Imminut pilluta inuujunnaarpugut

„[Kristusip] tamaasa toqqutigai inuusut imminnik pillutik inuujunnaaqqullugit.“ — 2 KORINTHIMIUT 5:15.

1, 2. Jiisusip ajoqersugaasa ukiuni hundredelinni siullerni inuusut inassut Biibilimeersoq suna iluaqutigalugu namminissarsiornertik ajugaaffigisinnaavaat?

JIISUSIP nunami inuunerani unnuuvoq kingulleq. Akunnialuinnaat qaangiuppata imminut uppertut iluaqutissaannik inuunini pilliutigissavaa. Unnuk taanna Jiisusip apustilini aalajaatsut pingaaruteqartunik arlalinnik oqaluttuuppai. Ilaatigut inassummik ajoqersukkami ilisarnaatigisariaqagaannut tunngasumik tunivai. „Inassummik nutaamik tunivassi,“ oqarpoq. „Asaqatigiissaasi. Soorlu uanga asagissi, taamattaaq ilissi asaqatigiissaasi. Asaqatigiikkussi tamatumuuna tamarmik paasissavaat ajoqersugarigissi.“ — Johannesi 13:34, 35.

² Kristumiut ilumoortut imminut pilliutigeriaannaallutik asaqatigiittussaapput uppeqatimillu pisariaqartitaat namminneq pisariaqartitaminnit pingaarnerutittussaallugit. Allaat ’ikinngutitik pillugit inuunerminnik akiginninnissartik’ nangaassutigisussaanngilaat. (Johannesi 15:13) Kristumiut siulliit inassummik nutaamik tamatuminnga qanoq maleruaalluartigisimappat? Atuakkiortup Tertullianip 100-kkunni inuusup atuakkiamini tusaamasaasumi Forsvarsskrift for de kristne-mi kristumiut allanit qanoq oqaatigineqartarsimanerat ima allaatigaa: ’Ila asaqatigiingaassusii; imminnullu pillutik inuunerminnik akiginneriaannaassusii.’

3, 4. (a) Sooq namminissarsiorneq akiortariaqarparput? (b) Allaaserisami matumani suut sammissavavut?

³ Uaguttaaq ’nanertuutigisatsinnik ersoqatigiittariaqarpugut, taamaaliornikkullu Kristusip inatsisaa naammassillugu’. (Galatiamiut 6:2) Namminissarsiornerli Kristusip inatsisaata naalannissaanut aamma ’Jehovap Guutitta uummatikkut iluunngarluta tarnikkullu iluunngarluta isumakkullu iluunngarluta asanissaanut’ akornutaasut annerpaartaasa ilagaat. (Matthæusi 22:37-39) Naammalluinnanngitsuugatta  imminuinnaq eqqarsaatigeqqajaasarpugut. Ulluinnarnilu ulapinneq, atuarfimmi suliffimmiluunniit unammillerpalaarneq akissanillu naammattusaariniarneq pissutigalugit inuit imminuinnaq eqqarsaatigeqqajaanerulertarput. Inuit namminissarsioqqajaannginnerulinngillat. Apustili Paulusi ullut kingulliit pillugit ima mianersoqqusivoq: „Inuit imminuinnavik isumagissapput.“ — 2 Timotheusi 3:1, 2, Phillips.

⁴ Jiisusip toqungajalerluni ajoqersukkani namminissarsiorneq akiorniarlugu iliuuserisinnaasaannik pingasunik oqaluttuuppai. Iliuuserineqarsinnaasut taakku suuppat, siunnersuutaalu qanoq iluaqutigisinnaavavut?

Akiuussutissaq sunniuteqarluartoq

5. Galilæap avannaani oqaluussitilluni Jiisusip ajoqersukkaminut suna paasitippaa, aamma sooq tamanna annilaarutigaat?

⁵ Jiisusi Galilæap avannaani Cæsarea Filippip eqqaani oqaluussivoq. Nuna alianaatsoq tamanna immaqa imminut tunulliunnissaminngarnit qasuersaarfissaqqippasinnerullunilu iluataffissaqqippasinneruvoq. Taamaattorli Jiisusip tamaaniitsilluni ajoqersukkani paasitippai ’Jerusalemiliartariaqarluni utoqqaanertanit palasiunernillu allakkanillu ilisimasunit anniartitaangaassalluni toqunneqassallunilu ullullu pingajuanni makikkumaarluni’. (Matthæusi 16:21) Jiisusip ajoqersugaasa taamatut paasitinneqarnertik annilaarutigisimassaqaat, mannami tikillugu ilimagisimagaluarpaat Siulersuisumik naalagaaffini maani nunarsuarmi pilersissagaa! — Lukasi 19:11; Apustilit Suliaat 1:6.

