Ilissi uiususi, Kristusip siulersuinera akuerisiuk
Ilissi uiususi, Kristusip siulersuinera akuerisiuk
’Angutip kialuunniit Kristusi niaqoraa.’ — 1 KORINTHIMIUT 11:3.
1, 2. (a) Uiulluarnissamut piumasaqaatit ilaannik eqqaasaqarit. (b) Aappariinnerup Guutimit pilersinneqarsimaneranik akuerinninnissaq sooq pingaaruteqarpa?
UIULLUARTUUNISSAMUT piumasaqaataasoq illit suusoraajuk? Eqqarsartaatsikkut piginnaaneqarluartariaqarpa imaluunniit assassullaqqissuusariaqarpa? Aningaasarsiullaqqissuusariaqarpa? Imaluunniit nuliaminik meeqqaminillu asannittuunissaa isumassuisuunissaalu kissaatiginarnerua? Eqqaaneqartoq kingulleq eqqarsaatigalugu uiusorpassuit iluatsinngitsoortarput silarsuup anersaavanit inuillu najoqqutassiaannit siulersortittaramik. Sooq? Pingaartumik aappariinnermik Pilersitsisup — ’najungasumik inummit tigusaminik arnaliortup, taassuminngalu Adamimukaassisup’ — siunnersuutai akuerinagillu malinnginnamikkit. — 1 Mosesi 2:21-24.
2 Jiisusi Kristusip aappariinnerup Guutimit pilersinneqarsimanera pillugu Biibilimi allassimasut uppernarsarpai nalimini isornartorsiuisartut ima oqarfigigamigit: „Atuarsimanngilisiuk pileqqaarneranniit Pinngortitsisup angut arnarlu pinngortikkai oqarlunilu: ’Tamanna pillugu angutip ataatani anaananilu qimassavai nulianilu attavigalugu, taakkulu marluk uininngussapput ataaseq’? Taamaattumik marluujunnaarlutik uiniulissapput ataaseq. Guutimmi ataqatigiilersitai inuup avissaartissanngilai.“ (Matthæusi 19:4-6) Pilluarluni aappariinnissamut ’matuersaat’ tassaavoq aappariinnerup Guutimit pilersinneqarsimaneranik aamma aatsaat siunnersuutinik Guutip oqaasiani Biibilimiittunik malinnikkaanni ingerlalluartoqarsinnaaneranik akuerinninneq.
Uiulluarnissamut piumasaqaat
3, 4. (a) Jiisusip aappariinneq pillugu ilisimasaqarluarneranut sunaana pissutaasoq? (b) Jiisusip assersuutaasumik nulia kinaava; aamma uiusup aappani qanoq pisartussaavaa?
3 Uiulluarnissamut iluaqutaasinnaasoq tassaavoq Jiisusip oqaaserisimasaanik misissuineq iliuuserisimasaanillu ilaarsineq. Aappariinneq pillugu ilisimasaqarluarpoq, inuimmi siulliit marluk pinngortinneqarmata aamma aappariilersinneqarmata najuuppoq. Taanna Jehova Guutip ima oqarfigaa: „Inunnik pinngortitsisa immitsinnik assililluta uatsitut ittussanik.“ (1 Mosesi 1:26) Aap, Guutip suut tamaasa sioqqullugit pinngortitani, ’sanimini suliortuusoq’, oqaluuppaa. (Ussatit 8:22-30, 1900/1961) Taanna ’pinngortitat tamarmik siornatigut erniuvoq’, „Guutip pinngortitaasa aallaqqaataat“, qilak nunarsuarlu takussaasut pinngortinneqanngikkallarmatali piusoq. — Kolossemiut 1:15; Saqqummersitat 3:14.
4 Jiisusi „Guutip savaaraa“-nik taaneqarpoq, assersuutaasumillu uiusutut allaatigineqarpoq. Ilaanni inngili ima oqarpoq: „Qaagit, nuliartaaq Savaaqqap nulia ilinnut takutissavara.“ (Johannesi 1:29; Saqqummersitat 21:9) Nuliartaarmi, imaluunniit nuliaasoq, taanna kinaagami? „Savaaqqap nulia“ tassaavoq Kristusip ajoqersugai tanitat aalajaatsut taassuma naalagaaffiani qilammiusumi taassuminnga naalakkersueqateqartussat. (Saqqummersitat 14:1, 3) Taamaammat Jiisusip ajoqersukkani nunarsuarmeeqatigigallaramigit taakkuninnga pinneriaasia uiusunut maligassaavoq, taakku aapparminnik qanoq pinnittariaqarnerannut tunngatillugu.
