Guutip oqaasia aqqutinni qaammaqqutigiuk

’Oqaatsitit . . . qaammaqqutigaakka aqqutinni.’ — TUSSIAAT 119:105.

1, 2. Aqquterput Jehovap oqaasianit qaammarsarneqassappat suna pisariaqarpa?

JEHOVAP oqaasia aqqutitsinni qaammaqqutaassaaq anersaakkut qaammaqquteqalernissamut piumasaqaatit naammassigutsigik. Tassa Guutip oqaasia allanneqarsimasoq eqiasuilluta misissoqqissaartariaqarparput tamatumanilu siunnersuutit maleruartariaqarlugit. Aatsaat taamaalioreerutta tussiaasiortutut ima oqarsinnaavugut: „Oqaatsitit naneruaraakka isikkannut, qaammaqqutigalugillu aqqutinni.“ — Tussiaat 119:105.

² Maanna Tussiaat 119:89-176 misissoriartigu. Versit taakku, immikkoortunut 11-nut immikkoortiterneqarsimasut, paasissutissanik ulikkaarput. Versit taakkua aqqutikkut inuunermut naassaanngitsumut sammisukkut ingerlaannarnissatsinnut iluaqutigisinnaavavut. — Matthæusi 7:13, 14.

Sooq Guutip oqaasia nuannarisariaqarparput?

3. Tussiaat 119:89, 90 naapertorlugit sooq Guutip oqaasia tatigisinnaavarput?

³ Jehovap oqaasia nuannarigutsigu anersaakkut aalajaallissaagut. (Tussiaat 119:89-96) Tussiaasiortoq ima erinarsorpoq: „Naassaanngitsumik, [Jehova], oqaatsit ittuinnarpoq qilammi. . . . Nuna tunngavilersimavat aalajaallisillugu.“ (Tussiaat  119:89, 90) Guutip oqaasii — tassa „qilammut inatsisit“ — tunngavigalugit ullorissat, seqineq qaammallu aalajaallutik ingerlavimminni ingerlasarput, nunarsuarlu naassaanngitsumik aalajaallisinneqarluni. (Jobi 38:31-33; Tussiaat 104:5) Oqaatsit Jehovap qarnanit anisut tamaasa tatigisinnaavavut. Guutip oqaasia eqquukkumaarpoq ’naammasseqqusaalu naammassiumaarlugit’. — Esaja 55:8-11.

4. Guutip kiffaasa annikilliortut oqaasianik nuannarinninneq qanoq iluaqutigaat?

⁴ Tussiaasiortup ’Guutip inatsisai nuannarisimanngikkaluarunigit annikilliornermini suujunnaariissagaluarpoq’. (Tussiaat 119:92, NV) Tussiaasiortumik malersuisut nunami allamiuunngillat, Israelikkuuppulli inatsisinik unioqqutitsisut tussiaasiortumik uumissuisut. (3 Mosesi 19:17) Tatisineq akiorsinnaavaa Guutip inatsisai imminik napatitsisut nuannarigamigit. Korinthimiitilluni Paulusi ’navianartorsiortarpoq qatanngutaasuusaartut’, immaqa „apustilissaarsuarnik“ taaneqartut ilaasa imminik unnerluutiginnissutissarsiortut, akornanni. (2 Korinthimiut 11:5, 12-14, 26) Paulusili anersaakkut nukittujuaannarpoq Guutip oqaasia nuannarigamiuk. Uaguttaaq Jehovap oqaasia allanneqarsimasoq nuannaralugulu maleruartarparput, taamaattumik qatanngutivut asavut. (1 Johannesi 3:15) Allaat silarsuarmit uumissorneqarnerput Guutip siunnersuutaasa ilaannaannilluunniit puiguissutiginngilarput. Taassuma piumasaatut iliortuarpugut qatanngutivut peqatigalugit nuannaarluta Jehovap naassaanngitsumik kiffartorfiginissaa qilanaariitigalugu. — Tussiaat 119:93.

