Kristusip siulersuinera akueraajuk?

„Ilitsersuisumilluunniit taagortissanngilasi, ataasermi ilitsersuisoraarsi, Kristusi.“ — MATTHÆUSI 23:10.

1. Kina kisimi kristumiunut ilumoortunut Ilitsersuisuua?

MARLUNNGORNERUVOQ nisanip aqqarnat. Ullut pingasut qaangiuppata Jiisusi pillagaalluni toqutaasimassaaq. Kingullermeerluni naalaffimmiippoq. Ulloq taanna inuit katersuussimasut ajoqersukkanilu pingaarutilimmik ajoqersorpai. Oqarfigai: „Ilissi rabbimik taagortissanngilasi; ataasermi ajoqersuisoraarsi, ilissilu tamassi qatanngutigiippusi. Nunamiittoq kinaluunniit ataatassinnik taassanngilarsi; ataasermi ataatagaarsi, taanna qilammiittoq. Ilitsersuisumilluunniit taagortissanngilasi, ataasermi ilitsersuisoraarsi, Kristusi.“ (Matthæusi 23:8-10) Taamaammat kristumiut ilumoortut Jiisusi Kristusi, Messiarsi, Ilitsersuisoraat imaluunniit Siulersuisoraat.

2, 3. Jehovap oqaasia tusaagutsigu Ilitsersuisunngortillugulu Siulersuisunngortitaa akuerigutsigu inuunitsinnut qanoq sunniuteqassava?

² Jiisusi Siulersuisutsitut akuerigutsigu inuunitsinnut ajunngitsumik sunniuteqassaaq. Pruffiiti Esaja aqqutigalugu Jehova Guutip siulersuisumik taamaattumik takkuttoqarnissaa siulittuutigaa. Esaja allappoq: „Qaagitsi qilalersusi tamassi, tamassa imeq! Qaagitsi ilissi aningaasaateqanngitsusi! Pisigitsi karrinik nerillusilu! Qaagitsi, karrisigitsi akiliinasi! Viinnisigitsi immussillusilu akilernagit!. . . . Tusarnaarniarsinga, taava nerilluassaasi piisaassallusilu nerisassanik kimittuunik. . . . Taanna inuiaqatigiinnut nalunaajaasunngortippara inuianni naalagaaninngortikkakku naalaganngortillugulu.“ — Esaja 55:1-4.

³ Jehovap oqaasii tusarnaaraanngatsigit uatsinnullu ilitsersuisunngortitaa siulersuisunngortinngortitaalu malikkaangatsigu qanoq uatsinnut sunniuteqartarnersoq paasitinniarlugu Esajap imeq, immuk viinnilu assersuutitut atorpai. Inuummarissinartuupput; soorlu kiattumi imermik nillaarimmik imerluni – sallusuissummut naapertuilluarnermullu qilalerunnaartarpugut. Soorlu immuk meeraaqqanut inuussutissartaqarluartoq alliartortitsisartorlu, taamatuttaaq „oqaatsip immua“ anersaakkut ineriartuutigissavarput Guutimullu attaveqarnittinnut nakussatsissutigalugu. (1 Petrusi 2:1-3) Nalliuttorsiualaarnernilu viinni nuannaarnerulersitsisartoq kia miserratigissavaa? Taamatuttaaq Guuti ilumoortoq pallorfigalugulu Jiisusip tumai atuaraangatsigit inuunerput ’nuannersuinnanngortarpoq’. (5 Mosesi 16:15) Taamaattumik inuusuttuugaluarutta, utoqqaagaluarutta, angutaagaluarutta arnaagaluaruttaluunniit tamatsinnut pingaaruteqarluinnarpoq Jiisusip, Messiarsip Ilitsersuisutsitut Siulersuisutsitullu akuerinissaa. Ulluinnarnili tamanna qanoq ersersissinnaavarput?

Meeqqat inuusuttullu — ’ilisimassuseqarnerujartoritsi’

4. (a) Jiisusi aqqaneq-marlunnik ukioqarluni Jerusalemimi poorskisioqataammat qanoq pisoqarpa? (b) Angajoqqaavisa sumiittoq nanivaat, tamannalu sumik takutitsiva?

