Ilumoorfiginninneq iluaqutaavoq

NUNAT ilaanni meeqqat pinnguaqatigisartakkamik atisaat burrelersorlugit qinngasaarineq nuannarisarpaat (burre tassaavoq naasup kaavequtaa oqummersaaraasartalik). Burret ingammik atisanut meqqulualinnut naatissuuttarput, meeqqallu qanorluunniit ilioraluarpata — pisukkaluarpata, arpakkaluarpata, pisseqattaaraluarpata atisatilluunniit issuttuukkaluarpatigik — katatsitassaaneq ajorput. Katatsinniaraanni ataasiakkaarlugit nutsunneqartariaqarput. Tamanna meeqqanut nuannersuuvoq.

Soorunami kialuunniit atisami burreninnera nuannarinngilaa, tamattali naatillaqqissusiat alutoraarput. Inuk ilumoorfiginnittoq aamma aalajaatsuuvoq. Ilumoorfiginnittoq aalajaalluni inummut allamut qanittumik attaveqartuartarpoq. Inummut attaveqarnermut taamaattumut atatillugu aalajaatsuuvoq pisussaaffimminillu eqqortitsisarluni aamma pissutsit erloqinaraluarpata. Oqaaseq „ilumoorfiginninneq“ sallusuissusermut, ilumuussusermut tunniusimanermullu tunngatinneqartarpoq. Qularnanngitsumik inuit ilinnut ilumoorfiginninnissaat pingaartingaarpat, illilli allanut ilumoorfiginninnissat nukissaqarfigalugulu piginnaaneqarfigaajuk? Taamaappat kimut ilumoorfiginnittussaavit?

Aappariinnermi ilumoorfigeqatigiinneq pisariaqarpoq

Aappariit ilumoorfigeqatigiinnissaat pingaaruteqarpoq, alianaraluartumilli taamatut pissuseqartut ikittuinnaapput. Uiusup nuliaasullu katinnermi neriorsoqatigiinnerminnik — tassa aappariiginnarniarlutik tamarmillu immikkut aapparminnut ajunngitsussap sulissutiginissaanik neriorsuutimik — aalajaallutik eqquutitsinerat pilluarnissaannut toqqissisimanissaannullu pingaaruteqangaarpoq. Sooq? Inuit allanit ilumoorfigineqarnissamik namminerlu allanut ilumoorfiginninnissamik pisariaqartitaqartutut pinngortitaagamik. Guutip Edenimi Adami Evalu aappariilersikkamigit ima nalunaarpoq: „Angutip ataatani anaananilu qimallugit nuliani attavigissavaa.“ Nuliaasoq aamma taamaaliussaaq; uini attavigissavaa. Uiusoq nuliaasorlu aalajaaffigeqatigiillutillu suleqatigiissapput. — 1 Mosesi 2:24; Matthæusi 19:3-9.

Ukiut tusindit arlallit matuma siornali oqaatsit taakku Adamimut Evamullu oqaatigineqarput. Taavami isumaqarpa aappariinnermi ilumoorfigeqatigiinneq ullumikkut qanganisaavallaartoq? Inuit amerlanerit naamiissapput. Tysklandimi isumasiuinermi paasineqarpoq 80 procentit aappariinnermi ilumoorfigeqatigiinneq pingaaruteqartilluinnaraat. Misissuinermi allami paasiniarneqarpoq angutini arnanilu suut pissuserineqartussatut kissaatigineqarnerpaajunersut. Angutit aperineqarput inuit pissusii tallimat sorliit arnani nuannarinerpaaneraat, arnallu aamma aperineqarput inuit pissusii tallimat sorliit angutini nuannarinerpaaneraat. Pissuseq angutit arnallu pingaartinnerpaasaat tassaavoq aalajaassuseq.

