Sooq Guutimut qinusariaqarpugut?

’QINUSARPUSI sussanasilu, ajortumik qinusarassi . . . Guutimut palligunniaritsi, taava ilissinnut palligutissavoq.’ (Jâko 4:3, 8) Jesusip ajoqersugaata Jakobip oqaasiisa taakku immaqa eqqarsalersissavaatigut sooq qinusarnersugut.

Qinuneq pisariaqartitatsinnik Guutimut oqaluttuarfissaannartut atorneqartariaqanngilaq. Qaqqami oqaluutsimini tusaamasaasumi Jesus oqarpoq: ’Ataatassi ajorsaatisi ilisimammagit qinnuiginngikkallartilluni.’ Jesusili oqarpoq: „Qinujuaritsi, tunineqassaasi taava; ujarlertuaritsi, nanisissaasi taava; kasuttortuaritsi, mappiunneqassaasi taava.“ (Matîuse 6:8; 7:7, NV) Tassami, Jehovap kissaatigaa pisariaqartissorisatsinnik oqaluttuutissagitsinni. Qinunerli taakkunannga kinguneqarnerujussuuvoq.

Ikinngutigiilluartut aatsaat pisariaqartitsigaangamik oqaloqatigiinneq ajorput. Imminnut soqutigipput, ikinngutigiinnerallu sakkortunerulersarpoq misigissutsitik oqaatigigaangatigik. Taamatuttaaq qinuneq ulluinnarni pisariaqartitatta qinnutigiinnarnerannit siunertaqarnerujussuuvoq. Qinunerup periarfissippaatigut Jehovamut attaveqarnitta nakussatsinnissaanut taassumunnga qamannga pisumik tunniusimanitta oqaatigineratigut.

 Imminut qaninneruleqqulluta qinunerup immikkut pisinnaatitaaffiunera Guutip tunniuppaa. Aatsaalli Guutimut qanillisoqarsinnaavoq qinunitsinni qamannga pisumik misigissutsivut oqaatigigutsigik alanngaaganngitsunik. Jehova qinnunikkut saaffigisinnaagatsigu nuannaarutigeqaarput, Biibilimilu Ussatit-ni allassimavoq ’peqqusersuitsut qinnutaat ilassilluartarai’. — Ussatit 15:8.

„Guuti qanillugu inuuneq tassa pilluarnartora,“ tussiaasiortoq Asaf allappoq. (Tussiaat 73:28) Guutili qanillissagutsigu qinuneq naammanngilaq. Malugiuk tamanna oqaluttuami tulliuttumi qanoq ersersinneqartoq:

’[Jesusip] ajoqersugaasa ilaata oqarfigaa: „Naalagaq, ajoqersortigut qanoq qinussasugut.“’ Akilluni Jesus oqarpoq: ’Qinusaraangassi ima oqartassaasi: „Ataataq, aqqit illernarsili; naalagaaffiit tikiulli.“’ (Lúkarse 11:1, 2) Guutip aqqa sunaasoq qanorlu ililluni illernarsisinneqassasoq ilikkarsimanngikkutsigu, qinnutivut siunertaqarluarsinnaappat? Jesusillu oqaasii naapertorlugit qinusinnaavugut nalugutsigu Guutip naalagaaffia sunaasoq? Tamakku paasilluarsinnaavavut Biibili atuaqqissaartarutsigu. ilisimassutsip tamatuma pisatta Guutip ilisarilernissaanut aqqutigeqqusaasalu paasinissaannut ikiussavaatigut. Jehova Guuti ilisarigutsigu taassumunnga qaninnerusutut misigissaagut asanerulerlugulu. Aamma qinunikkut ammanerusumik oqaluunnissaanut ikiussavaatigut.

Qinnunikkut ajornartorsiutit anigorneqarsinnaapput

Jehovamut qanittumik attaveqarnerup ajornartorsiutitta anigornissaannut ikiorsinnaavaatigut. Tulliullutik oqaluttuarineqartuni paasineqarsinnaavoq ilaat Guutimut qinusut qanoq taassumunnga qaninnerusumik attaveqalersut.

Brasiliami arnaq Mariamik atilik ikioqqulluni Guutimut qinuvoq. Innuttaaqatigiinni ilumoortuusaarniarneq qatsulluinnaramiuk ileqqorissaarnissamut najoqqutassiat nalinginnaasut pikitsitsiffigisimavai. Mariap uini, meeqqani angerlarsimaffinilu qimassimavai ikiaroortalerlunilu. Pilluarnermik ujarlernini iluatsinngitsoormat uummammiugisani Guutimut aniatippai ikioqqullunilu.

Tamatuma kingunitsiannguagut Jehovap Nalunaajaasuinit marlunnit pulaarneqarpoq Napasuliaq Alapernaarsuiffik-millu paasissutissanik Guutip siulersuinerata akuersaarnerata pingaaruteqassusianik imalimmik tunineqarpoq. Allaaserisap uummataa killippaa, ullorlu taanna Maria oqaluussisartut peqatigalugit Biibilimik atuaqqissaartalerpoq. Tamatuma kinguneraa ilaqutariit najoqqilernerat. Jehova ilisarileriartortillugu taassumunnga asanninnermi takutinnissaa kissaatigilerpaa. „Inuttut allanngoriartulerpunga,“ Maria oqarpoq. „Aallaqqaammut uima ilaquttamalu Biibilimik atuaqqissaartarnera iluarinngilaat, allanngoriartornerali malugigamikku ingerlaqqeqquaannga.“ Kingusinnerusukkut Maria qinnutinik tusartoq, Jehova Guuti kiffartuunniarlugu tunniulluinnarpoq.

