Nikallujuinnissinnut ilanngussiuk guutimut tunniusimaneq

„Uppernissinnut ilanngussiuk . . . nikallujuinneq, nikallujuinnermut [Guutimut tunniusimaneq. NV]“ — 2 PETRUSI 1:5, 6.

1, 2. (a) Meeraq qanoq ilimasuffigineqarpa? (b) Anersaakkut ineriartorneq qanoq pingaaruteqartigaa?

MEEQQAP alliartornissaa pingaaruteqarpoq, timikkulli ineriartorneq naammanngilaq. Meeraq aamma eqqarsartaatsimigut misigissutsimigullu ineriartortariaqarpoq. Piffissap ingerlanerani meerarpallattarnerit qaangerlugit angutitut arnartulluunniit ineriartussaaq. Apustili Paulusip tamanna pivaa allakkami: „Meeraagallarama meeqqatut oqaluttarpunga, meeqqatut paasinnittarpunga, meeqqatut eqqarsartarpunga; inersimaleramali meerarpallannerit iperarpakka.“ — 1 Korinthimiut 13:11.

² Anersaakkut ineriartornermut tunngatillugu Paulusip pingaartumik paasissutissippaatigut. Kristumiut anersaakkut meeraanermiit inerikkiartortariaqarput ’silatussutsimi inersimasuullutik’. (1 Korinthimiut 14:20) ’Kristusip peqangaassusianut ineqarfiussallutik naammaattunngorlutik’  inerikkiartorniartariaqarput. Taamaalillutik ’meeraajunnaassapput, tamanut tamaanga nassataritittarunnaarlutik malinnit ajoqersuutit suulluunniit anoraannit inuillu immeraammik nalussinerannit’. — Efesosimiut 4:13, 14.

3, 4. (a) Anersaakkut inersimasunngorumalluta qanoq iliortariaqarpugut? (b) Ileqqut suut ineriartortittariaqarpavut, qanorlu pingaaruteqartigaat?

³ Qanoq anersaakkut inersimasunngorsinnaavugut? Timikkut ineriartorneq tamatigut immineq pisarpoq, anersaakkulli ineriartussagutta piumassuseqarlutalu ilungersortariaqarpugut. Aallarniutigalugu Guutip oqaasianik eqqorluartumik ilisarsisariaqarpugut, ilinniarsimasavullu naapertorlugit iliuuseqartariaqarluta. (Hebræerit 5:14; 2 Petrusi 1:3) Taamaaliorutta ileqqut Guutip iluarisai suli amerlanerusut ineriartortissavavut. Soorlu timip pisatai ataatsikkut ineriartortartut, inuup Guutimik mianerinnittup anersaakkut ineriartornermini pissutsit assigiinngitsut ataatsikkut ineriartortittarpai. Apustili Petrusi allappoq: „Tamannarpiaq pissutigalugu ilungersungaarlusi uppernissinnut ilanngussiuk ileqqorinneq, ileqqorinnermut ilisarsineq, ilisarsinermut imminut naalakkersinnaaneq, imminut naalakkersinnaanermut nikallujuinneq, nikallujuinnermut [Guutimut tunniusimaneq, NV] Guutimik mianerinninnermut qatanngutigiittut pissuseqarneq, qatanngutigiittut pissuseqarnermut asanninneq.“ — 2 Petrusi 1:5-7.

⁴ Ileqqut Petrusip eqqartugai tamarmik pingaaruteqarput, ilaallu ataasiinnaq pinngitsoorneqarsinnaanngilaq. Petrusi nangippoq: „Tamakkumi ilissinniippata ineriartorlutillu ilatsiinnartuussanngilasi inerititaqanngitsuussanasilu Naalakkatsinnik Jiisusi-Kristusimik ilisarsinissinni.“ (2 Petrusi 1:8) Misissoriartigu sooq nikallujuissutitsinnut Guutimut tunniusimaneq ilannguttariaqaripput.

