„Ilinniarfigisinga“

„Nammaatara ilissinnut pisissiuk, ilinniarfigisingalu qanilaarama uummatikkullu makitajuikkama; tarnissigullu nukissaqaleqqikkumaarpusi.” — MATTHÆUSI 11:29, NV.

1. Sooq Jiisusimit ilinniartinneqarneq iluaqutaallunilu anersaakkut pisuunngornarpa?

JIISUSI KRISTUSI tamatigut eqqortumik eqqarsartarlunilu oqaluttarpoq. Ukiualuinnaat nunarsuarmi maani inuugaluarluni ajunngitsumik nalerisimaarnartumillu inuuvoq pilluarlunilu. Ajoqersuganngortitsivoq, taakkulu ilinniartippai qanoq Guuti pallorfigissagaat tullertillu asassagaat silarsuarlu qanoq ajugaaffigisinnaagaat. (Johannesi 16:33) Uummataat neriuuteqalersippai „inuunerlu aserujuissullu saqqangiullugit iivangkiiliukkut“. (2 Timotheusi 1:10) Jiisusimut ajoqersugaaguit, ajoqersugaaneq qanoq paasiviuk? Tassami Jiisusip ajoqersukkat pillugit oqaasiisa eqqarsaatiginerisigut inuunerput qanoq imaqarnerusinnaanersoq ilikkarsinnaavarput. Ilikkassagutsigu taassuma isiginnittaasii akuerisariaqarpavut najoqqutassiallu tunngaviusut maleruartariaqarlugit. — Matthæusi 10:24, 25; Lukasi 14:26, 27; Johannesi 8:31, 32; 13:35; 15:8.

2, 3. (a) Jiisusimut ajoqersugaaneq qanoq paasisariaqarpa? (b) Sooq imminut ima aperineq pingaaruteqarpa: ’Kimut ajoqersugaavunga?’

² Oqaaseq Kristumiut Allagaataanni Grækerisuuni ’ajoqersugaq’-mik nutserneqartoq pingaarnerpaamik isumaqarpoq isumamigut toraagaqalersoq, ajoqersorneqartoq. Oqaluut isumaqataa allassimaffimmi najoqqutarisatsinni, Matthæusi 11:29-mi (NV), aamma atorneqarpoq: „Nammaatara ilissinnut pisissiuk, ilinniarfigisingalu qanilaarama uummatikkullu makitajuikkama; tarnissigut nukissaqaleqqikkumaarpusi.“ Aap, ajoqersugaq ilinniartinneqartarpoq. Iivangkiiliuni oqaaseq „ajoqersugaq“ atorneqaraangat pineqarnerusarput Jiisusip malittai qaninnerusut, oqaluussiartorluni angalagaangat oqaluusseqataasartut taassumanngalu ajoqersorneqartartut. Ajoqersukkat allat Jiisusip ajoqersuutaanut isumaqataaginnarput, immaqa allaat isertorlutik. (Lukasi 6:17; Johannesi 19:38) Iivangkiiliunik allattut „Johannesip [Johannesip Kuisisup] ajoqersugai farisiiarillu ajoqersugaat“ eqqartorpaattaaq. (Markusi 2:18) Jiisusip ajoqersukkani „farisiiarit ajoqersuutaannut“ mianersoqqummagit, imminut aperisinnaavugut: ’Kimut ajoqersugaavunga?’ — Matthæusi 16:12.

³ Jiisusimut ajoqersugaagutta taassumanngalu ilinniarluta, allat ilagigaangamisigut anersaakkut nakussatsittassapput. Malugisinnaasariaqarpaat qanilaarnerulersimasugut uummatitsigullu makitajuinnerulersimasugut. Siulersuisutut akisussaaffeqarutta, angajoqqaajugutta kristumiulluunniit ilagiivini paarsisuugutta, immitsinnut aperisinnaavugut inuit akisussaaffigisatta malugisinnaaneraat Jiisusip allanik pinninneratut iliortarnersugut.

