Jehovap oqaasia uumavoq

Esajap allagaanit pingaarnersat — 2

ESAJA aalajaalluni pruffiititut sulivoq. Naggueqatigiissortat quliusut naalagaaffiannut Israelimut siulittuutai eqquutereerput. Maanna Jerusalemip siunissaa pillugu suli oqaasissaqarpoq.

Illoqarfik Jerusalemi piuneerunneqassaaq, tassanilu innuttaasut tigusarineqassapput. Inoqanngittuaannassanngilarli. Piffissap ilaa pallorfiginninneq ilumoortoq pilerseqqinneqassaaq. Tamakkuupput Esaja 36:1-imiit 66:24-mut tusarliussat pingaarnerit. * Atuakkap immikkoortuani tassani siulittuuterpassuit nalitsinni qanittukkullu pingaarnerusumik inaarutaasumillu eqquutissammata kapitalini taakkunani sammineqartut eqqarsaatigineri iluaqutigissavagut. Esajap allagaani immikkoortumi tamatumani aamma Missiarsi pillugu pissanganartunik siulittuuteqarpoq.

„ULLUT NALLIUKKUMAARPUT“

(Esaja 36:1–39:8)

Kunngip Hizkijap naalakkersuiffiisa 14-ianni (732-mi u.n.s.) Assyriamiut Judamut isaapput. Jehova neriorsuivoq Jerusalemi illersorumallugu. Isaanissaannut aarlerinartueruppoq Jehovap inngiliata ataatsip Assyriamiut sakkutuui 185.000-t toqummagit.

Hizkija napparsimalerpoq. Qinnutaa Jehovap akivaa ajorunnaarsillugulu, inuuneralu ukiunik 15-inik sivitsorlugu. Babylonip kunngia Hizkijamik ajorunnaarnera pillugu pilluaqqusiartortitsimmat Hizkijap isumaalliorluni pisuussutini tamaasa takutippai. Esaja Jehovameersumik Hizkijamut ima tusarliussaqarpoq: „Ullut nalliukkumaarput illussaarsuanniittut tamarmik siuaasavillu ulloq manna tikillugu katersorsimasaasa Babyloniamut aallarunneqarfissaat.“ (Esaja 39:5, 6) Ukiut 100-t sinnilaarlugit qaangiummata siulittuut eqquuppoq.

Allassimaffiit pillugit apeqqutit akineqartut:

38:8 — Suumuna tarraa kinguartoq? 700-kkunni u.n.s. seqinermut nalunaaquttat Egyptenimi Babylonimilu nalinginnaammata, seqinermut nalunaaqutaq Hizkijap angutaata Akazip pissarsiarisimasinnaasaa pineqarsimasinnaavoq. Imaluunniit oqaaseq hebræerisooq ’seqinermut nalunaaquttamik’ nutserneqartoq nutsiinnavillugu isumaqarmat ’tummeqqat’ illussaarsuup iluani tummeqqat pineqarsimasinnaapput. Tummeqqat sanianni sukaq tummeqqanut allanngorartumik tarranittarsimasinnaavoq, taamaanneralu nalunaaquttatut atorneqarluni.

Ilinniarfigisinnaasavut:

36:2, 3, 22. Naak Shebna pilittatut soraarsitaasimagaluarluni naalagaaffimmi allattuunertut kunngimut kiffartorsinnaatitaavoq. (Esaja  22:15, 19) Arlaannik pissuteqartumik Jehovap peqatigiissortaani immikkut pisinnaatitaaffimmik annaasaqassagaluarutta Guutip suliassiissutigisinnaasaa sunaluunniit suliaralugu taassumunnga kiffartortuartariaqarpugut, ilaa?

37:1, 14, 15; 38:1, 2. Annikilliuuteqaraangatta qinunikkut Jehova saaffigisarutsigu taassuminngalu tatiginnilluinnarutta silatusaassaagut.

37:15-20; 38:2, 3. Jerusalemi Assyriamiunit aarlerinartorsiortinneqarmat Hizkijap isumakuluutiginerpaavaa illoqarfiup tiguarneqarnerata Jehovap aqqanut kanngunarsaataanissaa. Hizkijap paasigamiuk nappaatini toqqutigissallugu imminuinnaq eqqarsaatiginngilaq. Daavip kinguaavinik kunngikkormiunik ingerlatitseqqittussamik suli ernertaannginnini pingaarnerutippaa. Aamma isumakuluutigaa Assyriamiunut sorsunnermi kina siuttuusinnaanersoq. Hizkijap isiginnittaaseqarneratut Jehovap aqqata illernartinneqarnissaa taassumalu siunertaata naammassineqarnissaa uagut nammineq annaanneqarnissatsinnit pingaarnerutipparput.

