1-2. Qanoq nalunngilarput Jehovap aqqa Jiisusip pingaartikkaa?

 JEHOVAP aqqa sunit tamanit Jiisusip pingaar­nerpaatippaa. Jiisusi kikkunnit allanit tamanit Jehovap aqqa ilisimaneqalersin­niarlugu iliuuseqar­nerpaajuvoq. Soorlu allaaserisap siuliani atuaripput, Jehovap aqqata illernar­tuunera iliuusiisalu tamarmik eqqortuunerat uppernarsar­niarlugit Jiisusi allaat toqujumavoq. (Mak 14:36; Hebr 10:7-9) Ukiunilu tuusintini naalakkersuereeruni Jiisusip oqartus­saassutsini Jehovamut utertissavaa aqqa illernarsisik­kumallugu. (Kor 1. 15:26-28) Jehovap aqqa pillugu iliuuseqangaar­nermigut Jehovamut asanningaarnini takutippaa.

² Jiisusi Ataatami aqqani nunarsuarmukarpoq. (Joh 5:43; 12:13) Ataatami aqqa ilinniar­titaminut ilisimaneqalersippaa. (Joh 17:6, 26) Ilinniar­titsigaangami tupinnar­tulioraangamilu erseqqis­sartuaannarpaa taamaalior­nissaminut Jehovap ilisimas­susermik pissaanermillu tunisaraani. (Joh 10:25) Jiisusip ilinniartitani eqqarsaatigalugit Jehova ima qinnuigaa: “Atit … pillugu sernigikkit.” (Joh 17:11) Jehovap aqqa Jiisusimut taama pingaaruteqar­tigimmat qanoq ililluni Jiisusimut malinnit­tuunerar­toqarsinnaava Ataataata aqqa nalullugulu atunngikkaanni?

3. Allaaserisami matumani suna sammissavarput?

³ Kristumiuugatta Jiisusi ilaarusupparput. Taamaattumik iliuuseqarluta Jehovap aqqa asallugulu ataqqillugu takutit­tarparput. (Pet 1. 2:21) Allaaserisami matumani sammissavarput ‘Kunngeqarfik pillugu nutaarsiassanik nuannersunik’ oqaluus­sisartut sooq Jehovap aterminik ateqaateqartikkai.  (Mat 24:14) Aamma sammissavarput tamatta immikkut Jehovap aqqa pingaar­tillugu qanoq ersersis­sinnaagipput.

‘ATERMINIK ATEQAATEQARTUSSAT INNUTTARILERUMAARPAI’

4. (a) Jiisusip ilinniartitani sumik suliassippai? (b) Jiisusip oqaasii pissutigalugit suna apeqqutaalerpa?

⁴ Qilalian­ngitsiarluni Jiisusip ilinniartitani oqarfigai: “[Anersaap] illernartup qulangerpasi nukimmik pissaasi, aamma Jerusalemmimi, Judiiami tamarmi, Samaariami nunarsuullu isorpiaa tikillugu uanga pillunga ilisiman­nittutut nassuiaassaasi.” (ApS 1:8) Israalimiinnaq tusagassaq nuannersoq oqaluus­sissutigineqas­sanngilaq. Piffissap ingerlanerani nunarsuarmiut tamarmik periarfis­sinneqassapput Jiisusimut malinnit­tunngorsin­naallutik. (Mat 28:19, 20) Kisianni Jiisusi oqarami “uanga pillunga ilisiman­nittutut nassuiaassaasi” qanoq isumaqarpa? Kristumiun­ngorlaat Jehovap aqqa ilinniar­tariaqarpaat, imaluunniit Jiisusi kisiat oqaluus­sissutigissavaat? Tamanna paasineqarsinnaavoq Apustilit Suliaat kapitali 15-p misissor­neratigut.

5. Apustilit utoqqaanertallu Jerusalem­mimiittut qanoq takutippaat kristumiun­ngortut tamarmik Jehovap aqqa ilinniar­tariaqaraat? (Aamma asseq takuuk).

⁵ Ukiumi 49-mi apustilit utoqqaanertallu Jerusalem­mimiittut ataatsimiipput aalajangiun­niarlugu juutiun­ngitsut kipineqan­ngitsut kristumiun­ngorumallutik sussanersut. Jiisusip affarmik qatanngutaa Jaaku ima oqarpoq: “[Petrusip] sukumiisumik oqaluttuuteq­qammerpaatigut Guutip allamiut ilaat aterminik ateqaateqartussat innuttarilerumallugit qanoq aatsaavissuaq akuerigai.” Pruffiiti Aamosi issuarlugu ima nangippoq: “Inuit kingulerus­simasut inuiaqatigiinnit tamaneersut atinnik ateqaateqartut ilagalugit pimoorus­sillutik uanga Jehova ujarnias­sammannga. Uanga Jehova taama oqarpunga.” (ApS 15:14-18) Kristumiun­ngorlaat Jehova pillugu ilinniarlutillu aqqa ateqaatigissavaat. Tassa imaappoq Jehovap aqqa kikkunnut tamanut ilisimaneqalersissagaat ilisarnaatigis­sallugulu.