⁴ Jiisusi Kristusi Ilitsersuisutut Siulersuisutullu meeqqanut inuusuttunullu qanoq maligassiuiva? Naak Jiisusip meeraanera ilisimasaqarfigilaaginnaraluarlugu pisimasup ataatsip tamatuminnga paasisaqartissinnaavaatigut. Jiisusi aqqaneq-marlunnik ukioqartoq angajoqqaavisa Josefip Mariallu Jerusalemimut ukiumoortumik pooskisioriartoqatigaat. Tassaniitillutik naalaffimmi ajoqersuisut oqaloqatigigamigit Jiisusi ima tiguartitsigaaq angajoqqaani angerlamut aallarmata  sianiginagu. Ullut pingasut qaangiuttut angajoqqaavisa ernumaqisut naalaffimmiittoq nanivaat, ’ajoqersuisut akornanniittoq taakku tusarnaarai aperisarlugillu’. „Tusarnaartut tamarmik ilisimassusia akissutaalu ajasoorutigeqaat.“ Aqqaneq-marluinnarnik ukioqarluni Jiisusi anersaamut tunngasunik eqqarsalersitsisunik apeqquteqarsinnaaginnarani aamma silassorissunik akissuteqarsinnaavoq! Qularnanngitsumik angajoqqaavisa ilinniartitsinerat perorsaanerallu iluaqutaasimassapput. — Lukasi 2:41-50.

5. Inuusuttut ilaqutariittut atuaqqissaartarnermut isiginnittaasertik qanoq nalilersinnaavaat?

⁵ Meeraaguit inuusuttuaraaguilluunniit Guutimut tunniulluinnarsimasunik angajoqqaalik, qularnanngitsumik angerlarsimaffissinni aalajangersimasumik ilaqutariittut atuaqqissaartarpusi. Tamatumunnga qanoq isiginnittaaseqarpit? Ima imminut aperisinnaavutit: ’Ilaqutariittut atuaqqissaartarnerput tamakkiisumik tapersersorpara? Suleqatigiuminarpunga atuaqqissaaqataarusunnangaluunniit patsisissarsiortarpunga?’ (Filippimiut 3:16) ’Atuaqqissaaraangatta tusarnaaginnarnanga peqataasarpunga? Atuaqqissaakkavut pillugit silassorissunik apeqquteqartarpunga, allassimaffiillu qanoq paasineqassanersut atorneqassanersullu takutittarpara? ’Inersimasunngorluarsimasunut nerisassat tamuasarissat’ marmarsikkiartorpakka, taamaalillungalu anersaakkut siumukarlunga?’ — Hebræerit 5:13, 14.

6, 7. Inuusuttut ulllut tamaasa Biibilip atuartarnissaanik pilersaaruteqarnissaat qanoq pingaaruteqartigaa?

⁶ Ullormut Biibilimik atuartarnissamut pilersaarusiornissaq aamma pingaaruteqarpoq. Tussiaammi ima oqaatigineqarpoq: „Pilluarpoq iluaatsut siunnersuutaat malillugit inuunngitsoq, . . . kisianni [Jehovap] inatsisaanik nuannarisaqartoq inatsisaalu eqqarsaatigalugit ullukkullu unnuakkullu.“ (Tussiaat 1:1, 2) Mosesip kingoraartaata, Josvap ’Jehovap inatsisaasa allassimaffiat ullukkut unnuakkullu eqqarsaatigiuaannartarpaa’. Taamaammat siuneqassuseqarluni Guutip suliareqqusaanik suliaqarsinnaavoq ’pilluarsinnaallunilu’. (Josva 1:8) Ilitsersuisorput Siulersuisorpullu Jiisusi Kristusi oqarpoq: „Allassimavoq: ’Inuup timiusaannaq inuussutissarinngilaa, oqaaserli sunaluunniit Guutip qarnanit anisoq.’“ (Matthæusi 4:4) Ullut tamaasa nerisariaqarutta, aalajangersimasumik anersaakkut nerisarnissarput pisariaqartinnerungaannginnerparput!

