1. Jehovap qanoq inuit tamaasa kissaappai?

 JEHOVAP inuit namminneq aalajangiisin­naatillugit pinngortippai. Ullut tamaasa aalajangiisarpugut. Aalajangigassani tamani pingaaruteqar­nerpaaq tassaavoq Jehovamut tunniul­luinnarneq taassumalu ilaqutariis­sortaanut ilanngunneq. Jehovap kissaatigaa tamatta taamaalius­sasugut. Sooq? Inuit asagamigit ajunngin­nerpaamillu kissaak­kamigit. Ikinngutigerusuppai naassaan­ngitsumillu inuuneqaleq­qullugit. – Mos 5. 30:19, 20; Gal 6:7, 8.

2. Ajortuliortut peqqissimin­ngitsut Jehovap qanoq misigis­suseqarfigai? (Johannesimit 1. 2:1)

² Jehovap kinaluunniit kiffartorfigeq­qulluni pinngitsaalinngilaa. Taavami imermut morsutsitaasimasoq Guutip inatsisaanik unioqqutitsilluni ingasattumik ajortulioruni qanoq pineqassava? Peqqissimin­ngikkuni ilagiinnit peerneqassaaq. (Kor 1. 5:13) Taamaat­toqaraluarpal­luunniit Jehovap neriuutigiuarpaa ajortuliortoq imminut utissasoq. Tamannalu utertitsissummik pilersitsineranut peqqutaavoq pingaarutilik – tassa ajortuliortut peqqissimisut isumakkeerfiginias­sagamigit.  (Johannesimit 1. 2:1 atuaruk). Guutitta asannittup ajortuliortut qamannga pisumik kajumis­saarpai peqqissimeq­qullugit. – Zak 1:3; Rom 2:4; Jaak 4:8.

3. Allaaserisami matumani suut sammissavagut?

³ Ajortuliornermut ajortulior­tunullu tunngatillugu Jehovap immisut isiginnit­taaseqar­nissarput kissaatigaa. Qanoq taamaaliorsin­naasugut allaaserisami sammineqassaaq. Allaaserisaq atuartillugu maluginiaruk (1) ilagiit Korintimiittut ingasattumik ajortulior­toqartillugu qanoq ilioqquneqartut, (2) ajortuliortoq peqqissimimmat Paulusip qanoq ilitsersorai aamma (3) Jehovap ingasattumik ajortuliortut qanoq misigis­suseqarfigigai.

INGASATTUMIK AJORTULIOR­TOQARTILLUGU KORINTIMI ILAGIIT QANOQ ILIORTUT

4. Korintimi ilagiinni qanoq pisoqarpa? (Korintimiunut 1. 5:1, 2)

⁴ Korintimiunut 1. 5:1, 2 atuakkit. Paulusi oqaluus­sisartutut pingajussaanik angalanermini paasitin­neqarpoq Korintimi ilagiinni pilersin­neqarlaani ingasattumik pisoqartoq. Qatanngutip angutip ataatami nulia atoqatigisarsimavaa. Allaat Guutimut kiffartun­ngitsut nalunngilaat tamanna eqqunngitsulior­nerusoq! Ilagiin­niittulli iliuusaa ippigin­ngilaat isumaqarlutillu qatanngut angut taanna ilagiin­niiginnarsinnaasoq. Immaqa ilaasa Jehova nallittuisoq paasinnit­tuusorlu ilaarsoraat. Jehovalli innuttami akornanni eqqunngitsuliorneq iluarinngilaa. Qatanngutip angutip kanngut­taatsumik iliuuseqar­tarnera ilagiit tusaamanerlugaalis­sutigaat. Uppeqataalu taassumannga sunnerneqariaan­naapput. Taamaattumik Paulusip ilagiit qanoq ilioqquai?

5. Paulusip ilagiit qanoq ilioqquai, aamma qanoq isumaqarpa? (Korintimiunut 1. 5:13) (Aamma asseq takuuk).

⁵ Korintimiunut 1. 5:13 atuaruk. Jehovap Paulusi isumassarsisillugu allatsippaa ajortuliortoq peqqissimin­ngitsoq ilagiinnit peerneqassasoq. Taava ilagiin­niittut qanoq iliussappat? Paulusip allaffigai “ilagisarun­naaqqullugu”. Imalu nangippoq: “Aap, nereqatigis­sanngilarsiluunniit.” (Kor 1. 5:11) Sooq? Nereqatigisarunikku ikinngutigiittut oqaloqatigiittarneq peqatigiit­tarnerlu attatiin­nassagamikku. Ilagiilli angut taanna ilagisarun­naarunikku qanoq iluaqutigissavaat? Ajortumik sunnertin­nginnissamut illersuutigissavaat. (Kor 1. 5:5-7) Tamatumalu saniatigut ilagisarun­naarmanni angutip immaqa paasilissavaa Jehova  aliasutsis­simallugu iliuuserisimasanilu peqqissimis­sutigilerlugu.

