1. Ullumikkut inuit alianartut suut atugaraat?

JEHOVAP inuit naalliunnissaat, sanngiillinissaat utoqqalinissaallu kissaatiginngisaannarsimavaa. Angutit arnallu paratiisimi naammalluinnartumik peqqissuseqarnerminnik nuannaarutiginninnissaat siunertaraa. Maannali “pinngortitat tamarmik suli peqatigiillutik anersaarulullutillu [nimaarput]”. (Rom 8:22) Ajortip kingunerinik alianartunik inuit naalliuutiginninnerannut Guuti qanoq misigissuseqarsoraajuk? Utoqqarpassuit ikiorneqarnissaminnik pisariaqartitsinerpaaffimminni sumiginnarneqartarnerat takullugu alianarpoq. — Tuss 39:6; 2 Tim 3:3.

2. Sooq kristumiut ilagiinni utoqqartaqarnertik qujamasuutigingaarpaat?

² Jehovap innuttaasa ilagiinni utoqqartaqarnertik qujamasuutigaat. Ilisimassusiat iluaqutigalugulu uppernermut tunngatillugu maligassiuinerat ilaarusupparput. Utoqqaat taakku asanartut amerlanertigut ilagiinniittunik ilaqutaqartarput. Qatanngutinik utoqqarnik ilaqutaqarutta ilaqutaqanngikkaluaruttaluunniit utoqqaat isumassorluarneqarnissaat qulakkeerusupparput. (Gal 6:10; 1 Petr 1:22) Guutip utoqqarnut qanoq isiginnittaaseqarneranik misissuineq tamatta iluaqutigissavarput. Utoqqartatsinnik asasatsinnik isumassuinermut tunngatillugu ilaqutaasut ilagiinniittullu qanoq akisussaaffeqarnerat aamma sammissavarput.

3, 4. (a) Tussiaat 71-imik allattup Jehovamut suna qamannga pisumik qinnutigaa? (b) Utoqqaat ilagiinniittut Guutimut suut qinnutigisinnaavaat?

³ Tussiaat 71:9-mi ima allassimavoq: “Ilinnit igeqinanga utoqqaliguma,  qimaqinanga nukeerutileruma.” Daavip oqaatsit taakku allassimagunarpai. Inuunini tamaat Guutimut kiffartorlunilu sulianut annertuunut Jehovamit atorneqarpoq. (1 Sam 17:33-37, 50; 1 Kng 2:1-3, 10) Daavi Jehovamut kiffartornermi iliuuseqangaarnikuugaluarluni utoqqaligami Jehovamit isumassorneqarsinnaanerluni aperisariaqartutut misigivoq. — Tussiaat 71:17, 18 atuakkit.

⁴ Ullumikkut inuppassuit Daavitut atugaqarput. Utoqqaliartoraluarlutik ‘ullunilu ajortuni’ inuugaluarlutik Guutimik unnersiutiginninnermi sapinngisaminnik iliuuseqartarput. (Oqal 12:1-7) Amerlanerit siornatigutut, allaat oqaluussinermi, iliuuseqartigisinnaanngillat. Pilluaqquneqartuaqqullutilli isumassorneqartuaqqullutillu Jehovamut kimigiisersinnaapput. Utoqqaat aalajaatsut taakkua Guutip qinnutiminnik akisiumaarnera qularinngilluinnarsinnaavaat. Tamanna nalunngilarput Jehovap Daavi isumassarsisinneratigut tamatumunnga tunngatillugu pissutissaqarluartumik isumakuluutit pillugit qinutimmagu.

5. Jehovap utoqqaat aalajaatsut qanoq misigissuseqarfigai?

⁵ Jehovap utoqqaat aalajaatsut pingaartingaarlugillu kiffaminit ataqqineqarnissaat piumasaraa. (Tuss 22:25-27; Uss 16:31; 20:29) Mosesimik allakkat pingajuanni 19:32-mi ima allassimavoq: “Qeersuut nikuiffigissavatit utoqqaallu ataqqillugit. Guutit mianerissavat. Uanga tassaavunga Naalagaq!” Aap, taamani oqaatsit taakku allanneqarmata ilagiinni utoqqaat ataqqineqarnissaat akisussaaffiuvoq pimoorunneqartussaq, ullumikkullu suli taamaappoq. Taakkuninngali isumassuinissaq kikkut akisussaaffigaat?

