„Qanermik ataasiusumik“ Guuti unnersiutigisiuk

’Isumaqatigiillusi qanermik ataasiusumik Guuti Naalakkatta Jiisusi-Kristusip Ataataa unnersiutigisiuk.’ — ROMAMIUT 15:6.

1. Isumaqatigiinngissuteqartarneq eqqarsaatigalugu Paulusip uppeqatini sumik ilinniartippai?

KRISTUMIUT tamarmiunngitsoq assigiimmik qinersisarput assigiimmilluunniit nuannarisaqartarlutik. Taamaattorli tamatta suleqatigiilluarluta inuunermut aqqutikkut ingerlaqatigiissaagut. Tamanna ajornanngila? Aap, isumaqatigiinngissuteerannguit akerleriissuterujussuanngortinngikkutsigik. Tamanna apustili Paulusip ukiuni hundredelinni siullerni uppeqatiminut ilinniartitsissutigaa. Pingaarutilik tamanna qanoq nassuiarpaa? Ullumikkullu siunnersuutaa isumassarsiarititaasoq qanoq maleruarsinnaavarput?

Kristumiutut ataasiussuseqarnerup pingaaruteqarnera

2. Ataasiussuseqartariaqarneq Paulusip qanoq erseqqissarpaa?

² Paulusip kristumiutut ataasiussuseqartuarnissap pingaaruteqarnera nalunngilaa, uppeqatinilu asannillutik kamageqatigiissinnaaqqullugit pitsaasumik siunnersorpai. (Efesosimiut 4:1-3; Kolossemiut 3:12-14) Ukiunili 20-nit amerlanerusuni ilagiippassuarnik pilersitsisareerluni tikeraartareerlugillu nalunngilaa ataasiussuseqartuarnissaq qanoq ajornakusoorsinnaatigisoq. (1 Korinthimiut 1:11-13; Galatiamiut 2:11-14) Taamaattumik uppeqatini Romamiittut ima kajumissaarpai: „Guutip nikallujuitsuutitsisup tuppallersaasullu tunilisi . . . isumaqatigiillusi qanermik ataasiusumik Guuti Naalakkatta Jiisusi-Kristusip Ataataa unnersiutigeqqullugu.“ (Romamiut 15:5, 6) Aammattaaq uagut ullumikkut Guutimut innuttaasutut ataasiussuseqartutut Jehova Guuti „qanermik ataasiusumik“ unnersiutigisariaqarparput. Taamaaliorpugut?

3, 4. (a) Romami kristumiut tunuliaquttamikkut qanoq assigiinngissuteqarpat? (b) Romami kristumiut Jehova qanoq „qanermik ataasiusumik“ kiffartorfigisinnaavaat?

³ Romami kristumiorpassuit Paulusip qanitarai. (Romamiut 16:3-16) Assigiinngitsunik tunuliaqutaqaraluartut Paulusip qatanngutini tamaasa ’Guutip asasaasut’ isigai. Ima allappoq: „Tamassi pillusi Guutiga qutsavigaara Jiisusi-Kristusikkut uppersusersi silarsuarmi tamarmi nalunaajaatigineqarmat.“ Romami kristumiut assigiinngitsorpassuartigut maligassiuilluartuunerat erseqqippoq. (Romamiut 1:7, 8; 15:14) Aammattaarli taakkua ilaat aalajangersimasunut assigiinngitsumik isumaqarput. Ullumikkut kristumiut tunuliaquttamikkut kulturimikkullu assigiinngitsorujussuupput, assigiinngitsumillu isumaqarnerup qanoq periaaseqarfigineqarnissaa pillugu Paulusip siunnersuutaanik isumassarsiarititaasumik misissuineq „qanermik ataasiusumik“ oqalunnissaminnut iluaqutigisinnaavaat.