6. Paulusimit allakkat ilagiinnut angummullu ajortuliortumut qanoq sunniuteqarpat?

⁶ Paulusip Korintimi kristumiunut allakkani nassiutereerlugit eqqarsaatigisimassavaa ilagiit qanoq qisuarias­sanersut. Tittusimilli nuanningaartumik tusarler­neqarpoq, tassa ilagiit ilitsersuutitut allakkani maleruaraat. (Kor 2. 7:6, 7) Aamma sivitsun­ngitsoq angut peqqissimivoq! Isiginnit­taatsiminik iliuutsiminillu allannguisimavoq Jehovallu najoqqutas­siaanik naapertuil­luartunik maleruaalerluni. (Kor 2. 7:8-11) Maanna Paulusip ilagiit qanoq kajumis­saassavai?

ILAGIIT PEQQISSIMISOQ QANOQ PISSAGAAT

7. Ajortuliortup ilagiinnit peerneqarnera qanoq ajunngitsumik kinguneqarpa? (Korintimiunut 2. 2:5-8)

⁷ Korintimiunut 2. 2:5-8 atuakkit. Paulusi allappoq: “Amerlanersassi angummik taassuminnga naqqiinerat naammappoq.”  Allatut oqaatigalugu perorsaatis­siinerup siunertaatut pisoqarpoq. Tassami ajortuliortup ilagiinnit peerneqarnermi kingorna paasivaa peqqissimisariaqarluni. – Hebr 12:11.

8. Kingornatigut Paulusip ilagiit qanoq ilioqquai?

⁸ Paulusip ilagiit paasitippai angut peqqissimigami ilagiinnut utersinnaasoq. Imalu allaffigai: “Ilumoorlusi isumakkeerfigalugulu tuppallersas­savarsi”, aamma: “Asannin­nissinnik uppernarsaavigeq­qullugu kajumis­saarpassi.” Maluginiaruk Paulusip kissaatigigaa qatanngutit iliuutsimikkut oqaatsimikkullu ersersissagaat ilumoorlutik isumakkeerfigisimallugu asallugulu. Taamaalillutik ersarissumik paasitis­sinnaavaat ilagiinnut uternera nuannaarutigigitsik.

9. Sooq ilaasa qatanngut peqqissimisoq isumakkeerfigiuminaatsis­sinnaavaat?

⁹ Immaqa taamani ilagiin­niittut ilaasa qatanngutip ilaalerseq­qinneqarnera aallaqqaammut nuannaarutigin­ngilaat. Sooq taama isummersin­naavugut? Angut taanna iliuutsimigut ilagiinnik ajornar­torsior­titsisimammat, imaassin­naavorlu ilaat misigis­sutsikkut eqqugaasimasut. Immaqa ilaat isumaqarput angutip ilagiinnut qatanngutitut ilaalerseq­qinneqarnera naapertuil­luanngitsuusoq, namminnermi ilungersorlutik Jehovap peqqussutaanut naalattuar­niarsimagamik. (Aamma takukkit Lukkarsi 15:28-30). Soorli ilagiit qatanngummut angummut asannin­nerminnik qularun­naarsitsinissaat pingaaruteqarpa?

10-11. Utoqqaanertat peqqissimisoq isumakkeerfigiuman­ngippassuk qanoq pisoqarsinnava?

¹⁰ Takorlooriaruk qanoq pisoqarsinnaasoq utoqqaanertat angut ilumoorluni peqqissimisoq ilagiinnut ilaalerseq­qikkuman­ngippassuk imaluunniit ilaalerseq­qinneqarnerata kingorna ilagiit asannin­nerminnik ersersitsivigiuman­ngippassuk. Paulusi allappoq ‘aliasorujus­suarnermik sapilersutut misigilersinnaasoq’. Immaqa isumaqalersinnaavoq Jehovamut kiffartoq­qilersin­naanaviarani, immaqalu allaat Jehovap qanillinissaa sulissutigiun­naarlugu.

¹¹ Ilagiin­niittut angut peqqissimisoq isumakkeerfigiuman­ngippassuk qanoq allatut pisoqarsinnaava? Tamanna Jehovamut attaveqar­nerminnut ajoqutigisin­naavaat. Qanoq? Isumakkeerfigin­nikkuman­ngitsut Jehova ajortuliortunik peqqissimisunik isumakkeerfigin­nittartoq ilaarnagu Saatani naakkit­taatsoq ilaassagamikku. Taamaalillutik angutip Jehovamut kiffartor­niarnissaanik akornusiiniartoq, Diaavulu, ikiussavaat. – Kor 2. 2:10, 11; Ef 4:27.