6-7. (a) Jiisusip nunarsuarmukar­neranut peqqutaasut suna ilagaat? (b) Jiisusip nunarsuarmukar­neranut suna pissutaanerpaava?

⁶ Jiisusip atia “Jehova Annassutaavoq”-mik isumaqarpoq. Jehovallu taanna atorpaa  annaassisussatut upperluartunut tamanut. Inuit pillugit imminut pilliutiginiarluni Jiisusi nunarsuarmukarpoq. (Mat 20:28) Inuit ajortimit toqumillu aniguisin­neqarnis­saannik naassaan­ngitsumillu inuuneqaler­nissaannik periarfissiivoq utertitsis­sutitut imminut akiliutiginermigut. – Joh 3:16.

⁷ Kisianni soormiuna inuit annaanneqar­tariaqartut? Naatsiivimmi Edenimi pisimasoq pissutigalugu. Allaaserisap siuliani sammineqartutut Adami Evalu Jehovamut pikitsitsipput, taamaat­tumillu kinguaas­satillu naassaan­ngitsumik inuunissaq annaavaat. (Mos 1. 3:6, 24) Tamanna aaqqinniarlugu Jiisusi nunarsuarmut pivoq. Inuilli aniguisin­neqarnissaat pineqaan­nanngilaq, Jehovammi aqqa salluliuutigineqarsimavoq. (Mos 1. 3:4, 5) Jiisusip nunarsuarmukar­nerminut pissutaa pingaar­nerpaaq tassaavoq Jehovap aqqanik illernarsisitsinissani. Jiisusi taamaalior­nissaminut piukkun­narnerpaajuvoq sutigut tamatigut Jehovap qanoq ittuuneranik ersersitsisarami.

8. Jiisusip ilinniar­titaasa tamarmik suna paasisariaqarpaat?

⁸ Juutit juutiun­ngitsullu Jiisusimut uppertun­ngortut tamarmik kia – tassa Jiisusip Ataataata, Jehovap – aniguisikkaatik paasisariaqarpaat. (Joh 17:3) Jiisusitulli Guutip aqqa ilisarnaatigissavaat. Taamaattumik aqqanik illernarsisitseqataanissartik qanoq pingaaruteqar­tigisoq paasisariaqarpaat. Taamaaliorunimmi annaanneqarsin­naanngussapput. (ApS 2:21, 22) Ersarippoq Jiisusip malinnittaasa tamarmik Jiisusi aamma Jehova pillugit ilisimasaqassasut. Paasinarpoq Jiisusi qinunermi naggataatungaani, Johannesi kapitali 17-imi allassimasumi, ima oqarmat: “Uannut asannit­tuliornittut asannit­tuliornias­sammata uangalu taakkununnga ataniassagama atit taakkununnga ilisimaneqalersippara ilisimaneqalersis­sallugulu.” – Joh 17:26.

“ILISSI UANGA ILISIMAN­NITSIGAASSI”

9. Jiisusimik malinnik­kusukkutta suna pingaar­tissavarput?

⁹ Jiisusimik malinnik­kusukkaanni Jehovap aqqanik illernarsisitseqataanissaq pisariaqarpoq. (Mat 6:9, 10) Jehovap aqqa sunit tamanit pingaar­nerpaatit­tariaqarparput, tamannalu inooriaatsitsigut takutillugu. Qanorli Jehovap aqqanik illernarsisitseqataasin­naagatta Saatanillu salluliuuterpassuisa eqqunngitsuunerat uppernarsarlugu?

10. Esajap allagaani kapitali 42-mit 44-mut suna allaatigineqarpa? (Esaja 43:9; 44:7-9) (Aamma asseq takuuk).

¹⁰ Esajap allagaani Jehovap aqqanik illernarsisitseqataanissatta qanoq pingaaruteqar­tigineranik paasitin­neqarpugut. Kapitali 42-mit 44-mut Jehovap illuatungeriit eqqartuus­sivimmullusooq sassaqquai kina Guutiunersoq ilumoortoq paasineqar­niassammat. Guutiunerartut imminut illersoqquai, aamma ilisimannittut sassaqquai taakkua guutiliamik ilumoor­tuunerat uppernarsaq­qullugu. Kinaluunniilli taamaaliorsin­naanngilaq! – Esaja 43:9; 44:7-9 atuakkit.