6. Sooq Jiisusip Petrusi sukannersumik naveerpaa?

⁶ Erniinnaq „Petrusip [Jiisusi] avinngarutitippaa, oqaaqqisaalerlugulu ima oqarluni: ’Imminut ajunngisaarfiginiarit, Naalagaq; taama pineqanngisaannassaatit!’“ Jiisusi qanoq qisuariarpa? „Petrusi tunuutigalugu oqarfigaa: ’Tununnut nigorit, Saatani! Uannut naakkiuffissiaavutit, Guutip eqqarsaatai pinnagit inuilli eqqarsaataannik eqqarsaravit.’“ Tamatuma takutippaa isiginnittaatsit taakku marluk qanoq assigiinngitsigisut. Jiisusip kajumilluni suliassani Guutimit tunniunneqartoq — imminut pilliutigeriaannaalluni inuuneq qaammatialuit qaangiuppata nappakkami anniartitaaffimmi toqumik kinguneqartussaq — akueraa. Petrusip atoruminartumik inuunissaq kajumissaarutigaa. „Imminut ajunngisaarfiginiarit,“ oqarpoq. Qularnanngilaq Petrusi ajunngitsumik siunertaqarluni taama oqartoq. Taamaattorli Jiisusip Petrusi naveerpaa tamatumani Saatanimit sunnerneqarsimammat. Petrusi ’Guutitut isumaliortaaseqarnani, inuttut isumaliortaaseqarpoq’. — Matthæusi 16:22, 23, NV; Ny Verden-Oversættelsen-imi quppernerup ataani ilanngussaq.

7. Matthæusi 16:24 naapertorlugu Jiisusip ajoqersukkaminut suut iliuusereqquai?

⁷ Ullumikkut Petrusip Jiisusimut oqaaserisaanut eqqaanartunik oqartoqarsinnaasarpoq. Silarsuarmi inuit ’imminut ajunngisaarfiginissaq’ imaluunniit ’ajornannginnersiornissaq’ kajumissaarutigigajuttarpaat. Jiisusili allaanerulluinnartumik isiginnittaaseqaqqusivoq. Ajoqersukkani ima oqarfigai: „Uannik malinnikkumasoq imminut isumakkiissaaq, nappagarlu anniartitaaffini ersukkiutissavaa malittuarlungalu.“ (Matthæusi 16:24, NV) „Oqaatsit taakku suli ajoqersuganngorsimanngitsunut ajoqersuganngornissamik kajumissaarutaanngillat,“ The New Interpreter’s Bible-imi allassimavoq, „Kristusilli qaaqqusineranik ilassinnereersimasunut ajoqersugaanerup qanoq paasisariaqarneranik eqqarsaatiginninnissamut kajumissaarutaapput.“ Iliuuserineqartussat pingasut Jiisusip allassimaffimmi matumani eqqartugai tassaapput uppertunit iliuuserineqartariaqartut. Taakku ataasiakkaarlugit sammeriartigik.

8. Imminut isumakkeernerup qanoq paasisariaqarnera nassuiaruk.

⁸ Siullermik, imminut isumakkeertariaqarpugut. Grækerit oqaasiat ’imminut isumakkeernermik’ nutserneqarsimasoq, namminissarsiortumik kissaatigisanik namminerluunniit iluaqutissanik naaggaarfiginnikkumanermik isumaqarpoq.  Ilaannikkuinnaq nuannaarniutinik aalajangersimasunik naaggaarfiginninnerunngilaq; aamma ima paasisariaqanngilaq imminut naaggaarluinnassasugut imminulluunniit aserorsassasugut. ’Immitsinnik pigiunnaarpugut’, kajumillutali inuunerput tamaat inuunitsinnullu tunngasut tamaasa Jehovamut tunniuppavut. (1 Korinthimiut 6:19, 20) Imminuinnaq eqqarsaatiginata inuunitsinni Guutimut kiffartornerput pingaarnerpaajussaaq. Imminut isumakkiissagaanni Guutip piumasaanik iliorniarluni aalajangerluinnartariaqarpoq, naak immaqa tamanna naammalluinnanngissuserput pissutigalugu kajumigisatsinnut akerliugaluartoq. Guutimut tunniulluinnaraangatta kuisikkaangattalu takutittarparput taassumunnga tunniusimalluinnarluta. Inuunerpullu tamaat tunniulluinnarsimanerput naapertorlugu inuuniartarpugut.