12. Ilagiit Jehova qanoq ilaarsin­naavaat?

¹² Taavami Korintimi ilagiit qanoq Jehova, Saataniun­ngitsoq, ilaarsin­naavaat? Jehovap peqqissimisunik isumakkeerfigin­nittarneranik ilaarsinermikkut. Biibilimik allattut ilaasa Jehova pillugu oqaasii maluginiakkit. Daavi allappoq Jehova ‘ajunngitsuusoq isumakkeerfigin­nikkumasarlunilu’. (Tuss 86:5) Mika allappoq: “Guuti kina ilittut innerpa pisuusunik isumakkeerfigin­nittarluni asattuus­sisarlunilu?” (Mika 7:18) Aamma Iisaaja ima allappoq: “Iluaatsup qimalliuk aqqutigisani, iluaatsuliortullu soraarulligit pilersaarutini, saallunilu Naalakkamut, imminik naakkin­nikkumaartumut, uterluni Guutitsinnut, taanna isumakkeerfigin­nittuartarmat.” – Es 55:7.

13. Sooq angutip ilagiinnut ilaalerseq­qinneqar­nissaata kinguar­tinnissaa pisariaqanngila? (Ungalusaq “ Angut Korintimiu qanga ilagiinnut ilaalerseq­qinneqarpa?” takuuk).

¹³ Korintimi ilagiit Jehova ilaassagunikku peqqissimisoq isumakkeerfigissavaat asannin­nerminnillu  uppernarsaavigalugu. Paulusip taamatut ilitsersuutaanik maleruaanermikkut ‘sutigut tamatigut naalannertik’ ersersissavaat. (Kor 2. 2:9) Ajortuliortoq ilagiinnit peerneqarnermi kingorna qaammatialuinnaat qaanngiuttut peqqissimivoq. Taamaattumik ilagiinnut ilaalerseq­qinneqarnissaa utoqqaanertat kinguar­teqqittariaqan­ngilaat.

JEHOVA NAAPERTUIL­LUARTOQ NALLITTUISORLU QANOQ ILAARSIN­NAAGIPPUT

14-15. Korintimi pisimasoq qanoq ilinniarfigaarput? (Petrusimit 2. 3:9) (Aamma asseq takuuk).

¹⁴ Itsaq Korintimi pisimasoq ilinniutiginias­sagatsigu Biibilimi oqaluttuarineqarpoq. (Rom 15:4) Paasivarput Jehovap ingasattumik ajortuliortut peqqissimin­ngitsut ilagiin­niiginnar­nissaat akuerin­ngikkaa. Immaqa ilaat eqqarsarput Jehovap nallittuingaar­nermigut ilagiin­niiginnar­tikkumassagai. Ilumoorpoq Jehova nallittuisuusoq, iliuutsilli ilaat akuerinngilai. Taassuma eqqortoq eqqunngitsorlu pillugit najoqqutassiai allanngorneq ajorput. (Juud 4) Jehovap ingasattumik ajortuliortut ilagiin­niiginnar­nissaat ajorinngik­kaluarpagu tamanna nallittuinerus­sanngik­kaluarpoq, ilagiin­niittummi tamarmik tamanna ajoqutigisin­naavaat. – Uss 13:20; Kor 1. 15:33.

¹⁵ Nalunngilarpulli kialluunniit suujunnaarsitaanissaa Jehovap kissaatigin­ngikkaa.  Inuit aniguisik­kumasarpai. Inuit eqqarsar­taatsiminnik iliuutsiminnillu allannguisut Jehovamullu ikinngutaal­lualeqqik­kusuttut taassumannga nallittor­neqartarput. (Ez 33:11; Petrusimit 2. 3:9 atuaruk). Taamaattumik angut Korintimiu peqqissimillunilu ingasattumik ajortulior­tarunnaarsimammat Jehovap Paulusi aqqutigalugu ilagiit paasitippai angut taanna isumakkeerfigissagaat ilagiinnullu tikilluaq­qullugu.

16. Angutip Korintimiup qanoq pineqarnera paasereerlugu Jehova pillugu qanoq misigivit?

¹⁶ Korintimi pisimasumit paasivarput Jehova asannittuusoq naapertuil­luartuusorlu. (Tuss 33:5) Jehovap unnersiutiginissaanut killitsin­nginnerpit? Tamattami ajortiliugatta taassumannga isumakkeerfigineqar­nissarput pisariaqar­tittarparput. Aamma qujamasuutigeqaarput Jehova, isumakkeerfigineqar­nissarput ajornarun­naarsillugu, utertitsissummik aaqqissuus­sisimammat. Tuppaller­narlunilu eqqissial­lannangaarami ilisimallugu Jehovap innuttani asangaarlugillu ajunngin­nerpaamik kissaakkai!

17. Allaaserisani tulliuttuni suut sammineqassappat?

¹⁷ Nalitsinni ingasattumik ajortuliortup peqqissiminissaanut utoqqaanertat Jehova asannittoq ilaarlugu qanoq ikiorsin­naavaat? Utoqqaanertat aalajangerpata kristumiu ilagiinnit peerneqassasoq ilagiin­nulluunniit ilaalerseq­qinneqassasoq ilagiin­niittut qanoq iliussappat? Tamakku allaaserisani tulliuttuni sammissavagut.