Guutip oqaasia siulittuutaasoq siunissamut neriulersitsivoq

GUUTIP oqaasia Biibili pissutaalluni kristiumiut ilumoortut siunissamut upperlutik, neriuuteqarlutik isumalluarlutillu inuusinnaapput. Jehova Guutimut attaveqarnertik toqqissisimassutigigamikku aqagussaq qilanaarisarpaat. Ataatsimeersuarnermi „Guutip oqaasia siulittuutaasoq“-mi aallarniutitut oqalugiaammi nassuiarneqartutut Jehovap Nalunaajaasuisa Biibilimi siulittuutit ukiorpassuarni kajumillutik atuaqqissaartarsimavaat. Ataatsimeersuarnerni taakkunani Jehovap innuttani sumik isumassorsimavai? Tamanna paasiumaqalugu najuuttut tamarmik Biibili tigummiarpaat. Ataatsimeersuarnermi ullunut ataasiakkaanut qulequtaasut tulliuttuni allaatigineqarput.

ULLOQ SIULLEQ: Guutip oqaasia qaammaqqutigalugu saqivugut

Oqalugiaammi „Guutip oqaasianit siulersorneqarpugut“-mi ersersinneqarpoq Jehovap innuttai assersuunneqartut angummut unnuami taartumi angalalersumut. Seqernup nuiartuaarnerani avatangiisii ersinnerlupput, kisianni seqineq qullarmat suut tamaasa takulluarsinnaalerpai. Guutip oqaasiani siulittuutaasumi sallusuissutsip qaamarinnera iluaqutigalugu Jehovap kiffaasa, Ussatit 4:18-mi siulittuutigineqartutut, aqqutertik takulluarsinnaalerpaat. Anersaakkut taartumi sattallutik nammineertitaanngillat.

Ataatsimeersuarnerup qulequtaanik oqalugiaatip „Guutip oqaasia siulittuutaasoq aalluttaruk“-ip najuuttut eqqaasippai, Messiasioqqusersut pruffiitioqqusersullu malitaasa misigisaattut Jehovamut tatiginnittut pakatsisinneqarnatillu isumalluarunnaarsinneqanngillat. Tamatuma akerlerluinnaanik Jesus Kristus ilumut Messiasiuneranik nalunaajaatit amerlaqaat. Assersuutigalugu Jesusip tupinnartuliornikkut allatut isikkoqalernera Guutip naalagaaffiani kunnginngortitaaneranut assersuutaasimavoq. 1914-imi Jesus Naalagaaffiup pissaanerani tikiukkamili Pîtrusip agdlagaisa áipait 1:19-mi taaneqartutut aamma ’qaasiutaasimavoq’. Oqalugiartup aalajangerpaa: „Qaasiutitut Messiasiusutut silarsuarmi tamarmi qaamasutut ulloq nutaaq, ukiut nutaat, inuiannut naalattunut tamanut atuutilertussaq nalunaarutigaa.“

Ualikkut oqalugiaammi siullermi „Qaammaqqutaasutut qaamasarpugut“-mi Evfisumiunut agdlagkat  5:8 erseqqissarneqarpoq, tassanilu Paulusip ima unnersuuppaatigut: ’Qaamasuup qitornaasut saqiuaritsi.’ Kristumiut Guutip oqaasianik allanik ilinniartitsinermikkut qaammaqqusersuisuinnaanngillat, aammattaarli namminneq Biibili malillugu inuunermikkut Jesusillu malinneratigut.

Taamatut qaammaqqusersuisuussagaanni pisariaqarpoq kajumissaarut una malissallugu: „Guutip oqaasiata atuartarnera qiimmataatigiuk.“ Oqalugiaatini ataqatigiinni pingasunik immikkoortortalimmi tamanna eqqartorneqarpoq. Oqalugiartup siulliup Abraham Lincoln Biibilimi „Guutip inunnut tunissutaasa pitsaanerpaartaat“-ut taasisoq issuareerlugu najuuttut aperai Guutip oqaasianik pingaartitsinerisa itissusiat pillugu atuartarnerisa suna qulaarneraat. Tusarnaartut Biibilimik atuaqqissaartarnissaannut kajumissaarneqarput oqaluttuarineqartullu takorloornissaannut piffissaqarniartaqqullugit paasisallu nutaat ilikkariikkaminnut atassuseqqullugit.