9. (a) Jiisusi nunamiikkallarmat nappagaq anniartitaaffik eqqaaneqaraangat suut eqqarsaatigineqartarpat? (b) Uagut qanoq ililluta nappagaq anniartitaaffipput ersukkiuttarparput?

⁹ Iliuuserisariaqakkatta aappaat tassaavoq nappakkamik anniartitaaffitsinnik ersukkiussineq. Ukiuni hundredelinni siullerni nappagaq anniartitaaffik eqqaaneqaraangat anniaatit, nikanarsaagaaneq toqulu eqqarsaatigineqartarput. Amerlanertigut pinerluttuliortut kisimik nappakkami anniartitaaffimmi toqutaasarput imaluunniit timaat toqungasut nivingarneqartarlutik. Jiisusip taamatut oqarnermigut takutippaa kristumiup silarsuarmut ilaannginnami malersorneqarnissani, narrugineqarnissani allaallu toqunissani piareersimaffigisariaqarai. (Johannesi 15:18-20) Kristumiutut najoqqutarisavut silamiunit allaassutigaavut, taamaattumillu immaqa silamiut ’mitaatigissavaatigut’. (1 Petrusi 4:4) Atuarfimmi, suliffimmi allaallu ilaquttatsinnit taama pineqarsinnaavugut. (Lukasi 9:23) Taamaattorli silamiunit narrugineqarnissaq naammagalugu atorumavarput, imminummi pilluta inuujunnaaratta. Jiisusi ima oqarpoq: „Pilluarpusi ilissi uanga pillunga mitaatigippasi qinugalusilu tamanillu ajortunik oqaatigippasi sallullutik. Tipaatsugitsi nuannaarlusilu akissarsiassarsi qilanniittoq angeqimmat.“ (Matthæusi 5:11, 12) Aap, uagutsinnut pingaaruteqarnerpaaq tassaavoq Guutimit iluarisaaneq.

10. Jiisusip malittuarnissaa qanoq paasisariaqarpa?

¹⁰ Pingajussaanik, Jiisusi oqarpoq malittuassagitsinni. 1 Johannesi 2:6-imi ima allassimavoq: „Taassumaniittuassalluni [Guutimiittuassalluni] oqartoq taanna nammineq taassuma [Kristusip] inuuneratut inuusariaqartussaassaaq.“ Jiisusi qanoq inuusimava? ’Kristusi imminut eqqarsaatiginngilaq,’ Paulusi allappoq. (Romamiut 15:3) Jiisusip namminissarsiunngivilluni Ataatani qilammiusoq ajoqersukkanilu asavai. Jiisusi qasugaluarluniluunniit kaakkaluaraangami allat pisariaqartitaat nammineq pisariaqartitaminit pingaarnerutittarpai. (Markusi 6:31-34) Jiisusip aamma Guutip naalagaaffianik oqaluussissutiginninneq allanillu ajoqersuineq tamaviaarutigai. Suliassiissutigineqartumik aallussilluarnitsigut — ’inunnik inuiannit tamaneersunik ajoqersuganngortitsinitsigut, Jiisusillu uagutsinnut peqqussutaanik tamanik maleruaanissamik ajoqersuinitsigut’ — taanna ilaartariaqarparput. (Matthæusi 28:19, 20, NV) Taamaalilluni Kristusip maligassippaatigut, ’tumiilu atuarlugit malittariaqarparput’. — 1 Petrusi 2:21.

11. Sooq pingaaruteqarpa imminut isumakkeernissarput, nappakkamik anniartitaaffitsinnik ersukkiussinissarput Jiisusi Kristusimillu malinnittuarnissarput?