38:9-20. Hizkijap erinarsuusiaanit tamatumannga ilinniarparput Jehovamik unnersiutiginninneq inuunermi pingaarnerpaajusoq.

„Illoqarfiliareqqinneqassaatit“

(Esaja 40:1–59:21)

Jerusalemip piuneerussaanissaa juutillu Babylonimut aallarussaanissaat siulittuutigeqqammerlugit Esajap pilersitseqqinnissamik siulittuut saqqummiuppaa. (Esaja 40:1, 2) „[Jerusalemi] illoqarfiliareqqinneqassaatit,“ Esaja 44:28-mi allassimavoq. Babylonimiut guutiisa assingi nersutinut nammattartunut nammakkiutitillugit piiarneqassapput. (Esaja 46:1) Babyloni piuneerussaassaaq. Ukiut 200-t tamatuma kingorna tamakku tamarmik eqquupput.

Jehovap kiffani ’inuiannut qaammaqqutinngortissavaa’. (Esaja 49:6) „Nungujumaarpoq putsutut“ Babylonimiut ’qilaat’, imaluunniit naalakkersuisui, Babylonimilu innuttaasut „toqorarumaarput ippernatut“, kisianni ’Zionip paniata tiguagaasimasup kalunnerit qungatsimi qilerutai piiassavai’. (Esaja 51:6; 52:2) Jehova imminut palliguttunut tusarusuttunullu ima oqarpoq: „Soraajuitsumik angerfigeqatigissavassi Daavimut neriorsuutikka aalajaatsut eqquutitillugit.“ (Esaja 55:3) Inuit Guutip piumasaqaataanik naapertuilluartunik maleruaatillutik ’Jehova nuannaarutiminnut annerpaartaritissavaat’. (Esaja 58:14, NV) Ajortuliortarunilli ’Guutiminnit avissaarsimassapput’. — Esaja 59:2.

Allassimaffiit pillugit apeqqutit akineqartut:

40:27, 28 — Sooq Israeli ima oqarpa: „Aqqutiga [Jehovamut] isertorsimavoq, eqqortumik pineqarnissara Guutip soqutiginngilaa“? Juutit Babylonimiittut ilaat isumaqarsimasinnaapput naapertuilluanngitsuliorfigineqarnitik Jehovap takunngikkai ilisimanngikkaaluunniit. Eqqaasinneqarput Jehova, nunarsuarmik Pinngortitsisuusoq, qasussananilu nukillaarneq ajortoq aamma Babyloni inunngikkaa.

43:18-21 — Sooq aallarussaaqqareerlutik nunaminnut utertut ’pereersut eqqarsaatiminniitissanngilaat’? Imaanngilaq Jehovap siornatigut annaassiniarluni iliuuserisimasai puiussagaat. Jehovap kissaatigaa ’nutaat’ namminneq misigiumaakkatik — soorlu isumannaatsumik Jerusalemimut angalaneq, inoqajuitsukkut aqqutikkut immaqa toqqaannarnerusukkoorneq — pillugit unnersiutigissagaanni. ’Amerlangaartut annikilliortitaangaarnermit aniguisut’ Jehovamik naalannarsisitsinissaminnut aamma namminerisaminnut tunngasunik nutaanik pissutissaqassapput. — Saqqummersitat 7:9, 14.

49:6 — Missiarsi qanoq ’inuiannut qaammaqqutaasinnaava’ nunarsuarmi kiffartornera Israelikkunnuinnaq tunngaguni? Tamatuma akissutaa erserpoq Jiisusip toqunerata kingorna pisimasunit. Esaja 49:6 Biibilimi Jiisusip ajoqersugaanut tunngatinneqarpoq. (Apustilit Suliaat 13:46, 47) Ullumikkut kristumiut tanitat, pallorfiginnittunit ilumoortunit amerlangaartunik ikiorneqarlutik, ’inuiannut qaammaqqutaapput’ „nunarsuup isua tikillugu“ inunnik qaammarsaagamik. — Matthæusi 24:14; 28:19, 20.

 53:10, 1900/1961 — Jehovap ernerminik sequmisitsinerminik iluarinninnera qanoq paasisariaqarpa? Jehovap, Guutiusup asannittuusup misigittartuusullu, erni asasani naalliuttoq isigalugu anniaatigisimassaqaa. Iluarisai tassaapput Jiisusip naalliunnissaminut piareersimanera, aamma naalliunneratigut toquatigullu naammassineqartut tamaasa. — Ussatit 27:11; Esaja 63:9.