5. Jiisusi kikkunnut maligassaava?
5 Ilumoorpoq Jiisusi tamatsinnut maligassatut Biibilimi eqqartorneqarmat, imami allassimasoqarpoq: „Kristusi aamma anniartitaammat ilissi pillusi maligassamillu qimatsivigalusi, tumini atuarlugit malinnaaqqullusi.“ (1 Petrusi 2:21) Pingaartumilli angutinut maligassaavoq. Biibilimi ima allassimavoq: ’Angutip kialuunniit Kristusi niaqoraa, arnap angut niaqoraa, Kristusillu niaqua Guutiuvoq.’ (1 Korinthimiut 11:3) Kristusi angutip niaqorimmagu, uiusut taassuma maligassiaanik malinninnissartik pisussaaffigaat. Taamaattumik ilaqutariittut inuuneq iluatsilluarlunilu pilluarnassappat siulersuinermut najoqqutassiamik maleruaanissaq pisariaqarpoq. Taamaammat uiusup nuliani Jiisusip assersuutaasumik nuliaminik, ajoqersukkaminik tanitanik, pinninneratut asannitsigisumik pissavaa.
Aappariittut ajornartorsiutit qanoq naammagalugit atorneqartartut
6. Uiusup nuliani qanoq inooqatigisariaqarpaa?
6 Ullumikkut silarsuatsinni ajornartorsiutinik ulikkaartumi uiusut naammagittarnermut, asanninnermut najoqqutassianillu naapertuilluartunik aalajangiusimanninnermut tunngatillugu Jiisusip maligassiaanik malinninnissartik immikkut pisariaqartippaat. (2 Timotheusi 3:1-5) Jiisusip maligassiaanut tunngatillugu Biibilimi ima allassimasoqarpoq: ’Ilissi angutit nuliasi inooqatigissavasi ilisimasaqarneq naapertorlugu.’ (1 Petrusi 3:7, NV) Aap, uiusut ilisimasaqarnissaq pisariaqartippaat aappariittut ajornartorsiutit iliuuseqarfigissagunikkik. Taamaalillutik Jiisusip ajornartorsiutinik iliuuseqarfiginneriaasia ilaassavaat. Jiisusi inuup kialuunniit misilinneqaatigisimasaanit annermik misilinneqarpoq, nalunngilaali Saatani taassumalu anersaapilui silarsuarlu ajortoq manna tamatumunnga pisuusut. (Johannesi 14:30; Efesosimiut 6:12) Jiisusip ajornartorsiuteqalertarnera tupaallaatiginngisaannarpaa, aamma aappariit ’inuunerminni ajornartorsiuteqaleraangamik’ tupaallattariaqanngillat. Biibilimi mianersoqqussutigineqarpoq aappanittut ajornartorsiuteqartarnissartik ilimagisinnaagaat. — 1 Korinthimiut 7:28.
7, 8. (a) Uiusut ilisimasaqarneq naapertorlugu nuliaminnik inooqateqarnissaat qanoq paasisariaqarpa? (b) Sooq nuliaasut ataqqineqartariaqarpat?
7 Biibili naapertorlugu, uiusut „ilisimasaqarneq naapertorlugu“ (NV) nuliaminnik inooqateqarnerannut ilaavoq ’arnamik qajannarnerusumik ataqqinninneq’. (1 Petrusi 3:7) Biibilimi siulittuutigineqarpoq uiusut nuliaminnik naqisimannittarnerat nalinginnaassasoq, angulli Guutimit iluarisaassaguni taassuma nuliani ataqqisariaqarpaa. (1 Mosesi 3:16) Erlinnangaartutut pinissaa kissaatigissavaa timikkullu nukeqarnerunini taassuminnga ajoqusiinissamut atornerlunngisaannassallugu. Misigissusiili soqutigissavai ataqqinnittumillu piuaannassallugu, nikanarsaataasumik pinagu.
