Ilagiit ineriartortinneqarlik

„Ilagiit . . . maanna eqqissisimalerput. Ineriartortinneqarput.“ — APUSTILIT SULIAAT 9:31.

1. ’Guutip ilagiissaanut’ tunngatillugu suut apeqqutigineqarsinnaappat?

UKIUMI 33-mi piinsip ulluani Jehovap Kristusip ajoqersugarpaalui inuiaqatigiittut nutaatut, ’Israelitut Guutip pigisaatut’, akuerai. (Galatiamiut 6:16) Kristumiut tanitat taakku aamma tassaalerput Biibilimi ’Guutip ilagiissaasut’ taaneqartut. (1 Korinthimiut 11:22) Guutimulli ilagiissinngorneq qanoq paasisariaqarpa? „Guutip ilagiissai“ qanoq aaqqissuussaassappat? Nunarsuarmi qanoq ingerlassappat, tamatumunnga ilaasortaasut sumiikkaluarpataluunniit? Aamma taakkua inuunitsinnut pilluarnitsinnullu qanoq sunniuteqarpat?

2, 3. Ilagiit aaqqissuussaajumaarnerat Jiisusip qanoq ersersippaa?

² Allaaserisap matuma siuliani eqqaaneqareersutut Jiisusip siulittuutigaa ajoqersukkat tanitat ilagiissaat taakku pilersinneqarumaartut. Imminut innersuussutigaluni apustili Petrusi ima oqarfigaa: „Qaarsumut taassumunnga tunngavilerumaarpakka ilagiissikka, toqusullu inaata isaaffiisa ajugaaffigissanngilaat.“ (Matthæusi 16:18) Aamma Jiisusi apustilit suli najortillugit ilagiit taakku erniinnaq pilersinneqartussat qanoq aaqqissuunneqartussaallutillu ingerlalerumaarnerat pillugu paasissutissiivoq.

³ Jiisusip oqaatsimigut suliamigullu ajoqersukkani ilinniartippai ilagiinni siulersuisoqarumaartoq. Siulersuissapput allanut kiffartornermikkut. Jiisusi ima oqarpoq: „Nalunngilarsi inuiaqatigiinni naalagaanertatut isigineqartut innuttatik naqisimasaraat naalagartaasalu pissaanertik taakkununnga atornerluttaraat. Ilissinni taamaassanngilaq, akornassinnili angisuujumasoq ilissinnut kiffaassaaq; akornassinnilu nuimanerujumasoq tamanut inussiaataassaaq.“ (Markusi 10:42-44) Erseqqippoq „Guutip ilagiissai“ inuit ataasiakkaaginnaassanngitsut immikkoortitaartut, ilagiittut aaqqissuulluagaanngitsutut ittut. Ilagiittulli aaqqissuussaasussaapput inuit ataasiakkaat suleqatigiiffigisaat.

4, 5. Qanoq ililluta nalunngilarput ilagiit anersaakkut ittunik ilinniartinneqarnissartik pisariaqartikkaat?

⁴ ’Guutip ilagiissaanut’ taakkununnga niaquusussap oqaatigimisaarpaa apustilini allallu imminit ilinniartinneqarsimasut ilagiinniittut sinnerinut immikkut akisussaaffeqarumaartut. Suna akisussaaffigissagamikku? Suliassaasa pingaarnerpaat ilaat tassaavoq ilagiinniittunik anersaakkut ittunik ilinniartitsineq. Eqqaamajuk Jiisusip makititaasimasup apustilit allat ilaat najuutsillugit Petrusi ima oqarfigigaa: „Siimuut, Johannesip ernera, asavinga?“ Petrusi ima akivoq: „Aap, Naalagaq, nalunngilat asagikkit.“ Jiisusip ima oqarfigaa: „Savaaraatikka paarikkit! . . . Savaatinnik paarsisuugit. . . . Savaatikka paarikkit.“ (Johannesi 21:15-17) Suliassaavoq annertooq peqqissaarluinnartumik isumagineqartussaq!