53:11, 1900/1961 — Ilisarisaanermigut Missiarsip ’amerlasuut iluartuutissagai’ qanoq paasisariaqarpa? Ilisarisaaneq, imaluunniit ilisimassuseq, pineqartoq tassaavoq Jiisusip nunarsuarmukarnermigut, inunngornermigut toqussilu tikillugu pinertusaarluni naapertuilluanngitsuliorfigineqarluni naalliutsitaanermigut paasisimaligai. (Hebræerit 4:15) Taamaalilluni pilersippaa utertitsissutitut pilliut kristumiut tanitat amerlangaartullu Guutimi naapertuilluartuutitaanissaannut pisariaqartoq. — Romamiut 5:19; Jaaku 2:23, 25.

56:6 — „Takornartat“ kikkuuppat, qanorlu ’Jehovap angerusianik aalajangiussippat’? „Takornartat“ tassaapput Jiisusip ’savaatai allat’. (Johannesi 10:16) Angeruseq nutaaq aalajangiusimavaat ima paasillugu inatsisinut angerutsimut tunngasunut naalapput, tassungalu tunngatillugu aaqqissuussinernik tapersersuilluinnarput, kristumiullu tanitat anersaakkut inuussutissalersorneqarnerattulli inuussutissalersorneqarput Guutillu naalagaaffianik oqaluussinermi ajoqersuganngortitsiortornermilu tanitat ikiorpaat.

Ilinniarfigisinnaasavut:

40:10-14, 26, 28. Jehova nukittuujullunilu qajassuussisuuvoq, ajugaqanngitsuullunilu sunik tamanik ilisimasaqarpoq, paasisimasaqassusialu uagut paasisinnaasatsinnik akimuingaarpoq.

40:17, 23; 41:29; 44:9; 59:4. Politikkikkut iligiinnerit guutipiluillu „piunngillat“, naleqanngillat. Taamaattumik tatigineqassanngillat.

42:18, 19; 43:8. Guutip oqaasianik allassimasumik sumiginnaaneq aamma „kiffaq ilumoortoq silatoorlu“ aqqutigalugu inassutaanik peqqussutaanillu tusaajumannginnerup assigaa anersaakkut tapiitsunngorneq tusilartunngornerlu. — Matthæusi 24:45.

43:25. Jehova imminut pilluni unioqqutitsinernik piiaassaaq. Aqqata illernarsisinneqarnissaa ajortimut toqumullu inussiaataanitsinnit aniguisitaanissatsinnit naassaanngitsumillu inuulernissatsinnit pingaarneruvoq.

44:8. Jehovamit, qaarsutut aalajaatsigisumit, annertoqqusersorneqarpugut. Guutiussusiata nalunaajaatiginissaa annilaangatiginngisaannartariaqarparput! — 2 Samueli 22:31, 32.

44:18-20. Guutipilussiorneq uummatip ajortunngorsimaneranut ersiutaavoq. Jehovap uummatitsinni inissisimaffia allanit ingiarneqartinngisaannassavarput.

46:10, 11. Jehovap pilersaarutiminik, imaluunniit siunertaminik, naammassinnissinnaanera Guutiussusianut uppernarsaataavoq erseqqissoq.

48:17, 18; 57:19-21. Jehovap annaassinissaanik tatiginnikkutta, taassumunnga palligukkutta peqqussutaalu eqqumaffigigutsigik eqqissineq kuussuup imeqarluartigineratulli atsigisoq pigilissavarput, naapertuilluartuliornivullu immap malingisut amerlatigilissapput. Guutip oqaasianik eqqumaffiginninngitsut assigaat „imaq mallersoq“. Eqqissiveqanngillat.

52:5, 6. Babylonimiut isummeramik Guuti ilumoortoq sanngiitsuusoq kukkupput. Paasinngilaat Israelikkut inussiaataasut Jehovamit iluarisaajunnaarnertik pissutigalugu. Ajunaarnermik eqqugaasoqaraangat tamatumunnga pissutaasoq pillugu isummerniapallattassanngilagut.

52:7-9; 55:12, 13. Guutip naalagaaffianik oqaluusseqataanissatsinnut ajoqersuganngortitsiortoqataanissatsinnullu minnerpaamik pingasunik pissutissaqarpugut. Inunnut maniguuttunut anersaakkut kaattunut tusarnersuuvugut. Jehova ’nammineerluta takuarput’, tassa taassumunnga qanittumik attaveqarpugut. Aamma anersaakkut atugarissaarpugut.