⁷ Niviarsiaqqap 13-inik ukiullip Nicolep anersaakkut pisariaqartitsinini paasigamiuk ullut tamaasa Biibili atuartalerpaa. * Maanna 16-inik ukioqarluni Biibili tamaat atuareerlugu aappassaanneerlugu qiteqquppaa. Qanoq ililluni taamaaliorsinnaasimava? Oqarpoq: „Ullormut minnerpaamik kapitali ataaseq atuartassallugu aalajangerpunga.“ Ullut tamaasa Biibilimik atuartarnini qanoq iluaqutigaa? Akivoq: „Sorpassuit sunnersinnaavaatigut. Ullut tamaasa atuarfimmi allanilu tatineqartuartarpunga upperninnut misilinneqaataasinnaasunik. Ullut tamaasa Biibili  atuartarakku allassimaffiit najoqqutassiallu eqqaapallassinnaasarpakka, tatisinerlu akiorsinnaalertarlugu. Taamalillinga Jehovamut Jiisusimullu qaninnerullunga misigaanga.“

8. Jiisusi sapaatip-akunneri tamaasa qanoq iliortarpa, qanorlu meeqqat inuusuttullu ilaarniarsinnaavaat?

⁸ Jiisusip sapaatip-akunneri tamaasa naalaffimmut Allakkat atuffassissutigineqarnerat tusarnaariartarpaa. Nammineq aamma atuffassisarpoq. (Lukasi 4:16; Apustilit Suliaat 15:21) Maligassiaanik malinninnissaq meeqqanut inuusuttunullu pitsaassaaq. Taamaaliorsinnaapput kristumiut ataatsimiinnerinut aalajangersimasumik najuuttarnermikkut, ataatsimiinnerni Biibili atuarneqartarmat nassuiarneqartarlunilu. Richardip 14-inik ukiullip ataatsimiinnerit pingaartippai, oqarporlu: „Ataatsimiittarnerit uannut pingaaruteqaqaat. Suna ajunngitsuunersoq sunalu ajortuunersoq, suna ileqqorissaarnerunersoq sunalu ileqqorlunnerunersoq aammalu suna kristumiunut ileqqussaanersoq ileqqussaannginnersorlu eqqaasinneqartuartarpunga. Misigisanit ajortunit ilinniartariaqanngilakka.“ Aap, „[Jehovap] nalunaajaatai aalajaatsuupput, misilittagakitsunik ilisimasunngortitsisarput.“ (Tussiaat 19:8) Taariikkatta Nicolep sapaatip-akunneri tamaasa ataatsimiinnerit tallimat najuuffiginiartarpai, nalunaaquttap akunneri marluk pingasullunniit piareersarfisarlugit. — Efesosimiut 5:15, 16.

9. Meeqqat inuusuttullu qanoq ’ilisimassuseqarnerujartuinnarsinnaappat’?

₉ Inuusutuunermi ’ilumut kisimi Guutiusoq aallartitaalu Jiisusi Kristusi ilisimalerneqartariaqarput’. (Johannesi 17:3) Titartakkanik atuakkianik atuarnermut, fjernsynernermut, videospilernermut interneternermullu piffissarujussuarmik atuisartunik meeqqanik inuusuttunillu nalunngisaqarunarputit. Ilitsersuisutta Siulersuisuttalu maligassiaa naammalluinnartoq malissinnaassagukku sooq taakku ilaassavigit? Jiisusi nukappiaraalluni Jehovap qanimut ilisarinera nuannaraa. Qanorlu tamanna kinguneqarpa? Apeqqutit anersaamut tunngasut nuannarigamigit Jiisusi ’ilisimassuseqarnerujartuinnarpoq’. (Lukasi 2:52) Aamma illit taamaaliorsinnaavutit.

„Immissinnut naalatsigeqatigiigitsi“

10. Ilaqutariit qanoq eqqissisimalersinnaappat pillualerlutillu?

¹⁰ Angerlarsimaffik qimarnguiusinnaavoq eqqissisimaffiusoq toqqissimaffiusorlu, imaluunniit akersuuffiusinnaavoq saqitsaaffiusoq eqqissiviilliorfiusorlu. (Ussatit 21:19; 26:21) Kristusip siulersuinera akuerigutsigu ilaqutariit eqqissisimassapput pilluarlutillu. Jiisusimi inoqutigiinni tamanut maligassiuisuuvoq. Apustili Paulusi aqqutigalugu Biibilimi ima siunnersuuteqarpoq: „Immissinnut naalatsigiteqatigiigitsi Kristusi mianeralugu, nuliaasusi uissinnut naalatsigitillusi soorlu Naalakkamut, uiusoq nuliaminut niaquummat soorlu Kristusi ilagiinnut niaquusoq timiminullu annaassisuulluni. . . . Angutit, nuliasi asassavasi soorlu Kristusip ilagiit asagai imminullu tunniulluni taakku pillugit.“ (Efesosimiut 5:21-25) Kolossemilu ilagiinnut ima allappoq: „Qitornaasusi, tamatigut angajoqqaasi naalattarsigit tamanna Naalakkami iluarmat.“ — Kolossemiut 3:18-20.