5. Kunngi Asap qanoq ililluni Jehova ujarpaa?

⁵ Jehovamut tunniusimanerput ersersinniarlugu immaqa ima qinuvugut: „Illit pigaarma, annaannga, peqqussutitit [aalajangersakkatit, NV] ujarakkit.“ (Tussiaat 119:94) Kunngi Asap Guuti ujarpaa Judamilu tunussineqarunnaarsillugu. Asap ukiut kunngiuffiisa 15-ianni (963-imi u.n.s.) ataatsimeersuarnermi Judakkut „angerfigeqatigiipput [Jehova] . . . ujarniarlugu“. Guuti taakkununnga nanitippoq ’tamanillu eqqissisimatinneqartillugit’. (2 Nalunaarsuutit 15:10-15) Ilagiinnit kristumiunit qimagussimasut tamarmik taakkua maligassiaat Guutip ujaqqinnissaanut kajumississutigisariaqarpaat. Nalunaajaasutut suliniuteqartutut innuttaminut ilannguteqqittut tamaasa pilluaqqussavai illersussallugillu.

6. Anersaakkut ajoqutaasunut suut illersuutigissavavut?

⁶ Jehovap oqaasia anersaakkut ajoqutaasunut illersuutigisinnaasatsinnik ilisimassuseqalersitsisarpoq. (Tussiaat 119:97-104) Guutip peqqussutai akeqqatsinnit ilisimassuseqarnerulissutigaavut. Biibilimi oqaaqqissaarutinik maleruaaneq paasisimasaqalernarpoq; ’Guutillu peqqussutai [aalajangersagai, NV] maleruaraangatsigik utoqqarnit silassorinnerulluta’ iliuuseqarsinnaavugut. (Tussiaat 119:98-100) Jehovap oqaasii ’qilaatsinnut ippata tungusunnitsutut tungusunnitsuummit tungusunninnerullutik qanitsinni’, taava „aqqutit eqqortuunngitsut tamaasa“ uumigalugillu aqqutiginaveersaassavavut. (Tussiaat 119:103, 104) Anersaakkut ajoqutaasunut illersuutigissavavut ulluni kingullerni makkunani inunnik anneruniartunik, qiningasunik guutiitsunillu naapitaqaraangatta. — 2 Timotheusi 3:1-5.

Isikkatsinnut naneruaq

7, 8. Tussiaat 119:105 naapertorlugu iliuuseqassagutta qanoq iliortariaqarpugut?

⁷ Guutip oqaasia anersaakkut qaammaqqutaajuaannarpoq. (Tussiaat 119:105-112) Kristumiunut tanitanut taakkualuunniit suleqataannut, ’savanut allanut’, ilaagaluarutta, Guuti ima oqarfigaarput: „Oqaatsitit naneruaraakka isikkannut, qaammaqqutigalugillu aqqutinni.“ (Johannesi 10:16; Tussiaat 119:105) Guutip oqaasia aqqutitsinni qaammaqqutitut ippoq anersaakkut naakkiunnatalu orlunnginniassagatta. (Ussatit 6:23) Tamattali immikkut Jehovap oqaasiata isikkatsinnut qaammaqqutaanissaa qulakkeertariaqarparput.

⁸ Taamaaliorsinnaavugut tussiaasiortutut aalajangerluinnarluta. Taassuma Guutip aalajangersagai qimallugit tammannginnissani aalajangiusimavaa. Ima oqarpoq: „Uppernarsaasimavunga, tamannalu aalajangiusimavara, maleruarumallugit [Jehovap] inassutai [eqqartuussutai, NV] naapertuilluartut.“ (Tussiaat 119:106) Biibilimik atuartuarnerup ataatsimiigiartuarnerullu pingaaruteqarnerat suusupaginngisaannartigu.

9, 10. Qanoq ililluta nalunngilarput Jehovamut kiffaasut tunniulluinnarsimasut ’aalajangersagai qimallugit tammarsinnaasut’, qanorlu tamanna mianersuutigisinnaavarput?

⁹ Tussiaasiortoq ’Guutip aalajangersagai qimallugit tammarsimanngilaq’, Jehovalli kiffaasa  tunniulluinnarsimasut ilaat tammarsimapput. (Tussiaat 119:110, NV) Taakkua ilagaat kunngi Salomo, inuiaqatigiinnut Jehovamut tunniulluinnarsimasunut ilaagaluartoq, aallaqqaammullu ilisimassuseq Guutimeersoq malillugu iliuuseqarsimagaluartoq. „Taamaakkaluartoq takornartat arnartaasa ajortuliortippaat“ guutipilussiortunngortikkamikku. — Nehemia 13:26; 1 Kunngit 11:1-6.