⁵ Jiisusip oqaasiinit takusinnaavarput ilagiinnut katersorneqartut savanut ungalusaniittunut assersuunneqartut. Savat taakkua — angutit, arnat meeqqallu kristumiut — paarsisunit isumassuisunit isumassorneqarnissartik inuussutissanillu anersaakkut ittunik tunineqartarnissartik pisariaqartissavaat. Aammattaaq Jiisusip malinnitsini tamaasa allanik ilinniartitseqqullugillu ajoqersuganngortitsiortoqqummagit, taassuma savaataanut ilaalersut tamarmik Guutimit suliassiissutigineqartumik tamatuminnga qanoq suliarinninnissaminnik ilinniartinneqarnissartik pisariaqartippaat. — Matthæusi 28:19, 20.

6. ’Guutip ilagiissaani’ pilersinneqarlaani aaqqissuussaaneq suna atulersinneqarpa?

⁶ „Guutip ilagiissai“ pilersinneqarmata taakkununnga ilaasut ilinniartinneqarniarlutik kaammattoqatigiinniarlutillu aalajangersimasumik katersuuttalerput: „Apustilit ajoqersuinerat, peqatigiinneq timiusallu aggorneqartarnerat qinusarnerillu  aalajangerfigaat.“ (Apustilit Suliaat 2:42, 46, 47) Oqaluttuami piviusumi tamatumani soqutiginaatilik alla tassaavoq angutinik piumasaqaatinik Biibilimeersunik eqqortitsisunik suliassanik aalajangersimasunik isumaginnittussanik toqqaasoqartarnera. Taakku ilinniarluarsimaneq suliassamulluunniit pisinnaaneq pissutigalugu toqqarneqanngillat. Angutit taakku ’anersaamik ilisimassusermillu peqangaarput’. Taakkua ilagaat Stefanusi, oqaluttuarineqarporlu taanna „uppernermik Anersaamillu Illernartumik ilumioqangaartoq“. Ilagiittut aaqqissuussaaneq ’Guutip oqaasiata siammariartorneranik ajoqersukkallu Jerusalemimiittut amerliartuinnarnerannik’ ilaatigut kinguneqarpoq. — Apustilit Suliaat 6:1-7.

Angutit Guutip atugai

7, 8. (a) Apustilit utoqqaanertallu Jerusalemimiittut ilagiinni kristumiuni siullerni suna suliassaraat? (b) Ilagiit aqqutigalugit ilitsersuisoqarnera qanoq kinguneqarpa?

⁷ Paasinarluarpoq apustilit ilagiinni kristumiuni siullerni siulersuimmata, taakkuli kisimik siulersuinngillat. Ilaanni Paulusi angalaqataalu Antiokiamut Syriamiittumut uterput. Tamanna Apustilit Suliaat 14:27-mi ima oqaluttuarineqarpoq: „Tikikkamik ilagiit katersortippaat oqaluttuullugillu Guutip imminnut qanoq iliorsimanerinik [Guutip taakku ikiortigalugit iliuuserisimasarpassuinik, NV].“ Ilagiit taakkua suli najoraat, kristumiut juutiunngitsut kipineqartariaqarnersut pillugu apeqqut pilerpoq. Apeqqut aalajangiiffigineqarniassammat Paulusi Barnabalu ’apustilinut utoqqaanertanullu Jerusalemimiittunut’, siulersuisoqatigiittut kiffartortunut, aallartinneqarput. — Apustilit Suliaat 15:1-3.

⁸ Jiisusip affarmik qatanngutaa, Jaaku, ilagiinni kristumiuni utoqqaanertaasoq, apustilinulli ilaanngitsoq, ’apustilit utoqqaanertallu tamanna oqaluuserissallugu ataatsimiilermata’ aqutsisuuvoq. (Apustilit Suliaat 15:6) Isumasioqatigeereeramik anersaamillu illernartumit ikiorneqareeramik Allakkanut naapertuuttumik isummiussaqarput. Ilagiit allaffigaat isummiussartik oqaluttuaralugu. (Apustilit Suliaat 15:22-32) Ilagiit paasissutissat akueraat maleruarlugillu. Tamanna qanoq kinguneqarpa? Qatanngutit ineriartortinneqarput sapiissuseqaqqilerlutillu. Biibilimi ima oqaluttuarineqarpoq: „Ilagiit uppernerminni nakussatsitaasarput ullullu tamaasa amerliartorlutik.“ — Apustilit Suliaat 16:5.