Jiisusip allat qanoq pisarpai

4, 5. (a) Sooq Jiisusip inuit ajornartorsiortut qanoq pisarai paasiuminaanngila? (b) Jiisusi farisiiarimut neriartormat qanoq pisoqarpa?

⁴ Paasisariaqarparput Jiisusip allat qanoq pisarnerai, ingammik ajornarsiungaartut.  Paasiuminaatsuusariaqanngilaq, Biibilimimi oqaluttuarpassuaqarpoq Jiisusip allanut attaveqarnera pillugu, ilaatigut ajornartorsiutilinnut. Malugisariaqarparputtaaq upperisarsiornikkut siuttut, pingaartumik farisiiarit, ajornartorsiortut qanoq pisarneraat. Assigiinngissutaat ilikkarnartorujussuuvoq.

⁵ Ukiumi 31-mi Jiisusi Galilæami oqaluussiartorluni angalatillugu „farisiiarit ilaata Jiisusi imminut qaaqquaa nereqatigiartoqqulluni“. Jiisusip nangaanani qaaqqusissut ilassivaa. „Illuanut iserpoq nerrivimmilu inissilluni. Illoqarfimmiittoqarpoq arnamik inuunerluttuusumik. Taassuma paasigamiuk Jiisusi farisiiarip illuani nereqataasoq tassunnarpoq qummuattannguaq alabastiusoq uuliamik ulikkaartoq nassarlugu, qiaatigalunilu Jiisusip isigaasa killingannut inissippoq, isigaalu qulliminik masatsilerpai nutsaminillu allarterlugit, kunillugillu uuliamik tanippai.“ — Lukasi 7:36-38.

6. Arnap ’inuunerluttuusup’ farisiiarip illuaniinnera qanoq nassuiarneqarsinnaava?

⁶ Qanoq pisoqartoq takorloorsinnaaviuk? Qinerlerfissiami allassimavoq: „Arnap (v. 37) innuttaaqatigiinni ileqquusoq malillugu nereqatigiit ornippai sinnikuinik piumalluni.“ Tamanna immaqa nassuiaataasinnaavoq qaaqqusaanngikkaluarluni iserneranut. Immaqa aamma allanik najuuttoqarpoq nerereerpata sinnikutorusuttunik. Arnarli taanna immikkut ittumik pissusilersorpoq.  Nerereernissaat tunuarsimaarluni utaqqiinnanngilaa. Tusaamanerlugaavoq; tamarmik nalunngilaat ’inuunerluttuusoq’, Jiisusilu oqarpoq ’ajortuliai amerlasuujusut’. — Lukasi 7:47.

7, 8. (a) Pissutsit assingusut atulissagaluarutsigit qanoq iliornissatsinnut tunngatillugu suna eqqarsaatigisinnaavarput? (b) Siimuut qanoq qisuariarpa?

⁷ Takorlooriaruk taamani inuullutit Jiisusitullu pineqarlutit. Qanoq qisuariassavit? Arnap ornittuuppatit ittuuallassanngilatit? Qanoq misigissavit? (Lukasi 7:45) Tupassavit annilaarlutillu?

⁸ Qaaqqusaaqataasuuguit farisiiaritut Siimuutut eqqarsassannginnerpit? „Farisiiarip Jiisusimik qaaqqusisup tamanna takugamiuk isumaliorpoq: ’Angutip taassuma pruffiitiugaluaruni ilisimassagaluarpaa arnap qanoq ittup — tassa inuunerluttup — attuuagaani.’“ (Lukasi 7:39) Jiisusilli allat misiginneqatigingaarpai. Nalunngilaa arnaq artorsaateqartoq malugalugulu sunik annikilliuuteqartoq. Eqqaaneqanngilaq arnaq taanna qanoq inuunerluttunngorsimanersoq. Atortittartuiusimassappat nunaqqataasa angutit juutit upperluartut ikiorsimassagunanngilaat.

