Maligassaalluartut ilinniarfigaagit?

’UPPERTUNUT tamanut Makedoniamiunut Akajamiunullu maligassanngorpusi,’ apustili Paulusip kristumiut aalajaatsut Thessalonikamiittut allaffigai. Taakku uppeqatiminnut nersornartumik maligassiuipput. Assersuutigalugu Thessalonikamiut Paulus suleqataalu malinniarpaat. Paulus allappoq: ’Iivangkiiliu pigisarput ilissinnut oqaasiinnaalluni pinngimmat, pissaallunili anersaakkut illernartukkut pisarluni nakimajunnaarsitsilunilu; ilisimavusimi qanoq ililluta ilissi pissutigalusi akornassinniittugut. Uatsinnillu . . . malinnittunngorpusi.’ — 1 Tásalûníkamiut 1:5-7.

Aap, Paulus oqaluussiinnanngilaq. Inuunera allanut kajumissaataavoq, uppernikkut, nikallujuissutsikkut imminullu tunniunnermigut maligassaalluarluni. Taamaattumik Thessalonikamiut Paulusimit suleqataanillu sunnerneqangaarput, ’annikilliungaaraluarlutillu’ sallusuissut ilassivaat. Paulusilli angalaqataasalu kisimiunngitsoq uppertut ajunngitsumik sunnerpaat. Allattaaq annikilliuteqarlutik nikallujuitsut taakkununnga kajumissinartumik sunniuteqarput. Soorlu Paulusip Thessalonikamiut allaffigigai: ’Ilissimi qatanngutivut, Guutip ilagiissai Judæamiittut Kristus Jesusimi malissimalerpasi, taamarluinnaq ilississaaq naggueqatissinnit naalliutsitaagassi, soorlu ikku juutinit.’ — 1 Tásalûníkamiut 2:14.

Kristus Jesus — maligassaq pitsaanerpaaq

Paulus maligassaalluartuuvoq, uparuanngitsuunngilaali Jesus Kristus tassaasoq kristumiunut maligassiuilluartuunerpaaq. (1 Tásalûníkamiut 1:6) Kristus tassaavoq maligassarput pitsaanerpaaq. Apustili Peter allappoq: ’Tamatumunngami qaaqqusimavusi, Kristusissaaq anniarmimmat ilissi pillusi maligassaqartillusi, tumini atuaqqullusigik.’ — 1 Pîtruse 2:21.

Jesusilli ukiut 2000-ngajaat matuma siorna nunarsuarmi inuunini naasimavaa. Maanna anersaatut toqujuitsutut ’inuup takunngisaannagaa takusinnaanngisaalu’ ’qaamasumi pallitassaanngitsumi ineqarpoq. (1 Timûtiuse 6:16) Qanoq ililluta ilaarsinnaavarput? Ilaatigut Biibilimi Jesusip inuuneranik oqaluttuat sisamat misissornerisigut. Iivangkiiliuni inuttut pissusiinik, inuuneranik isiginnittaasianillu sukumiisumik paasitinneqarpugut. (Filípimiut 2:5-8) Tamakku paasiniarneqarnerusinnaapput atuakkap Inuk inuit inuusimasut pingaarnerpaartaat-a atuaqqissaarneratigut, tassani Jesusip inuunerani pisimasut annikitsualutigut tulleriiaarnerisigullu sammineqarmata. *

Jesusip imminut tunniunnermigut maligassiaa apustili Paulusimut sunniuteqarluarpoq. Taassuma kristumiut Korinthimiittut allaffigai: ’Uanga tunissiumaqalungalu tarnisi pillugit tunniukkumaqaanga.’ (2 Korintumiut 12:15) Taamaalilluni Kristusip isiginnittaasia malinniarluarpaa. Kristusip naammalluinnartumik maligassiaa eqqarsaatigigutsigu nammineq inuunitsinni malinniarusuttariaqarparput.