9. Angutit kristumiut piumasaqaatinik eqqortitsisut akisussaaffigisassaat suut Biibilimi eqqaaneqarpat?

⁹ Ilagiilli ulluinnarni qanoq ingerlasussaappat? Ilagiit qeqertami Kretamiittut assersuutigeriartigit.  Tassani najugaqartut ilarpassui tusaamanerlugaagaluartut, ilaat inooriaatsiminnik allannguipput kristumiunngorlutillu ilumoortut. (Titusi 1:10-12; 2:2, 3) Taakku illoqarfinni assigiinngitsuni najugaqarput, aamma tamarmik siulersuisoqatigiinnit Jerusalemimiittunit ungasissumiipput. Tamannali ajornartorsiuterujussuunngilaq, ilagiinnimi tamani Kretamiittuni allamiittunilu anersaakkut ittunik pingaartitsisunik utoqqaanertanngortitsisoqartarpoq. Angutit taakkunatut ittut piumasaqaatinik Biibilimi allanneqarsimasunik eqqortitsipput. Utoqqaanertanngortinneqarput, imaluunniit nakkutilliisunngortinneqarput, ’ajoqersuut peqqissinartoq malillugu oqaaqqissaarisinnaasut assortuisunillu oqaasissaarutitsisinnaasut’. (Titusi 1:5-9; 1 Timotheusi 3:1-7) Angutit anersaakkut ittunik pingaartitsisut allat ilagiinni kiffartortutut, imaluunniit ikiortaasutut, ilagiinnik ikiuinissamut Biibilimi piumasaqaatinik eqqortitsipput. — 1 Timotheusi 3:8-10, 12, 13.

10. Matthæusi 18:15-17 naapertorlugu ajornartorsiutit ilungersunartut qanoq aaqqinneqartussaappat?

¹⁰ Jiisusip oqaatigimisaarpaa taama ittumik ilagiittut aaqqissuussaaneqarumaartoq. Matthæusi 18:15-17 naapertorlugu eqqaavaa Guutip kiffaasa marluk akornanni ilaannikkut ajornartorsiuteqartoqalersinnaasoq taakkua arlaata aapparminut ajortuliornera pissutigalugu. Eqqunngitsuliorfigineqartutut misigisup nammineq isumani naapertorlugu eqqunngitsuliorfiginnitsini saaffigissavaa marluinnaatillutillu ’kukkussutaa qulaarlugu’. (NV) Taamatut iliuuseqaraluarluni ajornartorsiut aaqqinneqanngippat ataaseq marlulluunniit susoqarsimaneranik ilisimannittut ikioqqulluni qinnuigineqarsinnaapput. Taavami ajornartorsiut suli aaqqinneqanngippat? Jiisusi ima oqarpoq: „Taakku tusarumanngippagit ilagiinnut oqaatigiuk. Ilagiilluunniit paasiumanngippagit taava Guutimik nalusutut ilanngaaserisutullu isigissavat.“ Taamani Jiisusi taama oqarmat suli juutit ’Guutip ilagiissigai’, taamaammat aallaqqaammut oqaasii taakkua taakkununnga atuupput. * Ilagiilli kristumiut pilersinneqarmata Jiisusip siunnersuutaa taakkununnga atuuppoq. Tamanna Guutip innuttaasa ilagiittut aaqqissuussaalerumaarnerannut uppernarsaataavoq suli alla, aaqqissuussaanerlu taanna aqqutigalugu kristumiut tamarmik immikkut ineriartortinneqarsinnaallutillu siunnersorneqarsinnaapput.

