1. Inuit amerlanersaat inussiaataaneq pillugu qanoq eqqarsartarpat, inussiaataanerlu Romamiunut allakkani 6:22-mi eqqartorneqartoq qanoq paasisariaqarpa?

INUIT amerlanersaat isumaqarput inussiaq, imaluunniit kiffaq, naalakkaminit naqisimaneqarlunilu naapertuilluanngitsumik pineqartartoq. Guutimulli inussiaaneq allaalluinnarpoq. Guutip oqaasiani allassimavoq kristumiup naalakkamut asannittumut inussiaataanissani nammineq aalajangersinnaagaa. Apustili Paulusi kristumiut ‘Guutimut inussiaataanerat’ eqqartoramiuk allappoq taakku Guutimut asanninnertik kajumississutigalugu illernartumik kiffartortartut. (Rom 6:22) Taamatut inussiaataaneq qanoq paasisariaqarpa? Qanoq Saatanimut taassumalu silarsuaanut inussiaataalernaveersaarluinnarsinnaavugut? Jehovamullu aalajaalluni inussiaataaneq sunik iluaqutissartaqarpa?

2. (a) Sooq inussiap Israelikkuusup inussiaataaginnarnissani aalajangersinnaavaa? (b) Inussiap siutimi nuuatigut pututinneqarnermigut suna ersersippaa?

² Guutip Israelikkunnut inatsisai iluaqutigalugit Jehovamut inussianngornissamut suut piumasaqaataanersut paasisinnaavarput. Inussiaq hebræeriusoq ukiut arfineq-aappaanni inussiaajunnaarsinneqartarpoq. (2 Mos 21:2) Naalakkanili asaguniuk taassumunngalu inussiaajunnaarsitaarusunngikkuni Jehovap inatsisai naapertorlugu naalakkaminut inussiaataaginnarnissaminik periarfissaqarpoq. Naalagaata inussiaatini matumut matserfimmulluunniit iigartillugu siutaata nuua puttummik putussavaa. (2 Mos 21:5, 6) Sooq taamaaliortariaqarpa? Hebræerit oqaasii naapertorlugit naalanneq tusaanermut tunngatinneqartarpoq. Siutimi nuuatigut pututinnermigut inussiaataasup naalakkaminut naalalluni inussiaataajuarusunnini ersersippaa. Tamanna Guutimut tunniulluinnarsimanitsinnut assinguvoq, Jehovamummi tunniulluinnarnitsigut ersersipparput taassumunnga asanninnerput kajumississutigalugu Taanna naalakkusullutigu.

3. Sooq Jehovamut tunniulluinnarsimavugut?

³ Kuisinnginnitsinni aalajangerpugut Jehova kiffartorfiginiarlugu, tassa taassumunnga inussiaataaniarluta. Tunniulluinnaratta  Jehova neriorsorparput naalakkusullutigu taassumalu piumasaatut iliorumalluta. Taamatut aalajangeratta kimilluunniit pinngitsaalineqanngilagut. Allaat inuusuttuaqqat namminneq aalajangersimanertik tunngavigalugu kuisittarput; angajoqqaatik nuannaartinniaannarlugit taamaaliorneq ajorput. Tamatta inuttut ataasiakkaatut tunniulluinnarniarluta nammineq aalajangertarpugut Naalagarput qilammiusoq, Jehova, asagatsigu. Apustili Johannesi ima allappoq: “[Guutimut] asanninneq tassaavoq inassutai maleruaratsigit.” — 1 Joh 5:3.

4. ‘Iluarnermut inussiaataalerumalluta’ susariaqarpugut?

