Qanoq siunertaqarluartumik inuusoqarsinnaava?

GYMNASIAMI ilinniartoq Jesse 17-inik ukiulik aperineqarami inuunerup siunertaa pillugu qanoq isumaqarnersoq, ima akivoq: „Inuutilluni sapinngisannguamik nuannisaarneq.“ Suziep tamanna allatut isumaqarfigaa. Ima akivoq: „Isumaqarpunga nammineq aalajangertaripput inuunerput qanoq siunertaqassanersoq.“

Inuuneq sumik siunertaqarnersoq eqqarsaatiginikuuiuk? Silarsuarmi tamarmi inuiannut annerusumik siunertaqartoqarpa? Imaluunniit Suzie ilumoorpa — inuuneq qanoq nammineq siunertaqartinneripput pingaarnerpaava? Qanorluunniit inuiaqatigiinni teknologii siuariartortigigaluartoq qamuuna ilutsigut inuunerup siunertaata paasinerunissaa maqaasisutut ittarparput. Amerlanersavut ilaanni imminut ima aperisimassagunarput: ’Sooruna maaniittugut?’

Nalitsinni ilisimatuussutsimi apeqqut tamanna akissutissaaleqissunneqarpoq. Qanoq kingunilimmik? „Pinngoriartuaarsimaneraaneq malillugu inuuneq siunertaqavinngilaq,“ taama oqarpoq David P. Barash, psykologiimi zoologiimilu professoriusoq. Pinngoriartuaarsimaneraasut isumaqarput uumassusillit tamarmik ataasiinnarmik siunertaqartut: aniguiniarneq kinguaassiornerlu. Taamaattumik professori Barash ima nangippoq: „Silarsuarmi siunertaqanngivissumi inunnillu soqutiginninngiffiusumi inuunerput nammineq siunertaqartittariaqarparput nammineerluta silaqarlutalu aalajangiisarnitsigut.“

Inuunerup siunertaa

Inuuneq tassaaginnarpa tamatta immikkut iluarisatsinnik iliorneq? Ikiortissarsiorfissaqarpa, imaluunniit inuunermut siunertaqanngitsumut silarsuarmi siunertaqanngitsumi imminiiginnagaavugut? Naamik, Biibilimi itsarli allassimavoq maaniinnerput siunertaqartoq. Piunerput nalaatsornikkut pinngilaq. Biibilimi allassimavoq Pinngortitsisup piffissarujussuaq atorlugu nunarsuaq inummut piareersarsimagaa. Nalaatsornerinnaanngilaq. Qulakkeerpaa suut tamarmik ’ajunngingaartuunerat’. (1 Mosesi 1:31; Esaja 45:18) Sooq? Inunnut siunertaqarami.

Guutilli siunertaqarfigigaluarluta inuit ataasiakkaat inuunerat siumut aalajangereersimanngilaa, sananeqaataasigut toqqaannartumilluunniit akuliunnermigut. Ilumoorpoq sananeqaatsitsigut kingornussatta sunniuteqartarnerat, qanorli iliussanerluta amerlanertigut nammineq aalajangertarparput. Kiffaanngissuseqarpugut inuunerput qanoq atussanerlutigu.

Tamatta immikkut aalajangertussaavarput qanoq inuussanerluta, Pinngortitsisorli eqqarsaatiginngikkutsigu sianiilliornerussaaq. Inuppassuit paasilersimavaat inuunerup siunertavia Guutimut qanittumik attaveqarnermut attuumassuteqartoq. Guutip inuunittalu siunertaata imminnut attuumassuteqarnerat Guutip nammineq atiani, Jehova-mi, erseqqilluinnarpoq, atia ima isumaqarpoq „-nngortitsivoq“, imaluunniit ’-tippaa’. (2 Mosesi 6:3; Tussiaat 83:19) Tassa imaappoq neriorsuutini tamaasa eqquutitikkiartuaartarai siunertanilu tamatigut naammassisarai.  (2 Mosesi 3:14; Esaja 55:10, 11) Tassa Jehovap pinngortikkamisigut siunertaqarneranut ateq Jehova tamatsinnut qularnaveeqqutaavoq.

