Aalajaalluinnarta qulanngilluinnarlutalu

Ataatsimeersuarnerit — ataasiussuseqarnitsinnut nuannaarutaangaartumik nalunaajaatit

JOSEPH F. Rutherfordip 50-inik ukiullip neriniartarfimmi saqqisuaraanini nuannaraa. Naak ukioq ataaseq parnaarussivimmeereernermi kingorna peqqiillioraluaqaluni, tamaviaarluni ikinngutini inissaanut kuffertiinillu ikiorpai. Qatanngutit angutit allat marluk — tigusaaqatikui — unnuap qeqqata qaangerneranut sulipput inissarsiortorpassuit inissaannik tuniorarlugit. Akornanni qiimaneq tuniluuppoq. Susoqartoruna?

Ukioq 1919-ivoq. Biibilimik atuaqqissaartartut (ullumikkut Jehovap nalunaajaasuisut ilisimaneqartut) akerlilersugaareeqalutik nakussakkiartorput. Imminnut nakussassaqatigiinniarlutik ineriartoqatigiinniarlutillu, Cedar Pointimi, Ohiomiittumi, septembarip aallaqqaataaniit 8-ata tungaanut ataatsimeersuarput. Ataatsimeersuarnerup ulluisa naggataani 7000-init amerlanerusut qatanngummut Rutherfordimut, ataatsimeersuarnermi peqataasunut tamanut qiimmassaataasunik oqaatsinik ukuninnga tusarnaarluaqqissaarput: „Illit Kunngit Kunngigaatsit Naalakkallu Naalagaraatsit aallartitaq, . . .. nalunaajaasoq inunnut . . . Naalakkatta alianaatsup Naalagaaffianik.“

Guutip innuttai aatsaat ataatsimeersuartalinngillat. Israelitoqqamittaaq taamaaliortarput. (2 Mosesi 23:14-17; Lukasi 2:41-43) Ataatsimeersuarnerit taamaattut nuannaarutaasaqaat, najuuttut isummamikkut Guutip oqaasianut sammiuaannarnissaannut iluaqutaasarmata. Ullutsinni aamma Jehovap Nalunaajaasuisa ataatsimeersuarnerini anersaakkut tunngasut pingaartinneqarput. Peqqusersuitsunut, nuannaarsaqatigiinnerit tamakku assortugassaanngitsumik nalunaajaataapput Jehovap Nalunaajaasui kristumiussutsikkut ataasioqatigiillutik qatanngutigiittut ataqatigiilluartuunerannut.

Najuuffiginissaanut ilungersornerit

Ullutsinni kristumiut paasisimavaat Biibilimit ilinniartitaalluarnerit ataatsimeersuarnerni pisartakkatik anersaakkut nutaannguallaatigisarlugit. Ataatsimeersuarnerit tamakkua ’aalajaalluinnarnissamut qularutiginngilluinnaqqullugulu tamatigut Guutip piumasaata suunera’, iluaqutissaalluartutut isigaat. (Kulorsamiut 4:12) Taamaattumik Jehovap nalunaajaasuisa uummatimikkut iluunngarlutik nuannaarsaqatigiinnerit tamakkua tapersersortarpaat ilungersorlutillu najuuffiginiartarlugit.

Allanut uppissuseqarluarnissaq pisariaqarpoq, akornutaasut qaqqatut ittut najuutiinnarnissaminnut ajugaaffigisariaqarpaat. Soorlu Østrigimi kuiserlaaq taamaasiorsimasoq. Naak utoqqaagaluarluni sukkortuullunilu ullullu tamaasa nakorsaatini pisariaqartillugu, nunap immikkoortortaqarfiani ataatsimeersuarneq tamaat najuuffigiumavaa. Indiami inoqutigiit amerlasuut piitsuungaartullu Jehovap nalunaajaasuinit atuaqqissaaqatigineqartartut ataatsimeersuariarnissartik ajornartilluinnarpaat. Ilaqutaasut ilaat periarfissarseriataarpoq. „Pisussaq najuuffiginngitsoorusunngilara,“ oqarpoq, „Angalanissara akilersinnaajumallugu iverutikka kuultiusut tunivakka. Peqqissimissutiginngilara, katerisimaaqatigiinnermi misigisallu uppernemut nakussasaataaqimmata.“

