Meeqqanik perorsaanermut Biibilimi siunnersuuteqarpa?

ORKIDÉ naasuuvoq kusanartorujussuaq, kisianni naatinniaruminaatsoq. Iluatsittumik naassaguni kissamik qaamanermillu naammattumik pisariaqarpoq, naasulivillu eqqortumik angissuseqartariaqarluni. Aamma naajartorfia naggorissaallu atorneqartoq pingaaruteqarput. Aammattaaq nappaatinit uumasunillu imaaliallaannaq aserorneqarsinnaavoq. Taamaattumik siullermeerluni orkidémik naatitsiniarnermi kissaatigisatut tamatigut pisoqarneq ajorpoq.

Qajassuussilluni meeqqanik perorsaaneq aamma pisariaqartorujussuuvoq, pisariunerujussuullunili piuminaallunilu. Taamaattumik angajoqqaat meeqqanik perorsaanermut tunngatillugu akuttunngitsumik isumassaaruttutut misigisinnaapput. Amerlasuut ikiorneqarnissartik pisariaqartillugu paasisarpaat, soorlu orkidéutillip immikkut ilisimasalimmik siunnersorneqarnissaq pisariaqartissinnaagaa. Sumi nanineqarsinnaava?

Biibili tassaanngilaq atuagaq meeqqanik perorsaanermut najoqqutassiaq, Pinngortitsisulli allaatiginnittut isumassarsisippai sammisaq taanna pillugu siunnersuutit amerlasuut atoriaannaat allannissaannut. Guutip oqaasiani erseqqissarneqarpoq ajunngitsunik isumalluartumillu pissuseqalernissap sulissutiginissaata pingaaruteqassusia, tamannalu ullumikkut amerlasuunit annikippallaamik iliuuseqarfigineqartutut isumaqarfigineqarpoq. (Efesosimiut 4:22-24) Tassa Biibili oqimaaqatigiissumik ilinniartitsinermut pissutsinik tunngaviusumik imaqarpoq. Tusindilippassuit sumiluunniit najugaqaraluarlutik, kulturilu sunaluunniit tunuliaqutarigaluarlugu, ilitsersuutinik maleruaanertik iluaqutigisimavaat. Taamaattumik siunnersuutit Biibilimeersut meeqqavit ajunngitsumik perorsarnissaannut iluaqutigisinnaavaatit.

Angajoqqaat maligassiaat — ajoqersuineq pitsaanerpaaq

„Illimmi allanut ajoqersuisuusutit imminut ajoqersunngilatit! Oqaluussisartutit tillittoqassanngitsoq nammineq tillittarputit! Oqartartutit allasiortoqassanngitsoq nammineq allasiortarputit!“ — Romamiut 2:21, 22.

Seoulimi skolekommissionip pisortaa oqarpoq: „Ajoqersuineq pitsaanerpaaq angajoqqaat meeqqaminnut tunniussinnaasaat tassaavoq oqaatsitigut iliuutsikkullu maligassiuineq.“ Angajoqqaat meeqqatik immikkut ittumik ilitsersorunikkit, namminerli malissiuilluaratik, meeqqap pisuusaarneq pilertortumik paasissavaa. Angajoqqaat oqaasii kissaatigisatut sunniuteqassanngillat. Angajoqqaat meeqqatik unneqqarissuunermik ilinniartinniarunikkit, namminneq unneqqarissuusariaqarput. Angajoqqaat oqarasuaatikkut oqaluussinissamut kajumippallaanngitsut, ilaannikkut meerartik oqartittarpaat: „Ajoraluartumik ataataga (imaluunniit anaanaga) angerlarsimanngilaq.“ Meeraq taamatut oqaqquneqartoq peqqusiileqitinneqassaaq paatsiveerullunilu. Kingusinnerusukkut meeqqap pisumit nuanniitsumit ilerasuuteqarani sallulluni aniguiniartalerneranik kinguneqarsinnaavoq. Angajoqqaat ilumoorlutik kissaatigigunikku meeqqamik unneqqarissuunissaat, namminneq oqaatsimikkut iliuutsimikkullu unneqqarissuusariaqarput.