9. Jiisusip arnaq qanoq oqarfigaa, tamannalu qanoq kinguneqarsimasinnaava?

⁹ Jiisusilli ikiorusuppaa. Oqarfigaa: „Ajortinnik isumakkeerfigineqarputit.“ Nangillunilu oqarpoq: „Uppernerpit annaappaatit. Eqqissillutit qimagunniarit!“ (Lukasi 7:48-50) Oqaluttuaq tassunga naavoq. Immaqa isumaqartoqarpoq Jiisusip arnamut iliuusii killeqartorujussuusut. Qimaguteqquinnarpaami eqqisseqqullugulu. Isumaqarpit inooriaaseq tujorminartoq uterfigigaa? Tamanna erseqqissumik oqaatigineqarsinnaanngilaq, malugikkilli Lukasip allagaani oqaatsit tulliuttut. Tassani oqaluttuarineqarpoq Jiisusi ’angalaartoq illoqarfiit illoqarfeeqqallu aqqusaartorlugit oqaluussisarluni Guutillu naalagaaffianik iivangkiiliu tusarliuttarlugu’. Lukasip aamma paasitippaatigut ’arnat qassiiusut’ Jiisusi ajoqersugaalu angalaqatigigaat, ’namminnerlu pigisaminnik taakku isumagisarlugit’. — Lukasi 8:1-3.

Jiisusip farisiiarillu assigiinngissutaat

10. Jiisusimik arnamillu Siimuup illuaniittumik oqaluttuaq eqqarsaatigissallugu sooq pitsaassava?

¹⁰ Oqaluttuaq takorlooruminartoq taanna qanoq ilinniarfigisinnaavarput? Killitsinnartipparput, ilaa? Siimuup illuaneeqataasimasuuguit qanoq misigissagaluarpit? Jiisusitut iliussagaluarpit, qaaqqussisutulluunniit, farisiiaritut? Jiisusi Guutip erneraa, taamaattumillu taassumatorluinnaq misigisinnaanatalu iliorsinnaanngilagut. Aappaatigulli nassuerutigerusukkunanngilarput farisiiaritut Siimuutut illuta. Amerlanersatta farisiiarit assigerusunnavianngilaat.

11. Sooq farisiiarinut assersuunneqarusunngilagut?

¹¹ Biibili silamiullu allagaataat misissoqqissaarlugit paasinarsisarpoq farisiiarit imminnut angisuutittut innuttaaqatigiit soqutigisaannik atugarissaarnissaannillu illersuisutut imminnut isigalutik. Isumaqanngillat Guutip inatsisaa erseqqillunilu paasinartuusoq. Inatsisit ersernerlussorigaangamikkik qanoq atorneqarnissaat nassuiarlugit ’amigaataarutsinniartarpaat’ kinaluunniit nalunngeqatiginnissutsiminik atueqqunagu. Upperisarsiornikkut siuttut inuit ileqquinut sunut tamanut, allaat nalinginnaanerpaanut, najoqqutassiorniarsarisarput. *

12. Farisiiarit imminnut qanoq isigippat?

 ¹² Oqaluttuarisaanermik ilisimatuup juutip Josefusip ukiuni hundredelinni siullerni inuusup takutilluarpaa farisiiarit inussiarnersutut, saammaasutut, kinaassusersiortuunngitsutut suliaminnullu piukkunnarluinnartutut imminnut isigisut. Qularnanngilaq farisiiarit ilaat ilumut taamaattuusut. Assersuutigineqarsinnaavoq Nikodemusi. (Johannesi 3:1, 2; 7:50, 51) Taakkua ilaat piffissap ingerlanerani kristumiutut uppertunngorput. (Apustilit Suliaat 15:5) Apustili Paulusi kristumiu juutit, ilaatigullu farisiiarit, pillugit allappoq: ’Taakkumi . . . Guuti ilungersuutigaat, eqqorluartumilli ilisimasaqarnatik.’ (Romamiut 10:2, NV) Iivangkiiliunili inuinnarnit isigineqarnerattut — pingaarniartutut, anneruniartutut, imminnut iluartuutinniartutut, isornartorsiuisartutut, assuarinnittutut nikaginnittutullu — allaatigineqarput.