⁴ Jehovamut qujamasuppugut taassumunnga inussiaataanissamut periarfissinneqaratta. Kristusip utertitsissutitut pilliutaanik upperinninnerput iluaqutigalugu ajortimut inussiaajunnaarsinneqarsimavugut. Naammalluinnanngitsuugaluarlutami Jehova Jiisusilu Naalakkatsitut naalakkumallugit aalajangersimavugut. Paulusip tamanna erseqqissaarpaa ima allakkami: “Immissinnik isumaqarfigissaasi ajortimut toqusimasusi, Guutimulli inuullusi Kristusi-Jiisusikkut.” Taavalu ima mianersoqqusivoq: “Naluisiuk ilissi inussiatut kiffartorfigiumasarsi naalakkumasarsilu inussiaataaffigisariaqarassiuk naalallugulu ajortiugaluarpat toqumik kinguneqartoq naalannerulluniluunniit iluarnermik kinguneqartoq? Guutili qujanarsili siornagut ajortimut inussiaataasimasusi uummatissigut naalattunngorassi ajoqersuummut ilissinnut maligassarititaasumut! Ajortimut inussiaataajunnaartitaallusi iluarnermut inussiaataalerpusi.” (Rom 6:11, 16-18) Maluginiaruk Paulusi allattoq ‘uummatitsigut naalattuusariaqartugut’. Taamaattumik Guutimut tunniulluinnaratta ‘iluarnermut inussiaataalerpugut’.

5. Tamatta suna akiorniagassaraarput, aamma sooq?

⁵ Guutimut inussiatut tunniulluinnarsimasuugatta akiorniagassavut marluupput. Siulleq tassaavoq uagut nammineq naammalluinnanngissuserput. Aamma Paulusip tamanna akiorniagarisimavaa. Ima allappoq: “[Guutip] inatsisai inuutsikkut ilorlikkut nuannarigaluarpakka, kisianni paasisarpara inatsisinik allanik avatinniittoqartoq, taakkulu inatsisinut eqqarsaatinniittunut akerartortuusut ajortillu inatsisaanit avatinniittunit tiguagaatillunga.” (Rom 7:22, 23) Naammalluinnanngitsuugatta uinitta pilerissusipilui akiorniartuartariaqarpavut. Apustilip Petrusip kiffaanngissuseqartooqqulluta kajumissaarpaatigut, imalu nangippoq: “[Kiffaanngissusersi] iluaatsuliornermut isertuiniutigissanngilarsi, Guutilli kiffaasut atussavarsi.” — 1 Petr 2:16.

6, 7. Saatanip silarsuarmi matumaniittut qanoq pilerinarpasitsinniartarpai?

⁶ Akiorniagassatta aappaat tassaavoq silarsuaq anersaapilunnit aqunneqartoq. Silarsuup naalagaanerata, Saatanip, sapinngisani tamaat Jehovamut Jiisusimullu ilumoorfiginnikkunnaarsinniartarpaatigut. Saatanip inussiaataalersinniarluta silarsuarmut ilaalernissatsinnut ussernartorsiortittarpaatigut. (Efesosimiut 6:11, 12 atuakkit). Assersuutigalugu taamaaliortarpoq silarsuarmiitunik pilerinarpasitsitsinermigut. Apustilip Johannesip ima mianersoqquaatigut: “Silarsuarmik asannittup Ataatap asanninnera immini piginngilaa; silarsuarmiittummi tamarmik — uinngup pilerigisai, isit pilerigisaat nunallu piinik usorsisimaaruteqarneq — Ataatamit pisuunngillat, silarsuarmit pisuupput.” — 1 Joh 2:15, 16.

⁷ Nunarsuaq tamakkerlugu inuppassuit pigisalerituuleraluttuinnarput. Saatanip inuit isumaqalersittarpai aningaasaaterpassuaqarneq pilluarnarnerulersitsisartoq. Pisiniarferujussuit takussaanerulersimapput. Ussassaarinikkut pigisaqarnerulernissaq aliikkutarpassuaqarnerulernissarlu pingaartinneqartarput. Assersuutigalugu angalatitsiviit ussassaarutigisarpaat inuit silamiorpaluttumik isiginnittaaseqartut ilagalugit nunanut allanut alutornangaartunut angalanissat. Aap, sumi tamani inooriaasitta allanngortinnissaanut kajumissaarneqartarpugut — tamatigulli silarsuup isiginnittaasia naapertorlugu allanngortinnissaanut.

8, 9. Suna navianaataasorujussuua, aamma sooq?