6. Jiisusi anaanaminik isumassuinermigut qanoq maligassiuilluarpa?

⁶ Guutip oqaasiani ima allassimavoq: “Ataatat anaanallu ataqqikkit!” (2 Mos 20:12; Ef 6:2) Peqqussutip tamatuma pingaaruteqassusia Jiisusip farisiiarit allakkanillu ilisimasut, angajoqqaaminnik isumassuiumanngitsut, assuarigamigit ersersippaa. (Mark 7:5, 10-13) Jiisusi nammineq maligassiuilluarpoq. Allaat nappakkami anniartitaaffimmiitilluni anaanani uillarninngorsimagunartoq isumassorpaa. Ikinngutiminit asasaminit ajoqersukkaminillu Johannesimit isumassorneqarnissaa qulakkeerpaa. — Joh 19:26, 27.

7. (a) Paulusip ilaqutariinnut tunngatillugu najoqqutassiaq suna eqqaavaa? (b) Paulusip aamma suna eqqartorpaa?

⁷ Apustilip Paulusip kristumiut ilaquttaminnik isumassuisariaqarnerat Timotheusimut allakkamini ersersippaa. (1 Timotheusi 5:4, 8, 16 atuakkit). Kikkut ilagiinniittunit aningaasaqarnikkut ikiorserneqarsinnaanerat eqqartoramiuk najoqqutassiaq taanna eqqaavaa. Paulusi allappoq qitornaasut, ernutaasut ilaqutaasullu allat kristumiut utoqqarnik uillarnernik isumassuinissaminnut pingaarnertut akisussaaffeqartut. Taamaalilluni ilagiit pisariaqanngitsumik nanertuuserneqassanngillat. Ullumikkuttaaq ilaquttavut pisariaqartitaannik tunisarnerisigut Guutimik asanninnerput uppernarsartarparput.

8. Sooq angajoqqaanik utoqqalisimasunik isumassuineq pillugu Biibilimi aalajangersimasumik malittarisassiaqanngila?

⁸ Qitornaasut inersimasut angajoqqaaminnik pigisatigut isumassuinissartik akisussaaffigaat. Paulusip ilaqutaasunik ‘uppertunik’ ikiuineq eqqartorpaa, angajoqqaalli kristumiut ilagiivinut ilaasortaanngitsut sumiginnarneqartussaanngillat. Ilaqutariit tamarmik assigiinngitsunik atugaqartarmata isumassuinermut tunngatillugu tamarmik assigiinngitsunik aalajangigaqartartussaapput. Inuit ataasiakkaat peqqissusaat, pisariaqartitaat kinaassusaallu assigiinngitsuupput. Utoqqaat ilaat amerlasuunik ilaallu ataasiinnarmik qitornaqarput. Ilaat pisortanit  tapersiissutinik pisartagaqarsinnaapput, allat pisartagaqarsinnaanngillat. Inuit isumassorneqarnissaminnik pisariaqartitsisut tamarmik kajungerisaat assigiinngitsuupput. Qatanngutitta ilaquttaminnik utoqqalisimasunik isumassuiniartut isumassueriaasiannik isornartorsiuineq silatusaarnerunanilu asannittuliornerunngilaq. Jehovap aalajangiinerit suulluunniit Biibilimik tunngaveqartut pilluaqqusarpai. Aalajangiinivut kinguneqarluartissinnaavai, soorlu itsaq innuttaminut tunngatillugu taamaaliortarsimasoq. — 4 Mos 11:23.

9-11. (a) Qatanngutit ilaat sapernartumik qanoq aalajangiisariaqalersinnaappat? (Allaaserisap aallaqqaataani assiliaq takuuk). (b) Sooq qitornaasut inersimasut piffissaq tamaat kiffartornermik unitsitsiniarlutik tuaviupiluullugu aalajangernaveersaassappat? Assersuuteqarit.

