqataaq­qinniarnani. (Kor 2. 6:15, 16) Tamanna pillugu ilinniar­titsisuuneq oqaluttuuppaa. Qanoq kinguneqarpa? Buddhistit ileqqulersuutaannut peqataan­ngikkaluarluni suliffim­miiginnarsinnaavoq. Biibilimik misissuiler­nermiit ukioq ataaseq qaangiummat imermut morsutsitaavoq. a Illit Jehova nuannaar­tikkumallugu suliffinnut tunngatillugu allannguisariaqaruit nalussanngilat taassuma ilaquttatillu isumassorumaaraasi. – Tuss 127:2; Mat 6:33.

KORINTIMIUT IMERMUT MORSUTSITAAPPUT

15. Korintimiut imermut morsutsitaanis­saminnut suna akornutigisimasin­naagaluarpaat?

¹⁵ Itsaq Korintimi pigisalerituneq inuunerlunnerlu nalingin­naapput. Korintimiut ilarpassui Jehovap iluarin­ngisaanik inooriaaseqarput. Tupinnanngilaq pissutsini taamaattuni inuugaanni Jehovamut kiffartulerneq sapernarsin­naasimassasoq. Paulusilli Korintimiitilluni nutaarsiassat nuannersut oqaluus­sissutigimmagit Korintimiorpassuit “tusartut uppertun­ngorput imermullu morsutsitaallutik”. (ApS 18:7-11) Tamatuma kingorna Jiisusip Paulusi takorluuisillugu saqqummerfigaa ima oqarfigalugu: ‘Illoqarfimmi maani uannut uppertun­ngortussat amerlapput.’ Taamaattumik Paulusi ukioq ataaseq affarlu oqaluus­silluni tassaniiginnarpoq.

16. Korintimiut imermut morsutsitaanis­saminnut suna iluaqutigaat? (Korintimiunut 2. 10:4, 5)

¹⁶ Korintimiut imermut morsutsitaanis­saminnut suna iluaqutigaat? (Korintimiunut 2. 10:4, 5 atuakkit). Guutip oqaasianit anersaavanillu illernartumit pissatsin­neqarlutik inooriaatsiminnik allannguerujus­suarput. (Hebr 4:12) Korintimiut ilaat imerajut­tuusimagaluarput, pinerlut­tuusimagaluarput suiaqatiminnillu atoqateqar­tartuusimagarluarlutik. Kristusili pillugu tusarliussaq nuannersoq paasigamikku taamatut inooriaaseqarun­naarput. – Kor 1. 6:9-11. b

17. Korintimiut qanoq ilinniarfigisin­naavagut?

¹⁷ Korintimiut ilaat akiugas­saminnik sivisuumik ileqqupalaaqarsimagaluarlutik isummin­ngillat kristumiun­ngorsin­naanatik. Allannguerujus­suarlutik naassaan­ngitsumik inuunissamut aqqutikkut nerukitsukkut ingerlaniarlutik tamaviaarput. (Mat 7:13, 14) Illit imermut morsutsitaanissamut piukkunarsar­niarninni ileqqupalaamik qaangeruminaatsitannik akiugaqarpit? Taava tunniutiin­naqinak! Jehova qinnuigiuaruk  anersaava illernartoq ilinnut tunniuteq­qullugu. Ajortulior­nissamut ussernar­torsiulissaguit nakkaan­nanngin­nissamut pissatsin­neqassaatit.

18. Monika qanoq ilinniarfigisin­naavarput?

¹⁸ Monika Georgiameersoq imermut morsutsitaarusuppoq. Kisianni ileqqorilersimavaa oqaasipilunneq kristumiunullu tulluan­ngitsut aliikkutarisarlugit. Ileqqupalaaqarun­naarnissani ilungersunartippaa. Ima oqaluttuarpoq: “Inuusut­tuaraaninni Jehovamut qinuneq nakuussutigisaqaara. Jehovap nalunngilaa eqqortuliorusuttunga, siulersorlungalu ikiortuarpaanga.” Monika 16-inik ukioqarluni imermut morsutsitaavoq. Illit Jehovap iluarisaanik inooriaaseqaq­qullutit unitsit­tariaqakkannik ileqqoqarpit? Allannguinissannut pissatsin­neqarnissat qinnutigiuaruk. Ilimagil­luinnarsinnaavat Jehovap tukkorluni anersaani illernartoq ilinnut tunniuk­kumaaraa. – Joh 3:34.

UPPERSUSEQARUIT QAQQAT NUUTSIS­SINNAAVATIT

19. Ajornar­torsiutit qaqqarsuartut ittut qanoq qaangersin­naavigit? (Aamma asseq takuuk).

¹⁹ Nalussanngilat Jehovap asangaaraatit imermullu morsutsitaanissat ilaqutariis­sortaminullu ilaalernissat kissaatigigaa. Taamaalior­nissannut akornutaasinnaasut qaangeruminaap­pasikkaluartut ikiorniarlutit piareersimavoq. Jiisusip ilinniartitami ilaat oqarfigai: “Siinuppip inerittussaatut mikitigisutut uppersuseqarussi qaqqaq una oqarfigisin­naassavarsi: ‘Uanngaanniit uunga nuugit’, taava nuussaaq, ilissinnullu sumilluunniit ajornar­toqassanngilaq.” (Mat 17:20) Ilinniartitat ukiualuinnaat Jiisusi najorsimagamikku uppernertik suli nakussatsit­tariaqarpaat. Jiisusilli neriorsorpai upperlualerunik Jehova ikiortigalugu akornutaasut qaqqarsuartut ittut qaangersin­naagaat. Illittaaq taamaalior­nissannut Jehovap ikiussavaatit!

20. Itsaq nalitsinnilu kristumiut allaaserisami eqqaaneqartut sunissamut kajumis­sissutigaagit?

²⁰ Imermut morsutsitaanissannut arlaannik akornutis­saqaruit qaanger­niarlugu iliuuseqapallagit. Itsaq nalitsinnilu kristumiut maligas­saalluartut qiimmas­saatigisin­naavatit ingerlariaq­qinnissannullu nakussatsis­sutigalugit. Jehovamut tunniul­luinnar­nissannut imermullu morsutsitaanissannut kajumis­sissutigilersin­naavatit. Tassa inuuninni aalajangigassat pitsaanerpaaq!