11. Utoqqaanertat ajornartorsiutinik aaqqiinermut tunngatillugu suut suliarisussaavaat?

¹¹ Utoqqaanertat, imaluunniit nakkutilliisut ilagiinnut najukkaminniittunut naleqqulluartumik sinniisuusussaapput ajornartorsiutit unioqqutitsinerilluunniit iliuuseqarfigineqassagaangata. Tamanna utoqqaanertanut piumasaqaataasunut Titusi 1:9-mi eqqaaneqartunut naapertuuppoq. Soorunami utoqqaanertat ilagiinniittut naammalluinnanngitsuupput, soorluttaaq Titusi, Paulusip ’naammassineqanngitsunik naammassinneqqullugu’ ilagiinnut aallartitaa, naammalluinnanngitsuusoq. (Titusi 1:4, 5) Ullumikkuttaaq utoqqaanertanngortinneqarnissamut piukkunneqartut piffissap ingerlanerani uppertuunertik tunniusimasuunertillu uppernarsarsimasariaqarpaat. Taamaammat ilagiinniittut aaqqissuussineq tamanna aqqutigalugu siunnersuutigineqartut tutsuiginissaannut pissutissaqarput.

12. Utoqqaanertat ilagiinnut sumik akisussaaffeqarpat?

¹² Paulusip utoqqaanertat Efesosimiut ilagiiviniittut ima oqarfigai: „Immissinnut misissugariniaritsi savaatittaarlu tamaasa misissugaralugit; Anersaammi Illernartup taakkununnga nakkutilliisunngortippaasi Guutip ilagiissai nammineq aamminik [nammineq ernermi aavanik, NV] pissarsiai paareqqullugit.“ (Apustilit Suliaat 20:28) Ullumikkuttaaq nakkutilliisut ’Guutip ilagiissaanik paarsisussanngortitaapput’. Asannittumik paarisussaavaat, savaatinut naalagaaniarnatik. (1 Petrusi 5:2, 3) Nakkutilliisut ’savaatit tamarmik’ ineriartornissaat ikiornissaallu ilungersuutigisariaqarpaat.

Ilagiinnut qanittumik attaveqarit

13. Ilagiinni pissutsit qanoq ittut ilaannikkut pilertarsinnaappat, aamma sooq?

¹³ Utoqqaanertat ilagiinnittullu allat tamarmik naammalluinnanngitsuupput, taamaammat ilaannikkut paatsuuisoqartarlunilu ajornartorsiuteqartarpoq, soorluttaaq ukiuni hundredelinni  siullerni apustilit ilaat inuugallarmata taamaattoqartarsimasoq. (Filippimiut 4:2, 3) Immaqa nakkutilliisoq allaluunniit ataqqinnippalunngitsumik, inussiarniippaluttumik ilumoorpianngitsumilluunniit oqaaseqarpoq. Immaqaluunniit isumaqarpugut Biibilimut naapertuutinngitsunik pisoqartoq, tamannali utoqqaanertanit najukkatsinniittunit ilisimaneqaraluarluni iliuuseqarfiginiarneqarpasinngitsoq. Soorunami imaassinnaavoq ajornartorsiut najoqqutassianut Biibilimiittunut naapertuuttumik iliuuseqarfigineqartoq imaluunniit iliuuseqarfigineqalersoq, aamma immaqa allanik pisoqarsimavoq ilisimasaqarfiginngisatsinnik. Pissutsilluunniilli taamaassorinninnitsitut ikkaluarpata, manna eqqarsaatigeriassagit: Piffissap ilaani ilagiinni Korinthimiittuni, ilagiinni Jehovap isumassugaani, ajorluinnartumik pisoqartarpoq. Naggataatigut unioqqutitsinerup eqqortumik aalajangersimasumillu iliuuseqarfigineqarnissaa isumagaa. (1 Korinthimiut 5:1, 5, 9-11) Immaqa imminut ima aperisoqarsinnaavoq: ’Taamani Korinthimi najugaqarsimasuuguma, taamatut pisoqartarnerata nalaani qanoq pisimassagaluarpunga?’

