1, 2. Inup­pas­suit suliar­tik pil­lugu qanoq isumaqar­tar­pat?

 INUP­PAS­SUIT suliar­tik suunersoq apeq­qutaatil­lugu pingaaruteqar­tutut pingaaruteqan­ngitsutul­luun­niit misigisar­put. Kulturit ilaan­ni inum­mik al­lamik ilisarisiman­niler­niar­nermi nalingin­naavoq ima aperis­sal­luni: “Sulerisuuit?”

² Ilaan­nik­kut inuit Biibilimi eq­qaaneqar­tut sulerisuunersut eq­qaaneqar­tar­poq. As­sersuutigalugu ‘ilan­ngaaserisoq Mat­thæusi,’ ‘Siimuut am­mior­toq’ aam­ma “Lukasi, nakorsaq asanar­toq,” eq­qaaneqar­put. (Matt 10:3; ApS 10:6; Kol 4:14) Ilaan­nik­kut inuit Jehovamut kif­far­tor­nermi sunik suliaqar­tar­nersut eq­qaaneqar­tar­poq. As­sersuutigalugu kunngi Daavi, pruffiiti Elia aam­ma apustili Paulusi eq­qarsaatigik­kit. Angutit taak­kua Jehovamit sulias­sin­neqarsimaner­tik pingaar­tip­paat. Uagut­taaq Jehovamut kif­far­tor­nermi suliar­put sunaluun­niit pingaar­tit­tariaqar­par­put.

3. Sooq utoq­qaanerusut inuusun­nerusunik ilin­niar­titsisariaqar­pat? (Al­laaserisap aal­laq­qaataani as­sit takuk­kit).

 ³ Jehovamut kif­far­tor­ner­put nuan­naralugulu sulias­siis­sutigineqar­tut pingaar­tip­pavut. Suliavut nuan­narisangaaratsigit sapin­ngisamik sivisuner­paamik isumagerusut­tar­pavut. Ajoraluar­tumil­li inuit utoq­qaligaangamik inuusuk­kal­lar­nermis­sut suliaqar­tigisin­naajun­naar­tar­put. (Oqal 1:4) Taman­na ingam­mik Jehovap in­nut­taanut unam­miniar­narsin­naavoq. Nalitsin­ni oqaluus­sineq an­ner­tusiar­tuin­narmat sapin­ngisamik amerlaner­paat nutaarsias­samik nuan­nersumik tusarler­niarlugit ator­toris­saarutit nutaaliat Jehovap peqatigiis­sor­taani ator­neqar­tar­put. Ilaan­nik­kul­li periutsit nutaat ilin­niar­nis­saat utoq­qaanerusut saper­nar­tis­sin­naasar­paat. (Luk 5:39) Aam­ma inuit utoq­qaliar­tor­nermin­ni pisin­naasaat an­nikil­liar­tor­tar­put. (Uss 20:29) Taamaat­tumik Jehovap peqatigiis­sor­taani akisus­saaf­feqar­neruler­nis­samut tun­ngatil­lugu utoq­qaanerusut inuusun­nerusunik ilin­niar­titsisar­nerat asan­nit­tulior­nerul­lunilu pis­susis­samisoor­poq. – Tussiaat 71:18 atuaruk.

4. Sooq ilaasa akisus­saaf­fim­mik ingerlatitseq­qiinis­sar­tik saper­nar­tis­sin­naasar­paat? (Takuuk ungalusaq “ Sooq akisus­saaf­fim­mik ingerlatitseq­qiineq saper­nar­tis­sin­naagip­put”).

⁴ Oqar­tus­saas­susil­lit inuusun­nerusunut akisus­saaf­fim­mik ingerlatitseq­qiinis­sar­tik saper­nar­tis­sin­naasar­paat. Qatan­ngutit angutit suliap nuan­naril­luin­nak­kamik isumagiun­naar­nis­saa aliasuutigisarsin­naavaat. Imaluun­niit suliaq nak­kutigiun­naarunik­ku eq­qor­tumik isumagineqarun­naar­nis­saa isumakuluutigisin­naavaat. Im­maqa al­lanik ilin­niar­titsinis­samut pif­fis­saqan­ngitsutut misigip­put. Tamatumalu saniatigut angutit inuusun­nerusut an­nerusumik akisus­saaf­filer­neqan­ngik­kunik erinitsajuit­tariaqar­put.