11. Jehova innuttaminut qanoq oqarpa? (Esaja 43:10-12)

¹¹ Esaja 43:10-12 atuakkit. Jehovap innuttani ima oqarfigai: “Ilissi ilisiman­nitsigaassi, … uanga tassa Guuti.” Apeqqummut uunga akeqquai: “Uangaan­ngitsumik Guuteqarpa?” (Es 44:8) Qujamasunnaqaaq apeqqummut tamatumunnga akisinnaatitaagatta.  Oqaatsitsigut iliuutsitsigullu Jehova illersorlugulu uppernarsarparput Guutiusoq ilumoortutuaq aamma aqqa atinit allanit tamanit pingaar­nerpaajusoq. Inooriaatsitsigut takutipparput Jehova asallugu ilumoorfigerusullugulu – Saatanimit qanoq pineqaraluarut­taluunniit. Tassa taamatorluinnaq Jehovap aqqanik illernarsisitseqataasin­naavugut.

12. Esaja 40:3, 5-imilu siulittuut qanoq eqquuppa?

¹² Jiisusip Jehovamut qanoq ilisiman­nittuunera Ataatamilu aqqanik qanoq illernarsisitsinera pillugit siulittuut sammilaariartigu. Kapitali 40-mi Esajap siulittuutigaa Jehovap aqqutissaanik piareersaasoqassasoq. (Es 40:3) Tamanna qanoq eqquuppa? Johannesip imermut morsutsitsisartup Jiisusip aqqutissaa piareersarpaa. Jiisusili Jehovap aqqani tikiullunilu oqaluttarmat oqarsin­naavugut Jehovap aqqutissaa Johannesip piareersaraa. (Mat 3:3; Mak 1:2-4; Luk 3:3-6) Esajap aamma siulittuutigaa Jehovap  ‘naalannassusia saqqummersin­neqassasoq’. (Es 40:5) Tamanna qanoq eqquuppa? Jiisusi angusisarluinnarami taanna nunarsuarmukarmat soorlulusooq Jehova nunarsuarmut tikiussimasoq. – Joh 12:45.

13. Jiisusi qanoq ilaarsin­naavarput?

¹³ Jehova illersoraangatsigu taannalu pillugu ilisiman­nittutut nassuiaagaangatta Jiisusip tumai atuaqqis­saartarpagut. Jehovap aqqa taaguutigaarput naapitatsinnullu tamanut Jehovap qanoq asannitsiginera inunnullu qanoq iliorsimaneri oqaluttuarisarlutigit. Tamatumunngalu ilaavoq Jehovap aqqanik Jiisusip illernarsisitsisarnera oqaluttuaris­sallugu. (ApS 1:8) Jiisusi Jehovamut ilisiman­nittuuvoq pingaar­nerpaaq, ilinniarfigingaarsin­naavarpullu. (Saqq 1:5) Jehovap aqqanik pingaar­nerpaatitsinerput inuunitsinnut qanoq sunniuteqartarpa?

QANOQ ERSERSIT­TARIPPUT JEHOVAP AQQA PINGAAR­TILLUGU

14. Jehovap aqqa qanoq misigis­suseqarfigaarput? (Tussiaat 105:3)

¹⁴ Jehovap aqqa tulluusimaarutigaarput. (Tussiaat 105:3 atuaruk). Jehovap nuannaarutigisarpaa tulluusimaarluta aqqa eqqartoraangatsigu. (Jer 9:22, 23; Kor 1. 1:31; Kor 2. 10:17) Jehovap aqqa ataqqinarsisis­sinnaagatsigu ajunngitsuliarpassuilu allanut oqaluttuarisin­naagatsigit qujamasuutigaarput. Suleqatitsinnut, atuaqatitsinnut, eqqaamiutsinnut allanullu Jehovamik Nalunaajaasuunerput oqaluttuaris­sallugu kanngusuutiginavian­ngilarput. Jehovap aqqa pillugu oqaluttarnerput Saatanip unitsik­kusuppaa. (Jer 11:21; Saqq 12:17) Sallulioqataasalu kissaatigigaluarpaat Jehovap aqqa puiorluin­narneqassasoq. (Jer 23:26, 27) Jehovali asagatsigu aqqa ‘qiimmat­taatigit­tuinnarparput’. – Tuss 5:12; 89:17.