14, 15. Sooq ilaasa Jiisusi angalaqatigiunnaarpaat, tamannalu qanoq ilinniutigisinnaavarput?

¹⁴ Pissutsit ilagiinni pilersinnaasut allat eqqarsaatigeriakkit. Takorlooriaruk qatanngutip Biibilimi ajoqersuutigineqartoq aalajangersimasoq paasiuminaatsillugulu akueriuminaatsikkaa. Immaqa Biibilimi aamma atuakkani atuagassianilu ilagiit aqqutigalugit pineqarsinnaasuni misissuisimavoq uppeqatinullu inersimalluartunut, immaqa allaat utoqqaanertanut, ikiortissarsiorsimalluni. Taamaakkaluartorli ajoqersuut suli paasiuminaatsillugulu akueriuminaatsippaa. Qanoq iliussava? Tamatumunnga assingusumik pisoqarpoq Jiisusip toqunissaa ukiup ataatsip missaanik sioqqullugu. Jiisusi oqarpoq ’timiusaalluni inuussutaasoq’, aamma naassaanngitsumik inuulerumasoq ’Inuup Ernerata uinnganik nerisariaqartoq aavanillu imertariaqartoq’. Tamanna ajoqersugaasa ilaasa mamiatsaatigaat. Ajoqersukkalli ilarpassuisa paasiniaanatik aamma Jehovap pineqartunik piffissaasukkut aaqqiiumaarneranik ilisimaarinninnertik pissutigalugu naammagittarlutillu utaqqinatik ’Jiisusi qimappaat angalaqatigiunnaarlugulu’. (Johannesi 6:35, 41-66) Imminut apereqqissinnaavugut tassaniissimasuugutta susimassagaluarnerluta.

¹⁵ Ullutsinni ilaat najukkaminni ilagiinnut aggissaarsimapput namminneerlutik Guutimut kiffartorusunnerugamik. Immaqa tamatumunnga pissutaanerarsinnaavaat misigissutsimikkut ikilerneqarsimanertik,  aaqqinneqarsimanngitsumik ilagiinni ajortumik pisoqarsimaneraanertik, imaluunniit ajoqersuummik aalajangersimasumik akuerinnissinnaannginnertik. Iliuusiat qanoq silatusaarnerutigaa? Soorunami ilumoorpoq kristumiut tamarmik immikkut namminneq Guutimut attaveqartariaqartut, miserratigisinnaanngilarpulli Guutip nunarsuaq tamakkerlugu ilagiit atorai, apustilit nalaanni iliorsimanermisut. Aammattaaq Jehovap ukiuni hundredelinni siullerni ilagiit atorlugillu pilluaqquai, aamma ilagiinnut iluaqutaasunik piumasaqaatinik eqqortitsisunik utoqqaanertaqarlunilu ilagiinni kiffartortoqarnissaa isumagaa. Ullumikkut aamma taamaappoq.

16. Ilagiit qimannissaannut ussernartorsioraanni suna eqqarsaatigineqartariaqarpa?

¹⁶ Kristumiu isumaqaruni Guutimut nammineq attaveqarnini naammattoq, aaqqissuussaq Guutip atuutilersitaa — nunarsuaq tamakkerlugu ilagiit aamma Guutip innuttaasa najukkaminni ilagiissaat — tunussavaa. Taanna immaqa ilagiinnut attaveqarnani imaluunniit allat ikittuinnaat peqatigalugit Guutimik pallorfiginnippoq, taavami utoqqaanertanik ilagiinnilu kiffartortunik aaqqissuussaq? Maluginiarnarpoq Paulusip kristumiut ’Jiisusimi sorlaqarnissaat, taassumanilu ineriartortinneqarnissaat’ eqqartoraa ilagiit Kolossemiittut allaffigigamigit allakkat Laodikeamissaaq atuffassissutigineqarnissaat innersuussutigalugu. Tamanna ilagiinniittut, imaanngitsoq inuit ataasiakkaat ilagiinnit avissaartut, iluaqutigissavaat. — Kolossemiut 2:6, 7; 4:16.

