Saatani akiorsiuk, taava qimaassaaq!

„Guutimut naalatsigitinniaritsi; Diaavululu akerartorsiuk [akiorsiuk, NV], taava ilissinnit qimaassaaq.“ — JAAKU 4:7.

1, 2. (a) Diaavulup pissusiisa ilaat sorleq Esajap allagaani kapitali 14-imi allaatigineqarpa? (b) Apeqqutit suut misissussavavut?

DIAAVULU makitalluinnartuuvoq. Pingaarniarnera Guutip pruffiitiata Esajap allagaani allaatigineqarpoq. Ukiut 100-t sinnerlugit Babylonip silarsuarmi pissaneqangaartutut naalagaaffissuanngornissaa sioqqullugu Esaja allappoq Jehovap innuttaasa ’Babylonip kunngia’ ima oqarfigigaat: „Illit uummatikkut oqartarputit: ’Qilammut pavunnassaanga napparlugu tappavani issiavissaarsuara Guutip ulloriaasa [kunngit Daavip kinguaavisa] qulaanni; . . . Qutsinnerussaartoq [assigilerpara].’“ (Esaja 14:3, 4, 12-15; 4 Mosesi 24:17) ’Babylonip kunngiata’ pingaarniarnera anersaamut Saatanip, „silarsuup matuma guutiata“, ilisarnaatigisaanut assingussupilussuuvoq. (2 Korinthimiut 4:4) Saatanilli makitanera ajunaarutaasumik kinguneqassaaq, soorluttaaq Babylonimi kunngit kinguaariit naalakkersuinerat nikanarsaataasumik naggaserneqartoq.

² Kisianni Diaavuloqartuartillugu immaqa apeqqutit soorlu imaattut eqqarsaatigisarpavut: Taassuma ersiginissaanut pissutissaqarpa? Sooq kristumiunik malersuisitsisarpa? Qanoq ililluta taassumannga nakutinneqarnaveersaarsinnaavugut?

Diaavulup ersiginissaanut pissutissaqarpa?

3, 4. Sooq kristumiut tanitat taakkualu suleqataasa Diaavulu ersiginngilaat?

³ Jiisusip oqaasii uku kristumiut tanitat nakussatsissutigingaarpaat: „Naalliunnissatit sioorageqinagit, Diaavulup ilasi parnaarussivimmut pisikkumaarpai misilinneqaqqullusi, naalliunnartorsiussaasilu ulluni qulini. Toqumut allaat ilumoorit, taava ajugaasumut niaqorusiussassaq inuussutaasoq ilinnut tunniukkumaarpara.“ (Saqqummersitat 2:10) Tanitat aamma taakkua suleqataasa nunarsuarmi inuunissamik neriugisallit Diaavulu ersiginngilaat. Ersisuitsuunerat inunnguuseralugu sapiitsuunermik pissuteqanngilaq. Guutimik mianerinninnerannik taassumalu ’suluisa alanngigaanni qimarnguffissarsiornerannik’ pissuteqarpoq. — Tussiaat 34:10; 36:8.

⁴ Jiisusi Kristusip ajoqersugai ersisuitsut ukiuni hundredelinni siullerni inuusut naalliutsitaagaluarlutik toqumut allaat ilumoorput. Taakkua Saatani Diavulup iliuusereratarsinnaasaanut ersineq nakkaannarfiginngilaat, nalunngilaammi Jehovap imminik ilumoorfiginnittuartut imminiiginnanngisaannassagai. Ullumikkut kristumiut tanitat taakkualu suleqataat tunniulluinnarsimasut peqqarniitsumik malersorneqaraangamik, taakkuattaaq Guutimik ilumoorfiginnittuarnissartik  aalajangiusimavaat. Paulusilli eqqartorpaa Diaavulu toqutsisinnaasoq. Tamanna eqqarsaatigalugu ersinissamut pissutissaqarpugut?