Nikallujuissuseq pisariaqarpoq

5. Sooq nikallujuittariaqarpugut?

⁵ Petrusip Paulusillu tamarmik Guutimut tunniusimaneq nikallujuissutsimut attuumassuteqartippaat. (1 Timotheusi 6:11) Nikallujuissuseq tassaaginnanngilaq artornartorsiornikkut aalajaattuarneq. Misilinneqarnikkut, assortorneqarnikkut, usserniarneqarnikkut malersorneqarnikkulluunniit kamagittarneq sapiissuserlu pisariaqartippavut. ’[Guutimut tunniusimalluta, NV] Kristusi-Jiisusimi inuugatta’ tamatta qinugineqarnissarput naatsorsuutigisariaqarparput. (2 Timotheusi 3:12) Jehovamut asanninnerput takutissagutsigu, ileqqullu annannissamut piumasaqaataasut ineriartortissagutsigit nikallujuittariaqarpugut. (Romamiut 5:3-5; 2 Timotheusi 4:7, 8; Jaaku 1:3, 4, 12) Nikallujuissuseqanngikkutta inuuneq naassaanngitsoq angusinnaanngilarput. — Romamiut 2:6, 7; Hebræerit 10:36.

6. Naggatissamut nikallujuinneq qanoq paasisariaqarpa?

⁶ Qanorluunniit aallartilluarsimatigigaluarutta, nikallujuitsuunerput apeqqutaanerpaavoq. Jiisusi oqarpoq: „Naggatissamulli nikallujuitsuusoq annaanneqassaaq.“ (Matthæusi 24:13) Aap, naggatissamut, toqunissarput tikillugu imaluunniit pissutsit aaqqissuussaanerata matuma ajortup naggatissaanut, nikallujuittariaqarpugut. Qanorluunniit pisoqassagaluarpat, Guutimut assuarnaatsuujuartariaqarpugut. Nikallujuinnitsinnut Guutimut tunniusimaneq ilaatinngikkutsigu Jehova nuannaartissinnaanngilarput, inuunerlu naassaanngitsoq angusinnaanatigu. Guutimulli tunniusimaneq qanoq isumaqarpa?

Guutimut tunniusimaneq qanoq paasisariaqarpa?

7. Guutimut tunniusimaneq qanoq nassuiarneqarsinnaava, tamannalu killinneqaatigalugu qanoq iliorusuppugut?

⁷ Guutimut tunniusimaneq tassaavoq Jehovamut mianerinninneq, pallorfiginninneq kiffartornerlu, taassuma silarsuarmi kisimi oqartussaaneranut ilumoorusunnermik aallaavilik. Jehova ataqqillugu tunniusimaffigissagutsigu taassuminnga aqqutigeqqusaanillu eqqorluartumik ilisimasaqartariaqarpugut. Guuti qanimut ilisarerusuttariaqarparput. Tamanna uummatikkut killinneqaatigalugu attavigilissavarput, tamannalu iliuutsitsinni inooriaatsitsinnilu malugineqarsinnaassaaq. Sapinngisarput tamaat Jehova assigerusuttariaqarparput — taassumatut pissuseqarluta pissusii kinaassusialu assigalugit. (Efesosimiut 5:1) Aap, Guutimut tunniusimaneq killinneqaatigalugu Guutip iluarisaanik tamatigut iliuuseqarusuppugut. — 1 Korinthimiut 10:31.

8. Guutimut tunniusimaneq tunniulluinnarnerlu qanoq imminnut attuumassuteqarpat?

 ⁸ Guutimut tunniusimasuussagutta Jehova kisiat pallorfigisariaqarparput, uummatitsinnilu inissisimaffia allanit ingiarneqanngilluinnassalluni. Tunniusimalluinnarnissarput Pinngortitsisutut kisimi pisussaavaa. (5 Mosesi 4:24; Esaja 42:8) Taamaattorli pallorfigeqqulluni Jehovap pinngitsaalinnngilaatigut. Kajumilluta pallorfiginninnissarput kissaatigaa. Guutimut asanninnerup, eqqorluartumik ilisarsinermik tunngaveqartup, inuunerisimasatta allanngortinnissaanut taassumunngalu tunniulluinnarnissatsinnut, tassungalu naapertuuttumik inuunissatsinnut killippaatigut.