¹⁰ ’Timmiarniaq’, Saatani, nigarniuterpassuarnik ilioraasarpoq. (Tussiaat 91:3) Assersuutigalugu siornatigut uppeqatigisimasap aqqummit anersaakkut qaammaqqutilimmit tunussinerup taarneranut tammartinniarsinnaavaatigut. Kristumiut Thyatiramiittut ilagaat „arnaq Jezabeli“, immaqa arnat arlallit allanik guutipilussiornissamik kinguaassiuutitigullu inuunerlunnissamik ilinniartitsisartut. Jiisusip ajussuseq taama ittoq akueriumanngilaa, aamma uagut akuerimassanngilarput. (Saqqummersitat 2:18-22; Judasi 3, 4) Taamaattumik Jehova qinnuigisigu ikioqqulluta taassuma aalajangersagai qimallugit tammaqqunata, anersaakkulli qaamanermiiginnaqqulluta. — Tussiaat 119:111, 112.

Guutip oqaasianit napatinneqarneq

11. Tussiaat 119:119 naapertorlugu Guutip ajortut qanoq isigai?

¹¹ Guutip ileqqoreqqusaanit nigunngisaannarutta napatissavaatigut. (Tussiaat 119:113-120) ’Allanngorartuartunik isumaqartut’ akuerinngilavut, soorluttaaq Jiisusip ullumikkut kristumiuunerartut ilatsiinnartut akuerinngikkai. (Tussiaat 119:113; Saqqummersitat 3:16) Uummatikkut iluunngarluta Jehova kiffartorfigigatsigu ’isertorfigaarput’, napatissavaatigullu. ’Narrugissavai ileqqoreqqusaminit nigortut tamaasa’, peqquserlunnermikkut salluliornermikkullu. (Tussiaat 119:114, 117, 118; Ussatit 3:32) Ajortut taakku „aamakutut“ — minguttut saffiugassanit erlinnartunit, soorlu kuultimit sølvimillu peerneqarsimasutut — isigai. (Tussiaat 119:119; Ussatit 17:3) Ajortut ilagalugit ’aamakutut’ suujunnaarsinneqarusunngilluinnarpugut. Taamaattumik qanortoq Guutip oqaaqqissaarutai nuannariuarniarisigit!

12. Sooq Jehovamik mianerinninnissaq pingaaruteqarpa?

¹² „Ilinnut ersinermit uulikullattarpunga,“ tussiaasiortup Jehova taama oqarfigaa. (Tussiaat 119:120) Jehovap kiffamisut napatissappatigut iluarinngisaanik iliornaveersaarnikkut taassuminnga peqqinnartumik mianerinninnissarput pingaaruteqarpoq. Jobi Jehova mianeralugu peqqusersuilluni inuusimavoq. (Jobi 1:1; 23:15) Guutimik mianerinninneq iluaqutigalugu qanorluunniit atugaqaraluarluta Guutip aqqutigeqqusaaniittuarsinnaavugut. Aatsaalli ilumoorluta upperlutalu Guutimut qinusarutta aalajaassinnaavugut. — Jaaku 5:15.

Uppernikkut Guutimut qinusarit

13-15. (a) Sooq qinnutitta akineqarnissaat upperisinnaavarput? (b) Qinuniarluta oqaasissaaruttarutta qanoq ikiorneqarsinnaavugut? (c) Tussiaat 119:121-128 ’anersaarulunnitsinnut oqaasertassaqartinneqanngitsunut’ atatillugu qanoq iluaqutaasinnaanersoq erseqqissaruk.

¹³ Guutimut qinusinnaavugut upperalugu iluaqutissatsinnik akuliukkumaartoq. (Tussiaat 119:121-128) Tussiaasiortutut qularutiginngilarput qinnutivut akineqarumaartut. Sooq? Guutip peqqussutai „kuultimit akuinnerpaamit annerusumik“ nuannarigatsigik. Aammattaaq ’Guutip aalajangersagai tamaasa eqqortutut isigigaavut’. — Tussiaat 119:127, 128, NV.