⁴ Taamanikkut Romami kristumioqarpoq juutiusunik juutiunngitsunillu. (Romamiut 4:1; 11:13) Kristumiut juutiusut ilaasa Mosesip inatsisai atuukkallarmata ileqquusut ileqqoriunnaarusunnginnguatsiarpaat, naak ilisimasariaqarluarlugu annaanneqarnissamut taamaaliornissaq pisariaqanngitsoq. Kristumiorpassuilli juutiusut paasivaat Kristusip pilliutaata kristumiunngunngikkallaramik malittariaqakkanit killilersuutaasunit aniguisikkaatsik, taamaattumillu inuttut ileqqumik ilaat allanngortippaat. (Galatiamiut 4:8-11) Paulusilli uparuaaneratut tamaasa ’Guutip asasarai’. „Qanermik ataasiusumik“ Guuti unnersiutigisinnaavaat imminnut eqqortumik isumaqarfigiuarunik. Ullumikkut immaqa aamma aalajangersimasut assigiinngitsunik  isumaqarfigaavut, taamaattumillu pingaarutilik tamanna Paulusip qanoq nassuiarneraa eqqarsaatigeqqissaarutsigu pitsaassaaq. — Romamiut 15:4.

„Ilasseqatigiinniaritsi“

5, 6. Sooq Romami kristumiut assigiinngitsunik isumaqarpat?

⁵ Paulusip Romamiunut allakkamini kristumiut assigiinngitsunik isumaqarfigisaat allaatigai. Ima allappoq: „Inuit ilaannut sumilluunniit nerinissaq upperisaanut akerliuneq ajorpoq, sanngiitsorli naatitaannarnik nerisarpoq.“ Sooq taamaappa? Mosesip inatsisai atuukkallarmata puulukip neqaanik nerineq inerteqqutaavoq. (Romamiut 14:2; 3 Mosesi 11:7) Jiisusilli toqunerata kingorna Inatsisit taakku atorunnaarput. (Efesosimiut 2:15) Jiisusillu toqunerata kingorna ukiut sisamassaat qiteqqullugu qaangiuttoq inngilip apustili Petrusi nassuiaappaa Guutip isaani nerisassanik mingunnartoqanngitsoq. (Apustilit Suliaat 11:7-12) Tamanna eqqarsaatigalugu kristumiut juutiusut ilaat immaqa misigipput ilerasuuteqaratik puulukitorsinnaallutik — nerisassanilluunniit allanik Inatsisit atuukkallarmata inerteqqutaasunik nerisinnaallutik.

⁶ Kristumiunulli juutiusunut allanut siornatigut mingunnartutut isigineqarsimasunik nerinissaq eqqarsaatigiinnarlugu maajunnartuusimassagunarpoq. Immaqa qatanngutitik kristumiut juutiusut taamaattunik nerisut takullugit sianiilliorlutik ajuallaatigisarpaat. Kristumiullu juutiunngitsut, upperisarsiornikkut tunuliaquttamikkut nerisassat tungaasigut malittarisassaqarsimanngisaannarunartut, immaqa tupigusuutigaat nerisassat ajornartorsiutaalersinnaanerat. Soorunami eqqunngitsuliornerunngilaq ilaasa nerisassat aalajangersimasut neriumanngimmatigik, isumaqanngikkunik annaanneqarnissamut taamaaliorneq pisariaqartoq. Taamatulli assigiinngitsunik isumaqarnerit ilagiinni akerleriittoqalersitseriaannaasimagaluarput. Romami kristumiut isummat assigiinngitsut taamaattut „qanermik ataasiusumik“ Guutimik unnersiutiginninnerminnut akornutaalinnginnissaat sianigisariaqarpaat.

7. Sapaatip-akunnerani ullormik aalajangersimasumik illernartitaqarnissaq pillugu kristumiut assigiinngitsunik qanoq isumaqarpat?