Meeqqavit pitsaasumik ataqqinningaartumillu oqalunnissaat piumasaraajuk? Taava illit nammineq oqaatsit pitsaasut ataqqinningaartullu atortariaqarpatit. Meeqqat ilaarsipallattarput. Sung-sik, meeqqanut sisamanut ataataasoq, oqarpoq: „Nuliaralu oqaasipilunngisaannarnissarput anguniarparput. Immitsinnut ataqqivugut kamakkaangattalu nipituuliussanata. Maligassiuilluarneq oqaatsinit  kimittunerujussuuvoq. Nuannaarutigaarput meeqqavut allanut inussiarnersumik ataqqinningaartumillu oqaluttarmata.“ Biibilimi Galatiamiut 6:7-imi allassimavoq: „Inuup siaruartikkani aamma katersorumaarpai.“ Angajoqqaat meeqqamik ileqqorissuunissaanik kissaatigisaqartut, namminneq takutitsisariaqarput qanoq iliortoqartarneranik.

Ataqatigiilluarneq sernigiuk?

„Erninnut nangeqqittuartassavatit [Guutip inatsisai] eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ — 5 Mosesi 6:7.

Suliffiup saniatigut allamik suliffeqarneq nalinginnaaleraluttuinnarpoq. Uiusoq nulialu suliffeqaraangata, meeqqanut sunniuteqartorujussuusarpoq. Angajoqqaanut amerlasuunut meeqqat ilaginissaannut piffissakinnerulersitsisarpoq. Angajoqqaat angerlarsimagaangamik, piffissaq illumi suliassanut saatassanullu allanut atortarpaat, ilimanarporlu kingorna qasullutillu nukillaangasassasut. Pissutsit taamaatsillugit meeqqaminik qanoq attaveqateqarluaannartoqarsinnaava? Angajoqqaat meeqqallu illumi suliassanik ikioqatigiippata oqaloqatigiinnissamut periarfissaqarpoq. Ilaqutariinni ataataasoq allaat fjernsyneqarunnaarumasimavoq, pingaarnerusumik meeqqami oqaloqatiginissaannut piffissaqarnerorusulluni. Taanna oqarpoq: „Aallaqqaammut meeqqat avaanngusoqqaarallarput, pinnguaqatigiinnerujartortillutali pinnguaatinik paasisaqarfiulluartunik, atuakkallu soqutiginartut oqaloqatigiissutigisarlugit allannguutaasoq akueraat.“

Meeqqat mikineranniilli angajoqqaaminnik attaveqatiginninnermut sungiussitinnissaat pingaaruteqarpoq. Taamaanngippat imaasinnaavoq inuusuttunngulernerminni angajoqqaatik ikinngutitut tatigisatut ajornartorsiutiminnik ikiuisinnaasutut isigissanngikkaat. Qanoq meeqqat ammartinneqarsinnaappat? Ussatit 20:5-imi allassimavoq: „Siunnersuutit ajunngitsut angutip uummataaniittut tassaapput imeq itisooq; silassorissoq taassumannga qalooraasinnaasarpoq.“ Angajoqqaat qitornatik qanoq eqqarsarnerminnik misiginerminnillu oqaatiginninnissaannik kajumissaarsinnaavaat, soorlu ima aperalutik: „Illit nammineq qanoq isumaqarpit?“

Qitornat sualuttumik kukkuppat qanoq qisuariassavit? Taamatorpiaq pisoqartillugu meeqqap pisariaqartittarpaa inussiarnersumik qajassuartumillu pineqarnissani. Meeqqat tusarnaartillugu nunusinnaagit. Taamatut pisoqarnerani ajornartorsiut akiorniarlugu qanoq iliorsimanerminik ataataasoq oqaluttuarpoq: „Meeqqat eqqunngitsuliorsimagaangata, ingasattumik qisuariarneq pinngitsoorniartarpara. Ingittarpunga qanorlu oqaasissaqarnersut tusarnaarlugit. Pisimasoq paasiniartarpara. Noqissinnaaneq sapernartikkaangakku, eqqissinissama tungaanut utaqqilaartarpunga.“ Misigissutsitit aqussinnaagukkit tusarnaarsinnaallutillu, siunnersuut akueriuminartinneqarnerussaaq.