Oqalugiaatit ataqatigiit immikkoortuani tulliuttumi ’nerisassat mattusuut’ ilikkassagutsigik atuaqqissaartariaqarneq atuapallaannannginnissarlu erseqqissarneqarput. (Eprîarit 5:13, 14) Oqalugiartoq oqarpoq uatsinnut iluaqutaassasoq ’siunertarigutsigu paasiniarluarnissaat’, soorlu Israelimi palasiusoq Ezra taamaaliorsimasoq. (Esra 7:10) Soorliuna atuaqqissaarnissaq taama pingaaruteqartigisoq? Jehovamut attaveqarnitsinnut toqqaannartumik sunniuteqarmat. Taamaattumik Biibilimik atuaqqissaarneq erlinnartuusariaqarlunilu, nuannersuullunilu eqiiallannartuusariaqarpoq, sianissutsikkut imminut aqussinnaasariaqaraluarluni eqiasuittariaqaraluarlunilu. Siunertaqartumik atuaqqissaarnissatsinnut sumit piffissarsisinnaavugut? Oqalugiaatini ataqatigiinni oqalugiartoq kingulleq oqarpoq pingaaruteqannginnerusunut ’ullut piginnaaffiusut asiutinnaveersaassagivut’. (Evfisumiut 5:16) Aap, piffissaqarlualernissamut matuersaat tassaavoq piffissatta atorluarnissaa.

Oqalugiaammi „Guutip qasusoq nakussatsittarpaa“-mi oqalugiartup nassuerutigaa amerlasuut ullutsinni qasusut. Kristumiutut kiffartornitsinni ’pissusissaq akimorlugu pissaaneqassagutta’ Jehova ’qasusumik nakussatsitsisartoq’ tunaartarisariaqarparput. (2 Korintumiut 4:7, NV; Jesaja 40:29) Ilaatigut Guutip oqaasiani, qinunikkut, kristumiut ilagiivini, kristumiut nakkutilliisunit, allat uppernikkut maligassiuinerisigut akuttoqatigiissumillu oqaluusseqataasarnitsigut nakussatsinneqarsinnaavugut. Qulequttami „Piffissaq ingerlareersoq eqqarsaatigalugu ajoqersuisunngortariaqarpugut“-mi kristumiut ajoqersuisuusariaqarnerat oqaluussisartuusariaqarnerallu, aammalu ilinniartitsillaqqinnerulerniarlutik ilungersornerat erseqqissarneqarpoq. — 2 Timûtiuse 4:2.

Ullormut oqalugiaammi kingullermi „Guutimut akerartorumasut iluatsissanngillat“-mi eqqaaneqarpoq nunat ilaannit qanittukkut Jehovap Nalunaajaasui paatsuuinikkut immikkut upperusiortutut ulorianartutut naqissuserniarneqaraluarsimasut. Ersissutissaqanngilagulli, Jesaja 54:17-imimi allassimavoq: „’Sakkut ilinnut sakkuaatissatut saffiukkat atorsinnaassuseqassanngillat, oqqat ilinnik unnerluutiginnittut tamaasa eqqartuutitissavatit pisuusutut. Tassa kiffama pissarsiassaat, iluarneq taakkununnga tunniussassara,’ oqarpoq [Jehova].“

ULLUP AAPPAA: Allakkat siulittuutaasut nalunaarutaat

Ullormut allassimaffik oqaloqatigiissutigineqareermat oqalugiaat ataqatigiit aappaat „Qaammaqqutaalluta Jehova naalannarsisipparput“  ataatsimeersuaqataasut nuannaarutigisimavaat. Oqalugiaatip siulliup tikkuarpaa sumi tamaani oqaluussinikkut Jehovap naalannarsisinissaa kristumiutut anguniagaasoq. Tulliata iserfigaa tusarusuttut Guutip peqatigiissortaanut siulersortariaqarivut. Qanoq? Assersuutigalugu atuaqatigiinnerup siorna kingornaluunniit 5-10 minutsinit peqatigiissortat qanoq ingerlanneqaneranik oqaluttuunnerisigut. Oqalugiaatit ataqatigiit immikkoortuisa pingajuani ajunngitsuliornikkut Guuti naalannarsisinneqartariaqarnera erseqqissarneqarpoq.

Oqalugiaammi „Jehovap maleruagassiai nuannaringaartakkit“-mi Tussiaat 119-imi versit qinikkat sammineqarput. Puigoqqajaasaratta soorunami eqqaasinneqartuartariaqarpugut. Taamaattumik Jehovap maleruagassiaanut asanninnitta ineriartortinnissaa immikkut pingaaruteqarpoq, soorlu tussiaasiortoq taamaaliorsimasoq.