 ⁸ Petrusip ilagiinniittut ilaat silarsuup eqqarsartaasiatut eqqarsartaaseqaleriartortut pillugit kristumiut siulliit ima mianersoqquai: “Ulluunerani erngunneq inuulluataarnartuutippaat. Peqatigalusi nalliuttorsioraangamik narrunarsaataasarput namminneq peqquserluutitik usorsitsaatigisaraangamikkit. Pingaakujuutinik isumaqanngitsunik oqalullutik inuunerlunnissarlu neqitaralugu uinikkut pilerissusipiloqarlutik inuit tammarsimasut ileqqupiluinit anigueqqammersut pisariniarpaat, inussiaajunnaarnissamik neriorsorpaat uffa namminneq aserornartumut inussiaataallutik; kinaluunniimmi sanngiissutsiminit inussiaatigineqartarpoq.” — 2 Petr 2:13, 18, 19.

⁹ “Isit pilerigisaat” naammassiniartuarutsigit, tassa kissaatigisavut tamaasa piniartuarutsigit, kiffaanngissuseqarnavianngilagut, Saatanimulli Diaavulumut, silarsuup naalagaaneranut takussaanngitsumut, inussiaataalerumaarpugut. (1 Joh 5:19) Pigisaleritunermut inussiaalernissaq navianaataasorujussuuvoq, pigisaleritunermullu inussiaajunnaaruminaassinnaavoq.

10, 11. Ullumikkut ingammik kikkut Saatanimit saassunneqartarpat, qaffasinnerusumillu ilinniaqarneq qanoq taakkununnga navianaataasinnaava?

¹⁰ Soorlu Edenimi pisoqarsimaneratut ullumikkut Saatanip misilittagakitsut, ingammik inuusuttut, saassuttarpai. Inuusuttoq, aamma soorunami inersimasoq, Jehovamut inussiaataaniarluni aalajangeraangat Saatanip nuannarineq ajorpaa. Saatanip kissaatigaa Jehovamut tunniulluinnarsimasut ilumoorfiginnikkunnaarnissaat.

¹¹ Itsaq inussiap siutaata nuua putuneqaraangat taanna sivikitsumik anniaateqartarsimassaaq. Kingornali ataavartumik ilisarnaateqalertarpoq naalakkaminit pigineqaannarumalluni aalajangersimanerminik. Inuusuttut inuit allat aalajangiinerannit allaanerusumik aalajangiiniaraangata ajornakusoorsinnaavoq, immaqalu allaat annernarsinnaavoq. Assersuutigalugu Saatani isumaqalersitsisarpoq inuuneq siunertaqarluartoq tassaasoq silarsuarmi angusaqarluarluni atorfeqarneq. Jehovali inuunitsinni pingaarnerpaatikkutsigu aatsaat inuunerput siunertaqarluarsinnaavoq. Jiisusi ima oqarpoq: “Pilluarput anersaakkut pisariaqartitaqarnerminnik miserratiginninngitsut.” (Matt 5:3, NW) Kristumiut Saatanip piumasaatut iliornissamuunngitsoq Jehovalli piumasaatut iliornissaminut tunniulluinnartarput. “Ullukkullu unnuakkullu” Biibilimik atuartarlutillu eqqarsaatiginneqqissaartarput. (Tussiaat 1:1-3 atuakkit). Ullumikkulli Guutimut kiffaasoq qaffasinnerusumik ilinniassaguni Guutip oqaasianik eqqarsaatiginneqqissaarnissamut Jehovamullu kiffartornissamut amerlanertigut piffissaqarpiarnavianngilaq.