⁷ Paulusi ima assersuusioqqippoq: „Inuit ilaat ullut ilaannik pingaarnerutitaqartarpoq, allalli tamaasa assigiimmik pingaassuseqartittarpai.“ (Romamiut 14:5a) Mosesip inatsisai atuukkallarmata sabbatimi sumilluunniit suliaqarneq inerteqqutaavoq. Allaat ullormi tamatumani angalasinnaanerat killeqartorujussuuvoq. (2 Mosesi 20:8-10; Matthæusi 24:20; Apustilit Suliaat 1:12) Inatsisilli atuukkunnaarmata taamaattunik inerteqqutaaruppoq. Taamaattoq kristumiut juutiusut ilaasa ullormi siornatigut illernartutut isigisimasaminni sulinissartik ungasissumulluunniit angalanissartik immaqa eqqissisimanarinngilaat. Allaat kristumiunngoreeraluarlutik ullut arfineq-aappaat immaqa anersaamut tunngasunut immikkoortittarpaat naak sabbati pillugu inatsit Guutip isaani atuukkunnaareeraluartoq. Eqqunngitsuliorpat? Naamik, aatsaat sabbatisiortarneq Guutimit piumasaqaataanerarlugu kimigiiserunik eqqunngitsuliussapput. Taamaattumik Paulusip qatanngutimi kristumiut nalunngeqatiginnissusiat eqqarsaatigalugu ima allappoq: „Tamarmik immikkut isumartik eqqortuusorisartik aalajangiullissuk.“ — Romamiut 14:5b.

8. Romami kristumiut, allat nalunngeqatiginnissusiannik innimiginnittuusut, qanoq iliussanngillat?

⁸ Naak Paulusip qatanngutini nalunngeqatiginnissusermut tunngasuni akiugaqartunut kamagittartooqqullugit asannittumik kajumissaaraluarlugit, annaanneqarnissamut piumasaqaataanerarlugu uppeqatiminnik Mosesip inatsisaanik malinneqqusillutik pinngitsaaliiniartut sakkortuumik avoqqaarai. Assersuutigalugu ukiup 61-ip missaani Paulusip hebræerinut allakkamini kristumiut juutiusut kimittuumik allaffigai, tassanilu erseqqilluinnartumik nassuiarpaa Mosesip inatsisaanik maleruaaneq naleeruttoq, kristumiut Jiisusip utertitsissutitut pilliutaa tunngavigalugu pitsaanerusumik neriuuteqarmata. — Galatiamiut 5:1-12; Titusi 1:10, 11; Hebræerit 10:1-17.

9, 10. Kristumiut qanoq iliornaveersaartariaqarpat, aamma sooq?

⁹ Takoriikkatsitut Paulusip nassuiarpaa kristumiut  assigiinngitsunik aalajangiisarnerat ataasiussutsimut navianartorsiutaasariaqanngitsoq, kristumiunut najoqqutassiat unioqqutinneqanngippata. Taamaattumik Paulusip kristumiut sanngiinnerusumik nalunngeqatiginnissusillit ima aperai: „Sooq qatanngutit eqqartuunniarpiuk?“ Nukittunerusullu (immaqa kristumiut ilerasuutiginagu sabbatimi sulisinnaasut Inatsisilluunniit atuukkallarmata nerisassanik inerteqqutaasunik aalajangersimasunik nerisinnaasut) ima aperai: „Sooq illit qatanngutit asissorpiuk?“ (Romamiut 14:10) Paulusi naapertorlugu kristumiut sanngiinnerusumik nalunngeqatiginnissusillit qatanngutitik akaarinninnerusut assuarissanngilaat. Aammattaaq kristumiut nukittuut nalunngeqatiginnissutsimikkut arlaatigut suli sanngiitsuusut nikagissanngilaat. Tamarmik immikkut allat pissutiginiagaat ataqqissavaat ’imminnillu pingaartissanatik pisariaqartumit annerusumik’. — Romamiut 12:3, 18.