Jiisusip paasinnittaasia

13. Jiisusip farisiiarit qanoq oqaatigai?

¹³ Jiisusip allakkanik ilisimasut farisiiarillu avoqqaarai ilumoortuusaarniartuummata. „Ersugassanik oqimaatsunik ersunnerlu ajornangajattunik qilersisarput inuillu tuiinut ilillugit, namminnerli attorumanerluunniit ajorpaat.“ Aap, ersugassat oqimaapput, inuillu nammaataat iluarinanngilluinnarpoq. Jiisusip aamma allakkanik ilisimasut farisiiarillu ’sianiitsutut’ eqqartorpai. Sianiitsoq avatangiisiminut navianartuusinnaavoq. Aamma ’ingerlassisunik tappiitsunik’ taavai oqarlunilu ’sumiginnaraat inatsisini pingaarnerutitat: naapertuilluarneq nallittuinerlu ilumoorsuserlu’. Kina Jiisusimit farisiiarinut assersuunneqarusuppa? — Matthæusi 23:1-4, 16, 17, 23.

14, 15. (a) Matthæusi Levimut Jiisusip pinninnerata farisiiarit pillugit sumik paasitippaatigut? (b) Oqaluttuaq taanna qanoq ilinniarfigisinnaavarput?

¹⁴ Iivangkiiliunik atuartut tamangajammik malugisarpaat farisiiarit amerlanersaat qanoq isornartorsiuigajutsigisut. Ilanngaaserisup Matthæusi Levip Jiisusimit ajoqersuganngoqquneqareerluni Jiisusi qaaqquaa nereqatigiinnermut amerlasuunit peqataaffigineqartumut. Oqaluttuarineqarpoq: „Farisiiarit taakkualu  allakkanik ilisimasortaat oqalorujulerput ajoqersugaalu aperalugit: ’Sooq ilanngaaserisut ajortuliortullu nereqatigaasigit imeqatigalugillu?’ Jiisusip akivai: ’. . . Tikiutinngilanga iluartut qaaqqujartorlugit ajortuliortulli allamik isumataaqqullugit.’“ — Lukasi 5:27-32.

¹⁵ Jiisusip tamatumani oqaaserisai allat Levip maluginiartorujussuuai: „Oqaatsit uku qanoq isumaqarnersut ilinniariartorsiuk: ’Piumasaraara nallittuineq, pilliutit toqutassat pinnagit.’“ (Matthæusi 9:13) Pruffiitit hebræeriusut allassimasaat farisiiarit upperineraraluarlugit oqaatsit taakku Hosea 6:6-imit issuarneqartut akuerinngilaat. Taamaattorli maligassarsiat maleruaqqissaarniartarpaat. Tamatta imminut ima aperisinnaavugut: ’Maleruagassanik aalajangersimasunik, soorlu nammineq isummiussanik imaluunniit ileqquliussanik, maleruaaqqissaarniartutut ilisimaneqarnerpunga? Imaluunniit allat naakkinnittutut inussiarnersutullu isiginerusarpaannga?’

16. Farisiiarit qanoq ippat, tamatumunngalu atatillugu qanoq aperisinnaavugut?

¹⁶ Farisiiarit kikkut tamaasa isornartorsiortarpaat. Kukkunerit tamaasa — piviusut piviusuunngitsullu — arajutsinaveersaartuaannarpaat. Allat oqaasissaarutitinniartarpaat kukkunerinillu eqqaasinniartarlugit. Farisiiarit usorsisimaarutigaat naasunik minninnguanik allaat, soorlu myntinik, dildinik kumaasanillu, pissarsiamik qulinginik tunniussisaramik. Upperluartuunertik atisamikkut takoqqusaarutigisarpaat, inuiaqatigiillu tamaasa aqunniarsaraat. Ileqqutsigut Jiisusi malinniassagutsigu allanik kukkunersiueqqajaajuarneq kukkunerinillu isiginninniaqqajaajuarneq pinaveersaartariaqarpavut.