12. Ullumikkut inuusuttorpassuit sumik aalajangigassaqarpat?

 ¹² Itsaq naalagaq Jehovamut kiffartortuunngitsoq inussiaatiminik kristumiumik ajornartorsiortitsisarsinnaavoq. Paulusi Korinthimiunut allakkamini siullerni ima allappoq: “Inussiaallutit qaaqquneqaruit tamanna isumakuluutigissanngilat — inussiaajunnaarnissamulli periarfissaqassagaluaruit taava iluatsillugu inussiaajunnaarsitaaniarit.” (1 Kor 7:21) Inussiaq Jehovamut kiffartortuunngitsumik ajornartorsiortitsisumillu naalagaqaruni pitsaanerussaaq inussiaataajunnaaruni. Ullumikkut nunani amerlasuuni inatsisit naapertorlugit meeqqat inuusuttuaqqallu ukiuni aalajangersimasuni atuartartussaapput. Atuartut soraarummeerunik namminneq aalajangissavaat suniarnerlutik. Ilinniarnerujumallutik aalajangersinnaapput. Kristumiuli silarsuarmi angusaqarluarluni atorfeqarniaannarluni qaffasinnerusumik ilinnialeruni piffissaq tamaat Jehovamut kiffartornissaminut periarfissaqarpiarunnaassaaq. — 1 Korinthimiut 7:23 atuaruk.

13. Ilinniagaqarneq sorleq Jehovap kiffaanut iluaqutaanerpaava?

¹³ Paulusip kristumiut Kolossemiittut ima mianersoqquai: “Mianersoritsi napitinneqaqqunasi ilisimaqqissaarniutinik salloqittaatinillu piunngitsunik, taakku tunngaveqarmata inuit kingornussassiissutaannik silarsuullu pissaanerinik, Kristusimit pisuunngitsunik.” (Kol 2:8) Ilinniartitsisorpassuit “ilisimaqqissaarniutinik salloqittaatinillu piunngitsunik” ilinniartitsisarput. Ilinniartut qaffasinnerusumik ilinniagaqartut ilisimatusarnermut tunngasut ilinniartarpaat, amerlanertigulli ulluinnarni pisariaqartitatik tunngaviusut ilinniarneq ajorpaat. Kristumiulli pilimanianngitsumik inooriaaseqarumallutik Guutimullu kiffartorsinnaajumallutik pisariaqartitaannarminnik ilinniagaqartarput. Taakkua Paulusip Timotheusimut kajumissaarutaa una pimooruppaat: “[Nalunanngilaq] Guutimik mianerinninneq naammagittarnermik ilaqartoq taamaalluni immini iluanaarnaraluartoq; Nerisassaqarlutalu atisassaqarutta tamakku naammagissavavut.” (1 Tim 6:6, 8) Qaffasinnerusumik ilinniagaqarneq nuimasumillu atorfeqalerneq pingaartinnagu kristumiut ilumoortut sapinngisartik tamaat oqaluusseqataanermikkut inuit Kristusimut ajoqersuganngornissaannut ikiorusunneruaat. — 2 Korinthimiut 3:1-3 atuakkit.

14. Paulusip Guutimut Kristusimullu inussiaataanerminik isiginnittaasia qanoq ilinniarfigisinnaavarput?

¹⁴ Apustilip Paulusip inuunera ilinniarfigisinnaavarput. Gamalielimit juutit inatsisaannik ilinniartitsisumit ilinniartinneqarsimavoq.  Paulusip taamani ilinniarsimasaata assigaa ullumikkut universitetimi ilinniagaqarneq. Paulusilli ilinniarsimanini Guutimut Kristusimullu inussiaataanermut ataqqinaataasumut naleqqiukkamiuk qanoq isummerpa? Ima allappoq: “Tamakku tamaasa ajunaarutaatippakka pissutigalugu Kristusi-Jiisusimik Naalakkannik ilisimanninneq annerungaartoq.” Imalu nangippoq: “Taanna pillugu tamakku tamaasa annaasimavakka, tamaasalu perlukutut igitassaannaatippakka Kristusi pigilerumallugu.” (Fil 3:8) Kristumiut inuusuttuaqqat angajoqqaavisalu ilinniagaqarnissamut tunngatillugu aalajangigassaqarangaamik Paulusip isiginnittaasia eqqarsaatigalugu iluaqutigisinnaavaat. (Assiliat takukkit).

15, 16. Jehovap peqatigiissortaani qanoq ilinniagaqartoqarsinnaava, tamakkualu suna siunertaraat?