5. Al­laaserisami matumani apeq­qutit suut sam­mis­savavut?

⁵ Taamaat­tumik sooq akisus­saaf­feqar­neruler­nis­samut tun­ngatil­lugu utoq­qaanerusut inuusun­nerusunik ikiuinis­saat pingaaruteqar­pa? Qanoq taamaaliorsin­naap­pat? (2 Tim 2:2) Aam­ma sooq inuusun­nerusut utoq­qar­nik misigilit­tagaqar­nerusunik suleqateqar­nermin­ni eq­qor­tumik isigin­nit­taaseqar­tariaqarlutil­lu ilin­niarusus­suseqar­tariaqar­pat? Siul­ler­tul­li kun­ngip Daavip er­nini sulias­samut pingaarutilerujus­suarmut qanoq piareersaraa sam­meriar­tigu.

6. Kun­ngi Daavi sorusup­pa, Jehoval­lu qanoq oqarfigaa?

⁶ Daavi ukior­paalun­ni malersor­neqar­nermini sumiif­fin­nut as­sigiin­ngitsunut nooqat­taar­tar­poq. Kun­ngin­ngoramili il­lumi ilorrisimaar­nar­tumi najugaqaler­poq. Taamaat­tumik pruf­fiitimut Natanimut ima oqar­poq: “Uanga il­lumi cederinit sanaasumi najugaqar­punga, Naalak­kal­li angerusiata il­lerfia tupiin­narmi inis­sisimavoq.” Daavip Jehova kusanar­tumik naalaf­filiuuk­kusup­paa. Natanip ima akivaa: “Qaa, pilersaarutitit tamaasa naam­mas­siniar­niak­kit Guutip najormatit.” Jehoval­li taman­na piumasarin­ngin­namiuk Natani Daavimut ima oqaq­quaa: “Il­lit il­luliuutis­san­ngilarma.” Jehovamit najor­neqar­tuar­nis­samik neriorsor­neqaraluarluni Daavip paasivaa er­nermi ilaata naalaf­fik sanas­sagaa. Daavi sua? – 1 Nal 17:1-4, 8, 11, 12; 29:1.

7. Daavi Jehovamit ilitsersor­neqarami sua?

⁷ Jehovap naalaf­fia sanarusut­torujus­suugamiuk  Daavi im­maqa pakatsingaar­poq. Sulias­sarli er­nermi Salomop nak­kutigisas­saa tapersersor­tuar­paa. Daavi sulisunik aaq­qis­suus­sinermik aam­ma saviminermik, kan­ngus­sam­mik, sølvimik, kuultimik qisun­nil­lu katersuinermi ikiuivoq. Naalaf­filior­nermut tun­ngatil­lugu kina nersor­neqas­sasoq er­numas­sutigin­ngilaa. Naalaf­fil­lu taan­na kingusin­nerusuk­kut Salomop naalaf­fiatut ilisimaneqaler­poq. Daavip Salomo ima qiim­mas­sar­paa: “Qanor­tormi Naalak­kap najorilisit pil­luar­til­lutit, er­nera. Qanor­toq Naalak­kap Guutivit il­lus­saa sanasin­naagiuk soorlu oqar­toq il­lit taamaaliorumaar­tutit.” – 1 Nal 22:11, 14-16.

8. Sooq Daavi eq­qarsarsimasin­naava Salomo naalaf­filior­nis­samut piuk­kun­nan­ngitsoq, qanorli ilior­pa?

⁸ 1 Nalunaarsuutit 22:5 atuaruk. Daavi im­maqa misigivoq Salomo sulias­samut taama pingaaruteqar­tigisumut piareersiman­ngitsoq. Naalaf­fik ‘angisoorujus­suusus­saavoq’, Salomolu “inuusut­tun­nguuvoq misilit­tagakitsuul­lunilu”. Daavil­li nalun­ngilaa sulias­samut im­mik­kut it­tumut tun­ngatil­lugu Jehovap Salomo ikiorumaaraa. Taamaat­tumik Daavip er­nini sulias­samut an­ner­toqisumut piareersaan­niarlugu sapin­ngisaminik ikior­paa.