Guutimut qanimut attaveqarneq ineriartortiguk

9, 10. Qanoq ililluta Guutimut qanimut attaveqarneq ineriartortillugulu attattuarsinnaavarput?

⁹ Kuisilluta Guutimut tunniulluinnarsimagutta, tassunga qanimut attaveqarnerulernissaq ineriartortittuartariaqarparput. Taamaaliornissatsinnik kissaatitta, Jehovalu ilumoorluta kiffartorfigerusukkatsigu oqaasia atuaqqissaartarlugulu eqqarsaatigiuartarparput. Guutip anersaava isummatsinnut uummatitsinnullu sunniuteqartikkutsigu Jehovamut asanninnerput alliartuinnassaaq. Taava taassumunnga attaveqarnerput inuunitsinni pingaarnerpaajuassaaq. Jehova ikinngutinnaatitut isigissavarput, tamatigullu iluarisaanik iliornissarput kissaatigalugu. (1 Johannesi 5:3) Guutimut qanimut attaveqarnerput nuannaarutiginerulissavarparput, qujamasuppugullu pisariaqaraangat asannilluni ajoqersorlutalu perorsartarmatigut. — 5 Mosesi 8:5.

¹⁰ Jehovamut attaveqarnerput erlinnartoq aalajaallisartuanngikkutsigu, sanngiilliartorsinnaavoq. Taamaattoqassappat Guuti pisuunngilaq, ’ilatsinnit kimilluunniit ungasinngikkaluarami’. (Apustilit Suliaat 17:27) Nuannaarutigaarput Jehovap imminut qanillinissaq ajornakusoortuutinngimmagu! (1 Johannesi 5:14, 15) Jehovamut qanimut attaveqartuarniarluta suliniuteqarutta, Jehovap imminut qanillinissatsinnik ikiorumaarpaatigut, Guutimut tunniusimanerup ineriartortinnissaanut attattuarnissaanullu pisariaqartitatsinnik tamanik tunilluta. (Jaaku 4:8) Periarfissiissutai asannilluni tunniussai qanoq iluaqutigilluarsinnaavavut?

Anersaakkut nukittujuarit

11. Guutimut tunniusimanerput qanoq ilaatigut ersersissinnaavarput?

¹¹ Guutimut tunniusimanitta ersersinnissaanut Guutimut asanningaarnitta, Paulusip kajumissaarutaanut naapertuuttumik killissavaatigut: „Noqqaassutiginiaruk sulisutut kanngusuutissaqanngitsutut oqaatsimik sallusuissutaasumik nassuiaasutut Guutip saavani misiligaaninni attassinissat.“ (2 Timotheusi 2:15) Taamaaliussagutta aalajangersimasumik Biibilimik atuaqqissaarneq, ataatsimiigiartarneq oqaluussinerlu ileqquliulluartariaqarpavut. Aamma ’qinujuarnikkut’ Jehova qanimut attaveqarfigiuarsinnaavarput. (1 Thessalonikamiut 5:17) Tamakku tamarmik Guutimut tunniusimanitsinnut ersiutaapput. Taakkua arlaannaanulluunniit Guutimut tunniusimaneq ersersinngitsoorutsigu anersaakkut napparsimalersinnaavugut, Satanillu saassussinerinut pisariuminarnerulerluta. — 1 Petrusi 5:8.