Pinngortitsisoqarneranik akuerinninnerinnaq inuup inuunermut qanoq isumaqarneranut pingaaruteqangaarpoq. Linet 19-inik ukiulik oqarpoq: „Jehovap pinngortitai tupinnangaartut qimerlooraangakkit siunertaqarnerallu paasillugu, paasisarpara aamma uanga siunertalimmik pinngortinneqarsimallunga.“ Amber oqarpoq: „Tusagaqaraangama ’ilisimanngisatik’ pillugit oqaluttunik qujamasuttarpunga uanga nalunnginnakkit. Jehovap piuneranut uppernarsaatit pinngortitaani erseqqilluinnarput.“ (Romamiut 1:20) Pinngortitsisoqarnera paasillugu allaavoq, siunertaqarluartumilli nammineq attaveqarfigilerlugu soorunami allaalluinnarpoq.

Guutimik ikinnguteqarneq

Uani Biibili iluaqutigeqqissinnaavarput. Kapitalini aallaqqaasiutaasuni erseqqissumik uppernarsarneqarpoq Jehova Guuti tassaasoq ataataq asannittoq. Adami Evalu pinngortikkamigit pinngortitsisortik kinaanersoq taakkununnga eqqoriagassanngortinngilaa. Aap, akuttunngitsumik oqaloqatigisarpai. Jehovallu Edenip naatsiiviani imminiiginnanngilai kingornalu allamik suliaqarluni. Aap, sukumiisumik ilitsersorpai qanoq ajunnginnerpaamik inuusinnaanersut. Nalerisimaarnartumik suliakkerpai ilinniartittuarlugillu. (1 Mosesi 1:26-30; 2:7-9) Ataatap akisussaassusillip asannittullu taamaattuunissaa naatsorsuutigisariaqarpoq, ilaa? Tamatumani sumik paasisaqarpugut? Denielle oqarpoq: „Takusinnaavara Jehovap nunarsuaq pinngortissimagaa piginnaanilersimagaatigullu pinngortitarsuarminik nuannaarutiginninnissamut, tamatumalu takutippaa pilluartuunissarput kissaatigigaa.“

Tamannaannaanngilarli, Jehovap qitornami tamarmik nammineerlutik imminut attaveqarnissaat kissaatigaa soorlu ataataalluartut tamarmik taama kissaateqartartut. Apustilit Suliaat 17:27-mi Guutip neriorsoqqissaarpaatigut ’ilatsinnit kimilluunniit ungasigani’. Tamanna qanoq kinguneqartarpa? Amber oqarpoq: „Jehova ilisarisimalerakkuli kisimiittutut misiginngisaannarpunga. Qanorluunniit atugaqaraluaruma, sukkulluunniit saaffigisinnaavara. Jehova ilisarinerujartortillugu asannittuusoq, ingasaassiniarneq ajortoq tatiginartorlu paasinarsisarpoq.“ Jeff oqaluttuarpoq: „Jehovamut qanittumik attaveqalerama paasivara allamik taassumannga ajunnginnerusumik uannik tapersersuisinnaasoqanngitsoq ikiuisinnaasoqanngitsorlu.“

Ajoraluartumik Guuti pillugu eqqunngitsunik oqaluttoqartarpoq. Inuppassuit naalliuutaannut upperisarsiornerullu ajortunngorsimaneranut akisussaatinneqartarpoq. Jehova inuiaat oqaluttuarisaaneranni pisimasunut amiilaarnartunut pisuutinneqartarpoq. Mosesimik allakkat tallimaat 32:4, 5-imili qularunnaarsinneqarpugut: „Aqqutigisai tamarmik eqqortuupput. . . . Namminneq aserornartumik iliorput; Guutip qitornarinngilai; namminneq kukkussutigaat.“ (NV) Taamaammat suna ilumoortuunersoq nammineq misissortariaqarparput. — 5 Mosesi 30:19, 20.