9. Utoq­qaanerusut akisus­saaf­fim­mik al­lamut ingerlatitseq­qiineq ajun­ngitsutut qanoq isigilersin­naavaat? As­sersuuteqarit.

⁹ Qatan­ngutit angutit utoq­qaanerusut akisus­saaf­fim­mik ilaan­nik angutinut inuusun­nerusunut ingerlatitseq­qiiner­tik nikal­lus­sutigisus­saan­ngilaat. Tamat­ta nalun­ngilar­put Jehovap uagutsin­nut sulias­siis­sutaata naam­mas­sinis­saa pingaar­ner­paasoq. Akisus­saaf­feqaler­nis­samut tun­ngatil­lugu inuusun­nerusunik ilin­niar­titsineq suliamut tamatumun­nga iluaqutaavoq. Una eq­qarsaatigiuk: Meeraal­lutit  im­maqa ataatat biiler­toq isigin­naar­tar­pat. Peroriar­tor­nin­ni biiler­neq pil­lugu nas­suiaat­tar­paatit. Pif­fis­sap ingerlanerani biilersin­naanermut al­lagar­tar­taaravit nam­mineq biiler­taler­putit. Taamaak­kaluar­torli ataatavit siun­nersor­tar­paatit. Ilaan­nik­kut paarlakaajaal­lusi biiler­tar­pusi. Ataatal­li utoq­qaliar­tor­til­lugu il­lit biiler­nerusaler­putit. Ataatat nikal­lor­pa? Naamik, ilin­nit biiliun­neqarsin­naanini nuan­naarutigisimas­savaa. Taamatut­taaq qatan­ngutit angutit utoq­qaanerusut angutit inuusun­nerusut ilin­niar­tis­simasatik Jehovap peqatigiis­sor­taani akisus­saaf­feqaler­nis­samut piareer­tut takul­lugit nuan­naarutigisar­paat.

10. Mosesip ataq­qineqar­neq oqar­tus­saas­suseqar­nerlu qanoq isigin­nit­taaseqarfigai?

¹⁰ Al­lat sulias­sin­neqar­nerat pil­lugu sin­ngalin­ngin­nis­sar­put mianersuutigisariaqar­par­put. Israelik­kut ilaat pruf­fiititut pis­susilersulermata Mosesip oqaasii ilin­niarfigisin­naavavut. (4 Mosesi 11:24-29 atuakkit). Josvap unitsin­niaraluarmagit Mosesi ima oqar­poq: “Uangaana sin­nerlunga taama ilungersor­tigisutit? Pitsaaq­qajaraluaqaaq Naalak­kap in­nut­tai tamarmik pruf­fiitiusin­naagaluar­pata, Naalak­kal­lu anersaaminik tunisin­naagaluar­pagit!” Mosesip nalun­ngilaa suliaq Jehovamit siulersor­neqar­toq. Mosesip ataq­qinarsisin­neqar­nis­sani kis­saatiginagu Jehovap kif­faasa tamarmik suliaqar­nis­saat kis­saatigaa. Uagum­mi? Al­lat Jehovamut kif­far­tor­nermi sulias­sin­neqaraangata nuan­naar­tar­pugut?

11. Qatan­ngut angut akisus­saaf­fim­mik al­lamut ingerlatitseq­qiineq pil­lugu qanoq oqar­pa?

¹¹ Qatan­ngutit angutit amerlasuut Jehovamut kif­far­tor­nermi ukiuni qulik­kuutaani tamaviaarlutik sulisarlutil­lu akisus­saaf­feqar­neruler­nis­samut tun­ngatil­lugu angutinik inuusun­nerusunik ilin­niar­titsisimap­put. As­sersuutigalugu qatan­ngut Peter eq­qarsaatigiuk. Ukiuni 74-ini pif­fis­saq tamaat kif­far­tor­nermini ukiuni 35-ni Europami im­mik­koor­tor­taqarfim­mi kif­far­tor­poq. Ukior­pas­suar­ni Kif­far­tor­nermik Nak­kutil­liisoqarfim­mi nak­kutil­liisuuvoq. Taava Paul, angut inuusun­nerusoq Peterip ilin­niar­tis­simasaa, nak­kutil­liisun­ngor­tin­neqar­poq. Peterip taman­na nikal­lus­sutigaa? Naamik, ima oqar­poq: “Akisus­saaf­feqar­neruler­nis­samik ilin­niar­tin­neqarsimasunik sulias­sanil­lu isumagin­nil­luar­tunik angutinik qatan­nguteqar­nera nuan­naarutigeqaara.”