Aap, ilumoorfigeqatigiinneq pissusiuvoq pilluarluni aappariinnermut tunngavissaalluartunut ilaasoq. Allaaserisalli matuma siuliani takuarput ilumoorfiginninneq pingaartinneqaraluarluni qaqutiguinnaq pissuserineqartartoq. Assersuutigalugu nunani amerlasuuni avittut  amerlanerujussuat ilumoorfigeqatigiinnginnerup nalinginnaaneranut ersiutaavoq. Tamatumunnga aappariit qanoq illersorsinnaappat ilumoorfigeqatigiillutillu?

Aappariit ilumoorfigeqatigiittut aappariiginnartarput

Ilumoorfigeqatigiinnermut ersiutaasarpoq aappariit tunniusimaffigeqatigiinnertik uppernarsarniarlugu periarfissarsioraangata. Assersuutigalugu pitsaanerusarpoq oqarnani „ikinngutikka“ oqarluni „ikinngutivut“ — „qitornavut“, „angerlarsimaffipput“, „misigisavut“ ilaalu ilanngullugit. Pilersaarusiulernermi aalajangigassaqartillunilu — angerlarsimaffimmut, suliffimmut, qitornanik perorsaanermut, aliikkutassanut, feeriarnermut upperisarsiornikkulluunniit sammisassanut tunngassuteqaraluarpata — aappariit eqqortuliussapput aappaasup kissaatigisai isumaalu naatsorsuutigigunikkik. — Ussatit 11:14; 15:22.

Aamma ilumoorfigeqatigiinnermut ersiutaassaaq aappariit marluullutik aappartik pisariaqartinneqartutut pingaartinneqartutullu misigitikkunikku. Toqqissiveerunnartarpoq aapparisaq arnaaguni angummut angutaagunilu arnamut naleqqutinngitsumik soqutiginnileraangat. Biibilimi uiusut siunnersorneqarput ’inuusunnerminni nuliarilikkatik’ aappariinnassagaat. Uiusup nuliarinngisaminit arnamit allamit sammineqalernissani ujartussanngilaa. Qaquguluunniillu arnaq alla attaveqarfigilinngisaannartariaqarpaa. Biibilimi ima mianersoqqussuteqarpoq: „Isumaatsutut iliorpoq allasiortoq, taamaaliortoq imminut aseruutissiuinnarpoq.“ Aalajaannermut najoqqutassiaq qutsissoq taanna aamma nuliaasup malitassaraa. — Ussatit 5:18; 6:32.

Aappariinnermi aalajaatsoorusunneq iluaqutaava? Soorunami. Taamaakkunik aappariilluarnerussapput aappariittuarlutillu, marluullutillu iluaqutigissavaat. Assersuutigalugu uiusup nuliami ajunnginnissaa soqutigippagu, nuliaasoq toqqissisimassaaq ajunngitsuliornissaminullu kajumississutigalugu. Uiusumut aamma taamaappoq. Nuliaminut ilumoorfiginninniarluni aalajangiusimannilluinnaruni inuunermini sutigut tamatigut najoqqutassianik naapertuilluartunik maleruaanissaminut iluaqutigissavaa.

Pissutsit artornaraluarpataluunniit uiusoq nuliaasorlu ilumoorfigeqatigiikkunik marluullutik toqqissisimassapput. Aappariinnili ilumoorfigeqatigiinneq amigaataappat, ajornartorsiuteqalernermi aappariit averusernerat avinneralluunniit nalinginnaavoq. Ajornartorsiutit aaqqinnagit taamatut iliorneq ajornartorsiutinik allanik kinguneqarajuppoq. Mutinut tunngasunik siunnersortip tusaamasap 1980-ikkunni nuliani meeqqanilu qimappai. Pillualerpa? Ukiut 20-t qaangiuttut nassuerpoq taamanimiilli „kiserliulerluni nikallungallunilu sininnaveertarlunilu qitornani nammineq sinilluaqqusinnaaneq ajoramigit“.