11. Kristusip siulersuinera akueralugu uisup qanoq takutissinnaavaa?

¹¹ Siunnersuut taanna naapertorlugu angut  ilaqutariinni siulersuissaaq, nuliaasoq ilumoorluni uiminik tapersersuissaaq meeqqallu angajoqqaatik naalassavaat. Angulli eqqortumik siulersuippat aatsaat pilluartoqalersinnaavoq. Niaqquni siulersuisunilu, Jiisusi Kristusi, ilaarlugu ilaquttami siulersornissaat ilinniartariaqarpaa. (1 Korinthimiut 11:3) Jiisusi nunamukanngilaq „kiffartorfigeqqulluni, namminerli kiffartussalluni“ naak kingusinnerusukkut ’sunut tamanut . . . ilagiinnuttaaq niaquulersinneqaraluarluni’. (Efesosimiut 1:22; Matthæusi 20:28) Taamatuttaaq uisup kristumiup ilaqutariit niaquattut nammineq soqutigisani kisiisa aallunnagit nuliamili meeqqamilu soqutigisai aallutissavai – aap, ilaqutariit tamarmik iluaqutissaannik siulersuissaaq. (1 Korinthimiut 13:4, 5) Naalakkami Jiisusi Kristusip ilisarnaatai pissusii ajunngitsut ilaarniassavai. Jiisusitut qanilaarlunilu uummammigut makitajuitsuussaaq. (Matthæusi 11:28-30) Kukkusimagaangami ima oqarnissani ajornakusoortissanngilaa: „Utoqqatserpunga“ aamma „Ilumoorputit“. Maligassiuilluarnera nulianut ’ikiortiussalluni’, ’illuatungiussalluni’ ’atavissuussallunilu’ oqinnerulersitsissaaq, ilinniarfiussalluni, nuliatalu suleqatigissavaa. — 1 Mosesi 2:20; Malaki 2:14.

12. Nuliaasup siulersuinermut najoqqutassiamut naalatsigitinnissaanut suna iluaqutaassava?

¹² Nuliaasoq uiminut naalatsigitissaaq. Silarsuup anersaava nakkaannarfigiguniuk siulersuinermut najoqqutassiamut isiginnittaasia sunnerneqarsinnaavoq uiminut naalatsigitinnissani kajungeriunnaarlugu. Uiusulli qalliuniartuunissaa Biibilimi ersersinneqanngilaq. Ersersinneqartoq tassaavoq nuliaasoq uiminut naalatsigitissasoq. (Efesosimiut 5:24) Ersersinneqarportaaq uiusoq ataataasorlu akisussaasuusoq, tamannalu malikkaanni ilaqutariit eqqissisimassapput aaqqissugaalluarlutillu. — Filippimiut 2:5.

13. Meeqqat angajoqqaaminnut attaveqarnerannut tunngatillugu Jiisusi qanoq maligassiuiva?

¹³ Meeqqat angajoqqaaminnut naalattuussapput. Tassani Jiisusi aamma maligassiuivoq. Jiisusi aqqaneq-marlunnik ukioqarluni naalaffimmut ulluni pingasuni qimataanermi kingorna angajoqqaani ’Nazaretimut angerlaqatigai naalallugillu’. (Lukasi 2:51) Meeqqat angajoqqaaminnut naalakkaangata ilaqutariit eqqisseqatigiittarput aaqqiagiittarlutillu, ilaqutariinnilu ataasiakkaat tamarmik Kristusip siulersuinera akuerigaangassuk ilaqutariit pilluartarput.

14, 15. Ilaqutariinni ajornartorsiuteqalissagaluarpat suna iluaqutigisinnaavarput? Assersuusiorit.