¹⁰ Oqimaaqatigiissumik isiginnittaaseqarneq Paulusip ima nassuiarpaa: „Nerisup asissunngikkiliuk nerinngitsoq, nerinngitsullu eqqartuutinngikkiliuk nerisoq, Guutimmi ilassisimammagu.“ Aammattaaq ima oqarpoq: ’Kristusip ilassisimavaasi Guutip naalannaatissaanik.’ Nukittuut sanngiitsullu Guutimit Kristusimillu ilassineqarmata, uaguttaaq taamatut kamagittartuusariaqarpugut ’ilasseqatigiillutalu’. (Romamiut 14:3; 15:7) Tamanna assortorneqarsinnaava?

Qatanngutigiittut asaqatigiinneq ullumikkut ataasiussuseqartitsivoq

11. Paulusip nalaani pissutsit immikkut ittut qanoq ittut atuuppat?

¹¹ Paulusip Romamiunut allakkamini pissutsit immikkorluinnaq ittut allaatigai. Jehovap angeruseq atorunnaarseqqammerpaa nutaarlu atulerseqqammerlugu. Ilaasa angerutsimut nutaamut naleqqussarnissartik ajornakusoortippaat. Pissutsinik taamatut ittorluinnarnik ullumikkut atugaqanngilagut, ilaannikkulli assingusunik ajornartorsiuteqartoqalersinnaavoq.

12, 13. Pissutsini qanoq ittuni kristumiut ullumikkut uppeqatimik nalunngeqatiginnissusiannik innimiginnissinnaappat?

¹² Assersuutigalugu arnaq kristumiu immaqa upperisarsiortunut pilimanianngilluinnartumik atisalersortarnermik kiinnamullu tanigutinik atuinnginnissamik pingaartitsisunut ilaasortaasimavoq. Sallusuissut ilikkaramiuk immaqa tulluartumik tanilaarnerup qalipaatigissaartunilluunniit, pilimanianngitsumilli pissutsinullu naleqquttumik, atisaqarnerup eqqunngitsuliornerunnginnerat sungiukkuminaatsippaa. Tamakkununnga Biibilimi najoqqutassiaqanngimmat nalunngeqatiginnissusianut akerliusumik iliuuseqartinniarnissaa eqqortuliornerussanngilaq. Arnalli taassuma paasivaa arnat kristumiut ilerasuutiginagu tanittartut qalipaatigissaartunillu atisaqartartut isornartorsiussanngikkini.

¹³ Allamik assersuuteqariarta. Angut kristumiu immaqa peroriartorpoq aalakoornartortalinnik imigassartortartunik ajorinnittunik avatangiiseqarluni.  Maanna sallusuissummik ilisarsigami ilikkarpaa Biibili naapertorlugu viinni Guutimit tunissutisiaasoq ingasaannagu imerneqarsinnaasoq. (Tussiaat 104:15) Tamanna akueraa, tunuliaqutanili naapertorlugu aalajangerpoq aalakoornartutunngilluinnarniarluni. Ingasaassinatilli aalakoornartutortut isornartorsiunngilai. Taamaalilluni Paulusip siunnersuutaa una malippaa: „Eqqissinartut ineriartorteqatigiinnerlu noqqaassutiginiartigit.“ — Romamiut 14:19.

14. Pissutsini qanoq ittuni kristumiut ersersissinnaavaat Paulusip Romamiunut siunnersuutaata anersaavanik paasinnillutik?

¹⁴ Aamma pissutsit allat pilersarput Paulusip Romamiunut siunnersuutaata anersaavanik paasinninnissamik pisariaqalersitsisut. Ilagiit kristumiut tassaapput inuit assigiinngitsorpassuit, tamarmiunngitsorlu assigiimmik nuannarisaqarput. Taamaattumik assigiinngitsunik aalajangiisarput, soorlu atisalersoriaatsimut nujalereriaatsimullu tunngasuni. Soorunami Biibilimi erseqqissunik najoqqutassiaqarpoq kristumiut eqqortuliorusuttut tamarmik malitaannik. Kinaluunniit arlarput eqqumiitsumik pilimaniartumilluunniit, silarsuarmiluunniit inunnut ilaarusunngisatsinnut assersuunneqaatigisinnaasatsinnik, atisalersoriaaseqassanngilaq nujalereriaaseqassananiluunniit. (1 Johannesi 2:15-17) Kristumiut eqqaamavaat Jehovamut kiffaajuarlutik qilammilu nunamilu Kisimi Oqartussaasumut sinniisuujuarlutik, aamma qasuersaaraangamik. (Esaja 43:10; Johannesi 17:16; 1 Timotheusi 2:9, 10) Assigiinngitsorpassuartigulli kristumiut qinigassarpassuaqarput. *