Angajoqqaat qitornaasullu ilumoorfigeqatigiinnerat

Angajoqqaat ilumoorfigeqatigiikkaangata, ilimanarluinnarpoq qitornaasa ilumoorfiginninneq aamma ilikkarumaaraat. Meeqqat ilaqutariinni ilumoorfiginnittuni asannittunilu peroriartortut inuunerminni kingusinnerusukkut aapparminnut angajoqqaaminnulluunniit immaqa  utoqqalillutik ajoquteqalersimasunut paasinnittuunissartik ajornannginnerutittarpaat. — 1 Timotheusi 5:4, 8.

Imaanngilarli angajoqqaat sanngiilleqqaartuujuaannartut napparsimaleqqaartuujuaannartulluunniit. Ilaanni qitornaasup paaqqutarineqarnissani pisariaqartittarpaa. Herbertip Gertrudillu — marluullutik Jehovamut nalunaajaasuusut — ernertik Dietmar, inunnguuseralugu nukeerukkiartornermik nappaatilik, ukiut 40-t sinnerlugit paaqqutaraat. 2002-mi novembarimi toqunissami tungaanut ukiut kingulliit arfineq-marluk ulloq unnuarlu paaqqutarineqarnissani nakkutigineqarnissanilu pisariaqartippaa. Angajoqqaavi asannillutik pisariaqartitaanik tamanik isumaginnipput, allaallu angerlarsimaffimminni atortunik ikkussuisitsillutik, aamma immikkut nakkutiginninneq paaqqinninnerlu ilinniarpaat. Ilaqutariinni ilumoorfiginninnikkut maligassiuilluarnerussusia!

Ilumoorfigeqatigiinneq ikinngutigiinnermut pingaaruteqarpoq

„Aappaqarani pilluartoqarsinnaavoq, ikinnguteqaranili pillualernissaq imaannaanngilaq,“ Birgit oqarpoq. Qularnanngitsumik isumaqatigaat. Aappaqaraanni aappaqanngikkaanniluunniit ilumoorfiginnilluni qanittumik ikinnguteqarneq qamuuna attortinnarpoq pisuunnguallannarlunilu. Aappaqaruit soorunami aappat ikinngutiginerpaasariaqarpat.

Ikinngut tassaaginnanngilaq ilisarisimasaq. Ilisarisimasavut amerlasinnaapput — sanilit, suleqatit inuillu ilaannikkut naapittakkavut. Ikinngutaaniaraanni ilumoortoq ikinngutigisaq pisussaassuseqarfigisariaqarlunilu piffissaqarfigisariaqarlunilu nukissaqarfigisariaqarpoq. Arlaannut ikinngutaaneq ataqqinaataavoq. Ikinngutigiinneq nuannaarutaallunilu pilluaataavoq, aammali akisussaaffittaqarluni.

Ikinngutigiit akornanni oqaloqatigiilluartarneq pisariaqarpoq. Pisariaqartitsineq pissutigalugu taamatut oqaloqatigiittoqarsinnaavoq. „Arlarput ajornartorsiuteqaraangat ikinngutigalu arnaq sapaatip-akunneranut arlaleriarluta immitsinnut sianerfigisarpugut. Tuppallernaqaaq nalunagu sianerfigeriaannaallugu tusarnaarnissaminullu piareersimasoq,“ Birgit oqarpoq. Ungasikkaluarluni ikinngutigiittoqarsinnaavoq. Gerda Helgalu imminnut kilometerit tusindit arlallit ungasitsigalutik najugaqarput, ukiulli 35-t sinnerlugit ikinngutigiilluarsimapput. „Aalajangersimasumik allaffigeqatigiittarpugut, oqaluttuarisarpavut misigisavut qamuunalu misigissutsivut, nuanniikkaluarpata nuannersuugaluarpataluunniit. Helgamik allagarsigaangama nuannaartaqaanga. Paaseqatigiilluinnartarpugut,“ Gerda oqaluttuarpoq.