¹⁵ Qaffasinnerusumik ilinniarnissamut ilinniarfinni pissutsit qanoq ittarpat? Ilinniartut amerlanertigut ileqqorluttarput aalakoorajuttarlutillu, ilaa? Pinngoriartuaarsimanermik ilinniartinneqarneq aamma nalinginnaavoq. Nunallu amerlasuut ilinniarfiini naalakkersuisunut oqartussaassusilinnullu allanut pikitsitsinerit aallartinneqakulasarput. (Ef 2:2) Jehovalli peqatigiissortaani pissutsini eqqissisimanartuni pitsaanerpaamik ilinniagaqartoqarsinnaavoq. Sapaatip-akunneri tamaasa tamatta Teokratiimik Ilinniarfik iluaqutigisinnaavarput. Aamma ilinniarfiit allat iluaqutigisinnaavavut. Assersuutigalugu angutinut pioneriusunut aappaqanngitsunut ilinniarfeqarpoq (Qatanngutinut Angutinut Aappaqanngitsunut Biibilimik Ilinniarfik), aamma aappariinnut pioneriusunut ilinniarfeqarpoq (Aappariinnut Kristumiunut Biibilimik Ilinniarfik). Ilinniarfiit taakku Jehovamut, Naalakkatsinnut qilammiusumut, naalannissatsinnut iluaqutigissavavut.

¹⁶ Ujarliutit iluaqutigalugit, assersuutigalugu nittartakkatsinni internetikkut atuagaateqarfik iluaqutigalugu, erlinnartuuterpassuit anersaakkut ittut nanisinnaavavut. Biibilimik misissuisarnitsinnut siunertaasoq pingaarnerpaaq tassaavoq Jehovamik pallorfiginninneq. Allat Guutimut ikinngutaalernissaannut ikiuinissamik ilinniartinneqartarpugut. (2 Kor 5:20) Taavalu ilinniartitavut allanik ilinniartitsisalersinnaapput. — 2 Tim 2:2.

17. Pitsaanerpaamik ilinniarumalluta aalajangerutta qanoq pilluaqquneqarumaarpugut?

¹⁷ Jiisusip talentinik assersuusiaani kiffat aalajaatsut marluk suliatik pillugit nersualaarneqarput. Tamanna namminneq naalagaatalu nuannaarutigaat. Naalakkap kiffaminik akisussaaffeqarnerulersitsinermigut iluarinninnini ersersippaa. (Matthæusi 25:21, 23 atuakkit). Pitsaanerpaamik ilinniagaqarumalluta aalajangerutta pilluarsinnaallutalu siunertaqarluartumik inuusinnaavugut. Assersuutigalugu Michael atuarfimmi angusaqarluartoq eqqarsaatigeriaruk. Ilinniartitsisut Michael universitetimi ilinniarnissamik periarfissaqarnera pillugu oqaloqatigigamikku tupigusupput qaffasinnerusumik ilinniarusunngimmat. Inuussutissarsiuteqarumallunili sivikinnerusumik ilinniarpoq kingornalu pionerinngorluni. Eqqunngitsumik aalajangersoriva? Naamik, isumaqarpoq Biibili tunngavigalugu utoqqaanertatullu ilinniagaqarnini naleqangaartoq. Imalu oqarpoq: “Pilluaqqussutikka pisinnaatitaaffikkalu aningaasarsiutigisinnaasaraluannit naleqangaarnerupput. Qaffasinnerusumik ilinniarniarnanga aalajangernera nuannaarutigeqaara.”

18. Sooq pitsaanerpaamik ilinniarumalluta aalajangissaagut?

¹⁸ Ilinniarneq pitsaanerpaaq iluaqutigalugu Guutip piumasaa sunaanersoq Jehovamullu qanoq inussiaataasinnaanerluta paasisinnaavarput. Ilinniarneq taamaattoq ‘nungujassusermi inussiaataanermit aniguisitaajumaarnissatsinnik’ aamma ‘kiffaanngissusermik Guutip qitornaasa naalannarsiffissami pisassaannik’ kingusinnerusukkut piginnilernissatsinnik neriuuteqalersitsisarpoq. (Rom 8:21) Pingaarnerpaamillu Jehovamik, Naalakkatsinnik, asanninnitsinnik pitsaanerpaamik ersersitsineq ilinniarparput. — 2 Mos 21:5.