Assersuutigalugu Jesusip ilinniartippaatigut Guutip timikkut pisariaqartitatta matunissaannik neriorsuutaa tatigeqqullugu. Sulili iliuuseqarneruvoq. Ulluinnarni inuunermini takutippaa nammineq Jehova upperalugulu tatigigini. Jesus oqarpoq: ’Terianniat siseqartarput, timmissallu qilaap ataaniittut ineqartarput; Inuulli Ernera niaqquminut iigarfissaqanngilarluunniit.’ (Matîuse 6:25; 8:20) Eqqarsaatitit iliuutsitillu nunap piinik isumakulunnermit  aqunneqartarpat? Imaluunniit inuuninni takuneqarsinnaavaa Guutip naalagaaffia salliutikkit? Jehovamut kiffartorneq qanoq isigaajuk? Maligassatsitut Jesusitut isiginnittaaseqarpit? Biibilimi takutinneqarpoq Jesusip allat ilungersoqquinnanngikkai, namminerli arlaleriaqaluni iliuutsimigut ilungersungaartartoq. (Juánase 2:14-17) Jesus aamma asanninnermigut maligassiuilluarpoq. Asanninneq pissutigalugu inuunini ajoqersukkaminut pilliutigaa! (Juánase 15:13) Jesus ilaartarpiuk qatanngutitit asallugit? Imaluunniit allat naammalluinnanngissusii pissutigalugit taakkununnga asanninnerit akornuserneqarpa?

Kristusimik malinninniarnitsinni akuttunngitsumik sapersittarpugut. Jehovalli ’Naalagaq Jesus Kristus atiniarlugu’ ilungersornivut nuannaarutigai. — Rûmamiut 13:14.

’Savaatinut maligassat’

Ullumikkut ilagiinni maligassatsitut isigisassaqarpugut? Ilaanna! Ingammik qatanngutit angutit akisussaaffilerneqartut allanut maligassaalluartariaqarput. Paulusip Titus, ilagiinnut Kretamiittunut kiffartortoq nakkutilliisunillu toqqaasartoq, oqarfigaa utoqqaanertat toqqakkat ’assuarnaatsuusariaqartut’. (Títuse 1:5, 6) Apustili Peterip tamatumunnga assingusumik utoqqaanertat oqaaqqissaarpai ’savaatinut maligassanngoqqullugit’. (1 Pîtruse 5:1-3) Taavami ilagiinni kiffartortut? Taakkuttaaq ’kiffartorluartariaqarput’. — 1 Timûtiuse 3:13.

Soorunami piviusorsiussanngilagut ilimagigutsigu utoqqaanertat ilagiinnilu kiffartortut tamarmik kristumiutut kiffartornermi suliassanut tamanut assigiimmik piukkunnaateqassasut. Paulusip kristumiut Romamiittut allaffigai: ’Saammaannermit tunissutinik assigiinngitsunik saammaanneq uatsinnut tunniussaq missiliorlugu pigisaqarpugut.’ (Rûmamiut 12:6) Qatanngutit angutit assigiinngitsuupput assigiinngitsutigullu pikkoriffeqartarlutik. Ilimagigutsigu utoqqaanertat tamatigut eqqortumik iliuuseqassallutillu oqaaseqassasut ingasaassiniartuuvugut. Biibilimi Jâko 3:2-mi allassimavoq: ’Tamattami qassiinik naakkiuttarpugut; oqalunnikkut naakkiunnaveersoqarpat, taanna angutaavoq iluarluinnartoq timini iluunngarlugu allaat naalakkersorsinnaallugu.’ Naalli utoqqaanertat naammalluinnanngitsuugaluartut suli Timoteusitut ’uppertunut maligassanngorsinnaapput oqaatsikkut ileqqukkullu asannissutsikkut uppernikkullu minguissutsikkullu’. (1 Timûtiuse 4:12) Taamaappat ilagiinniittut kajumillutik Eprîarit 13:17-imi allassimasoq maleruarusussavaat: ’Siulersortisi . . . eqqaaniarsigik; inuuneratalu naggataa misissorlugu uppersusiatigut malissigik.’