Ilumoorfigeqatigiinneq ikinngutigiinnermut pingaaruteqarpoq. Ataasiaannarluni ilumoorfiginninngitsuliorneq ikinngutigiilluarnermut aseruutaasinnaavoq. Nalinginnaavoq ikinngutigiit siunnersoqatigiittarnerat allaat allanut oqaatigiumanngisani. Ikinngutigiit uummammiugisatik oqaluuserisarpaat suusupagineqarnissartik anngigisamilluunniit allanut oqaatigineqarnissaa siooraginagu. Biibilimi ima allassimavoq: „Ikinngutaasup asannissutsi tamatigut takutittarpaa, qatanngutaasorlu erniusimavoq annikilliornermi ikiortissaalluni.“ — Ussatit 17:17.

Ikinngutigiit eqqarsartaatsimikkut misigissutsimikkut iliuutsimikkullu imminnut sunniuteqartarmata, pingaaruteqarpoq inooriaatsitsinnut naleqquttumik inooriaasilinnik ikinngutissarsiornissarput. Assersuutigalugu qulakkeertariaqarpoq upperisaqaqatigisamik aamma suna eqqortuunersoq sunalu eqqunngitsuunersoq pillugit ileqqussatigullu uagutsitulli najoqqutassiaqartunik ikinngutissarsiornissaq. Anguniakkavit angunissaannut ikinngutit taamaattut iluaqutigissavatit. Inuit ileqqussatigut najoqqutassiallu tungaasigut isumaqatiginngisatit qanimut ikinngutigilertariaqanngilatit, ilaa? Eqqortunik ikinngutissarsiornissap pingaaruteqassusia Biibilimi ima erseqqissarneqarpoq: „Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.“ — Ussatit 13:20.

Ilumoorfiginninneq ilikkarneqarsinnaavoq

Meeqqap allat atisaannik burrelersuineq ilikkaraangamiuk, qularnanngitsumik taamaaliorneq ueqqivigisarpaa. Ilumoorfiginninnermut tunngatillugu  aamma taamaappoq. Sooq? Ilumoorfiginninneq pissuserinerujartortillugu sapernannginnerujartortarami. Inuup meeraanermini ilaqutariinni ilumoorfiginninneq ilikkaruniuk, ilumoorfiginninnermik tunngaveqartumik ikinngutitaarnissani ajornannginnerutissavaa. Imaassinnaavoq nukittuunik ataavartunillu taamaattunik ikinnguteqarneq aappariinnermi ilumoorfiginninnissamut ilinniutaalluarsimasoq. Aamma ikinngutigiinnerit tamarmik pingaarnersaannut tunngatillugu ilumoorfiginninneq iluaqutaassaaq.

Jiisusi oqarpoq uummatikkut isumakkullu tarnikkullu iluunngarluta nukivullu tamakkerlugit Jehova Guutip asanissaa inatsisinit pingaarnersaasoq. (Markusi 12:30) Tamanna isumaqarpoq Guuti ilumoorfigilluinnarneqartussaasoq. Jehova Guutimut ilumoorfiginnikkutta pilluaqquneqangaassaagut. Qimanngisaannassavaatigut pakatsisinngisaannarlutaluunniit, namminermi ima oqarpoq: ’Ilumoorfiginnittuuvunga’. (Jeremia 3:12, NV) Aap, Guutimut ilumoorfiginnikkutta naassaanngitsumik iluaqutigissavarput. — 1 Johannesi 2:17. (wE 9/1 05)

[Qupp. 6-mi issuagaq]

Ilumoorfiginnilluni qanittumik ikinnguteqarneq pisuunnguallaataasarpoq

[Qupp. 5-mi assiliartaq]

Ilaqutariit ilumoorfiginnittut imminnut isumassoqatigiittarput