Sallusuissutip sukaralugulu tunngavigisaa

17. Timotheusimut allakkat siulliit 3:15-imi ilagiit pillugit suna erserpa?

¹⁷ Apustili Paulusip utoqqaanertamut kristumiumut Timotheusimut allakkamini ilagiinni utoqqaanertassanut ilagiinnilu kiffartortussanut piumasaqaatit taagorpai. Taakkua taagoriitsiaannarlugit ’Guutip uumasup ilagiissai’ eqqaavai allallunilu taakku tassaasut ’sallusuissutsip sukaralugulu tunngavigisai’. (1 Timotheusi 3:15) Kristumiut tanitat ilagiissaasa ukiuni hundredelinni siullerni taamatut sukaasimanerat qularnanngilluinnarpoq. Aamma qularnanngilluinnarpoq kristumiut tamarmik immikkut ilagiit najukkatik aqqutigalugit sallusuissummik taama ittumik ilassinnissimanerat. Ilagiinniuna Biibilip ilumoortuunera saqqummiunneqarlunilu illersorneqartoq, aamma ilagiinniuna kristumiut ineriartortinneqarsinnaasut.

18. Ilagiit ataatsimiinneri sooq taama pingaaruteqartigaat?

¹⁸ Taamatulli nunarsuaq tamakkerlugu ilagiit kristumiut tassaapput Guutip illua, imaluunniit inoqutai, ’sallusuissutsip sukaralugulu tunngavigisai’. Ilagiinni najukkatsinniittuni ataatsimiigiartuartarutta ataatsimiinnerillu peqataaffigiuarutsigit ineriartortinneqarlutalu Guutimut attaveqarnerput nakussatsinneqassaaq, aamma piumasaatut iliorsinnaanngussaagut. Paulusip ilagiit Korinthimiittut allaffigigamigit ataatsimiinnerni suut oqaatigineqartarnerat sammivaa. Allappoq kissaatigalugu taakkua ataatsimiinnerini oqaatigineqartut paasiuminartuussasut, najuuttut ’ineriartortinneqarsinnaaniassammata’. (1 Korinthimiut 14:12, 17-19) Ullumikkut ineriartortinneqarsinnaavugut ilagiinnik aaqqissuussaq Jehova Guutip atuutilersitaa akuerigutsigu tapersersorutsigulu.

19. Sooq ilagiinnut najukkanniittunut akiitsoqartutut misigivit?

¹⁹ Aap, kristumiutut ineriartortinneqarumagutta ilagiinniittariaqarpugut. Ilagiit qangaaniilli ajoqersuutinut eqqunngitsunut illersuutaapput. Aamma Guutip ilagiit naalagaaffini Missiarsikkoortoq pillugu nutaarsiassamik nuannersumik nunarsuaq tamakkerlugu oqaluussissutiginninnissamut atorpai. Qularutissaanngilaq Guutip ilagiit kristumiut aqqutigalugit naammassisaqangaarsimanera. — Efesosimiut 3:9, 10.  (wE 4/15 07)

[Quppernerup ataani ilanngussaq]

Eqqaamavigit?

• Sooq ilimagisinnaavarput Guutip ilagiit nunarsuarmiittut atorumassagai?

• Utoqqaanertat naammalluinnanngitsuugaluarlutik ilagiit pillugit susarpat?

• Ilagiit najukkanniittut aqqutigalugit qanoq ineriartortinneqartarpit?

[Atuaqqissaarnermi apeqqutit]

[Qupp. 28-mi assiliartaq]

Apustilit utoqqaanertallu Jerusalemimiittut siulersuisoqatigiittut kiffartorput

[Qupp. 30-mi assiliartaq]

Utoqqaanertat ilagiinnilu kiffartortut ilagiinnut akisussaaffimminnik isumaginninnissamik ilinniartinneqartarput