¹⁴ Ilaqutariinni ajornartorsiuteqalissagaluarpalluunniit Jiisusip maligassiaanik siulersuineranillu malinninneq aaqqiissutissaavoq. 35-nik ukiullip Jerryp Lana inuusuttuaqqamik panilik katikkamiuk takorloorsimanngisaannagaanik pisoqarpoq. Jerry oqaluttuarpoq: „Ilaqutariinnut niaquussaguma ataataalluassagumalu Biibilimi najoqqutassiat ilaqutariit allat iluatsilluarlutik malitaat malittariaqarlugit nalunngilara. Paasilertorparali ilisimassuseqarnerullungalu siuneqassuseqarnerullunga malittariaqarlugit.“ Anaanaminut attaveqarnerminut Jerry akornutaasoq panissaa isumaqarpoq, iluarinngitsorujussuuaalu. Niviarsiaqqap taama isumaqarnera oqaasiinut iliuusiinullu tamanut sunniuteqartartoq Jerryp paasisinnaassaguniuk siuneqassuseqartariaqarpoq. Qanoq iliorpa? Akivoq: „Lanalu isumaqatigiissutigaarput panimminik perorsaaneq nammineq isumagigallassagaa, uangalu panissannut ajunngitsumik attaveqarnissara sulissutigissagiga. Piffissap ingerlanerani periuseq taanna kinguneqarluarpoq.“

¹⁵ Angerlarsimaffimmi ajornartorsiuteqaleraangat siuneqassuseqartariaqarpugut, paasiniarlugu ilaquttat ilaat sooq taama iliuuseqarnersut aamma sooq taama oqalunnersut. Biibilimi najoqqutassiat eqqortumik atorsinnaassagutsigit aamma ilisimassuseqartariaqarpugut. Assersuutigalugu Jiisusi eqqortumik naliliivoq arnap aaqartuaannartup qallersaatini attormagu. Sooq taamaaliortoq ingerlaannaq paasivaa ilisimassuseqarluni misiginneqataallunilu iliuuseqarfigaa. (3 Mosesi 15:25-27; Markusi 5:30-34) Ilisimassuseq siuneqassuserlu Ilitsersuisutta Siulersuisuttalu ilisarnaatigai. (Ussatit 8:12) Taassumatut iliorutta pillualissaagut.

’Guutip naalagaaffia ujaqqaarsiuk’

16. Inuunitsinni suna pingaarnerusariaqarpa, tamatumuunalu Jiisusi qanoq maligassiuiva?

¹⁶ Siulersuinerminik akuerinnittut suna pingaarnerutissaneraat  Jiisusip nalorninartinngilluinnarpaa. Oqarpoq: „Guutip naalagaaffia iluarneralu ujaqqaarsigit.“ (Matthæusi 6:33) Maligassiuinermigut qanoq taamaaliortoqarsinnaasoq takutippaa. Kuisinnermi kingorna ulluni 40-ni inoqajuitsumi iisinnginniartsilluni, eqqarsaatiginneqqissaartilluni qinutillunilu Saatani Diaavulumit usserneqarpoq ’silarsuarmi naalagaaffinnik tamanik’ neqeroorfigineqarluni. Diiavulup neqeroorutaanik akuersisimasuuguni qanoq inuuneqarsimasinnaagaluartoq takorloorneqarsinnaavoq. Jiisusilli Ataatami piumasaa kisiat ilungersuutigaa. Nalunngilaattaaq Saatanip silarsuaani inuuneq sivikitsuinnaassasoq. Diaavulup neqeroorutaa ingerlaannaq itigartippaa, ima oqarluni: „Allassimavoq: ’ [Jehova] Guutit pallorfigissavat taannalu kisiat kiffartuullugu’.“ Tamatuma kinguninngua „Jiisusi ima oqaluussisarlerpoq: ’Allamik isumataaritsi, Qilaap Naalagaaffia qanillimmat.’“ (Matthæusi 4:2, 8-10, 17) Nunami inuunermi sinnerani Guutip Nalagaaffia pillugu oqaluussivoq, piffissaq tamaat oqaluussisartuulluni.