¹¹ Pingaaruteqarpoq imminut isumakkeernissarput, nappakkamik anniartitaaffitsinnik ersukkiussinissarput maligassatsinnillu malinnittuarnissarput. Taamaalilluni namminissarsiorneq — imminut pilliutigeriaannaalluni asanninnermut akornutaalluinnartoq — akiorneqarsinnaassaaq. Aamma Jiisusi ima oqarpoq: „Inuunerminik annaassiumasup inuunini annaassavaa. Uangali pillunga inuunerminik annaasaqartup inuunini nassaarissavaa. Inummummi sumut iluaqutaassava silarsuaq tamaat pigileraluaruniuk inuuninili akigalugu? Imaluunniit inuup inuunerminut suna akiliutigisinnaavaa?“ — Matthæusi 16:25, 26.

Naalakkanut marlunnut kiffartorsinnaanngilagut

12, 13. (a) Naalagaasut ilaata inuusuttup Jiisusimut saaffiginnittup suna soqutigaa? (b) Jiisusip angut inuusuttoq qanoq siunnersorpaa, aamma sooq?

¹² Jiisusip ajoqersukkaminut imminut isumakkeertariaqarnermik  erseqqissaanerata kingorna qaammatialuit qaangiuttut, angutip inuusuttup pisuup naalagaasut ilaata saaffigaa. Taanna ima oqarpoq: „Ajoqersuisoq, ajunngitsumik sumik iliussaanga inuuneq naassaanngitsoq pigilerumallugu?“ Jiisusip oqarfigaa ’inassutit maleruassagai’, nangillunilu taakkua ilaat issuarpai. Angut inuusuttoq ima oqarpoq: „Tamakku tamaasa maleruareerpakka.“ Pimoorussisuunnguatsiarpoq sapinngisaminillu Inatsisinik maleruaasuunnguatsiarluni, taamaattumillu ima aperivoq: „Taavami suna amigaatigaara?“ Akillugu Jiisusip angut inuusuttoq asseqanngilluinnartumik periarfissillugu ima qaaqquaa: „Iluarluinnarumaguit pigisatit tamaasa akigiartukkit piitsunullu tunniullugit, taava qilanni pisuussuteqalerumaarputit; qaallutillu malinnga!“ — Matthæusi 19:16-21.

¹³ Jiisusip paasivaa angutip inuusuttup Jehova uummatikkut iluunngarluni kiffartorfigissaguniuk allamut saassutigisinnaasani — pigissaarutini — pigiunnaartariaqarai. Jiisusimut ajoqersugaq ilumoortoq naalakkanut marlunnut kiffartorsinnaanngilaq. ’Guutilu Mammonilu [pisuussutillu] tamaasa kiffartorfigisinnaanngilai.’ (Matthæusi 6:24) ’Isi tappissoq’ anersaakkut ittunik nakkussisoq pisariaqartippaa. (Matthæusi 6:22, NV) Pigisanik piitsunut tunniussineq imminut pilliutigeriaannaalluni iliuuseqarneruvoq. Pigisanut pilliutigisaanut taarsiullugu Jiisusip naalagaasut ilaat inuusuttoq taanna qilammi pisuussutinik — inuunermik naassaanngitsumik Kristusimillu qilammi naalakkersueqateqalersinnaanermik kinguneqarumaartunik — katersuinissamik immikkut pisinnaatitaaffimmik asseqanngitsumik neqeroorfigaa. Angut inuusuttoq taanna imminut isumakkeerumanngilaq. „Aliasulluni qimaguppoq, pisoorsuugamimi.“ (Matthæusi 19:22) Jiisusilli ajoqersugaasa ilaat allat allaanerusumik iliuuseqarput.

14. Jiisusip imminik malinneqqusinera aalisartut sisamat qanoq iliuuseqarfigaat?

¹⁴ Ukiut marluk missiliorlugit tamatuma siorna Jiisusip aalisartut sisamat, Petrusimik, Andreasimik, Jaakumik Johannesimillu atillit tamatumunnga assingusumik qaaqquai. Taamaalinerani taakkua ilaat marluk aalisarput, allallu marluk qassutiminnik iluarsaassillutik ulapipput. Jiisusip oqarfigai: „Qaallusi malissinga, taava inunnik aalisartunngortissavassi.“ Naggataatigut taakku tamarmik aalisartuujunnaarput inuunertillu naallugu Jiisusi malillugu. — Matthæusi 4:18-22.