Guutip siunertaa naammassineqartoq

Qanorluunniit aalajangeraluarutta Guuti nunarsuarmut inuiannullu siunertaminik naammassinninniarnerani akornusersinnaanngilarput. Taannami Pinngortitsisuuvoq. Sunalu siunertaraa? Jiisusip Kristusip qaqqami oqaluutsimini eqqaavaa ima oqarami: „Pilluarput qanilaartut, taakkuami nunarsuaq kingornutissavaat.“ Kingornalu Jiisusi apustili Johannesimut oqamisaarpoq Guutip aalajangiusimagaa ’aserussallugit nunarsuarmik aseruisut.’ (Matthæusi 5:5; Saqqummersitat 11:18) Jiisusi taama oqarsinnaasimavoq Guuti tamanik pinngortitsimmat najoramiuk taamaammallu nalunngilaa aallaqqaataaniit Guutip siunertarigaa inuiaat naammalluinnartut nunami paratiisiusumi naassaanngitsumik inuunissaat. (1 Mosesi 1:26, 27; Johannesi 1:1-3) Guutilu allanngorneq ajorpoq. (Malaki 3:6) Neriorsuivoq: „Eqqarsaatikka eqqorlugit pisoqassaaq, pilersaarutikka eqqorlugit naammassineqassapput.“ — Esaja 14:24.

Jehovap inuiaat ataasiussusillit tunngaviliulereerpai, silarsuarmi avatangiisitsinniittutut piumatuussusermik imminullu pingaartinnermik tunngaveqanngitsut, Guutimut tullermullu asanninnermik tunngaveqartut. (Johannesi  13:35; Efesosimiut 4:15, 16; Filippimiut 2:1-4) Inuiaqatigiiupput namminneq kajumissutsiminnit peqataasut, inuit siumukarusussuseqartut kajumissuseqangaartut, pissutsillu aaqqissuussaanerata maanna atuuttup naggatissaa nalliutsinnagu Guutip naalagaaffia takkuttussaq pillugu tusagassamik nuannersumik oqaluussinermik suliassallit. (Matthæusi 24:14; 28:19, 20) Kristumiut 6 millionit sinnillit nunani 230-nit amerlanerusuni qatanngutigiissuit nunanit tamalaaneersut asaqatigiissut ataasiussuseqartut maanna suleqatigiilereerput.

Siunertaqarluartumik inuulerit

Inuunerit siunertaqarnerulerserusukkukku, taava ilisimassavat Jehova Guutip qaaqqugaatit innuttaminut ilannguteqqullutit — ’inuiannut iluartunut’ taassuma pigisaanut. (Esaja 26:2) Immaqali eqqarsarputit: ’Qanormita ippa kristumiunut inuiaqatigiinnut taakkununnga ilaalluni? Kissaatigaara arlaannut akuliunnissara?’ Tusariaruk inuusuttut ilaat qanoq oqaaseqarnersut:

Quentin: „Silarsuarmi ajortumi ilagiit qimarnguffigaakka. Jehova inuuninnut ilaasoq nassuerutigalugu, piuneranik takunninnissamut iluaqutigaara, kissaatigaalu pilluassasunga.“

Jeff: „Uannut ilagiit tassaapput sapiinnissamik nukissamillu aallerfissaq pitsaanerpaaq. Tassaniipput qatanngutikka, ikiortarpaannga tapersersortarlungalu. Soorlu tassa ilaqutavikka.“

Linet: „Sallusuissummik Biibilimeersumik ilassinnittut Jehovamullu kiffartorniarlutik aalajangersut takullugit nuannaarneq allamut nallersuunneqarsinnaanngilaq. Tamanna uannik nalerisimaartitsingaartarpoq.“

Cody: „Jehovaqarnanga inuunera naleqassanngikkaluarpoq, allarpassuillu iliortarnerattut taamungaannaq pilluarneq ujassagaluarpara naninngisaannarlugulu. Jehovalli asseqanngitsumik immikkut pisinnaatitaaffilerpaanga imminut attaveqalersillunga. Inuuneralu siunertaqalerpoq.“

Soormi Jehovap qaaqqusissutaa ilassigukku? Aamma Pinngortitsisinnut, Jehova Guutimut, qanillinikkut paasilissavat siunertaqarluartumik inuulersinnaallutit. (wE 8/1 04)

[Qupp. 10-mi assiliartat]

Guutimut ajunngitsumik attaveqarneq inuunermik siunertaqarlualersitsisarpoq

[Qupp. 8-mi suminngaanneernera]

NASA-foto