Ullumikkut maligassaalluartut allat

Allarpassuit aamma ukiut amerlaqisut ingerlaneranni maligassaalluarsimapput. Ajoqersuiartortitat namminissarsiujuitsut tusindilippassuit ’illuniluunniit qatanngutiniluunniit angunniluunniit arniluunniit nuliiluunniit qitornaniluunniit nunaatiniluunniit’ qimassimavaat Jesusip kristumiunut tamanut peqqussutaa maleruarniarlugu. (Matîuse 19:29) Eqqarsaatigikkittaaq nakkutilliisut angalasartut nuliaallu, angutit arnallu kajumillutik Napasuliaq Alapernaarsuiffiup Peqatigiiffiata immikkoortortaqarfiini kiffartortut pioneerillu ilagiinni kiffartortut. Taakkua maligassiaat allanik kajumilersitsippat? Oqaluussisartup kristumiup Asiamiittup eqqaamavaa ajoqersuiartortitaq Napasuliaq Alapernaarsuiffiup Biibilimik Atuarfiata Gileadip klassiata arfineq-pingajuanni atuarsimasoq. Eqqaamavaa qatanngutip angutip taassuma aalajaatsup „ippernarpassuit isugutanerlu erloqinartoq kajumilluni naammagittarfigai. . . . Maluginiarnarneruvormi taassuma tuluugaluarluni tusarliussaq Kinamiutut Malaysiamiutullu oqaluussissutigisinnaammagu.“ Maligassiaa qanoq sunniuteqarpa? Qatanngut angut oqarpoq: „Eqqissisimanerata tatiginninneratalu nammineq  inersimasunngorama ajoqersuiartortitanngornissannut kissaateqalersippaannga.“ Qatanngut angut taanna ilumut ajoqersuiartortitanngorpoq.

Register til Vagttårnets publikationer-imi inuunermi misilittakkanik oqaluttuat Napasuliaq Alapernaarsuiffik-mi Iteritsi!-milu allaaserineqartut allattorneqartarput. Taakkunani oqaluttuarineqarput kristumiut silarsuarmi atorfinnik anguniakkanillu isumakkeerisimasut, sanngiiffigisaminnut ajugaasimasut, inuttut pissuserisaminnik allanngortitsilluinnarsimasut, piffinni annikkiliornartuni isumalluartuaannarsimasut, eqiasuillutik, nikallujuillutik, ilumoorlutik, maniguullutik namminissarsiujuillutillu. Atuartartut ilaat oqaluttuat taamaattut pillugit ima allappoq: „Kristumiutut maniguunnerulersillungalu qujamasunnerulersippaanga, allat suut atortariaqarsimagaat atuarnerisa, imminuinnarlu eqqarsaatiginnginnissannut ikiorlunga.“

Aammattaaq nammineq ilagiitsinni maligassaalluartut puigortariaqanngilavut: ittuusut ilaquttamik anersaakkut timikkullu pisariaqartitaannik isumaginnittuartartut; qatanngutit arnat, ilaatigut anaanaasut kisermaat meeqqaminnik perorsaaniarnerminni tatineqarneq atortillugu kiffartornermi suliniuteqartartut; utoqqalisimasut napparsimasullu naak sanngiilliartuinnaraluarlutik peqqiilliartuinnarlutillu aalajaattuartut. Maligassat taakku qiimmassaatiginnginnerpigit?

Ilumoorpoq silarsuaq maligassaalluanngitsunik ulikkaartoq. (2 Timûtiuse 3:13) Eqqarsaatigiulli Paulusip kristumiunut Judæamiittunut oqaaqqissaarutaa. Upperluartut maligassaalluartut itsaq inuusut eqqartoreerlugit Paulus ima kajumissaarivoq: ’Taamaammat, nalunaajaasut taama eqimatigisut avatangermatigut, uaguttaaq . . . nikallujuerlutalu arpanniarta assoruunnitsinni uatsinnut siunertarititaasumi, uppernermillu aallarniisoq inerititsisorlu Jesus aarlorfigisigu.’ (Eprîarit 12:1, 2) Ullumikkuttaaq kristumiut ’nalunaajaasunik eqimasunik’ avatangersimaneqarput — siornatigut inuusunik maannakkullu inuusunik. Taakku ilinniarfigisarpigit? Taamaaliorsinnaavutit ’ajortoq pinnagu ajunngitsoq malissallugu’ aalajangeruit. — 3 Juánase 11. (wE 1/7 2000)

[Quppernerup ataani ilanngussaq]

[Qupp. 21-mi issuagaq]

Piviusorsiornerunngilaq ilimagissallugu utoqqaanertat ilagiinnilu kiffartortut tamarmik assigiimmik pikkorissuseqarlutik ilagiinni suliassat tamaasa naammassissagaat

[Qupp. 22-mi assiliartat]

Utoqqaanertat ’savaatinut maligassaassapput’