5. Hebræerinut allakkat 2:14, 15-mi allassimasoq qanoq ilinniarfigisinnaavarput?

⁵ Paulusi allappoq Jiisusi uinilinngorlunilu aalinngortoq „toqumigut pissaaneerutitikkumallugu taanna toqup pissaaneranik peqartoq, tassa Diaavulu, aniguisittussaagamigillu taakku toqumut ersinermit inuunertik tamaat inussiatut qunutitaasut“. (Hebræerit 2:14, 15) ’Toqup pissaaneranik peqartup’ Saatanip Judasi Iskarioti pissaaneqarfigilerpaa kingornalu juutit siuttui Romamiullu Jiisusimik toqutsisillugit. (Lukasi 22:3; Johannesi 13:26, 27) Pilliutitulli toqunermigut Jiisusip inuiaat ajortiliusut Saatanip pissaaneranit aniguisissimavai naassaanngitsumillu inuunissamik periarfissilluta. — Johannesi 3:16.

6, 7. Diaavulu toqutsinissamut qanoq pissaaneqartigaa?

⁶ Diaavulu toqutsinissamut qanoq pissaaneqartigaa? Taassuma ajortuliuleqqaarneraniilli salluliorneri siulersuineralu inunnut toqumik kinguneqartuarsimapput. Adami ajortuliortippaa, taassumalu ajorti toqulu inuiannut tamanut kingornutsippai. (Romamiut 5:12) Aammattaaq Saatanip nunarsuarmi ikiortaasa Jehovap kiffai malersortarsimavaat, ilaannikkut Jiisusimut iliorsimanermissut toqumut allaat.

⁷ Imaanngilarli Diaavulup toqukkumasani kinaluunniit toqussinnaagaa. Guutip inuit pigisani illersortarpai, Saatanillu nunarsuarmi pallorfiginnittunik ilumoortunik tamanik nungutitsinissaa akuerinngisaannassavaa. (Romamiut 14:8) Jehovap kiffami tamarmik malersorneqartarnerat akuerigaluarpaa, Diaavulullu saassussinerata kinguneranik ilatta toqunissaat akueraa. Biibilimili nuanningaartumik neriorsuutigineqarpoq Guutip ’imminik mianerinnittut eqqaamaneqaqqullugit mappersagaani allanneqartut’ toqusunit makitinneqarumaartut — Diaavulullu taakkua uummaqqinnissaat pinngitsoortissinnaanngivippaa! — Malaki 3:16; Johannesi 5:28, 29; Apustilit Suliaat 24:15.

Sooq Saatanimit malersorneqartarpugut?

8. Sooq Diaavulu Guutip kiffaanik malersuisitsisarpa?

⁸ Guuti ilumoorfiginnilluta kiffartorfigigutsigu, Diaavulup uagutsinnik malersuisarneranut tunngaviusumik pissuteqarpoq. Uppernikkut sanngiillisinneqarnissarput anguniagaraa. Ataatatsinnut qilammiusumut erlinnartumik attaveqarpugut, attaveqarnerlu tamanna Saatanip aserorusukkaluarpaa. Tamanna tupigusuutigissanngilarput. Edenimi Jehovap siulittuutigaa arnap assersuutaasup pigisami ’pulateriaarsuullu’ imminnut akerariikkumaarnerat taakkualu tamarmik immikkut ’kinguaassaasa’ imminnut akerariikkumaarnerat. (1 Mosesi 3:14, 15) Biibilimi ersersinneqarpoq Diaavulu tassaasoq „pulateriaarsutoqaq“ taannalu maanna piffissakillunilu kamattorsuusoq. (Saqqummersitat 12:9, 12) Arnap pulateriaarsuullu ’kinguaassaat’ imminnut akerariittuartillugit Jehovamut  kiffaasut aalajaatsut malersorneqartarnissartik ilimagisinnaavaat. (2 Timotheusi 3:12) Saatanip uagutsinnik malersuisarneranut pissutiviusoq illit eqqumaffigaajuk?