¹⁴ Torlulanivut Jehovap tusarnaartarpai upperluta qinusaratta aalajangersagaalu maleruaqqissaartaratsigit. (Tussiaat 65:3) Taavami ilaannikkut ajornartorsiortivut ima nanertuutigisartigigutsigit Guutimut qinuniaraangatta oqaasissaaruttarluta? Taamaattoqartillugu „anersaap nammineq qinnuttarpaatigut anersaarulunnertigut oqaasertassaqartinneqanngitsutigut“. (Romamiut 8:26, 27) Tamanna isumaqarpoq Guutip qinnutit oqaatsimini allanneqarsimasut qinnutitut pisariaqartitatsinnut tunngasutut akuerisarai.

¹⁵ Qinnuterpassuarnik eqqarsaaterpassuarnillu ’anersaarulunnitsinnut oqaasertassaqartinneqanngitsunut’ tunngassuteqarsinnaasunik Biibilimiittoqarpoq. Immaqa Tussiaat 119:121-128-mi qinnutit ilaat pissutsinut atukkatsinnut eqqaanarput. Assersuutigalugu sualuttumik iluanaarniarfigineqarnissarput isumakuluutigigutsigu tussiaasiortup Guutimut qinusimaneratut qinusinnaavugut. (Versi 121-123) Ilungersunartumik aalajangigassaqarutta Jehova qinnuigisinnaavarput anersaavanit oqaaqqissaarutaanik eqqaasinneqarnissamik taakkuninngalu maleruaanissamut kajumissisinneqarnissamik.  (Versi 124, 125) Naak ’aqqutit eqqortuunngitsut tamaasa uumigigaluarlutigit’ immaqa Guutip akuliunnissaanik qinnuiginissaa pisariaqartipparput inatsisaanik unioqqutitsinissamut ussernartorsiornerit akiorsinnaaniassagatsigik. (Versi 126-128) Ullut tamaasa Biibilimik atuartarutta, qamannga pisumik Jehovamut qinugaangatta allassimaffiit iluaqutaasut taamaattut eqqaamajuminartissavavut.

Jehovap oqaaqqissaarutai iluaqutigalugit

16, 17. (a) Sooq Guutip oqaaqqissaarutai pisariaqartippavut, qanorlu isigisariaqarpavut? (b) Allat immaqa qanoq isigisarpaatigut, sunali pingaarnerpaava?

¹⁶ Guutimit iluarineqarusukkutta taassumanngalu tusarneqarusulluta oqaaqqissaarutai maleruartariaqarpavut. (Tussiaat 119:129-136) Puigutugatta Jehovap oqaaqqissaarutai nuanningaartut siunnersuutaanik peqqussutaanillu eqqaasitsissutaasut pisariaqartippavut. Soorunami Guutip oqaasianik paasinninneq nutaaq ’nassuiarneqaraangat’ anersaakkut qaamaneq qinngortartoq pingaartipparput. (Tussiaat 119:129, 130) Aamma qujamasuutigaarput Jehovap ’kiinnaminik qaammarsarmatigut’ iluaralutalu, naak ’qulliit isitsinnit kuukkaluartut’ allat taassuma inatsisaanik unioqqutitsimmata. — Tussiaat 119:135, 136; 4 Mosesi 6:25.

¹⁷ Oqaaqqissaarutai naapertuilluartut maleruartarutsigik Guutimit iluarisaajuarnissarput qularinngilluinnarsinnaavarput. (Tussiaat 119:137-144) Jehovamut kiffaagatta akueraarput taassuma oqaaqqissaarutiminik naapertuilluartunik uagutsinnik ilisimatitsisinnaatitaanera taakkuninngalu uagutsinnut peqqussuteqarsinnaatitaanera. (Tussiaat 119:138) Tussiaasiortup Guutip peqqussutaanut naalannera eqqarsaatigalugu ima oqarnera tupigusuutigineqarsinnaavoq: „Nikanarpunga asiginnagaallungalu.“ (Tussiaat 119:141) Akeraasa taama isumaqarfigisimagunarpaat. Tunniutiinnarumanata naapertuilluarneq aalajangiukkutsigu immaqa allat nikagissavaatigut. Pingaarnerpaasorli tassaavoq oqaaqqissaarutai naapertuilluartut malillugit inuugatta Jehovamit iluarineqarnerput.

Toqqissisimaneq eqqissinerlu

18, 19. Guutip oqaaqqissaarutaanik maleruaaneq qanoq kinguneqartarpa?