8 Sooq uiusut aappartik ataqqissavaat? Tamanna Biibilimi ima akineqarpoq: „Taakkuttaaq saammaannermit tunissutaasumik inuussutaasumik ilumut kingornusseqataasussaammata — qinusarnisi akornuserneqaqqunagit.“ (1 Petrusi 3:7) Uiusut paasisariaqarpaat Jehovap angut imminik pallorfiginnittoq arnamit imminik pallorfiginnittumit pingaarnerutinngikkaa. Arnat Guutimit akuerineqarnissaminnut qinngaqqunnanngitsut angutit inuunermik naassaanngitsumik akissarseqatigissavaat — taakkulu ilarpassui allaat qilammi inuulissapput ’anguteqaranilu arnaqanngitsumi’. (Galatiamiut 3:28, NV) Taamaattumik uiusut eqqaamasariaqarpaat inuup aalajaassuseq Guutip isaani erlinnartunnguutigisaraa. Angutaaneq arnaanerluunniit, uiuneq nuliaaneq meeraanerluunniit apeqqutaanngilaq. — 1 Korinthimiut 4:2.
9. (a) Petrusip oqaasii naapertorlugit sooq uiusup nuliani ataqqissavaa? (b) Qanoq ililluni Jiisusip arnat ataqqinninnermik ersersitsivigai?
9 Uiusup nuliaminik ataqqinninnissaa qanoq pingaaruteqartiginersoq, apustili Petrusip Petrusimik allakkat siulliit 3:7-imi oqaasiisa naggataatungaani ima erseqqissarneqarpoq: „Qinusarnisi akornuserneqaqqunagit.“ Akornuserneqarnerat ajorluinnartumik kinguneqarsinnaavoq! Aap, allaat Jehovap uiusup qinnutaanik imminut anngussinnaajunnaartitsineranik kinguneqarsinnaavoq, soorlu itsaq kiffami ilaanut akisussaaffimminnik sumiginnaasunut taama iliorsimasoq. (Upputit 3:43, 44) Angutit kristumiut — aappallit aappaninnialersaartullu — silatusaassapput Jiisusip arnat ataqqinnittumik qanoq pisarnerai maluginiarunikku. Taassuma arnat nuannaarluni oqaluusseqatiminut ilaatippai, aamma inussiarnisaarfigalugillu ataqqinnittumik pivai. Ilaanni Jiisusip arnat sallusuissummik pingaarutilimmik saqqummersitsivigai. Taakkulu paasisaminnik angutinut ingerlatitseqqittussaasimapput! — Matthæusi 28:1, 8-10; Lukasi 8:1-3.
Pingaartumik angutinut maligassaq
10, 11. (a) Sooq pingaartumik uiusut Jiisusip maligassiaa misissortariaqarpaat? (b) Uiusut nuliatik asanninnermik qanoq ersersitsivigisarpaat?
10 Soorlu eqqaaneqareersoq Biibilimi angutip nuliaminut attaveqarnera Kristusip ’nuliartaaminut’, ajoqersukkat tanitat ilagiissaannut, attaveqarneranut assersuunneqarpoq. Biibilimi ima allassimavoq: „Uiusoq nuliaminut [niaquuvoq] soorlu Kristusi ilagiinnut niaquusoq.“ (Efesosimiut 5:23) Matumani allassimasut uiusut Jiisusip ajoqersukkaminik qanoq siulersuisarneranik, imaluunniit taakkununnga qanoq ’niaquuneranik’, misissuinissamut kajumississutigisariaqarpaat. Aatsaat taamatut misissuiguni uiusoq Jiisusip maligassiaanik eqqortumik malinnissinnaassallunilu aappariinnermi siulersuisuusinnaassaaq, nuliaminik asannillunilu isumassuinermi saniatigut, soorluttaaq Jiisusi ilagiissiminik isumassuisimasoq.