9, 10. Akerleriissut suna Diaavulup pilersippaa, tamannalu qanoq pissusilersornitsinnut attuumassuteqarpa?

⁹ Diaavulup qilammi nunamilu kisimi oqartussaaneq pillugu akerleriissut pilersissimavaa. Akerleriissummut tamatumunnga atatillugu aamma inuit Pinngortitsisiminnut assuarnaassusiat apeqqusersimavaa. Sooq Saatanip angut peqqusersuitsoq Jobi malersorneqartippaa? Taamaaliorpoq taanna Jehovamut assuarnaakkunnaarsinniarlugu. Jobip nulia ’tuppallersaasullu erloqisitsiinnartut’ pingasut taamani Diaavulup piumasaatut iliorput. (1990) Soorlu Jobimik allakkat-ni ersersinneqartoq Diaavulup Guuti unammilleraa oqarluni inuk kinaluunniit Guutimut aalajaattuassanngitsoq taassuma Saatanimit misilinneqarnissaa akuerineqarpat. Jobili assuarnaattuaannarpoq, taamaalillunilu uppernarsarpaa Saatani sallutuujusoq. (Jobi 1:8–2:9; 16:2; 27:5; 31:6) Ullumikkuttaaq Diaavulup Jehovap Nalunaajaasui malersortarpai assuarnaakkunnaartinniarsaralugit oqaatsinilu uppernarsarniarsaralugit.

¹⁰ Diaavulup uagutsinnik malersuisitsineranut pissutaasoq nalunnginnatsigu — tassa Guutimut assuarnaakkunnaarsikkusungaarpaatigut — sapiitsuusinnaallutalu nakuusinnaavugut. (5 Mosesi 31:6) Guuterput Naalagaavoq qilammi nunamilu kisimi oqartussaasoq, taassumalu assuarnaattuarnissatsinnut ikiorumaarpaatigut. Tamatigut Jehovap uummataa nuannaartinniartartigu assuarnaattuarnitsigut Jehovamillu mitalliisumut pingaarnermut, Saatani Diaavulumut, taanna akissutissaqartillugu. — Ussatit 27:11.

„Ajortumit annaatsigut“

11. Qinnut „ussernartumut pisinnata“ qanoq paasisariaqarpa?

¹¹ Assuarnaattuarnissaq imaannaanngilaq; assuarnaattuassagutta ilumoorluta qinusariaqarpugut. Ingammik oqaatsit qinnummi najoqqutassaasumi ataatarpuumiittut iluaqutaassapput. Jiisusi qinnummi tamatumani ilaatigut ima oqarpoq: „Ussernartumut pisinnata, ajortumilli annaatsigut.“ (Matthæusi 6:13) Jehovap ajortuliornissamut usserneq ajorpaatigut. (Jaaku 1:13) Ilaatigulli Biibilimi eqqartorneqarpoq Guuti arlaannik iliuuseqartoq imaluunniit arlaannut pisuusoq, naak tamatuminnga akuerinniinnaraluartoq. (Ruthi 1:20, 21) Taamaattumik Jiisusip oqaasii atorlugit qinugaangatta Jehova qinnuigisarparput ussernartunut nakkaannarnissarput akuereqqunagu. Qinnuterpullu taanna tusassavaa, Biibilimimi ima neriorsoqqissaarneqarpugut: „Guuti unneqqarippoq; akuersaarumanngilaa artukkassinnik usserneqarnissarsi, kisianni usserneqarnermut ilagitillugu aniguiffissaq pilersissavaa artorsartitaaqqunasi.“ — 1 Korinthimiut 10:13.