Taava immikkut pingaarutilik tulliuppoq — kuisinneq pillugu oqalugiaatip qulequtaraa „Oqaatsip siulittuutaasup maleruarnera kuisinnissamik kinguneqarpoq“. Kuisittussat eqqaasinneqarput Kristus malissagaanni kuisinneq naammanngitsoq, aammattaarli tumai maleqqissaartariaqaraat. (1 Pîtruse 2:21) Nutaat taakkua immikkut pisinnaatitaaffimmut Jesusip ’allanik savaateqarnerarluni’ aamma siulersugassaminik ajoqersukkaminillu tanitanik kiffartoqateqartussanik siulittuutaanut Juánase 10:16-imi allassimasumut eqquutsitseqataasinnaanertik nuannaarutigaat.

Ualikkut sammisassanut aallarniutitut oqalugiaammi „Anersaap oqaaserisai tusartigik“-mi nassuiarneqarpoq Guutip anersaava Biibili, ’kiffaq ilumoorlunilu silartooq’ aamma nalunngeqatiginnissutserput Biibilimit ilinniartitaasoq aqqutigalugit uagutsinnut qanoq ililluni oqalunnersoq. (Matîuse 24:45) Taamaattumik Guuti qanoq nuannaartissanerlugu paasiumallugu kristumiut qilammit nipimik piviusumik tusarnissatik pisariaqartinngilaat. Oqalugiaatip tulliuttup „Guutimut tunniusimanermik ajoqersuinerit ingerlattuaruk“-ip kristumiut kajumissaarpai eqqarsaatit ajortunngornartut silarsuarmi maani siammarsimasut sammisaqqunagit. Nangagassaanngitsumik alapernaanerup tunussisuneersunit Satanillu ikiortaaneersunit allanit paasissutissanik ajoqutaasinnaasunik paasitinneqassaagut. Taamaattumik Napasuliaq Alapernaarsuiffik-ip aamma Iteritsi!-p akuttoqatigiimmik atuarnissaat Biibilillu misissoqqissaartarnissaa pitsaanerungaarpoq.

Oqalugiaatip tullia qulequtarpoq „Oqaatsit peqqissinartut pigiuarniakkit“ tassanilu Guutip oqaasiani sallusuissummi najoqqutassap imaluunniit imminut naapertuunerata ilisimalluarnissaata pingaaruteqarnera erseqqissarneqarpoq. (2 Timûtiuse 1:13) Najoqqutassaq taanna paasilerutsigu Guutimut tunniussimaneq matuersaatissaqartilissavarput sallusuissutsimullu naapertuutinngitsut immikkoortissinnaaliitigalugit.

Eqqarsaatigeriaruk Jehovap erlinnartuutitut isigigaatigut. Ataqqinaat angeq! Oqalugiaammi „’Erlinnartuutinik’ Jehovap illua immerneqarpoq“-mi Haggajip siullittuutaa sammineqarpoq assullu kajumissinarluni tusarnaartut neriorsoqqissaarneqarmata ’amerlangaartunut’ ilaasut tamarmik Jehovap isaani ilumut erlinnartuusut. (sarĸúmersitat 7:9) Taamaattumik ’naalliunnartoqangaarnissami’ Jehovap naggammik inuiaat tamaasa ’aalassatsikkunigit’ asattuukkumaarpai. (Haggaj 2:7, 21, 22; Matîuse 24:21) Utaqqiisaa Jehovap innuttai anersaakkut eqqumasariaqarput, tamannalu sammisami „Allakkat siulittuutaasut eqqumanissatsinnut ikiorpaatigut“-mi nassuiarneqarpoq. Oqalugiartup Jesusip oqaasii issuarpai: ’Taamaattumik eqqumagitsi, naalakkassi tikiuffissaa nalugassiuk.’ (Matîuse 24:42) Anersaakkut qanoq eqqumajuarsinnaavugut? Jehovamut kiffartornitsinni ulapittuarnitsigut, qinujuarnitsigut Jehovallu ullussarsuanut ilimasuttuarnitsigut.

Ullormut oqalugiaatit kingullersaat qulequtaqarpoq „Naggatissap nalaani oqaaseq siulittuutaasoq“. Tamanna ukiorpassuarni tulliuttuni eqqaamaneqassaaq. Sooruna? Pissutigalugu oqalugiartup nalunaarutigamiuk Peqatigiiffik atuakkamik nutaamik saqqummersitsisoq — Giv agt på Daniels profeti! „Atuakkap taassuma kusanartunik assiliartallip 320-nillu quppernillip Danielimik Allakkat tamaasa sammivai,“ oqalugiartoq oqarpoq. Jehovap oqaatsiminik siulittuutaasunik qaammarsaaneranut nalunaajaat uppernikkut nakussatsinnartoq!