52:11, 12. „Immersakkanik [Jehovap] piinik“ — illernartumik kiffartorsinnaaqqulluta aaqqissuussaanik — tigumiartuusinnaassagutta ileqqussatigut  anersaakkullu minguitsuusariaqarpugut.

58:1-14. Upperluartuusaarneq naapertuilluartuusaarnerlu naleqanngilluinnarput. Pallorfiginnittut ilumoortut Guutimut tunniusimanermik qatanngutigiittullu asaqatigiinnermik ilumoortumik ilisarnaateqassapput. — Johannesi 13:35; 2 Petrusi 3:11.

59:15b-19. Jehovap nunarsuarmi susoqarnera malugisarpaa, piffissarlu aalajangikkani nalliuppat akuliutissaaq.

ZIONI ’NIAQORUTINNGUSSAAQ KUSANANGAARTOQ’

(Esaja 60:1–66:24)

Pallorfiginninnerup ilumoortup itsaq nalitsinnilu pilerseqqinneqarnera pillugu Esaja 60:1-imi ima allassimavoq: „Nikutserit, qaammalerit qaammaqqutissat takkutereermat [Jehovallu] naalannassusiata nuiffigimmatit.“ Zioni ’niaqorutinngussaaq kusanangaartoq Jehovap assaani’. — Esaja 62:3.

Esaja Jehovamut qinuvoq nunaqqatini Babylonimi aallarussaaqqanerminni allamik isumataarumaartut sinnerlugit. (Esaja 63:15–64:11) Pruffiitip pallorfiginnittut ilumoortut ilumuunngitsullu assigiinngissutaat oqaluttuarereerlugu nalunaarpoq Jehovap kiffartortini qanoq pilluaqqujumaarai. — Esaja 65:1–66:24.

Allassimaffiit pillugit apeqqutit akineqartut:

61:8, 9 — ’Angeruseq ataavartussaq’ suua, aamma ’kinguaassat’ kikkuuppat? Tassaavoq angerusisaaq Jehovap kristumiunik tanitanik angerfigeqatiginnissutaa. ’Kinguaassat’ tassaapput ’savat allat’ — inuit millionilikkuutaat taakkua tusarliussaannut ajunngitsumik periartut. — Johannesi 10:16.

63:5 — Guutip kamannini qanoq ikiuisigaa? Guutip kamannini — uumitsaatiginninnini naapertuilluartoq — aqussinnaajuaannarpaa. Eqqartuussutiminik naapertuilluartunik naammassinninnissaminut kamannini ikiuisigalugulu kajumississutigaa.

Ilinniarfigisinnaasavut:

64:5. Inuit naammalluinnanngitsut imminnut annaassinnaanngillat. Ajortit saammaanneqarnissaannut atatillugu naapertuilluartuliornerat atisatut minguttutut iinnarput. — Romamiut 3:23, 24.

65:13, 14. Jehovap kiffani aalajaatsut pilluaqqusarpai anersaakkullu pisariaqartitaannik naammangaartunik isumagisarlugit.

66:3-5. Jehovap ilumoortuusaarneq uumigaa.

’Tipaatsussaasi’

Juutit aalajaatsut Babylonimi aallarussaaqqasut pilersitseqqinnissamik siulittuutit tuppallersaatigisimassaqaat! Jehova ima oqarpoq: „Pinngortitakka naassaanngitsumik tipaatsuutigalugillu qiimmattaatigissavasi Jerusalemi qiimmattaatissanngortissagakku inuilu tipaatsuutissanngortillugit.“ — Esaja 65:18.

Aamma uagut nunap inuiaallu taarmiuuffigisaanni inuuvugut. (Esaja 60:2) ’Ulluni atugarliungaarfiusuni’ inuuvugut. (2 Timotheusi 3:1) Taamaattumik Biibilimi Esajap allagaani Jehovap annaanneqarnissamik tusarliussaa qiimmassaatigingaarparput. — Hebræerit 4:12. (wE 1/15 07)

[Quppernerup ataani ilanngussaq]

[Qupp. 28-mi assiliartaq]

Hizkijap Assyriamiunit aniguisitaanissamik qinunerminut pingaarnertut suna pissutigaa?

[Qupp. 31-mi assiliartaq]

„Ila tusarningaarami oqariartuuteqartup qaqqani pisuppalua!“