12. Sooq ima qinusarpugut: „Ajortumit annaatsigut“?

¹² Qinnummi najoqqutassaasumi ussernartut eqqaareerlugit Jiisusi tulluartumik ima oqarpoq: „Ajortumit annaatsigut.“ (Matthæusi 6:13) Biibilimik nutsikkat ilaanni ima allassimasoqarpoq: „Ajortunit annaatsigut“, imaluunniit „Ajortunut illersortigut“. (Assersuutigalugu Biibilimik nutsikkat qallunaatuut akuerisaasut 1948-meersoq aamma 1992-imeersoq; Contemporary English Version) Biibilimili oqaatsit ’-mit annaassineq’-mik nutserneqartartut pingaartumik kinaassusilinnut tunngatillugu atorneqartarput, Matthæusillu iivangkiiliuani Diaavulu ’Ussiisutut’, tassa kinaassusilitut, eqqaaneqarpoq. (Matthæusi 4:3, 11) Taamaattumik „ajortumit“, tassa Saatani Diaavulumit, annaanneqarnissamik qinusarneq pingaaruteqarpoq. Taassuma Guutimut ajortuliortinniarsaraatigut. (1 Thessalonikamiut 3:5) Ima qinugaangatta „ajortumit annaatsigut“, Ataatarput qilammiusoq qinnuigisarparput siulersoqqullutalu ikioqqulluta Diaavulumit nakutinneqannginniassagatta.

 Diaavulumit nakutinneqaqinasi

13, 14. Korinthimiut sooq ilagiinni angut kinguaassiuutitigut inuunerlulluni inuusimasoq allatut isiginnittaaseqarfigilertariaqarpaat?

¹³ Paulusip kristumiut Korinthimiittut isumakkeerfiginnittaqqullugit kajumissaaramigit ima allappoq: „Ilissi isumakkeerfigiumasarsi uangattaaq isumakkeerfigaara. Isumakkeerfigisimasarami — isumakkeerfigisassaqarsimaguma — ilissi pillusi isumakkeerfigaara Kristusip kiinaata saani Saatanimit nakutinneqaqqunata; nalunngilarpummi taanna qanoq ittumik pilersaaruteqartoq.“ (2 Korinthimiut 2:10, 11) Diaavulup assigiinngitsutigut nakutissinnaavaatigut, kisianni sooq Paulusip Korinthimiut taama allaffigai?

¹⁴ Tamatuma siorna Paulusip Korinthimiut naveersimavai angut kinguaassiuutitigut inuunerluttoq ilagiinniitiinnarsimammassuk. Ilagiit ’kinguaassiuutitigut inuunerlunneq allaat Guutimik nalusuni ileqqorineqanngitsoq’ tamanna akuerimmassuk ilagiinnut kanngunarsaataasoq Saatanip nuannaarutigisimassavaa. Naggataatigulli unioqqutitsisoq ilagiinnut ilaajunnaarsinneqarpoq. (1 Korinthimiut 5:1-5, 11-13) Kingusinnerusukkut angut taanna peqqissimivoq. Korinthimiut maanna taanna isumakkeerfigiumanngikkaluarpassuk ilagiinnullu ilanngutiteqqikkumanngikkaluarpassuk, Diaavulup taakku allatut nakutissagaluarpai. Qanoq? Misigittaatsunngussagaluarlutillu naakkittaatsunngussagaluarput, soorluttaaq Saatani nammineq taamaattoq. Angut peqqissimisoq taanna ’aliasunnermit suli annerusumit sapilersinneqaraluarpat’ taamaatilluinnarlunilu, ingammik utoqqaanertat tamanna pillugu Guutimut naakkinnittumut, Jehovamut, akisussaaqataassagaluarput. (2 Korinthimiut 2:7; Jaaku 2:13; 3:1) Soorunami kristumiup ilumoortup kialuunniit peqqarniisaarnikkut, misigittaatsuliornikkut naakkittaatsuliornikkullu Saatani ilaarusunngilaa.