Papua New Guineami soqutiginnittut eqimattat illoqarfiup pigaarnersaani ataatsimeersuarnissaq najuuffigerusuppaat. Nunaqarfimminni angut tamanut atugassamik assartuutaatilik saaffigaat aperalugulu ataatsimeersuariarfissamukaatissappatik qanoq akiliissanerlutik. Akiliutissartik naammanngimmat, angut isumaqatigiissuteqarfigaat sullillugu igaffianik allanngortiterissunniarlugu. Aallarsinnaalerput, ataatsimeersuarnerlu tamaat pissarsiaqarfigalugu.

Jehovap nalunaajaasuinut, ataatsimeersuarneq najuuffigiumallugu aalajangersimasunut, ungasissuseq  ajornartorsiutaanngilaq. 1978-imi inuusuttunnguaq ataatsimeersuariaq Polenimeersoq, Lillemut Frankrigimiittumi ataatsimeersuariarluni ulluni arfinilinni 1200 kilometerit sikkilersimasoq. Aappariit Mongoliameersut 1997-mi aasaagaa Irkutskimi Ruslandimiittumi ataatsimeersuarnissaq najuuffigerusullugu, aamma taakku 1200 kilometerit angalasimavaat.

Qatanngutigiinneq ilumoortoq

Ataasioqatigiinneq qatanngutigiittullu asaqatigiinneq Jehovap Nalunaajaasuisa ataatsimeersuarnerini, nalunaajaasuunngitsunut isiginnittunut ersaarippoq. Amerlasuut malugisimavaat ataatsimeersuaqataasut akornanni assigiinngisitsisunik takussaasoqanngitsoq, kissalaarnerli piviusoq, allaat siornatigut naapinnikuunngitsut akornanni.

Australiami, nunani tamani peqataaffigineqartumi ataatsimeersuarnermi, angallassisartup ataatsimeersuarianik ingerlatsisup, sapaatip akunneranit pilersaarutaagaluartumit sivisunerusumik angallatani ilagerusussimavai . Asaqatigiinnerat ataasioqatigiinnerallu tassunga sunniuteqarpoq, tupigusuutigaalu imminnut ataqatigiilluarnerat, amerlanerit imminnut ilisarisimannginnerat eqqarsaatigalugu. Inuulluaqqusisussanngorami saasarpai. „Qatanngutinik“ taavai qutsaviginiarlugillu, oqaasissanili oqaatiginagit qiassamik tupikkami qissaserpoq.

1997-imi Sri Lanka-mi unammisarfissuarmi siullermeersumik nunap immikkoortortaqarfiani oqaatsit pingasut atorlugit ataatsimeersuartitsisoqarpoq. Pilersaarut tamaat ataatsikkut tuluttut, singalesiskisut tamiilisullu saqqummiunneqarpoq. Silarsuarmi naggueqatigiit akornanni pissanganartorsiorfioqisumi, oqaatsit pingasut atorlugit katerisimaarneq taamaattoq arajutsineqanngitsoornavianngilaq. Politiip qatanngut aperaa: „Ataatsimeersuarneq kikkunnit isumagineqarpa? Singalesarit, tamiilit tuluttulluunniit oqaasillit?“ „Arlaannaalluunniit naamik,“ qatanngut akivoq. „Tamatta ikioqatigiilluta suliaraarput.“ Politeeq tupigusuppaseqaaq. Immikku oqaasillit pingasut taakkua, naggataarnersiummik qujareeramik unammisarfissuarmilu tamarmi amenneeqatigiittoqareermat, ataatsimeersuaqataasut pilersaarutaanngitsumik assatik ersaartaatilerpaat. Qullipinngitsoortoqarunanngilaq. Aap, ataatsimeersuarnerit ataasioqatigiinnitsinnut nuannaarutaangaartumik nalunaajaataapput. — Tussiaat 133:1. * (wE 15/9 01)

[Quppernerup ataani ilanngussaq]