11 Kristumiunut Biibilimi imaattumik kajumissaaruteqarpoq: „Angutit, nuliasi asassavasi soorlu Kristusip ilagiit asagai imminullu tunniulluni taakku pillugit.“ (Efesosimiut 5:25) Efesosimiunut allakkani, kapitalit sisamaanni, ilagiit „Kristusip timaa“-nik taaneqarput. Timi assersuutaasoq taanna angutinik arnanillu avaterpassuaqarpoq, taakkualu tamarmik timimik ingerlallualersitseqataapput. Soorunami Jiisusi ’timip niaqoraa, tassa ilagiit’. — Efesosimiut 4:12; Kolossemiut 1:18; 1 Korinthimiut 12:12, 13, 27.
12. Jiisusip timiminut assersuutaasumut asanninnini qanoq ersersippaa?
12 Jiisusip timini assersuutaasoq, ilagiit, asanninnermik ersersitsivigisarpai ilagiinnut ilaasortaasut isumassornerisigut. Assersuutigalugu ilaanni ajoqersukkani qasummata ima oqarpoq: „Inoqanngitsumut ilagisinga; taakkuinnaallusi tassani qasuersaatsiarsinnaavusi.“ (Markusi 6:31) Apustilit ilaata Jiisusip toqutaanissaa nalunaaquttap akunnialunnguinik sioqqullugu qanoq iliorneri oqaluttuarai imalu oqarluni: „Pigisani [tassa timiminut assersuutaasumut ilaasortaasut] . . . asajuarsimavai, naggatissamullu allaat asavai.“ (Johannesi 13:1) Uiusup nuliaminik qanoq pinnittussaaneranut Jiisusi maligassaalluarpoq.
13. Uiusut nuliaminnik asanneqqullugit qanoq kajumissaarneqarpat?
13 Jiisusip uiusunut maligassiaa innersuussutigalugu apustili Paulusip uiusut kajumissaarpai nuliatik namminneq timimissut asaqqullugit. Taanna ima oqarpoq: „Nuliaminik asannittoq imminik asavoq. Inuummi timini uumissunngisaannarpaa, kisianni inuussutissittarpaa paaqqisarlugulu soorlu Kristusip ilagiit taama pisarai.“ Paulusilu ima nangippoq: „Tamassi immikkut nuliasi immissisut asasussaavasi.“ — Efesosimiut 5:28, 29, 33.
14. Uiusup timini naammalluinnanngitsoq qanoq pisarpaa, tamannalu nuliaminik qanoq pinnittariaqarnera pillugu sumik ersersitsiva?
14 Paulusip oqaasii eqqarsaatigeriakkit. Angutip silaqarluartup nammineq timini qaquguluunniit piaaraluni ajoqusissavaa? Angutip putukkuni kallukkuniuk, putukkuni naassutigigamiuk unatalissavaa? Soorunami naamik! Uiusoq ikinngutimi takkuanni imminut nikassartarpa, imaluunniit kukkussutini kikkunnut tamanut oqaluuserisarpai? Naamik! Taava sooq nuliani oqaatsikkut timikkulluunniit annersissavaa kukkummat? Uiusup soqutigisani kisiisa pingaartissanngilai, aammali nuliami soqutigisai pingaartissavai. — 1 Korinthimiut 10:24; 13:5.
15. (a) Jiisusi qanoq piva ajoqersukkani inuttut sanngiissusermut nakkaannarmata? (b) Maligassiaa qanoq ilinniarfigisinnaavarput?
15 Jiisusip toqunissaminut aqaguttoq Naatsiivimmi Getsemanemi ajoqersukkami inuttut sanngiissusertik nakkaannarfigimmassuk ajoqersukkaminik isumassuinera ilinniarfigisinnaavarput. Qinoqqusaqattaaraluaraatik pingasoriarlutik sinilerput. Tassanngaannaq angutinit sakkulisartunit unguneqarput. Jiisusip angutit aperai: „Kina ujarpisiuk?“ Ima akimmata: „Jiisusi Nazaretimioq,“ Jiisusip taakku ima oqarfigai: „Uangaavunga.“ Nalunagu toquffissani nalliuttoq ima oqarpoq: „Uanga ujagarigassinga taava ilakka uku qimagutitiinnarsigit.“ Jiisusip ajoqersukkani — nuliartaaminut assersuutaasumut ilaasussat — isumassortuaannarpai, aniguiffissarsissuppaalu. Uiusut Jiisusip ajoqersukkaminik qanoq pinnittarnera maluginiaqqissaarunikku, najoqqutassiarpassuarnik aapparminnut attaveqarnerminni atorsinnaasaminnik nassaassapput. — Johannesi 18:1-9; Markusi 14:34-37, 41.