Boliviami José pinnersumik nuliaqarpoq ingerlalluartumillu niuertarfiuteqarluni, taamaattorli pilluanngilaq. Allasiornera pillugu nuliata qimappaa. Aamma imertarpoq atorfissaqanngitsutullu misigaluni. José oqarpoq: „Qamannga pisumik Guutimut qinulerpunga taassumunnga iluarisaalissaguma qanoq iliornissara paaserusullugu. Kinguninngua Jehovap Nalunaajaasui suliffinnut takkupput akeqanngitsumillu Biibilimik atuaqqissaarnissamik neqerooruteqarlutik, itigartippakkali. Pingasoriarluni taamatut pisoqarpoq. Guutimut ikioqqullunga qinoreeraangama tamatigut takkuttarput. Naggaataatigut aalajangerpunga takkuteqqippata tusarnaarumallugit. Biibili naallugu atuareersimavara apeqqutissarpassuaqarlungalu, tamatigulli naammaginartumik akisarpaannga. Jehova ilisarilerakku inuunera nutaamik imaqalerpoq, ikingutigisakkalu Jehovap Nalunaajaasui uannut maligassaalluarput. Arnaatiga ernguteqatigisartakkakkalu qimappakka nuliannut meeqqannullu uterlunga. 1999-ip aallartinnerani kuisippunga.“

Tamara Italiami alliartorsimasoq aappariinnermini ajornartorsiuteqarpoq Guutimullu ikioqqulluni qinuvoq. Meeraalluni unatarneqartarami 14-inillu ikioqarluni angarlarsimaffimminit anisitaalluni saassussiumatuunngorsimavoq. Tamara oqaluttuarpoq: „Biibilimik nassaarpunga atualerlugulu. Unnuit ilaanni atuarpara ilisimassummik nassaarneq ’erlinnartunik nassaarniarnertut’ ittoq. Guuti qinnuigaara ilisimassutsip taamaattup nassaarinissaanut ikioqqullunga. (Ussatit 2:1-6) Aqaguani ullaap tungaani Jehovap Nalunaajaasuinit  pulaarneqarpunga. Peqatigalugit Biibilimik atuaqqissaartalerpunga, sivisungaatsiartumilli ilikkakkakka iliuuseqarfiginngilakka. Naggataatigut aalajangerpunga kristumiutut inuulerumallunga kuisillungalu. Maanna uigalu allat Guutip ilisimassusianik iluaquteqarnissaannut ikiortarpavut.“

Beatriz siornatigut Venezuelami Caracasimi pisuunerusut ilagisimavaat. Avipporli aliasuutigingaarlugulu. Ilaanni nalunaaquttap-akunneripassui aliasungaarluni Guutimut qinuvoq. Aqaguani ullaap tungaani matukkut sianertoqarpoq. Uumitsaatigisaminik matumi itsuartorfikkut angut arnarlu tamarmik pooqattallit takuai. Angerlarsimanngitsuusaarpoq. Oqaluussisartulli ingerlaqqitsinnatik matup ataanut naqitaarannguaq ilivaat. „Biibiliutit ilisimajuk,“ allaqqavoq. Pulaarnerat unnuami qinnutaanut attuumassuteqarnerpa? Suaarluni uteqqeqquai. Biibilimik atuaqqissaaqatigineqartalerpoq, kingusinnerusukkullu kuisilluni. Inuunermi nuannaarneq piviusoq nassaarereeramiuk maanna Beatrizip allat pilluarnerup qanoq angunissaanik ajoqersortarpai.

Carmen piitsuussutsimut akiuuppoq Guutimullu ikioqquvoq. Qulinik meeraqarpoq imerajuttumillu ueqarluni Rafaelimik atilimmik. „Allat errorsissuttarlugit aningaasarsiorniarsarivunga,“ oqaluttuarpoq. Rafaelili imerajunnerujartorpoq. „Aatsaat Jehovap Nalunaajaasui Biibilimik atuaqqissaaqatigisaleratsigit uiga allanngulerpoq. Guutip naalagaaffianik neriuut ilikkarparput — tassa Jehovap qanittukkut piitsuussuseq naqisimanninnerlu nunarsuarmit peerumaarai. Kiisami Guutimut qinnutikka akineqarput!“ Jehovap aqqutigeqqusai ilikkaramigit Rafael imerunnaarnissaminut ikiorneqarpoq, ’inuttaarli’ inuunerilerpaa. (Evfisumiut 4:24) Ilaqutariillutik pissaqarnerulerput. Rafael oqarpoq: „Pigissaartuunngikkaluarpugut, namminerlu illoqarata, inuussutissaqarpugulli pilluarlutalu.“

Qinnutit tamarmik akineqarpata

Inuit eqqaaneqartut Guutimut qinunertik iluaqutigaat? Ilaana. Malugaajuk qinnutaat akineqartut amerlanertigut kristumiut ilagiissaanneersunit ikiorneqaramik ’Jehova Guutimut palligunnissaannut’ Biibilimik atuaaqqissaaqatiginerisigut? — apustilit suliait 9:11.

Taamaattumik Guutimut qinunissamut pissutissaqarluarpugut. Guutip naalagaaffiata tikiunnissaanik piumasaatalu nunarsuarmi pinissaanik qinnut qanittukkut akineqassaaq. (Matîuse 6:10) Guutip imminut assortuisut nunarsuarmit peereerpagit ’Jehovamik ilisarsinerup nuna tamakkerumaarpaa’. (Jesaja 11:9) Taamanikkut Jehovamik asannittut tamarmik ’Guutip qitornaasa kiffaanngissusiata naalannaataat pigilissavaat’ qinnutaallu ilumut akineqassapput. — Rûmamiut 8:18-21. (wE 15/11 2000)

[Qupp. 7-mi assiliartaq]

Nalunngiliuk sooq Guutimut qinusariaqartugut?