Biibili najoqqutassaqqissuuvoq

TUSARNAARUK

Aalajangiiniarnitsinni qanoq misiginerput allallu misigissusii kisiisa tunngavigisarutsigit aalajangiilluarnissarput qulakkeersinnaanngilarput. Sooq taamaannersoq Biibilimi nassuiarneqarpoq. Aamma Biibilimi pitsaasunik najoqqutassaqarpoq. Taakkulu maleruarutsigit pilluarsinnaavugut.

NAJOQQUTASSAT PISARIAQARTITAGUT

Biibilimi Jehovap a Guutip inuit paasitippai Guutimit ikiorneqartariaqartut. (Matiusi 5:3) Taamaattumik eqqortut eqqunngitsullu pillugit najoqqutassat Biibilimi allatsippai. Inuit asagamigit kissaatiginngilaa ajoqutigilikkatsinnik inuunitsinnilu ajornartorsiutigilikkatsinnik aalajangiisassasugut. (Mosesimik 5. 5:29; Johannesimit 1. 4:8) Aamma pinngortikkamisigut pitsaanerpaamik uagutsinnut najoqqutassiinissamut ilisimassuseqarpoq. (Tussiaat 100:3; 104:24) Inuilli najoqqutassiaminik malinninnissaannut pinngitsaalinngisaannarpai.

Jehovap inuit siulliit, Adami Evalu, pilluarlutik inuuniassammata pisariaqartitaannik tamanik tunivai. (Mosesimik 1. 1:28, 29; 2:8, 15) Aamma paasiuminartunik malittarisassiuuppai, naatsorsuutigaalu taakku naalassagaat. Maleruaassanerlutilli maleruaassannginnerlutilluunniit namminneq aalajangernissaat akueraa. (Mosesimik 1. 2:9, 16, 17) Ajoraluartumik Adami Evalu Guutip najoqqutassiai malinnagit namminneq eqqortuusorisartik malillugu inuuniarlutik aalajangerput. (Mosesimik 1. 3:6) Qanoq kinguneqarpa? Inuit eqqortuusorisamittut iliortaramik pilluarnerulerpat? Naagga. Oqaluttuarisaanermi paasinarsisimavoq Guutip najoqqutassiaanik sumiginnaanikkut eqqissineq pilluarnerlu piviusut anguneqarsinnaanngitsut. – Oqaluussisartup oqaasii 8:9.

Qanorluunniit tunuliaqutaqaraluarutta Biibilimi allassimasut silatusaartumik aalajangiinissamut iluaqutigisinnaavagut. (Timuutiusimut 2. 3:16, 17; ungalusaq “ Inunnut tamanut atuagaq” takuuk). Biibili qanoq iluaqutigisinnaaneripput misissoriartigu.

Sooq Biibilip ‘Guutip oqaasianik’ taaneqarluarsinnaanera pillugu paasisaqarnerugit. – Tessaluunikamiunut 1. 2:13. Isiginnaagassiaq Kina Biibilimik atuakkiortuua? jw.org-imiittoq takuuk.

INUIT ILAANNIT ILUAQUTAASORINEQANNGITSOQ

Inuit ilaasa Biibili najoqqutassatut atorneqarsinnaasorinngilaat.

Oqartoqartarpoq: “Biibilimi allassimasut imminnut naapertuutinngillat.”

Ilumoortoq: Allassimaffiit ikittunnguit imminnut naapertuutinngippasissinnaapput, ataqatigiinnerili oqaluttuarisaanikkullu paasissutissat taamanikkullu ileqquusut allallu eqqarsaatigigaanni imminnut naapertuuttarput.

Tamatumunnga tunngatillugu allaaserisaq “Kainip kina nuliaraa?” jw.org-imiittoq atuarsinnaavat.

Oqartoqartarpoq: “Biibilimik maleruaanerartut ajortumik iliortarmata najoqqutassaqqissuusimanavianngilaq.”

Ilumoortoq: Inuit Biibilimi ilinniartitsissutigineqartunik maleruaanngikkaangata Biibili pisuutinneqarsinnaaneq ajorpoq. Biibilimi siulittuutigineqarpoq uppertuunerartorpassuit – aamma upperisarsiornikkut siuttut – Biibilimi najoqqutassianut akerliusumik iliortassasut. Aamma allassimavoq tamatuma kinguneranik Biibilimi ilinniartitsissutigineqartut asissorneqalissasut. – Petrusimit 2. 2:1, 2.