Allanut naakkiussutaanaveersaarit

15. Qaqugukkut kristumiu qatanngutini soqutigittarfigalugit pisinnaatitaaffigisaraluamisut iliussanngila?

¹⁵ Paulusip Romami kristumiunut siunnersuutimini aamma pingaarutilik alla uparuarpaa. Ilaannikkut kristumiu ilinniartitaalluartumik nalunngeqatiginnissusilik pisinnaatitaaffigisaraluamisut iliorniarnani aalajangersinnaasarpoq. Sooq? Nalunnginnamiuk allat ajoqusersinnaallugit. Pissutsini taamaattuni qanoq iliortariaqarpugut? Paulusi ima allappoq: „Eqqortuliussaatit neqitunngikkuit viinnisunngikkuilluunniit allamilluunniit qatanngutinnut naakkiussutaasinnaasumik iliuuseqanngikkuit.“ (Romamiut 14:14, 20, 21) Aap, „uagut sanngisuujusugut pisussaavugut sanngiitsut sanngiissutaat ersussallugit imminuinnaq eqqarsaatiginata. Tamatta immikkut eqqarsaatigissavavut tullitta iluaqutissaat ineriartornissaallu“. (Romamiut 15:1, 2) Aalajangernerput pillugu uppeqatitta nalunngeqatiginnissusia ajoquserneqarsinnaappat qatanngutigiittut asannikkatta soqutigittartuussaagut imminullu killilersimaarluta. Aalakoornartortalimmik imigassartorneq assersuutigisinnaavarput. Kristumiu ingasaassinani viinnisorsinnaatitaavoq. Qatanngutimili naakkiussutigisinnaassappagu, pisinnaatitaanermisut iliorusussanngilaq.

16. Oqaluussiffigisartakkatsinni najugallit qanoq soqutigittarfigisinnaavavut?

¹⁶ Najoqqutassiaq tamanna aamma ilagiit avataanniittunut pissusilersornitsinni atorneqarsinnaavoq. Assersuutigalugu immaqa nunagisatsinni upperisarsiortut malunnarnerusut sapaatip-akunnerani ullut ilaat qasuersaarfigisarpaat. Taamaappat ullormi tamatumani sanilitta ajuallaatigisinnaasaannik oqaluussinermullu akornutaasinnaasumik sapinngisamik iliuuseqarnaveersaassaagut. Aammattaaq takorloorneqarsinnaavoq kristumiu pisooq pisariaqartitsiffiunerusumi kiffartorusuttoq taamaattumillu piitsoqarfiusumut nuuttoq. Immaqa aalajangerpoq pilimanianngilluinnartumik atisalersoriaaseqarnermigut imaluunniit aningaasaateqaraluarluni pilimaniannginnerusumik inooriaaseqarnermigut saniliminut soqutigittartuuniarluni.