12. Misilinneqarnerit qanoq anigorsinnaavavut?

¹² Anersaakkut nukittujuarutta suliniuteqartuaruttalu misilinneqarnerpassuavut qaangerluarsinnaanerussavavut, aamma akiuussinnaannginnerpaaffitsinni misilinneqaraluarutta. Soqutiginninnginneq, assortorneqarneq malersorneqarnerlu artornarnerungaarsinnaapput ilaquttatsinnit, eqqarlitsinnit sanilitsinnilluunniit pippata. Suliffitsinni atuarfitsinniluunniit kristumiutut najoqqutassianut naapertuutinngitsumik iliuuseqarnissatsinnut kimigiiserfigineqarsinnaavugut. Pakatsisimaneq, napparsimaneq isumatsassimanerlu pissutigalugit timikkut nukillaalersinnaavugut, taamaalillutalu uppernikkut misilinneqarnerit akioruminaannerutillugit. Misilinneqarnernili tamani iluatsitsisinnaavugut ’illernartuulluta Guutimillu mianerinnilluta inuugutta, Guutip ullussaata nalliunnissaa utaqqillugu piaarnerusumillu nalliunnissaa ilungersuutigalugu’. (2 Petrusi 3:11, 12) Nuannaarluta taamaaliorsinnaavugut tatigalugu Guutip najoraatigut. — Ussatit 10:22.

13. Guutimut tunniusimanerput attatiinnarniarlugu qanoq iliortariaqarpugut?

¹³ Naak Guutimut tunniusimanermik ersersitsisut Satanip saassuttaraluarai ersilertariaqanngilagut. Sooq? ’Jehovap mianerinnitsini ussernartunit aniguisinneq sapinngimmagit’. (2 Petrusi 2:9) Misilinneqarnerit akiorlugit aniguissagutta ’naaggaarsinnaasariaqarpugut  iluaatsuussusermut silarsuarmiullu kajungerisaannut, silatusaarluta peqqusersuillutalu [Guutimullu tunniusimalluta, NV] silarsuarmi matumani inuulluta’. (Titusi 2:12) Kristumiutut mianersuutigisariaqarparput uinikkut sanngiissutit kissaatillu eqqunngitsut Guutimut tunniusimanitsinnik sanngiillisitsinnginnissaat tunniusimajunnaartitsinissaallu. Navianaataasinnaasut ilaat misissoriartigik.

Guutimut tunniusimanermik navianartorsiortitsisunut mianersorit

14. Pigisanik pingaartitsivallaarnerup napiaaniutaanit usserniarneqarutta suna eqqaamasariaqarparput?

¹⁴ Pigisanik pingaartitsivallaarneq inuppassuarnut napiaaniutaavoq. Immitsinnut salloqittarsinnaavugut isumaqarluta „[Guutimut tunniusimaneq, NV] iluanaarutaasinnaasoq“, immaqalu ilaasa allaat uppeqatimik tatiginninnerat atornerluttarpaat. (1 Timotheusi 6:5) Allaat kukkusumik isummersinnaavugut kristumiu pigissaartoq kimigiiserfigalugu aningaasanik taarsigassarsiffiginiarsinnaallugu, uffa immaqa taarsersinnaanagit. (Tussiaat 37:21) Kisianni pigisat pinnatik, Guutimut tunniusimaneq „tamatigut iluaqutaasarpoq inuunermullu matumunnga piumaartussamullu immini neriorsuutitaqarluni“. (1 Timotheusi 4:8) ’Sunnguamik nassataqarata silarsuarmut matumunnga pisimagatta aamma sunnguamik nassataqarnata silarsuaq manna qimattussaagatsigu’, aalajangiusimalluinnartariaqarparput ’[Guutimut tunniusimaneq, NV] naammagittarnermik ilaqartoq’ noqqaassutiginiarlugu, ‘nerisassaqarlutalu atisassaqarutta tamakku naammagalugit’. — 1 Timotheusi 6:6-11.

15. Nuannaarniutit Guutimut tunniusimanitsinnik nigortitsileraluarpata qanoq iliorsinnaavugut?

¹⁵ Nuannaarniutit Guutimut tunniusimanerput nigortissinnaavaat. Tamatumunnga atatillugu allannguisariaqarpugut? Ilumoorpoq timikkut sungiusarneq sukisaarsaarnerlu iluaqutissartaqartut, iluaqutissartaalli tamakku naassaanngitsumik inuunissamut naleqqiullugit suunngillat. (1 Johannesi 2:25) Ullumikkut inuppassuit ’inuulluarniutit Guutimit pingaarnerutittarpaat, [Guutimut tunniusimaneq, NV] ileqqorisuusaaginnartarpaat pissaanerali asiginnarlugu’. Inuit taamaattut nigorsimasariaqarpavut. (2 Timotheusi 3:4, 5) Guutimut tunniusimanermik pingaartitsisut ’katersipput pisuussutinik siunissami toqqaviusinnaasunik ajunngitsunik inuunivik pigilersinnaaqqullugu’. — 1 Timotheusi 6:19.