Jiisusip ajornartorsiutinik iluarseeriaasia

17-19. (a) Nassuiaruk Jiisusi pisimasumi ilungersunartunik kinguneqarsinnaasumi qanoq iliortoq. (b) Sooq pisimasoq ajornakusoorlunilu nuanniitsuua? (c) Illit qanoq iliorsimassagaluarpit qanorlu pissusilersorsimassagaluarpit arnap Jiisusi ornimmagu najuussimagaluaruit?

¹⁷ Jiisusi farisiiarinit allaanerulluinnartumik periaaseqarluni ajornartorsiutinik iluarsiiniartarpoq. Eqqarsaatigeriaruk pisimasumi ilungersunartunik kinguneqarsinnaagaluartumi qanoq iliortoq. Arnaq ukiuni aqqaneq-marlunni aaqartuarsimasoq tassani pineqarpoq. Lukasi 8:42-48-mi oqaluttuarineqarpoq.

¹⁸ Markusip eqqartorpaa arnaq ’annilaarnermit sajuttoq’. (Markusi 5:33) Soormi taava? Qularnanngitsumik nalunnginnamiuk Guutip inatsisai unioqqutillugit. Mosesimik allakkat pingajui 15:25-27 naapertorlugit arnaq pissusissamisuunngitsumik aaqartoq minguttuujussaaq taamaattuartilluni, sulilu sapaatip-akunnerani ataatsimi. Attugai tamarmik minguttuunngussapput, aamma inuit attaveqarfigisai. Jiisusi orninniarlugu arnaq taanna inuppassuit akornatigut ingerlaniartariaqarpoq. Maanna ukiut 2000-it qaangiunneranni oqaluttuaq atuaraangatsigu arnaq taanna naakkigingaalersaraarput.

¹⁹ Taamanili najuukkaluaruit qanoq isumaqarsimassagaluarpit? Qanoq oqarsimassagaluarpit? Malugiuk Jiisusi arnamut inussiarnerlunilu, asannillunilu soqutiginnittoq. Oqamisaanngivippoq arnaq immaqa ajornartorsiortitsiinnarnialersoq. — Markusi 5:34.

20. Ilaat immaqa qanoq iliorsimassagaluarpat Mosesimik allakkat pingajui 15:25-27-mi piumasaqaat ullumikkut uatsinnut suli atuukkaluarpat?

²⁰ Pisimasoq tamanna ilinniarfigisinnaavarput? Oqariarta ullumikkut ilagiinni kristumiuni utoqqaanertaasutit, oqaatsillu Mosesimik allakkat pingajuini 15:25-27-niittut ullumikkut kristumiunut atuuttut. Qanoq qisuariarsimassagaluarpit arnap kristumiup ernumatsassimalluni neriuutaarulluinnarlunilu  inatsisit unioqqutippagit? Allat takkuanni nikanarsassaviuk isornartorsiorlugu avoqqaaralugulu? „Naamik, taamaaliornavianngilanga,“ immaqa eqqarsarputit. „Soorunami Jiisusi malinniassavara sapinngisannillu inussiarnerlunga, asannillunga soqutiginnillungalu iliuuseqassaanga.“ Ajunngeqaaq! Jiisusilli maligassiaata iliuuseqarluni maleruarnissaa imaannaanngitsuuvoq.

21. Jiisusip Inatsisit pillugit inuit sumik ilinniartippai?

²¹ Inuit Jiisusi peqatigigaangamikku nakussatsinneqartarput, qiimmassarneqarlutik kajumissisinneqarlutillu. Pissutsit aalajangersimasut pillugit Guutip inatsisai erseqqillutillu paatsuugassaanngillat. Tamanulli tunngasut pineqaraangata inuit nalunngeqatiginnissusertik atortariaqarpaat, namminnerlu aalajangiinermikkut takutissinnaavaat Guuti asallugu. Inatsisit inunnut kiffaanngissuseqartitsipput. (Markusi 2:27, 28) Guutip kiffani asavai, pitsaanerpaamik kissaallugit kukkugaangatalu naakkigerusuttarlugit. Jiisusi aamma taamaappoq. — Johannesi 14:9.