⁹ Angajoqqaat qitornaasullu imminnut ungasillutik najugaqaraangata angajoqqaat utoqqalisimasut pisariaqartumik ikiornissaat sapernarsinnaasarpoq. Qitornaasut angajoqqaatik — orlusoqarsimanera, saanermik napisisoqarsimanera allamilluunniit pinartumik ajornartorsiuteqalernera pissutigalugu — tassanngaannaq tikeraartariaqalersinnaavaat. Tamatuma kingorna angajoqqaat piffissami sivikitsumi imaluunniit allaat sivisuumi ikiorneqarnissartik pisariaqartissinnaavaat. *

¹⁰ Piffissaq tamaat kiffartortut nunagisaminnit ungasissumi suliassinneqarsimasut sapernartumik aalajangigassaqalersinnaapput. Betelimi kiffartortut, ajoqersuiartortitat nakkutilliisullu angalasartut suliassartik Jehovamit pilluaqqussutitut tunissutitullu erlinnartutut isigaat. Taamaakkaluartorli angajoqqaatik napparsimalerpata immaqa ima qisuariaqqaassapput: ‘Angajoqqaavut isumaginiarlugit suliarput qimallugu angerlartariaqarpugut.’ Angajoqqaalli sunik pisariaqartitsinerannik imaluunniit kissaateqarnerannik qinunikkut eqqarsaatiginneqqissaarneq silatusaarnerussaaq. Kinaluunniit Jehovamit suliassiissutigineqartumik unitsitsipallannaveersaartariaqarpoq, unitsitsinissaq tamatigut pisariaqarneq ajormat. Imaassinnaava piffissami sivikitsumi peqqiilliuuteqassasut? Qitornaasut suliaminnik ingerlatitsiinnarniassammata angajoqqaajusut ilagiiviniittut ilaasa utoqqarnik ikiuinissartik nuannaarutigisinnaavaat? — Uss 21:5.

¹¹ Aappariit utoqqaat Japanimiut marlunnik, nunani allani kiffartortunik, ernillit assersuutigeriartigit. Ernerisa aappaat Amerikami Kujallermi ajoqersuiartortitaavoq, aappaalu Brooklynimi, New Yorkimiittumi, qullersaqarfimmi kiffartorpoq. Ernerusut angajoqqaatik ikiorneqarnissaminnik pisariaqartitsilermata qanoq iliuuseqartoqarsinnaanera paasiniarlugu nuliatillu tikeraarpaat. Aappariit ajoqersuiartortitaasut suliartik unitseriarlugu angajoqqaaminnik isumassuiartornissartik eqqarsaatigeqqissaalerpaat. Angajoqqaajusulli ilagiivini utoqqaanertanit sianerfigineqarput. Utoqqaanertat angajoqqaajusut pissutsit atugaat eqqartoreerlugit ajoqersuiartortitat sapinngisamik sivisunerpaamik suliaminnik ingerlatsinissaat kissaatigaat. Aappariit kiffartornerat qujamasuutigalugulu taakkua angajoqqaavinik isumassuinissamik neqeroorput. Takorlooruk ilaqutaasut tamarmik utoqqaanertat asannillutik ikiuinerat qanoq qujamasuutigitigisimassagaat!

12. Utoqqaat pisariaqartitaannik isumaginninnissamut tunngatillugu aalajangiinermi kristumiut ilaqutaasut suna qulakkeertariaqarpaat?

¹² Kristumiut ilaqutaasut angajoqqaamik utoqqalisimasut pisariaqartitaannik isumaginninniarlutik aalajangigaat suugaluartulluunniit Guutip aqqanut ataqqinaataanissaat kikkut tamarmik qulakkeertariaqarpaat. Jiisusip nalaani upperisarsiornikkut siuttut assigerusunngilluinnarpavut. (Matt 15:3-6) Akerlianik Jehovamik ilagiinnillu ataqqinarsisitserusuppugut. — 2 Kor 6:3.

13, 14. Ilagiinniittut utoqqartaminnik isumaginnittarnissaat Biibilimi qanoq ersersinneqarpa?