15. Jehovap aqqanik torlorfiginninneq qanoq isumaqarpa?

¹⁵ Jehovap aqqanik torlorfigin­nittuarpugut. (Joel 3:5; Rom 10:13, 14) Taamaaliornermi Guuti qanoq ateqarnersoq atiatalu atornissaa pineqaan­nanngilaq. Isumaqarpoq Jehovap pissusii nuannersut pillugit ilinniar­tuartugut Jehovalu tatigalugu ikiortis­sarsiorfigalugulu siunnersor­tissarsiorfigisaripput. (Tuss 20:8; 99:6; 116:4; 145:18) Aamma Jehovap aqqa pissusiilu pillugit inoqatigut oqaluttuut­tarpagut kajumis­saarlugillu Jehovamut saaqqullugit taassumannga akuerisaasin­naanias­sammata iliuuseqaq­qullugit. – Es 12:4; ApS 2:21, 38.

16. Qanoq uppernarsarsin­naavarput Saatani sallutuujusoq?

¹⁶ Jehova ataqqinarsisin­niarlugu misilin­neqarnermi pinertusaarusuppugut. (Jaak 5:10, 11) Artornartunik misigisaqaraluaraangatta Jehovamut aalajaan­nitsigut uppernarsar­tarparput Saatani sallutuujusoq. Jehovap kiffai tamarmik Juubip nalaani Saatanimit unnerluun­neqarput. Saatanimi ima oqarpoq: “[Inuup] pigisani tamaasa akigeriaan­naasarpai inuunini annaajumanagu.” (Job 2:4) Tassa oqarpoq inuit taamaallaat ingerlal­luartillutik Jehovamut kiffartorusuttartut ajornar­torsiulerunilli Jehova ikinngutigiun­naassagaat. Juubilli aalajaan­nermigut uppernarsarpaa Saatani sallutuujusoq. Uagullu uppernarsaaqataanis­satsinnut periarfis­sinneqarpugut. Qanorluunniit Saatanip pigaluarpatigut Jehova tununnavian­ngilarput. Jehovap atini pillugu ikiorlutalu tapersersor­tuassagaatigut qularin­ngilarput. – Joh 17:11.

17. Petrusimit allakkat siulliit 2:12 naapertorlugu qanoq ililluta Jehovap aqqa ataqqinarsisis­sinnaavarput?

¹⁷ Jehovap aqqanik ataqqin­nippugut. (Uss 30:9; Jer 7:8-11) Inuit nalunngimmassuk Jehovamik Nalunaajaasuusugut pissusilersor­nitsigut  aqqa ataqqinarsisis­sinnaal­luguluunniit kanngunarsarsin­naavarput. (Petrusimit 1. 2:12 atuaruk). Soorunami Jehovap aqqa ataqqinarsisik­kusupparput, taamaat­tumillu oqaatsitsigut iliuutsitsigullu sapinngisatsinnik Jehova unnersiutiginiar­tarparput. Kukkusaraluarlutalu suna tamaat kusanaq­qissaartumik iliuuserisin­naanngik­kaluarlugu Jehovap aqqa ataqqinarsisis­sinnaavarput.

18. Qanoq allatigut uppernarsarsin­naavarput Jehovap aqqa pingaar­tikkipput? (Aamma quppernerup ataani ilanngussaq takuuk).

¹⁸ Inuit qanoq isumaqarfigineraatigut apeqqutaatinnagu Jehovap aqqa pingaar­tinneruarput. (Tuss 138:2) Taamatut isiginnit­taaseqar­nissarput pingaaruteqarpoq. Jehovammi iluarisaanik iliorusun­nitsinni allanit nikagineqalersin­naagatta. a Jiisusip pinerluttutut eqqartuun­neqarluni nikanarsagaasutut toqunissani akueraa Jehovap aqqa unnersiutigineqaq­qullugu. ‘Kanngunarsagaanini suutinngilaa,’ tassa allanit qanoq isumaqarfigineqarnini isumakuluutigin­ngilluinnarpaa. (Hebr 12:2-4) Jehovap piumasaanik iliornini pingaar­nerpaatippaa. – Mat 26:39.

19. Jehovap aqqa qanoq misigis­suseqarfigaajuk, aamma sooq?

¹⁹ Jehova Guutigigatsigu tulluusimaarutigaarput Jehovallu Nalunaajaasuisut ilisimaneqarnerput ataqqinaatitut isigalugu. Inuit allat qanorluunniit isumaqarfigigaluarpatigut Jehovap aqqa pingaar­nerpaatipparput. Taamaattumik Saatanimit qanorluunniit pineqaraluarutta Jehovap unnersiutiginissaa aalajangiusimajuartigu! Taamaalilluta uppernarsas­savarput Jehovap aqqa sunit tamanit pingaar­nerpaatillugu, soorlu Jiisusi taamaaliortoq.