Jiisusip ajoqersuinerata kinguneri

22. Jiisusip ajoqersuinerata ajoqersukkat qanoq isiginnittaaseqarnissamut ikiorpai?

²² Jiisusimut tusarnaartut ajoqersuganngortullu paasivaat oqaasii uku ilumoortut: „Nammaatarami iluaqaaq, nammakkiussaralu oqeqaluni.“ (Matthæusi 11:30) Misiginngisaannarput Jiisusimit nammakkersorneqarlutik akornusersorneqarlutilluunniit, Jiisusillu naveeqqajaajuaannanngilai. Kiffaanngissuseqarnerulersarput, pilluarnerulersarlutik aammalu Guutimut imminnullu tatiginninnerulersarlutik. (Matthæusi 7:1-5; Lukasi 9:49, 50) Jiisusimit ilinniarpaat anersaakkut siulersuisup allat nukissaqalerseqqissagai aammalu isumamigut uummammigullu maniguuttuussalluni. — 1 Korinthimiut 16:17, 18; Filippimiut 2:3.

23. Jiisusip peqatigineratigut ajoqersukkat suna ilinniarpaat, taamaattumillu qanoq isummersinnaappat?

²³ Amerlasuut aamma paasivaat qanoq pingaartigisoq Kristusi attaveqarfigiuassallugu taassumatullu isiginnittaaseqalerniassalluni. Ajoqersukkani oqarfigai: „Soorlu Ataatap asagaanga, uangattaaq ilissi asavassi; asannissutsinniittuaritsi. Inassutikka maleruarussigit asannissutsinniittuassaasi, soorlu uanga Ataatama inassutai maleruarikka asannissusianiittuarlungalu.“ (Johannesi 15:9, 10) Guutimut kiffartornerminni angusaqarluassagunik Jiisusimit ilinniarsimasatik maleruaqqissaartariaqarpaat, nutaarsiassamik nuannersumik Guutip tunniussaanik oqaluussissutiginninnerminni ajoqersuinerminnilu, aammalu eqqarliminnut ikinngutiminnullu attaveqarnerminni. Qatanngutigiit ilagiillu amerliartuinnartillugit imminnut eqqaasittuartariaqarput Jiisusip periaasia tassaasoq periaaseq eqqortoq. Taassuma ajoqersuussutaa tassaavoq sallusuissut, taassumalu inooriaasia ilumut malitassaqqissuuvoq. — Johannesi 14:6; Efesosimiut 4:20, 21.

24. Jiisusip maligassiaa qanoq ilinniarfigisinnaavarput?

²⁴ Maanna sammeriikkavut eqqarsaatigigukkit, sulissutigiumasannik paasisaqarpit? Isumaqatigissavisigut oqarutta Jiisusi tamatigut eqqortumik eqqarsarlunilu oqalullunilu iliortoq? Taava isumallualerit. Ima kajumissinartumik oqarfigaatigut: „Tamanna ilisimagussiuk taava pilluassaasi taamaaliorussi.“ — Johannesi 13:17. (wE 12/15 01)

[Quppernerup ataani ilanngussaq]

Qanoq akissavit?

• Jiisusimut ajoqersugaaneq ilinnut qanoq isumaqarpa?

• Jiisusip allat qanoq pisarpai?

• Jiisusip ajoqersueriaasia qanoq ilinniarfigisinnaavarput?

• Jiisusi qanoq farisiiarinit allaanerua?

[Atuaqqissaarnermi apeqqutit]

[Qupp. 18-mi assiliartaq]

Jiisusi farisiiarinit allaanerulluinnartumik inunnut allanut isiginnittaaseqarpoq