¹³ Ilagiit ilaat siornatigut eqqaaneqartutut piffissaq tamaat kiffartortunik ikiuisinnaanngillat. Biibilimili ersersinneqarpoq ilagiinniittut utoqqarnik aalajaatsunik sapinngisartik tamaat ikiuiniartassasut. Ukiuni hundredini siullerni Jerusalemimi ilagiinniittuni “ajorsartoqanngilaq”. Tamannali ilagiinniittut tamarmik pisuujunerannik isumaqanngilaq. Ilaat pissakilliortuusimagunarput, ‘ataasiakkaalli pisariaqartitsinerat naapertorlugu agguaasoqartarpoq’. (ApS 4:34, 35) Kingusinnerusukkulli ilagiinni ajornartorsiuteqartoqalerpoq. Uillarnerit ilaat “ullut tamaasa” agguaanneqartartunik tunineqarneq ajorput. Apustilit qanoq iliorpat? Uillarnerit assigiimmik pineqarniassammata naammattumillu nerisassanik tunineqartarniassammata angutit akisussaassuseqartut suliassippaat. (ApS 6:1-5) Ukiumi 33-mi piinsip nalaani nunanit allanit tikeraarpassuit kristumiunngorput uppernikkullu nakussatsinneqarniarlutik Jerusalemimiiginnarlutik. Nerisassanik agguaasarneq utaqqiisaarutaannaagaluartoq apustilit aalajangiussaannit erserpoq ilagiit qatanngutit utoqqaat aalajaatsut pisariaqartitaannut tunngatillugu ikiuussinnaasut.

¹⁴ Kristumiut uillarnerit timikkut pisariaqartitaannik matussusiinissamut qaqugukkut ilagiit ikiuunnerat naleqquttuussanersoq Paulusip Timotheusimut nassuiarpaa. (1 Tim 5:3-16) Iliarsunnik, uillarnernik annikilliuuteqartunillu allanik isumaginninnissamut kristumiut akisussaaffeqarnerat Jaakup isumassarsisitaalluni allaatigaa. (Jaak 1:27; 2:15-17) Apustili Johannesi aamma ima nassuiaavoq: “Nunap piinik peqartup qatanngutini ajorsartoq isigigaluarlugu uummatini taassumunnga matuppagu, taava qanoq ililluni Guutip asanninnera taassumaniittuarsinnaava?” (1 Joh 3:17) Taamaattumik kristumiut ataasiakkaat pisariaqartitsisunik isumaginninnissaminnut akisussaaffeqarmata ilagiinniittut tamarmik taamaaliornissamut akisussaaffeqarput.

15. Qatanngutinik utoqqarnik ikiorneqartariaqartunik isumassuinermi suut sunniuteqarsinnaappat?

¹⁵ Nunat ilaanni utoqqaat utoqqalinersiutinik aaqqiissutinillu allanik pisortanit pisartagaqarsinnaapput. (Rom 13:6) Nunani allani aaqqiissutit taamaattut pisartagarineqarsinnaanngillat. Taamaattumik pissutsit atugarineqartut ilaqutaasut ilagiinniittullu qanoq isumassuitiginiarnerannut aalajangiisuusarput. Qitornaasut uppertut angajoqqaaminnit ungasissumi najugaqarnerat angajoqqaaminnik qanoq ikiuisinnaatiginerannut  sunniuteqarsinnaavoq. Ilaqutaasut atugaat kikkunnit tamanit paasineqarsimanerat qulakkeerniarlugu qitornaasut angajoqqaamik ilagiivini utoqqaanertaasut attaveqaqatigisariaqarpaat. Assersuutigalugu utoqqaanertat angajoqqaajusut pisortanit qanoq ittunik ikiorsiissutinik pisartagaqalersinnaanerminnik paasiniaaneranni ikiorsinnaavaat. Imaassinnaavoq qitornaasut ilisimasariaqagaannik, soorlu angajoqqaat allakkanik pingaarutilinnik ammaajuaannarnerannik nakorsaatitortuaannarnerannilluunniit, nakkutiginnissinnaasut. Qitornaasut utoqqaanertallu unneqqarissumik paasiuminartumillu attaveqaqatigiittarunik pitsaasunik aaqqiissuteqarsinnaalissapput. Ilaqutaasunik ungasissumi najugalinnik ikiuisinnaasoqarpat siunnersuisinnaasoqarpallu pissutsit ajornerulitsaalineqarsinnaallutillu ilaqutaasut ernumavallaarunnaarsinneqarsinnaapput.