Asannittumik naveersineq pingaaruteqarpoq

„Ataataasusi, qitornasi kamatseqinasigit, perorsarsigilli anusinngorsartarlugit oqaaqqissaartarlugillu [Jehovamit] pisumik.“ — Efesosimiut 6:4.

Kissaatigisattut sunniuteqassappat, pingaartorujussuuvoq asannittumik naveersinissat. Angajoqqaat qanoq ilillutik ’qitornatik kamatsissinnaavaat’? Kukkusoqartillugu ingasaassilluni naveersigaanni, imaluunniit sakkortuallaamik isorinnikkaanni, meeqqat killormuulissapput. Tamatigut asannittumik perorsaasoqartariaqarpoq. (Ussatit 13:24) Meeqqatit eqqarsalersinniarlugit oqaloqatigigukkit, paasissavaat asagakkit naveeritit. — Ussatit 22:15; 29:19.

Eqqunngitsuliornerulli kingunipiluinik meeqqat misigisarnissaat ajoqutaanngilaq. Soorlu assersuutigalugu meeqqavit arlaat arlaannut  eqqunngitsuliorsimappat, meeraq piumaffigisinnaavat pineqartoq utoqqatserfigissagaa. Meeqqat illumi malittarisassat unioqqutippatigit, arlaatigut killilersorsinnaavatit erseqqissarniarlugu malittarisassat ilumoorunneqarnissaat.

Ilitsersuissagaanni, pingaaruteqarpoq piffissami eqqortumi taamaaliornissaq. Oqaluussisartup oqaasiini 8:11-mi ima allassimavoq: „Iluaatsuliorneq pillugu piaartumik eqqartuussineqanngikkaangat inuit uummataat ajortuliornissamut pilerissusermik ulikkaartarput.“ Meeqqat amerlasuut eqqunngitsuliorsimanertik pillarneqaatiginngitsoorniarsinnaavaat. Tassa ataasiarlutit mianersoqqoreersimagukkit aalajangersimasumik kukkusoqarpat qanoq kinguneqassanersoq tamatuma malinnissaa aalajangiusimasariaqarpat.

Ajunngitsunik aliikkutaqarneq pingaaruteqarpoq

„Tamarmik piffissaligaapput . . . illarfissaqarlunilu . . . qittaserfissaqarlunilu.“ — Oqaluussisartup oqaasii 3:1, 4.

Sunngiffik ajunngitsumillu oqimaaqatigiissumik aliikkusersorneq meeqqap eqqarsartaatsimigut timikkullu peroriartorneranut pingaaruteqarput. Angajoqqaat meeqqatik sammisaqaqatigippatigit, ilaqutariit ataqatigiinnerat nakussatsinneqassaaq, meeqqallu toqqissisimalissallutik. Ilaqutariittut suut aliikkutarineqarsinnaappat? Takorluuisinnaaneq atoraanni, ataatsimoorluni sammisarisinnaasarpassuit nassaarineqarsinnaapput. Silami sammisassat ingerlanneqarsinnaapput soorlu sikkilerluni angalaarneq, arsaanneq, tenniserneq, sulorarneq volleyballernerluunniit. Aamma akunnerpassuarni nuannersumik nipilersoqatigiittoqarsinnaavoq. Aamma najukkap eqqaani nunami angalaarluni nuannersunik amerlasuunik misigisaqartoqarsinnaavoq.

Taamatut pisoqartillugu angajoqqaat periarfissaqarput meeqqamik sunngiffimmut oqimaaqatigiissumik isiginnittaaseqalersinnissaannut. Nukappiaqqanut pingasunut ataataq kristumiu oqarpoq: „Meeqqama sammisaat soqutiginiartarpakka. Soorlu qarasaasiami pinnguaatinik pinnguarpata, aperisarpunga suna pinnguaammi anguniarneqarnersoq. Qiimmatsallutillu oqaluttuarigaangassuk, periarfissaq atortarpara ajortisaataasinnaasunik sammisaqarnerup ulorianartuinik oqaloqatigalugit. Maluginiarsimavara aliikkutassat ajortisaataasinnaasut ingalassimagaat.“ Aap, meeqqat ilaquttamik eqqissisimaaqatiginissaannik nuannarinnittut fjernsynikkut aallakaatitat, filmit internetikkullu pinnguaatit nakuusernertallit, ileqqorlunnerit imigassamillu atornerluinerit kajumigivallaarunnaartarpaat.