17. Aalajangigassaqartilluta aalajangiigaangatta sooq naleqquttuua allanut soqutigittartuunissarput?

¹⁷ Naleqquppa naatsorsuutigissallugu ’sanngisuujusut’ taamatut allanut soqutigittartuunissaat? Assersuusiaq una eqqarsaatigiuk: Aqqusinikkut biilertillutit siuninni meeqqat aqqusinermut qanippallaartut takulerpatit. Sukkanerpaasinnaatitaanittut  sukkatigalutit ingerlaannarpit taamaaliorsinnaatitaagavit? Naagga, meeqqat navianartorsiortinniarnagit kigaallapputit. Taamatulli ilaannikkut uppeqatitsinnut allanulluunniit attaveqarnitsinni mianersornissaq pisariaqartarpoq. Immaqa pisinnaatitaaffigilluinnakkatsitut iliuuseqarpugut. Biibilimi najoqqutassianik unioqqutitsinngilagut. Allalli mamiatsaatigisinnaappassuk sanngiitsumilluunniit nalunngeqatiginnissusilinnut ajoqutaasinnaappat kristumiutut asannikkatta qajassuussissaagut. (Romamiut 14:13, 15) Ataasiussuseqartuarneq Guutillu naalagaaffiata soqutigisaanik siuarsaaneq pingaaruteqarneruvoq pisinnaatitaaffimmik aalajangiusimanninnermit.

18, 19. (a) Allanut soqutigittartuugaangatta Jiisusi qanoq ilaartarparput? (b) Sumut tunngatillugu ataasiussuseqarluinnarpugut, allaaserisamilu tulliuttumi suna sammineqassava?

¹⁸ Taamatut allanut soqutigittartuugaangatta maligassiuilluarnerpaaq malittarparput. Paulusi ima allappoq: „Kristusiluunniit imminut eqqarsaatiginngilaq, soorlu allassimasoq: ’Mitallersivit mitalliutaasa tuffigaannga.’“ Jiisusi uagut pilluta inuunerminik pilliuteqarnissaminut piumassuseqarpoq. Soorunami aamma uagut piumassuseqarpugut pisinnaatitaaffitta ilaannik pilliuteqarnissamut, „sanngiitsut“ iluaqutigisinnaappassuk ataasiuqatigiilluta Guutimik unnersiutiginninnissamut. Kristumiunut sanngiinnerusumik nalunngeqatiginnissusilinnut soqutigittartuunikkut kamagittartuunikkullu — namminerluunniit aalajangiisinnaanitta kajumilluta killilersimaarneratigut pisinnaatitaanittalu aalajangiusimaannannginneratigut — ersersittarparput ’ataasiusumik isumaliorfigeqatigiilluta Kristusi Jiisusi malillugu’ (1900/1961). — Romamiut 15:1-5.

¹⁹ Naak immaqa Biibilimi najoqqutassianut tunngasortaqanngitsuni assigiilluinnanngitsunik isumaqaraluarluta, Guutimik pallorfiginninnermut tunngatillugu ataasiussuseqarluinnarpugut. (1 Korinthimiut 1:10) Ataasiussuseqarneq tamanna erseqqippoq, soorlu pallorfiginninnermik ilumoortumik akerlilersuisunut periaaseqartarnitsigut. Akerlilersuisut taakku Guutip oqaasiani nalusamik, imaluunniit takornartamik, taaneqarput, mianersoqquneqarpugullu ’nalusap nipaa’ mianersorfigissagipput. (Johannesi 10:5) Nalusat taakku qanoq ilisarisinnaavavut? Qanoq periaaseqarfigisariaqarpavut? Apeqqutit taakku allaaserisami tulliuttumi sammineqassapput.

[Quppernerup ataani ilanngussaq]

Uteqqiineq

• Inummut namminermut tunngasuni assigiinngitsunik isumaqarneq sooq ataasiussuseqarnitsinnik navianartorsiortitsinngila?

• Sooq kristumiutut asannittumik soqutigittarfigeqatigiittariaqarpugut?

• Paulusip ataasiussuseqarneq pillugu siunnersuutaa ullumikkut sutigut atorsinnaavarput, taamaaliornissatsinnullu suna kajumississutigissavarput?

[Atuaqqissaarnermi apeqqutit]

[Qupp. 14-imi assiliartaq]

Kristumiut assigiinngitsunik tunuliaqutaqaraluarlutik ataasiussuseqarput

[Qupp. 16-imi assiliartaq]

Biilertoq maanna qanoq iliortariaqarpa?