16. Kristumiut ilaasa utoqqaat ilagiinniittut qanoq ikiortarpaat?

¹⁶ Kristumiut ilaasa utoqqaat asagamikkit piffissartik nukitillu sapinngisaminnik ikiuinissaminnut atortarpaat. Ikiukkatik namminneq ilaquttamittut pisarpaat. Ilagiinniittut ilaat paarlakaajaallutik utoqqarnik ikiuisarput. Qatanngutit taakkua isumassuisut piffissaq tamaat kiffartorsinnaanngikkaluarlutik qitornaasut suliaminnik ingerlatsiinnarnissaannut ikiortarpaat. Qatanngutit taamaattut ajunngilluinnartumik isiginnittaaseqarput! Soorunami ilagiinniittut qanorluunniit ikiuitigigaluarpata qitornaasut sapinngisaminnik angajoqqaaminnik ikiuinissaminnut akisussaaffeqarput.

17, 18. Sooq utoqqaat isumassuisullu isiginnittaasiat pingaaruteqarpa?

¹⁷ Utoqqaat taakkuninngalu isumassuisut ajunngitsumik isiginnittaaseqartuarnermikkut pissutsit artornartut atoruminarnerulersissinnaavaat. Utoqqaat ukioqqortusiartornertik pissutigalugu nikallungalersinnaallutillu isumatsaqqalersinnaapput. Taamaattumik qatanngutit utoqqaat ataqqiniarlugit tuppallersarniarlugillu immikkut iliuuseqartoqartariaqarsinnaavoq. Qanoq taamaaliorsinnaavit? Nuannersut pillugit oqaloqatiginiartuarnerisigut. Utoqqaat taakku asanartut Jehovamut aalajaattuarsimanertik pillugu nersualaarneqartariaqarput. Jehovap imminerminut kiffartornerminni iliuuserisimasaat puiorsimanngilai, uaguttaaq puiunngilavut. — Malaki 3:16; Hebræerit 6:10 atuakkit.

¹⁸ Ulluinnarni suliassat naammassiuminarnerulissapput kikkut tamarmik ikasalaartarunik. (Oqal 3:1, 4) Utoqqaat amerlasuut aamma sapinngisaminnik piumasaqarpallaarnaveersaartarput. Nassuerutigaat inussiarnersuunermikkut maluginiarneqarnerussallutillu pulaarneqarnerussallutik. Utoqqarnut pulaartut amerlasuut ima oqarajupput: “Utoqqartarput tuppallersariartorlugu pulaarakku anivunga tuppallersarneqarsimasutut misigalunga.” — Uss 15:13; 17:22.

19. Ulluni artornartuni inuusuttut utoqqaallu suna iluaqutigisinnaavaat?

¹⁹ Utoqqaliartortarunnaarnissarput, anniaateqartarunnaarnissarput naammalluinnartunngornissarpullu qilanaaraarput. Tamakkuli nalliutserlugit Guutip innuttaasa naassaanngitsumik inuuneqalernissamik neriuutertik eqqaamajuartariaqarpaat. Guutip neriorsuutaanik upperinninnerput ulluni artornartuni nukittussutigisarparput. Uppersuseqaratta “nikallunngilagut, naammi inuuserput qalleq aseroriartoraluartillugu ilorleq ullut tamaasa nutaanngoriartorpoq”. (2 Kor 4:16-18; Hebr 6:18, 19) Utoqqarnik isumassuinissamik akisussaaffillit suut allat iluaqutigisinnaavaat? Siunnersuutitsialaat allaaserisami tulliuttumi sammineqassapput.