17. Naalagaaffik inuunitsinni siulliullugu qanoq takutissinnaavarput?

¹⁷ Ilitsersuisorput Siulersuisorpullu ilaartariaqarparput Saatanillu silarsuaanit akissaatigissaartumik qaffasissumilluunniit atorfeqarnissamik inuunitsinni pingaarninngortitsinissamut pileritsatsinneqarnaveersaarluta. (Markusi 1:17-21) Qaffasissumik atorfeqarusunnermik Naalagaaffimmut sullissineq tunulliukkutsigu sianiitsuliornerussaaq. Jiisusip Naalagaaffik pillugu oqaluusseqquaatigut ajoqersuganngortitseqqullutalu. (Matthæusi 24:14; 28:19, 20) Imaassinnaavoq ilaqutaqartugut allanilluunniit pisussaaffeqartugut, unnukkulli sapaatip-akunneratalu naanerani oqaluussisinnaaneq ilinniartitsisinnaanerlu, kristumiut tamarmik akisussaaffigisaat, nuannaarutigissannginnerpavut? Ukiumi kiffartorfiusumi 2001-imi nuanneqaaq 780.000-it missaat Naalagaaffik pillugu piffissaq tamaat oqaluussisartuusinnaasimammata.

18. Oqaluussinermik nuannarinnilernissatsinnut suna iluaqutigissavarput?

¹⁸ Jiisusi angutitut eqiingasutut misigissuseqangaartutullu iivangkiiliuni oqaluttuarineqarpoq. Inuppassuit anersaakkut qanoq asiginnagaatigisut takugamigit nalligingaalerpai, ingerlaannarlu ajoqersulerlugit. (Markusi 6:31-34) Inoqatitsinnut asanninnermik ikiuerusunnermillu pissuteqarluta oqaluussigaangatta nuannaarluta oqaluussisarpugut. Qanorli taamatut kissaateqalersinnaavugut? Angut inuusuttoq Jaysonimik atilik oqarpoq: „Inuusuttuaraallunga oqaluussineq nuannarivallaanngilara.“ Suliap  taassuma nuannarilernissaanut suna iluaqutigigaa? Jayson akivoq: „Ilaquttariittut arfininngornerup ullaap tungaa tamatigut oqaluussisarpugut. Tamanna iluaqutaaqaaq, tassami oqaluussikulanerujartortillunga qanoq iluaqutaatigisoq takusinnaanerujartorpara, oqaluussisarneralu nuannarileraluttuinnarlugu.“ Uaguttaaq eqiasuilluta aalajangersimasumik oqaluusseqataasariaqarpugut.

19. Kristusip siulersuineranut tunngatillugu suna aalajangiusimasariaqarparput?

¹⁹ Kristusip siulersuineranik akuersineq iluaqutaaqaaq uppernikkullu nakussatsinnaqaluni. Siulersuinera akuerigutsigu inuusuttuuneq ilisarsinikkut ilisimassuseqarnikkullu siumukarfiussaaq. Ilaqutariinneq eqqissisimaffiullunilu pilluarfiussaaq, oqaluussinerlu nuannersuussaaq nalerisimaarnartuullunilu. Taamaattumik Kristusip siulersuinerata ulluinnarni aalajangiisarnitsinnilu malinnissaa aalajangiusimaniartigu. (Kolossemiut 3:23, 24) Jiisusilli aamma allatut periuseqarluni siulersorpaatigut – tassa kristumiut ilagiivi aqqutigalugit. Taama aaqqiisimanera qanoq iluaqutigisinnaagipput allaaserisami tulliuttumi eqqartorneqarpoq.

[Quppernerup ataani ilanngussaq]

Eqqaamavigit?

• Guutip Siulersuisunngortitaanik malinninnerput qanoq iluaqutigissavarput?

• Meeqqat inuusuttullu Jiisusip siulersuinera malikkusullugu qanoq takutissinnaavaat?

• Kristusip siulersuineranut ilaqutariit naalatsigitikkaangata qanoq sunniuteqartarpa?

• Kristusimik Ilitsersuisutut Siulersuisutullu akuerinninneq qanoq oqaluussinitsinni ersertarpa?

[Atuaqqissaarnermi apeqqutit]

[Qupp. 9-mi assiliartaq]

Inuusutsilluni Guuti Siulersuisunngortitaalu ilisarissallugit ajussanngeqaaq

[Qupp. 10-mi assiliartaq]

Kristusip siulersuineranut naalatsigitinneq ilaqutariiulluarnermut ilasaataavoq

[Qupp. 12-mi assiliartaq]

Guutip naalagaaffia Jiisusip ujaqqaarpaa. Aamma illit taamaaliorpit?