Jiisusip asanninnera misigissusiinnarnik tunngaveqanngilaq
16. Jiisusip Martha qanoq misigissuseqarfigaa, taamaakkaluartorli sooq naqqippaa?
16 Biibilimi allassimavoq „Jiisusip Martha qatanngutaalu arnaq Lazarusilu“ imminik pulaartitsisartut ’asagai’. (Johannesi 11:5) Taamaakkaluartorli Jiisusi Marthap siunnersornissaanut tunuarsimaanngilaq taassuma nerisassiornissani pingaartippallaarmagu taamaalillunilu anersaakkut ilinniartinneqarnissani piffissaqarfiginagu. Ima oqarpoq: „Martha, Martha! Amerlasuut isumakuluutigalugillu ulapputigaatit. Ataaserli pisariaqarpoq.“ (Lukasi 10:41, 42) Qularnanngitsumik Marthap Jiisusip siunnersuinera akueriuminartinneruaa imminut erseqqissumik tunniusimanera pissutigalugu. Uiusut taamatulli nuliatik inussiarnersumik asannittumillu pisariaqarpaat, oqaatsit eqqarsaatigilluakkat atorlugit. Naqqiinissarli pisariaqaraangat pissusissamisoorpoq Jiisusitut ammasumik unneqqarissumillu oqaaseqartarnissaq.
17, 18. (a) Petrusip Jiisusi qanoq oqaaqqissaarpaa, aamma sooq Petrusip naqqinneqarnissani pisariaqartippaa? (b) Uiusup suna akisussaaffigaa?
17 Ilaanni Jiisusip apustilini nassuiaappai Jerusalemiliartariaqarluni, ’utoqqaanertanit palasiunernillu allakkanillu ilisimasunit anniartitaangaarfissaminut toqunneqarfissaminut ullullu pingajuanni makiffissaminut’. Petrusip tamanna tusaramiuk Jiisusi avinngarutitippaa oqaaqqissaalerlugulu ima oqarluni: „Imminut ajunngisaarfiginiarit, Naalagaq; taama pineqanngisaannassaatit.“ (NV) Erseqqippoq Petrusip isiginnittaasiata killitsiassusermit sunnerneqarsimanera. Naqqinneqarnissani pisariaqartippaa. Taamaammat Jiisusip taanna ima oqarfigaa: „Tununnut nigorit, Saatani! Tammartinniarparma [Uannut naakkiuffissiaavutit, NV]; Guutimmi pii pinnagit inuit pii isumagaatit.“ — Matthæusi 16:21-23.
18 Jiisusip oqaatigeqqammerpaa Guutip imminut tunngatillugu piumasaa suunersoq — tassa anniartitaangaartussaalluni toqutaasussaallunilu. (Tussiaat 16:10; Esaja 53:12) Taamaattumik Petrusi kukkuvoq Jiisusimik oqaaqqissaarilerami. Aap, Petrusip erseqqissumik naqqinneqarnissani pisariaqartippaa, uaguttaaq ilaanneeriarluta tamanna pisariaqartittarparput. Uiusoq ilaqutariinni ittuugami ilaquttaminik, aammattaaq nuliaminik, naqqiinissamut piginnaaniligaallunilu naqqiinissani akisussaaffigaa. Taamatut naqqiiniaraanni aalajangersimalluinnarnissaq pisariaqarsinnaagaluartoq, inussiarnersumik asannittumillu naqqiisariaqarpoq. Soorlu Jiisusip Petrusi eqqortumik isiginnittaaseqalernissaanut ikioraa, uiusoq ilaannikkut nuliaminut aamma taamatut iliortariaqarpoq. Assersuutigalugu uiusup nuliani allannguisariaqarneranik inussiarnersumik uparuuttariaqarsinnaavaa, nuliami atisai pinnersariaasialuunniit ingasaassinngitsuunissaq pillugu Biibilimi najoqqutassiamut naapertuukkunnaarpata. — 1 Petrusi 3:3-5.