12. Rehabeami pil­lugu oqalut­tuaq qanoq ilin­niarfigisin­naavar­put?

¹² Salomop er­nera Rehabeami kun­ngin­ngorami  sulias­saminut tun­ngatil­lugu angutit utoq­qaanerusut siunersior­pai. Siun­nersuutaal­li malin­ngilai! Paarlat­tuanik angutit inuusun­nerusut peroriar­toqatigisami siun­nersuutaat malip­pai. Taman­na ajorluin­nar­tumik kinguneqar­poq. (2 Nal 10:6-11, 19) Taman­na qanoq ilin­niarfigisin­naavar­put? Uagutsin­nit utoq­qaanerusunut misilit­tagaqar­nerusunul­lu siun­nersoq­qusar­ner­put pitsaasuuvoq. Inuusun­nerusut periutsit siusin­nerusuk­kut ator­neqar­tarsimasut maleq­qis­saar­tariaqan­ngik­kaluarlugit utoq­qaanerusut siun­nersuutaat ingerlaan­naq itigar­tit­tas­san­ngilaat.

13. Inuusun­nerusut utoq­qar­nik qanoq suleqateqar­tariaqar­pat?

¹³ Ilaan­nik­kut qatan­ngutit angutit utoq­qaanerusut misilit­tagaqar­nerusut suliaan­nik nak­kutigin­nit­tus­satut angutit inuusun­nerusut sulias­sin­neqar­tar­put. Taak­ku utoq­qaanerusut ilin­niarfigigunik­kit silatusaas­sap­put. As­sersuutitut eq­qar­toriik­katsitut Paul Betelimi im­mik­koor­tor­taqarfim­mi nak­kutil­liisutut Peter paarlareerlugu ima oqar­poq: “Peterip isumasior­tar­nis­saanut pif­fis­saqar­tar­punga, im­mik­koor­tor­taqarfim­miit­tul­lu al­lat aam­ma taamaalioq­qul­lugit kajumis­saar­pak­ka.”

14. Timotheusip apustilil­lu Paulusip suleqatigiin­nerat qanoq ilin­niarfigisin­naavar­put?

¹⁴ Timotheusi apustilimit Paulusimit inuusun­nerujus­suugaluar­toq ukior­pas­suar­ni suleqatigiip­put. (Filippimiut 2:20-22 atuakkit). Paulusip Korinthimiut ima al­laf­figai: “Timotheusi ilis­sin­nut aal­lar­tip­para – Naalak­kami qitor­narisara asanar­toq ilumoor­torlu. Taas­suma Kristusi-Jiisusimi ingerlavigisan­nik eq­qaasis­savaasi, soorlu ilagiin­ni tamani ajoqersuisar­tunga.” (1 Kor 4:17) Paulusi Timotheusilu suleqatigiil­luar­tarlutil­lu ikorfar­toqatigiil­luar­tar­tut tamatuman­nga erser­poq. Paulusi ‘Jiisusimi ingerlavigisaminik’, tas­sa periutsiminik, Timotheusimik ilin­niar­titsinis­saminut pif­fis­saqar­tar­poq, Timotheusil­lu ilik­kak­kani iluaqutigil­luar­pai. Paulusip Timotheusi nuan­naralugulu qatan­ngutit Korinthimi isumas­sorluas­sagai qularin­ngilaa. Utoq­qaaner­tat angutit al­lat ilagiin­nik siulersuinermik ilin­niar­tik­kaangamik­kit apustili Paulusi ilaarsin­naavaat.