Guutip sakkutuussutaanit tamarmiusunit illersorneqarneq

15. Kikkut sorsuffigaavut, sunalu ajugaanissatsinnut aalajangiisuua?

¹⁵ Diaavulumit aniguissagutta, anersaanut pissaanilinnut ajortunut anersaakkut sorsuttariaqarpugut. ’Guutip sakkutuussutaanik tamarmiusunik’ atisisimanerput akiuunnermi tamatumani ajugaanissatsinnut aalajangiisuuvoq. (Efesosimiut 6:11-18) Sakkutuussutit tamakkua ilagaat ’iluarnermik saattuaasaqarneq’. (Efesosimiut 6:14) Israelimi kunngi Sauli Guutimut naalanngippoq anersaavalu illernartoq annaallugu. (1 Samueli 15:22, 23) Uagulli iluartuliorutta sakkutuussutillu tamarmiusut anersaakkut ittut atisimagutsigit taassuma anersaava illernartoq pigissavarput Saatanimullu taassumalu inngilipiluinut illersorneqassalluta. — Ussatit 18:10.

16. Qanoq anersaanut pissaanilinnut ajortunut illersorneqartuarsinnaavugut?

¹⁶ Anersaanut pissaanilinnut ajortunut illersorneqartuassagutta, ilaatigut aalajangersimasumik Guutip oqaasia atuarlugulu atuaqqissaartariaqarparput aamma atuagassiat atuakkallu ’pilittap ilumoortup silatuullu’ pilersittagai atorluartarlugit. (Lukasi 12:42) Taamaalilluta isumarput eqqarsaatinik anersaamut tunngasunik peqqinnartunillu immersortarparput Paulusip siunnersuutaa una naapertorlugu: „Qatanngutit, pingaartissigit suut ilumoortut tamaasa, suut assuarnaatsut, suut iluartut, suut minguitsut, suut asanartut, suut ajunngitsumik oqaatigineqarsinnaasut, tassa suut ajunngitsut nersornartullu.“ — Filippimiut 4:8.

17. Nutaarsiassamik nuannersumik oqaluussillaqqissunngornissamut suna iluaqutigissavarput?

¹⁷ Jehovap ’pitseriassutsimik kamippaqaannarsinnaanngortippaatigut  eqqissinerup iivangkiiliuanik ingerlassisussatut’. (Efesosimiut 6:15) Kristumiut ataatsimiinnerinut najuuttuartarutta, Guutip naalagaaffianik nutaarsiassaq nuannersoq oqaluussissutigisinnaanngortarparput. Nuannersorujussuuvoq Guuti pillugu sallusuissummik ilinniartinneqarnissaannik anersaakkullu kiffaanngissuseqalernissaannik allanik ikiuineq! (Johannesi 8:32) Ajoqersuutinik eqqunngitsunik naqqiissagaangatta aamma ’pallittaalisalianik aserorterissagaangatta’ ’anersaap panaa, tassa Guutip oqaasia,’ pinngitsoorneqarsinnaanngilaq. (Efesosimiut 6:17; 2 Korinthimiut 10:4, 5) Guutip oqaasianik allanneqarsimasumik atuillaqqinnikkut sallusuissummik ajoqersuisinnaavugut namminerlu Diaavulup peqquserlunneranut nakkaannarnissatsinnut illersorneqarluta.

18. Qanoq ’atasinnaavugut Diaavulup qoqassiniaraangatsigut’?

¹⁸ Paulusip sakkutuussutivut anersaakkut ittut allaatigigamigit ima aallarniivoq: „Naalakkami pissaanersuanilu nakuugitsi. Guutip sakkutuussutai tamarmiusut atiniarsigit atasinnaaqqullusi Diaavulup qoqassiniaraangasi.“ (Efesosimiut 6:10, 11) Grækerit oqaasiat ’atasinnaanermik’ nutserneqartoq sakkutooq pigaarfissaminiiginnartoq pillugu atorneqartarpoq. Anersaakkut sorsuffimmi atavugut naak Saatanip assigiinngitsutigut qoqassiniaraluaraatigut ataasiussuserput aserorniarsaralugu, ajoqersuutigisavut ajortunngortinniarsaralugit Guutimullu assuarnaakkunnaartinniarsaraluta. Manna tikillugu Diaavulu Guutip innuttaanik saassussisarnerminni iluatsisimanngilaq — iluatsinngisaannassaarlu! *