¹⁸ Jehova qanittarparput oqaaqqissaarutai maleruaraangatsigik. (Tussiaat 119:145-152) Taamaattumik nakimaalluta Jehova uummatikkut iluunngarluta torlorfigisinnaavarput ilimagalugu tusassagaatigut. „Ullaannguakkut“ itertarpugut ikioqqusarlutalu? Tamanna Guutimut qinunissamut piffissaalluarpoq! (Tussiaat 119:145-147) Guutip uagutsinnut qaninneranut pissutaasoq alla tassaavoq kannguttaatsuliorumannginnatta taassumalu oqaasia sallusuissutitut isigatsigu, soorluttaaq Jiisusi taamaassimasoq. (Tussiaat 119:150, 151; Johannesi 17:17) Jehovamut attaveqarnerput silarsuarmi eqqissisimanngiffiusumi matumani nappatigaarput Harmagedonimilu sorsunnissarsuani annertoqqutigissallutigu. — Saqqummersitat 7:9, 14; 16:13-16.

¹⁹ Guutip oqaasianik ataqqinningaartuugatta toqqissisimalluinnarpugut. (Tussiaat 119:153-160) Guutiitsut pisarnerattut Jehovap ’oqaaqqissaarutaanit nigorsimanngilagut’. Guutip aalajangersagai nuannaraavut, taamaattumillu ajunngissusia imaluunniit ilumoorfiginnilluni tunniusimanera toqqissisimassutigalugu. (Tussiaat 119:157-159) Jehovap oqaaqqissaarutaasa eqqaamannilluarsinnaanerulersippaatigut pissutsini aalajangersimasuni uagutsinnut piumasaqaatai eqqaamasinnaaniassagatsigit. Jehovap oqaaqqissaarutai aalajangersagaapput, kajumillutalu akueraarput Pinngortitsisitta uagutsinnik naalakkersuisinnaatitaanera. Nalunnginnatsigu ’Guutip oqaasiisa sallusuissut isumavigigaat’ alloriartarnivullu nammineq aqussinnaanngikkivut, nuannaarluta aalajangersagai naalattarpavut. — Tussiaat 119:160; Jeremia 10:23.

20. Eqqissisimangaarnitsinnut suna pissutaava?

²⁰ Jehovap inatsisaanik nuannarinninnerput eqqissisimassutigingaarparput. (Tussiaat 119:161-168) Malersorneqaraluarluta eqqissineq Guutimeersoq nalissaqanngitsoq pigisinnaavarput. (Filippimiut 4:6, 7) Jehovap eqqartuussutai pingaartingaaratsigik ’ullormut arfineq-marloriarluta’ allaat unnersiutigisarparput taakku pillugit. (Tussiaat 119:161-164) „Eqqissingaaqaat inatsisinnik nuannarinnittut, naakkiuffissaqanngilarlu taakkununnga,“ tussiaasiortoq taama erinarsorpoq. (Tussiaat 119:165, NV) Jehovap inatsisai nuannaralugillu maleruarutsigik, allat iliuusii suullunniillu allat pissutigalugit anersaakkut naakkiutissanngilagut.

21. Oqaluttuat Biibilimeersut suut ersersippaat ilagiinni ajornartorsiuteqalissagaluarpat naakkiuttariaqanngitsugut?

 ²¹ Biibilimi eqqartorneqartorpassuupput arlaannik naakkiussutinngortitsinngitsut. Angut kristumiu Gajusi Diotrefesip guutiitsuliornera naakkiussutiginagu ’sallusuissummi inuuvoq’. (3 Johannesi 1-3, 9, 10) Paulusip arnat kristumiut Euodia Syntykilu isumaqatigiinngissuteqalersimagunarmata „Naalakkami isumaqatigeeqqullugit“ kajumissaarpai. Qularnanngitsumik isumaqatigiinngissuteqarunnaarnissaminnik ikiorneqarsimapput, aalajaallutillu Jehovamut kiffartortuarlutik. (Filippimiut 4:2, 3) Taamaattumik uaguttaaq ilagiinni ajornartorsiuteqalissagaluarpat naakkiuttariaqanngilagut. Jehovap aalajangersagaanik maleruaaneq salliutinniartigu eqqaamallugulu ’ingerlavigisavut tamaasa nalunngikkai’. (Tussiaat 119:168; Ussatit 15:3) Taava eqqissisimangaassaagut, suulluunniillu eqqissisimajunnaartissinnaanngisaannassavaatigut.