15. Ullumikkut Jehovap Nalunaajaasuisa ilaat Jiisusi malinniarlugu qanoq pilliuteqarsimava?

¹⁵ Ullumikkut kristumiorpassuit naalagaasut ilaat inuusuttoq pisooq ilaarnagu aalisartut sisamat taakku ilaarsimavaat. Taakkua Jehova kiffartorfiginiarlugu pigissaarutitik silarsuarmilu matumani inissisimaffitsik pilliutigisimavaat. „22-nik ukioqarlunga pingaarutilimmik aalajangiisariaqarpunga,“ Deborah oqaluttuarpoq. Ima nassuiaavoq: „Ukiup affaa missiliorlugu Biibilimik atuaqqissaarpunga, Jehovamullu tunniulluinnarusullunga, ilaquttamali tamanna akerlerilluinnarpaat. Multimillionæriupput, isumaqarpullu inuiaqatigiinni inissisimaffitsik pissutigalugu ippinnassasoq Jehovap Nalunaajaasuinut ilaaleruma. Akunnerit 24-t ingerlaneranni sorleq piumanerunerlugu aalajangernissannut periarfissippaannga — piisaarluni inuuneq sallusuissulluunniit. Jehovap Nalunaajaasui attaveqarfigiunnaarluinnanngikkukkit  ilaquttama kingornussassaarutitissavaannga. Jehovap eqqortumik aalajangernissannut ikiorpaanga tamatumalu piviusunngortinnissaanut nakussatsillunga. Ukiut 42-t kingulliit piffissaq tamaat kiffartorpunga, sumilluunniillu peqqissimissuteqarnanga. Namminissarsiorneq inuulluataapilunnerlu tunukkakkit ilaquttama imaqanngitsumik pilluaallutillu inuunerattut inuujunnaarpunga. Uigalu inuit hundredet sinnillit sallusuissummik ilinniarnissaannik ikiornikuuavut. Anersaakkut meeqqavut taakku uannut pisuussutinit sunilluunniit naleqarnerungaarput.“ Jehovap Nalunaajaasui millionillit allat aamma taama isumaqarput. Illimmi?

16. Qanoq ililluta imminut pilluta inuujunnaarluta ersersissinnaavarput?

¹⁶ Imminut pillutik inuujunnaarumagamik Jehovap Nalunaajaasui tusindillit pioneerinngorsimapput piffissarluunniit tamaat kiffartortunngorsimallutik. Allat, piffissaq tamaat kiffartornissaminnut periarfissaqanngitsut, pioneerisut anersaaqarnermik ineriartortitsipput sapinngisartillu tamaat Guutip naalagaaffianik oqaluussissutiginninnermik tapersersuisarlutik. Angajoqqaat aamma taamatut isiginnittaaseqarlutik ersersittarpaat meeqqaminnik anersaakkut ajoqersuiniarlutik piffissarujussuaq atoraangamikku namminnerlu soqutigisatik pilliutigigaangamikkik. Tamatta Guutip naalagaaffiata soqutigisaanik inuunitsinni salliutitsinerput arlaatigut ersersissinnaavarput. — Matthæusi 6:33.

Kia asanninnerata pinngitsaalivaatigut?

17. Pilliuteqarnissamut suna kajumississutigaarput?

¹⁷ Imminut pilliutigeriaannaalluni asanninneq imaannaanngitsuuvoq. Eqqarsaatigiulli suna kajumississutigineripput, imaluunniit suup pinngitsaalineraatigut. Paulusi ima allappoq: ’Kristusip asanninnerata pinngitsaalivaatigut isumarput tassaammat ataatsip tamaasa toqussutigigai . . . Taassumalu tamaasa toqqutigai inuusut imminnik pillutik inuujunnaaqqullugit, imminnilli toqqutiginnittoq makissimasorlu pillugu inooqqullugit.’ (2 Korinthimiut 5:14, 15) Aap, Kristusip asanninnerata imminut pilluta inuujunnaarnissamut pinngitsaalivaatigut. Tamannalu kajumississutaangaarpoq! Kristusi uagut pilluta toqummat, taanna pillugu inuunissamut ileqqussatigut pisussaasutut misigivugut, ilaa? Ilumoortumik oqaatigissagaanni Guutip Kristusillu asanningaarnerat qujamasuutigigatsigu Guutimut tunniulluinnarpugut Kristusimullu ajoqersuganngorluta. — Johannesi 3:16; 1 Johannesi 4:10, 11.