Diaavulu akiorsiuk, taava qimaassaaq

19. Qanoq Diaavulumut imminut illersortoqarsinnaava?

¹⁹ Diaavulumut anersaanullu pissaanilinnut ajortunut taassumannga siulersortittunut anersaakkut sorsunnitsinni ajugaasinnaavugut. Saatanimut ersinermik sajunnissamut pissutissaqanngilaq, ajoqersugaq Jaaku ima allammat: „Guutimut naalatsigitinniaritsi; Diaavululu akerartorsiuk [akiorsiuk, NV], taava ilissinnit qimaassaaq.“ (Jaaku 4:7) Saatanimut anersaanullu pissaanilinnut ajortunut taassuma tapersersortaanut illersuutissat ilaat tassaavoq anersaarsiornermut angakkuarnermullu tunngasunik tamanik inunnillu tamakkuninnga sammisaqartunik tamanik ingalassimanninneq. Biibilimi erseqqilluinnarpoq Jehovap kiffai pisussanik ilimasaarinermik, ullorissat najoqqutaralugit allatigulluunniit siulittuinermik anersaarsiornermillu sammisaqassanngitsut. Anersaakkut suliniuteqartarutta nukittuujuguttalu, kimilluunniit anersaarsiornikkut ajoquserneqarnissarput annilaangagissanngilarput. — 4 Mosesi 23:23; 5 Mosesi 18:10-12; Esaja 47:12-15; Apustilit Suliaat 19:18-20.

20. Qanoq ililluta Diaavulu akiorsinnaavarput?

²⁰ ’Diaavulu akiorparput’ najoqqutassianik sallusuissutinillu Biibilimeersunik aalajangiussinikkut Diaavululu akiorniarlugu aalajangerluinnarsimanikkut. Silarsuaq Diaavulumut naapertuuppoq taanna guutigigamiuk. (2 Korinthimiut 4:4) Taamaattumik silarsuarmi nalinginnaasumik pissuserineqartut, soorlu pingaarniarneq, namminissarsiorneq, kinguaassiuutitigut inuunerlunneq, nakuuserneq pigisaleritunerlu, akuersaanngilavut. Nalunngilarput Diaavulu qimaasoq Jiisusip inoqajuitsumi taassuma ussiiniarneri Allakkat atorlugit itigartimmagit. (Matthæusi 4:4, 7, 10, 11) Taamatuttaaq Saatani ajorsassallunilu ’uagutsinnit qimaassaaq’ Jehovamut naalatsigitilluinnarutta qinunikkullu taassumunnga qanittarutta. (Efesosimiut 6:18) Jehova Guutip taassumalu ernerata asasaata ikiormatigut kialuunniit ataavartumik ajoqusersinnaanngilaatigut — Diaavululluunniit naami! — Tussiaat 91:9-11. (wE 1/15 06)

[Quppernerup ataani ilanngussaq]

Uteqqiineq

• Saatani Diaavulup ersiginissaanut pissutissaqarpugut?

• Sooq Saatani kristumiunik malersuisitsisarpa?

• Sooq ’ajortumit annaanneqaqqulluta’ qinusarpugut?

• Qanoq anersaakkut sorsunnermi ajugaasinnaavugut?

[Atuaqqissaarnermi apeqqutit]

[Qupp. 27-mi assiliartaq]

Jiisusi Kristusip ajoqersugai ersisuitsut toqumut allaat ilumoorput

[Qupp. 28-mi assiliartaq]

Diaavulup Jehovap eqqaamasaasa toqumit makititaanissaat pinngitsoortissinnaanngilaa

[Qupp. 29-mi assiliartaq]

Illit ’ajortumit annaanneqaqqullutit’ qinusarpit?

[Qupp. 30-mi assiliartaq]

„Guutip sakkutuussutai tamarmiusut“ atisimavigit?