16. Ajortulioqqajaanerit suut Guutip piumasaqaatai naapertuilluartut naammassinngitsoortissinnaavaat, qanorlu ajugaaffigisinnaavavut?

¹⁶ Imigassamik ikiaroornartumillu atornerluinerup, kinguaassiuutitigut inuunerlunnerup ajortulioqqajaanerullu Guutimut tunniusimanerput ipitissinnaavaa. Tamakkununnga nakkaannarutta Guutip piumasaqaatai naapertuilluartut naammassisinnaanngilavut. (1 Korinthimiut 6:9, 10; 2 Korinthimiut 7:1) Allaat Paulusip uinini ajortiliusoq akiortuartariaqarpaa. (Romamiut 7:21-25) Kissaatigisat ajortut akiorniarlugit ilungersorneq pisariaqarpoq. Siullermik ileqqussatigut minguitsuujuarniarluta aalajangertariaqarpugut. Paulusip peqquaatigut: „Taamaattumik toqutissigit nunamut atasut ilissinniittut: Kinguaassiuutitigut inuunerlunneq, minguttuuneq, pileritsaassineq kajungerisapiluillu aamma piumatuuneq, tassa guutipilussiorneq.“ (Kolossemiut 3:5) Ajortulioqqajaanerit taamaattut uinimut atasut ’toqutissagutsigik’ peerluinnartariaqarpavut, nungutilluinnarlugit. Ilumoorluta ikioqqulluta Guuti qinnuigigutsigu  pissutsit aaqqissuussaaneranni matumani ajortumi inuugaluarluta kissaativut ajortut akiorsinnaavavut, naapertuilluarneq Guutimullu tunniusimaneq noqqaassutigalugit.

17. Perorsaatissinneqarneq qanoq isigisariaqarparput?

¹⁷ Nikallornerup nikallujuissuserput Guutimullu tunniusimanerput sanngiillisissinnaavai. Jehovap kiffaasa ilarpassui nikallorsimapput. (4 Mosesi 11:11-15; Ezra 4:4; Jona 4:3) Nikallorneq taamaattoq ingammik aserornartuusinnaasarpoq soqutigineqanngitsutut misigigaangatta, sukannersumik avoqqaarineqaraangatta imaluunniit perorsarneqaraangatta. Perorsaatissinneqarnerli avoqqaarineqarnerlu Guutip soqutiginninneranut asannittumillu isumaginninneranut ersiutaapput. (Hebræerit 12:5-7, 10, 11) Jehovap pillarniaannarluta perorsaatissittanngilaatigut, naapertuilluarnermilli aamma ilinniartinniarluta. Maniguukkutta oqaaqqissaarneqarnerput pingaartillugulu akuerissavarput, paasillugu ’ilitsersuineq oqaaqqissaarinerlu inuunermut aqqutissaasut’. (Ussatit 6:23) Tamatuma Guutimut tunniusimaneq anguniarlugu anersaakkut siumukarluarnissatsinnik ikiussavaatigut.