Naammagittarneq — pissuseq uiusunut iluaqutaasoq
19, 20. (a) Jiisusip apustiliisa akornanni ajornartorsiut suna pilerpa, Jiisusillu tamanna qanoq iliuuseqarfigaa? (b) Jiisusip iliuuseqarnera qanoq iluatsilluartigaa?
19 Nuliaasoq ileqqupalaaqarpat uiusup naatsorsuutigissanngilaa ajornartorsiut ingerlaannaq aaqqissinnaassallugu naak ilumoorluni aaqqinniarsarigaluarlugu. Aammattaaq Jiisusi ajoqersukkami isiginnittaasiat aaqqinniarlugu iliuuseqartuartariaqarpoq. Assersuutigalugu taakku imminnut unammilersimapput Jiisusip kiffartornerata naggataatungaani malunnarseqqittumik. Kina arlartik annerpaartarinerlugu assortuussutigaat. (Markusi 9:33-37; 10:35-45) Aappassaanik taamatut assortuutereernerata kinguninngua Jiisusip taakkua naggammik poorskisioqatiginissaannut piareersaavoq. Poorskisiummik unnukkorsioqatigiinnissaminnut takkukkamik taakkua ilaat ataasiinnarluunniit ilami isigaannik pujorallersimasunik maniguulluni asattuiniarsimanngilaq, soorlumi taamaaliortarneq ileqquugaluartoq. Jiisusili taamaaliorpoq. Taamaalioreeramilu ima oqarpoq: „Maligassippassi.“ — Johannesi 13:2-15.
20 Uiusoq Jiisusitut maniguuttoq qularnanngitsumik nuliaminit suleqatigineqarumallunilu tapersersorneqarumassaaq. Naammagittarnissarli pisariaqarpoq. Unnuk taannarpiaq kingusinnerusukkut, apustilit arlartik ilaminit annerusutut naatsorsuunneqassanersoq assortuussutigeqqilerpaat. (Lukasi 22:24) Isiginnittaatsimik ileqqunillu allannguiniaasaartoqarsinnaavoq. Nalerisimaarnartaqaarli tamanna kinguneqarluaraangat, soorlu apustilinut tunngatillugu taamaassimasoq.
21. Uiusut ilungersortumik qanoq kajumissaarneqarpat, aamma susussaappat?
21 Ullumikkut aappariinnermi aatsaat taama unamminiarnartoqartigaaq. Inuit ilarpassuisa katinnermi neriorsoqatigiinnertik pimoorukkunnaartarpaat. Taamaattumik ilissi uiusut eqqarsaatigisiuk aappariinneq sumit pilerfeqarnersoq. Eqqaamajuk aappariinneq aaqqissuussinerusoq Guutitsinnit asannittumit, Jehovamit, isumassarsiarineqarlunilu pilersinneqartoq. Taassuma ernini, Jiisusi, tunniuppaa uagutsinnik utertitsisussaanera annaassisussaaneralu piinnarnagu, aammali uiusunut maligassaanissaa pillugu. — Matthæusi 20:28; Johannesi 3:29; 1 Petrusi 2:21.
Qanoq akissavit?
• Sooq aappariinnerup pilerfianik akuerinninnissarput pingaaruteqarpa?
• Uiusup nuliani qanoq ililluni asanninnermik ersersitsivigissavaa?
• Jiisusip ajoqersukkani qanoq pisarpai, aamma uiusoq qanoq iliorsinnaava ilaquttani Kristusip siulersuisimaneratut siulersorniarlugit?
[Atuaqqissaarnermi apeqqutit]
[Qupp. 14-mi assiliartaq]
Sooq uiusut Jiisusip arnanik qanoq pinnittarnera misissoqqissaartariaqarpaat?
[Qupp. 15-mi assiliartaq]
Jiisusi ajoqersukkani qasugaangata qasunerat eqqarsaatigalugu iliuuseqartarpoq
[Qupp. 16-mi assiliartaq]
Uiusup nuliani oqaatsit inussiarnersut eqqarsaatigilluakkallu atorlugit siunnersortariaqarpaa