18. Imminut pilliutigeriaannaalluni inuuneq sooq imminut akilersinnaava?

¹⁸ Imminut pilluni inuujunnaarneq imminut akilersinnaava? Naalagaasut ilaata inuusuttup pisuup Jiisusip qaaqqusissutaa itigartillugu qimagummat Petrusip Jiisusi oqarfigaa: „Takuat, uagut suut tamaasa qimallugit malippatsigit; sunami taava pisassaraarput?“ (Matthæusi 19:27) Petrusi apustilillu allat imminut isumakkeerluinnarsimapput. Suna akissarsiarissavaat? Siullermik Jiisusip immikkut pisinnaatitaaffigiligassaat eqqartorpaa, tassa qilammi naalakkersueqatigissagaanni. (Matthæusi 19:28) Nangilluni ajoqersukkami tamarmik immikkut pilluaqqussutisiassaat eqqartorpai. Jiisusi oqarpoq: „Inuk kinaluunniit illuminik, qatanngutiminik angutinik arnanillu, anaanaminik ataataminillu, qitornaminik narsaamminilluunniit qimatsisoq uanga pillunga iivangkiiliulu pillugu, maanna silarsuarmi matumani pissarseqqissaaq 100-riaammik . . . naassaanngitsumillu inuuneqalerumaarpoq silarsuartaassami.“ (Markusi 10:29, 30) Pilliutigisimasatsinnit amerlanerungaartunik tunineqarumaarpugut. Anersaakkut ittumik ataatavut, anaanavut, qatanngutivut meeqqavullu Guutip naalagaaffia  pissutigalugu pilliutigisimasatsinnit tamanit naleqarnerungaarput, ilaa? Kina nalerisimaarnarnerpaamik inuua — Petrusi imaluunniit naalagaasut ilaat inuusuttoq pisooq?

19. (a) Suna pilluarnermut piviusumut aalajangiisuua? (b) Allaaserisami tulliuttumi suut sammissavavut?

¹⁹ Jiisusip oqaatsimigut suliamigullu ersersippaa namminissarsiornerunngitsoq, imminulli pilliutigineq kiffartornerlu pillualissutaasartut. (Matthæusi 20:28; Apustilit Suliaat 20:35) Imminut pilluta inuujunnaarutta Kristusili malittuarlugu, maanna inuunerput nalerisimaarnangaassaaq siunissamilu naassaanngitsumik inuusinnaassalluta. Imminullu isumakkeerutta Jehovap pigilissavaatigut. Taamaalilluta Guutimut inussiaatinngorpugut. Taamatut inussiaaneq sooq nalerisimaarnartuua? Tamannalu aalajangiisarnitsinnut qanoq sunniuteqartarpa? Allaaserisami tulliuttumi tamakku sammineqassapput.

Eqqaamavigit?

• Sooq namminissarsioqqajaaneq akiortariaqarparput?

• Qanoq paasisariaqarpa imminut isumakkeerneq, nappakkamik anniartitaaffimmik ersukkiussineq Jiisusimillu malinnittuarneq?

• Imminut pilluta inuujunnaarnissamut suna kajumississutigaarput?

• Sooq imminut pilliutigeriaannaalluni inuuneq imminut akilersinnaava?

[Atuaqqissaarnermi apeqqutit]

[Qupp. 20-mi assiliartaq]

„Imminut ajunngisaarfiginiarit, Naalagaq“

[Qupp. 22-mi assiliartaq]

Naalagaasut ilaata inuusuttup Jiisusimik malinninnissamut suna akornutigaa?

[Qupp. 24-mi assiliartat]

Jehovap Nalunaajaasui asanninnermit pinngitsaalineqarput Guutip naalagaaffia pillugu oqaluussisartutut aallussilluartutut kiffartornissamut