Upperisarsioqatigiit Biibilimi ilinniartitsissutigineqartunik maleruaasimannginnerat pillugu allaaserisaq “Upperisarsiornerit tamarmik Guutimut qaninnerulersitsippat?” jw.org-imiittoq atuarsinnaavat.

Oqartoqartarpoq: “Biibilimik maleruaasut inunnik imminnit allaanerusunik ataqqinninngillat.”

Ilumoortoq: Inunnik allanik ataqqinninnissaq Biibilimi kaammattuutigineqarpoq. Makkuli akuersaarneqanngillat:

Imminut pingaarnerusutut isigineq. – Filippimiut 2:3.
Allanik pingaartitalinnik upperisalinnillu ataqqinninnginneq. – Petrusimit 1. 2:17.
Allanik immisut isiginnittaaseqalersitsiniaaneq. – Matiusi 10:14.

Biibilimi takutinneqarpoq Guutip inuit inussiarnersumik naapertuilluartumillu piuaannarai uaguttaarlu taamaaliornissarput kissaatigigaa. – Romamiut 9:14.

Tamatumunnga tunngatillugu allaaserisaq “Akaarinninneq – Biibili qanoq iluaqutigineqarsinnaava?” jw.org-imiittoq atuarsinnaavat.

GUUTIP BIIBILI AQQUTIGALUGU SIULERSORUSUPPAATIGUT

Guutip inunnut aallaqqaammulli qanoq attaveqartarsimanera Biibilimi eqqoqqissaartumik allaatigineqarpoq. Allassimasut Guutip eqqortutut eqqunngitsutullu, iluaqutaasutut ajoqutaasutullu isigisaanik paasinninnissamut iluaqutigissavagut. (Tussiaat 19:8, 12) Ilumoortut tunngaviusut taakku inuunitsinni silatusaartumik aalajangiinissamut iluaqutigissavagut.

Assersuutigalugu siunnersuut Ussatit 13:20-miittoq maluginiaruk: “Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.” Allassimasut taakku ullumikkut itsarsuartulli atorsinnaatigipput. Biibili najoqqutassanik atoriaannaasunik naleqangaartunillu ulikkaarpoq. – Ungalusaq “ Biibilimi siunnersuutit iluaqutaajuaannarput” takuuk.

Immaqali eqqarsarputit: ‘Siunnersuutit Biibilimiittut ilumut uannut iluaqutaasinnaappat?’ Allaaserisami tulliuttumi inuit namminneq misigisaminnik oqaluttuaat atuarsinnaavatit.

a Guuti Jehovamik ateqarpoq. – Saqqummersitat 15:4.

BIIBILIMI SIUNNERSUUTIT ILUAQUTAAJUAANNARPUT

Ukiut 2.000-ngajaat matuma siorna Biibilip allanneqarnera naammassineqaraluartoq ullumikkut suli atorluarneqarsinnaavoq. Inuimmi pilluarnissartik ajunngitsumillu inuunissartik anguniartuarsimavaat. (Oqaluussisartup oqaasii 1:9) Tamannalu angujumallugu Biibilimi siunnersuutit iluaqutigiuaannarsinnaavagut.

Unneqqarinneq

‘Sutigut tamatigut unneqqarissoorusuppugut.’ – Hebræerit 13:18.
“Tillittartoq tillissaarluni tamaviaarluni sulissaaq.” – Efesossimiut 4:28.

Allanut attaveqarluarneq

“Tamassi immikkut iluaqutissarsi pinnagu allap iluaqutissaa salliussiuk.” – Korintimiunut 1. 10:24.
“Kamageqatigiittuarlusilu ilumoorlusi isumakkeerfigeqatigiittuaritsi.” – Kolossimiut 3:13.

Aalajangigassat

“Misilittagaqanngitsup tatigisarpai oqaaserineqartut suut tamaasa, silatuup alloriarnini sianigeqqissaartarpai.” – Ussatit 14:15.
“Silatuup perlussaq takusinnaasarpaa qimarnguffissarsiortarlunilu, misilittagakitsorli ingerlaqqittarpoq tamannalu ajunaarutigisarlugu.” – Ussatit 22:3.

NAPASULIAQ ALAPERNAARSUIFFIK