Meeqqatit ajunngitsunik ikinngutitaarnissaannik ikiukkit

„Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.“ — Ussatit 13:20.

Ataataq kristumiu meeqqanik sisamanik perorsaasimasoq oqarpoq: „Ikinngutinik eqqortunik qinersinissap pingaaruteqassusia erseqqissarneqarneroqqissinnaanngilaq. Ikinngutipalaap ineriartortinneqarsimasut tamaasa aserorsinnaavai.“ Meeqqani ajunngitsunik ikinngutitaarnissaannik ikiorniarlugit apeqqutinik makkuninnga eqqarsarnartunik aperai: ’Kina ikinngutiginerpaaviuk? Sooq nuannaraajuk? Ilaannikkut assigerusuttarpiuk?’ Ataatap allap meeqqat ikinngutiminnik imminnut qaaqqusitittarpai. Taamaalilluni isiginnaanissaannut periarfissaqalertarpoq meeqqanilu eqqortumik ingerlanissaannut siulersorsinnaalertarlugit.

Aamma ukioqatiminnik ikinnguteqarnermittulli meeqqat utoqqaanerusunik ikinnguteqalersinnaanerannik  ilinniartinnissaat pingaaruteqarpoq. Bum-sun, pingasunik ernilik, oqarpoq: „Meeqqakka paasitinniartarpakka ikinngutit allatut ajornartumik tassaasariaqanngitsut ukioqatit, tassunga Daavimik Jonatanimillu assersuut Biibilimeersoq atorpara. Tamatta eqqissisimaaqatigiinniassagatta kristumiut ukiui apeqqutaatinnagit qaaqqusarpakka. Taamaalillutik meeqqat ukioqatiginngisaraluaminnik ilaqartarput.“ Meeqqanut iluaqutaalluarsinnaavoq.

Meeqqanik perorsaaneq iluatsissinnaavoq

USA-mi misissuinerup takutippaa angajoqqaat amerlasuut meeqqaminnik soorlu imminut naalakkersinnaanermik, imminut aqussinnaanermik ilumoortuunermillu ilinniartitsiniarnerigaluat iluatsippallaarsimanngitsoq. Sooq taama ajornartigaa? Anaanaq misissuilluni apersorneqartut ilaat ima oqarpoq: ’Alianartuali uaniippoq meeqqat illersorluinnarniaraanni iliuuserineqarsinnaasutuaq tassaammat inimi parnaarunnissaat silarsuarmullu anisinngilluinnarnissaat.’ Ilanngullugu innersuutigaa avatangiisit meeqqat peroriartorfigisaasa qangarnit ajornerujussuanngorsimanerat. Ilumut taama ajortigisunik avatangiiseqarluni meeqqanik perorsaaneq iluatsisinnaava?

Orkidép naatinniarnera iluatsikkusukkukku, toqunissaali annilaangagalugu, imaaliallaannaq sapiissuseerussinnaavutit. Qularnanngitsumik eqqissisimanerussaatit orkidémik ilisimasalik alakkaappat, pitsaasunillu ilitsersuullutit isumalluarluni oqarpat: „Qularnanngitsumik pitsaanerpaamik angusaqassaatit imatut imatullu ilioruit.“ Jehovap, inunnit siunnersuilluarsinnaanerusup, oqaluttuussimavaatigut qanoq pitsaanerpaamik meeqqavut perorsarsinnaagivut. Taanna oqarpoq: „Nukappiaraq ingerlavissamigut ingerlaannarnissaanut kajumissaaruk, utoqqaligaluaruniluunniit tamanna nigussanngilaa.“ (Ussatit 22:6) Meeqqanik perorsaanermut siunnersuutit Biibilimiittut malikkukkit, nuannaarutigilersinnaavat meeqqatit inersimasunngorsimasut akisussaassusillit, allanik qajassuussisut ileqqussatigullu qutsissunik najoqquttaqartut isigilerlugit. Taava allanit asaneqassapput minnerunngitsumillu Jehovamit, ataatatsinnit qilammiusumit. (wE 6/15 04)