22. (a) Jehova naalakkutsigu immikkut pisinnaatitaaffik suna nuannaarutigisinnaassavarput? (b) Ilagiinnit kristumiunit qimagullutik tammarsimasut qanoq isigisariaqarpavut?

²² Jehova naalattuarutsigu, taassuminnga unnersiutiginnittuarneq immikkut pisinnaatitaaffigilissavarput. (Tussiaat 119:169-176) Guutip ileqqoreqqusai malillugit inuugutta toqqissisimasinnaavugut ’qarluvullu appissapput erinalimmik Jehova unnersiutigiuarlugu’. (Tussiaat 119:169-171, 174) Tamanna tassaavoq ulluni kingullerni makkunani immikkut pisinnaatitaaffigisinnaasarput annerpaaq. Tussiaasiortoq inuujuarusuppoq Jehovalu unnersiutigiuarusullugu, erseqqinnerusumilli allaaserineqanngilaq ’savatut tammartutut angalaannarsimanera’. (Tussiaat 119:175, 176) Inuit ilaat ilagiinnit kristumiunit qimagullutik tammarsimasut immaqa suli Jehova asavaat unnersiutigerusullugulu. Taamaattumik sapinngisarput tamaat taakku ikiorniartigik anersaakkut toqqissisimaqqilersinnaaqqullugit Jehovallu innuttai peqatigalugit unnersiutiginninnerup nuannersuanik misigisaqaqqilersinnaaqqullugit. — Hebræerit 13:15; 1 Petrusi 5:6, 7.

Aqqutitsinni qaammaqqutaajuartoq

23, 24. Tussiaat 119 qanoq iluaqutigisimaviuk?

²³ Tussiaat 119 arlalitsigut iluaqutigisinnaavarput. Assersuutigalugu Guuti tatiginerulersinnaavarput, tassanimi paasigatsigu ’Jehovap inatsisaanik maleruaaneq’ piviusumik pillualersitsisartoq. (Tussiaat 119:1) Tussiaasiortup eqqaasippaatigut Guutip ’oqaasiisa isumaviata sallusuissutaanerannik’. (Tussiaat 119:160) Tamanna Guutip oqaasianik allanneqarsimasumik pingaartitsinerulissutigisariaqarparput. Tussiaat 119-imik eqqarsaatiginninnerput Biibilimik eqiasuilluta misissuinissamut kajumississutigisariaqarparput. Tussiaasiortup arlaleriarluni Guuti ima qinnuigaa: „Ileqqoreqqusannik ajoqersunnga.“ (Tussiaat 119:12, 68, 135) Aammattaaq qamannga pisumik ima qinuvoq: „Ajoqersunnga ajunngissusermik siuneqassusermik ilisimasaqarnermillu, peqqussutitit upperigakkit.“ (Tussiaat 119:66, NV) Uaguttaaq taamatut qinusariaqarpugut.

²⁴ Jehovamit ajoqersorneqarneq taassumunnga qanittumik attaveqalersitsisarpoq. Tussiaasiortoq arlaleriarluni Guutimut kiffaanerarpoq. Allaat Jehova tunniusimalluni ima oqarfigaa: „Illit pigaarma.“ (Tussiaat 119:17, 65, 94, 122, 125; Romamiut 14:8) Aap, Jehovamut taassuma nalunaajaasuisut kiffartorneq taassuminngalu unnersiutiginninneq immikkut pisinnaatitaaffiuvoq. (Tussiaat 119:7) Illit Guutip naalagaaffia pillugu oqaluussisartutut nuannaarlutit Guuti kiffartorfigaajuk? Taamaalioruit qularisariaqanngilat Jehovap tapersersortuarlutillu pilluaqqujuassagaatit suliami immikkut pingaarutilimmi tamatumani, oqaasia tatigiuarukku aqqutinnilu qaammaqqutigiuarukku. (wE 4/15 05)

Qanoq akissavit?

• Sooq Guutip oqaasia nuannarisariaqarparput?

• Guutip oqaasianit qanoq napatinneqartarpugut?

• Jehovap oqaaqqissaarutai qanoq iluaqutigaavut?

• Sooq Jehovap kiffai toqqissisimasinnaallutillu eqqissinermik nuannaarutiginnissinnaappat?

[Atuaqqissaarnermi apeqqutit]