ULLUT PINGAJUAT: Guutip oqaasia siulittuutaasoq eqquutinngitsoorneq ajorpoq

Ataatsimeersuarnermi ullormi kingullermi oqalugiaatit ataqatigiit „Piffissamut aalajangersakkamut oqaatsit siulittuutaasut“ aallarniutigineqarput. Oqalugiaatini taakkunani pingasuni Habakkukip eqqartuussutai pingasut Jehova Guutimeersut  sammineqarput. Eqqartuussut siulleq Judakkunnut namminissarsiortunut eqquutsinneqarpoq, aappaalu Babylonimut naqisimannittumut eqquulluni. Kingullerlu suli eqquutinngitsoq ungasinngitsukkut Guutip guutiitsut tamaasa piuneeruppagit eqquukkumaarpoq. Oqalugiaatit ataqatigiit kingullersaanni oqalugiartoq Harmagedon eqqartoramiuk tusarnaartut Guutimut peqqinnartumik mianerinninnissaannut kajumissaarivoq oqarlunilu: „Jehovap pissaanini angingaartoq tamaat nunujunnaaruniuk qularnanngilluinnarpoq mianernarngaassasoq.“

„Kingornussatit anersakkut ittut pingaartikkit“ — ataatsimeersuarnermi isiginnaagassiaq Biibililersaartoq killinnartoq taama qulequtaqarpoq. Isiginnaagassiami imminut misissornartumi Jakobip Esauillu anersakkut eriaginartunut isiginnittaasiat imminnut sanilliunneqarput. Esauip anersaakkut kingornussani suussupagaa Jakobimut pingaartitsisumut tunniunneqartillugu. Ataatsimeersuaqataasut aperineqarput: „Jehovap sumik anersaakkut ittunik kingornusitsikkamisigut?“ Akissutaa imaappoq: „Oqaatsini sallusuissutaasut, Biibili; inuunermik naassaanngitsumik neriuut nutaarsiamillu nuannersumik oqariartortitaatut oqaluussinerup ataqqinaataanerujussuanik.“

Sammisap tulliata qulequtaraa „Kingornussarput naleqangaartoq ilinnut qanoq pingaaruteqartigaa?“ Anersaakkut kingornussatsinnut eqqortumik isiginnittaaseqalersinnaavugut Jehovamut kiffartornerput anersakkullu immikkut pisinnaatitaaffivut inuttut imaluunniit timip piisigut soqutigisatsinnit salliuttarutsigit. Taamaalilluta Adamitut Esauitut Israelikkutullu uppinngitsutut pinnata Jehovamut attaveqarnerput naapertorlugu assigiinngitsunik inooriaaseqassaagut.

Tamanut ammasumik oqalugiaammi „Siulittuutigineqartutut Guutip suut tamaasa nutaanngortissavai“-mi ’qilassat nutaat’ aamma ’nunassaq nutaaq’ pillugit siulittuutit pingaarutillit sisamat ataqatigiissinneqarput. (Jesaja 65:17-25; 66:22-24; 2 Pîtruse 3:13; sarĸúmersitat 21:1, 3-5) Ersarippoq Jehovap innuttami utertitaasut ukiumi 537-mi u.n.s. misigisaanit annerusumik siulittutit taakku eqquutitsinniarai. Aap, naalagaaffini (’qilassat nutaat’) taassumalu innuttai nunamiittut (’nunassaq nutaaq’), nunarsuaq tamakkerlugu paratiisiusumi alianaatsumi inuusussat, eqqarsaatigai.

Ataatsimeersuarneq oqalugiaammik „Guutip oqaasianit siulersorneqarnitsinni ilimagisavut“-mik killinnartumik kajumissinartumillu naggaserneqarpoq. Tamarmillu eqqaasinneqarput Guutip Naalagaaffiata oqaluussissutiginissaata naammassinissaanut ’ullussat sivikittut’. (1 Korintumiut 7:29) Aap, Jehovap Satanimik aaqqissuussaanillu guutiitsunik tamanik eqqartuussinera naammassingajalerpoq. Tussiaasiortutut isumaqartariaqarpugut: „Uagut [Jehova] neriuffigaarput ikiortigalugulu eqqortinnaveeqqutigigatsigu.“ (Tussiaat 33:20) Guutip oqaasianut siulittuutaasumut neriugisaqartunut siunissaq qaamaqaaq! (wE 15/1 2000)

[Qupp. 7-mi assiliartaq]

Isiginnaagassiap killitsinnartup anersaakkut kingornussamik Jehovap kiffaminut tunniussaanik pingaartitsinerulersippaatigut

[Qupp. 7-mi assiliartaq]

Oqaatsinut siulittuutaasunut naalallutik amerlasuut kuisipput