18. Isumaqatigiinngissuteqarutta suna pisussaaffigaarput?

¹⁸ Paatsoorneqarnerit ajuallatsinneqarnerillu Guutimut tunniusimanitsinni unamminiarnartuusinnaapput. Taamaaliornerit eqqissiviilliortitsisinnaapput immaqalu anersaakkut qatanngutinit immikkoornialersitsisinnaallutik. Taamaaliornerli silatusaarnerunngilaq. (Ussatit 18:1) Eqqaamasariaqarparpulli puttarsisaqarneq allanullu akeqqersimaarneq Jehovamut attaveqarnitsinnik ajoqusiisinnaammata. (3 Mosesi 19:18) Aap, Biibilimi allassimavoq: „Qatanngunnimi takusimasani asanngikkuniuk Guuti takusimanngisani asasinnaanngilaa.“ (1 Johannesi 4:20) Qaqqami oqaluutsimini Jiisusip erseqqissarpaa inuttut isumaqatigiinngissutit aaqqinniarlugit iliuuseqapallattoqartariaqartoq. Tusarnaartini ima oqarfigai: „Tunissutissat pilliivimmukaakkukku tassanilu eqqaalerlugu qatanngutit illit pillutit unnerluussutissaqartoq, taava tunissutissat pilliivimmut qimallugu qatanngutit saammaakkiartoqqaarallaak, taavalu aatsaat kingorna tunissutissat pilliutigiartorlugu.“ (Matthæusi 5:23, 24) Inussiarniitsumik oqaatsit iliuutsilluunniit kingunerinik ikit utoqqatsernikkut mamitinneqarsinnaapput. Eqqunngitsumik iliorsimanerput miserratiginagu utoqqatserutta, isumaqatigiinngissutit aaqqinneqarsinnaapput, eqqisseqatigiittoqaqqilersinnaavorlu. Isumaqatigiinngittoqalersillugu qanoq iliortoqarsinnaaneranik Jiisusi allanik aamma siunnersuuteqarpoq. (Matthæusi 18:15-17) Ajornartorsiutit naalaattakkat aaqqinneqaraangata nuannaarnartaqaaq! — Romamiut 12:18; Efesosimiut 4:26, 27.

Jiisusip maligassiaa maliguk

19. Sooq Jiisusip ilaarniarnissaa immikkut pingaaruteqarpa?

¹⁹ Misilinneqartarpugut, tamakkuli naassaanngitsumik  inuunissamut arpannitsinni allamut saasartariaqanngilaatigut. Eqqaamajuk Jehovap misilinneqarnitsinni aniguisissinnaagaatigut. ’Nanertuisitsinnit tamanit peerniartilluta angusassamullu siunitsinniittumut arpannitsinni tamatumani nikallujuilluta Jiisusi uppernerup aqqutissiuussisua naammassisitsisualu tunaarisariaqarparput’. (Hebræerit 12:1-3) Jiisusip maligassiaa misissoqqissaarlugu oqaasiisigut iliuusiisigullu ilaarniartarutsigu Guutimut tunniusimaneq ineriartortillugulu ersersilluarnerusinnaassavarput.

20. Nikallujuinneq Guutimullu tunniusimaneq noqqaassutigigutsigik qanoq pilluaqqusaassaagut?

²⁰ Nikallujuinneq Guutimullu tunniusimaneq annannissatsinnut pingaaruteqarluinnarput. Ileqqut erlinnartut taakku ineriartortinnerisigut Guutimut aalajaalluta illernartumik kiffartorfigisinnaavarput. Nikallujuikkutta Guutimullu tunniusimanermik takutitsilluta misilinneqarnitsinni allaat nuannaarsinnaavugut, Jehovap asannittumik isumassuinera pilluaqqusineralu misigigatsigit. (Jaaku 5:11) Jiisusip neriorsoqqissaarpaatigut: „Pinertusaarnissigut inuunersi pigittuinnassavarsi.“ — Lukasi 21:19.

Qanoq akissavit?

• Nikallujuitsuunissaq sooq pingaaruteqarpa?

• Guutimut tunniusimaneq qanoq paasisariaqarpa, qanorlu ersertarpa?

• Guutimut qanimut attaveqarneq qanoq ineriartortillugulu attatiinarsinnaavarput?

• Guutimut tunniusimanitsinnut navianartorsiortitsisut suusinnaappat, tamakkulu qanoq nigorsimasinnaavavut?

[Atuaqqissaarnermi apeqqutit]

[Qupp. 16-mi assiliartaq]

Guutimut tunniusimaneq assigiinngitsorpassuartigut ersersinneqarsinnaavoq