15. Romamiut 12:3-5 al­lan­nguutinut tun­ngatil­lugu qanoq iluaqutigisin­naavar­put?

¹⁵ Pif­fis­sami pis­sanganar­tumi inuuvugut. Jehovap peqatigiis­sor­taasa ilaat nunarsuarmiit­tut as­sigiin­ngitsor­pas­suar­tigut ineriar­toramik al­lan­nguuteqar­toqar­tar­poq. Taak­kua ilaat uagutsin­nut inut­tut ataasiak­kaatut sun­niuteqar­tarmata sungiuk­kuminaas­sin­naasar­put. Nam­mineq iluarinerusavut sal­liun­nagit maniguul­luta Naalagaaf­fiup suliaanut iluaqutaasunik sal­liutitsiner­put iluaqutigis­savar­put. Taamaaliorut­ta ataasioqatigiis­saagut. Paulusi Romami kristumiunut ima al­lap­poq: “Im­mis­sin­nik pingaar­teqinasi pisariaqar­tumit  an­nerusumik.” Taama al­lareerluni nas­suiar­paa timip avatai tamarmik im­mik­kut iluaqutaasar­nerat­tut ilagiin­niit­tut as­sigiin­ngitsunik inis­sisimaf­feqar­tut. – Rom 12:3-5.

16. Jehovap peqatigiis­sor­taani eq­qis­seqatigiit­tuarumal­lutik ataasioqatigiit­tuarumal­lutil­lu kristumiut tamarmik susin­naap­pat?

¹⁶ Jehovap in­nut­taasa tamarmik Naalagaaf­fik tapersersorusul­lugulu sulias­siis­sutigineqar­tut suul­luun­niit isumagerusup­paat. Qatan­ngutit angutit utoq­qaanerusut inuusun­nerusunik ilin­niar­titsisin­naap­put. Angutit inuusun­nerusut an­neruniajuil­lutik al­lanil­lu ataq­qin­nil­lutik akisus­saaf­feqar­nerulersin­naap­put. Aam­ma qatan­ngutit angutit aap­pal­lit pis­sutsit al­lan­ngoraluaraangata nuliaasut tapersersuisar­nerat qujamasuutigisar­paat. Ar­nat taak­kua Priskil­la, uiminik Akvilamik aalajaal­luni suleqateqar­toq, ilaarsin­naavaat. – ApS 18:2.

17. Jiisusip ajoqersuk­kani sunis­samut ilin­niar­tip­pai?

¹⁷ Al­lanik ilin­niar­titserusus­suseqar­nermut tun­ngatil­lugu Jiisusi maligas­saal­luar­ner­paavoq. Nalun­ngilaa suliani al­lanit nangin­neqar­tariaqar­toq. Soorunami ajoqersuk­kani naam­mal­luin­nan­ngitsuusut nalun­ngilaa. Qularin­ngilaali nutaarsias­saq nuan­nersoq al­laat inun­nut amerlanerusunut tusarlius­sin­naagaat. (Joh 14:12) Ajoqersuk­kat Jiisusimit ilin­niar­tin­neqarluaramik nunami sumiik­kaluaraangamil­luun­niit oqaluus­sisin­naan­ngor­put. – Kol 1:23.

18. Siunis­sami sumik sulias­saqas­saagut, maan­nalu sumik sulias­saqar­pugut?

¹⁸ Jiisusi pil­liutitut toqoreerluni qilam­mut makititaagami suli amerlanerusunik sulias­sin­neqarlunilu ‘pigin­naanilin­nit, pis­saanermit, nakuus­susermit naalagaas­sutsimil­lu tamanit an­nerusumik’ oqar­tus­saas­susermik tunineqar­poq. (Ef 1:19-21) Harmagedonip nal­liutin­ngin­nerani Jehovamut kif­fatut aalajaatsutut toqugaluarut­ta silarsuas­sami nutaami makititaas­saagut sin­nilis­suar­nil­lu siuner­taqarluar­tunik sulias­saqas­sal­luta. Aam­ma maan­nangaaq nutaarsias­samik nuan­nersumik oqaluus­sis­sutigin­nin­nis­samik ajoqersugan­ngor­tor­titsior­tor­nis­samil­lu pis­sanganar­tumik sulias­saqar­pugut. Taamaat­tumik inuusut­tuugut­ta utoq­qaagut­taluun­niit tamat­ta ‘tamaviaarluta Naalagaq kif­far­tuus­sin­naavar­put’. – 1 Kor 15:58.