1-2. (a) Piaaraluni ajortuliorneq Jehovap qanoq isigaa? (b) Ajortuliortut pillugit Jehova qanoq neriuuteqarpa?

 JEHOVAP GUUTIP iliuutsit tamaasa akuersaaginnarneq ajorpai, ajortuliornerli uumigaa. (Tuss 5:5-7) Piumasaraa najoqqutassiani naapertuil­luartut Biibilimi allatsitani ataqqis­sagigut. Soorunami naammal­luinnan­ngitsuunerput nalunnginnamiuk kukkujuitsuunissarput naatsorsuutiginngilaa. (Tuss 130:3, 4) Aammali ‘ajunngisaangaar­nerminik kanngut­taatsulior­nissamut utoqqatsis­sutitut atuisut’ akuerinngilai. (Juud 4) Biibilimi eqqaaneqarpoq Guutip Harmagedonnimi sorsunnissamini ‘guutiitsut suujunnaarsissagai’. – Pet 2. 3:7; Saqq 16:16.

² Jehovalli kissaatiginngilaa kinaluunniit suujunnaarsin­neqassasoq. Soorlu atuagassiami eqqartoreeripput, Biibilimi erseqqissumik allassimavoq ‘inuit tamaasa peqqissiminissamut periarfis­sikkusukkai’. (Pet 2. 3:9) Utoqqaanertat Jehova ilaarusuk­kamikku ajortuliortut allannguinis­saannut Jehovamillu iluarisaaq­qilernis­saannut naammagit­tarlutik ikiorniar­tarpaat. Ilaannaalli ajunngitsumik qisuariartarput. (Es 6:9) Ilaat utoqqaanertanit peqqissiminissamut ikiorneqar­niartaraluarlutik ajortulior­tuartarput. Taama pisoqarpat utoqqaanertat qanoq iliussappat?

 “AJORTOQ ILAGIINNIT PEERSISSIUK”

3. (a) Ajortuliortut peqqissimin­ngitsut suneqar­nissaat pillugu Biibilimi qanoq allassimasoqarpa? (b) Sooq oqarsin­naavugut ajortuliortup ilagiinnit peerneqar­nissani nammineq toqqarsimagaa?

³ Ajortuliortoq peqqissimin­ngippat utoqqaanertat ilitsersuut Korintimiunut allakkat siulliit 5:13-imiittoq una malittariaqarpaat: “Ajortoq ilagiinnit peersissiuk.” Tassa oqartoqarsinnaavoq ajortuliortup qanoq pineqar­nissani nammineq toqqarsimagaa, siaruar­tikkanimi katersorpai. (Gal 6:7) Sooq taama oqarsin­naavugut? Utoqqaanertanit peqqissiminissamut ikiorneqar­niartarnini itigartit­tarsimammagu. (Kng 2. 17:12-15) Iliuusiinit erserpoq Jehovap najoqqutas­siaanut naalanniarnani aalajangersimagaa. – Mos 5. 30:19, 20.

4. Ajortuliortup peqqissimin­ngitsup ilagiinnit peerneqarnera sooq nalunaarutigineqartarpa?

⁴ Ajortuliortoq peqqissimin­ngitsoq ilagiinnit peerneqaraangat Jehovamik Nalunaajaasuujun­naarnera ilagiinnut nalunaarutigineqartarpoq. a Ajortuliortup kanngutsisin­neqarnissaa siunertarineqanngilaq. Kisianni ajortuliortartup ‘ilagisarun­naarnissaanik nereqatigisan­nginnis­saanillu’ peqqussut ilagiinnit malinneqarsin­naaniassammat nalunaarutigineqartarpoq. (Kor 1. 5:9-11) Biibilimi taamatut peqqussuteqarnera pissutis­saqarluarpoq. Apustili Paulusi allappoq “seernarsaatimininnguup naqittagaq tamaat pullatsittaraa”. (Kor 1. 5:6) Ajortuliortoq peqqissimin­ngitsoq ilagiinnit peerneqan­ngippat ilaat eqqarsalersin­naapput Jehovap najoqqutassiai naalanneqar­tariaqan­ngitsut. – Uss 13:20; Kor 1. 15:33.

5. Ilagiinnit peerneqarsimasoq qanoq isigissavarput, aamma sooq?

⁵ Uppeqaterpummi ilagiinnit peerneqarsimasoq qanoq isigissavarput? Peqatigisan­ngikkaluarlugu neriuutis­saqanngitsutut isiginagu savatut tammarsimasutut isigissavarput. Sava ilaminit tammarsimasoq utersinnaavoq. Eqqaamajuk taanna Jehovamut tunniul­luinnarsimammat. Ajoraluartumik tunniul­luinnarsimanini maanna eqqortinngilaa, naassaan­ngitsumillu inuunissamik neriuutini annaasinnaavaa. (Ez 18:31) Jehovali suli nallittuisin­naatillugu neriuppugut uterumaartoq. Ajortuliortoq ilagiinnit peerneqarsimasoq utoqqaanertat qanoq ikiorsin­naavaat?

PEERNEQARTUT UTOQQAANERTANIT QANOQ IKIORNEQAR­TARNERSUT

6. Ilagiinnit peerneqartoq ikiorniarlugu utoqqaanertat sussappat?

⁶ Ilagiinnit peerneqartoq Jehovamut uternissamut nammineer­tussanngorlugu imminiigin­narneqarpa? Naamik. Ajortuliortoq peqqissimin­ngitsoq ilagiinnit peerneqar­nissaanik paasitik­kunikku utoqqaanertat nassuiaatissavaat ilagiinnut uterniarluni qanoq iliussanersoq. Utoqqaanertalli suli iliuuseqar­nerussapput. Amerlanertigut qaammatialuit qaangiuppata isiginnit­taatsimigut allanngorsimanersoq paasiniarlugu ajortuliortoq naapeqqik­kumassavaat. Ajortuliortoq akuersippat utoqqaanertat saamallutik peqqissimeq­qullugulu uteqqussavaat. Inuttaa allanngorsiman­ngikkaluarpal­luunniit utoqqaanertat siunissami naapeqqik­kumasassavaat.

7. Utoqqaanertat Jehovap isumassuinera ilagiinnit peerneqarsimasumut qanoq ersersit­tarpaat? (Jeremia 3:12)

⁷ Ilagiinnit peerneqarsimasumut tunngatillugu  utoqqaanertat Jehovap isumassuinera ilaarniar­tarpaat. Assersuutigalugu itsaq Jehova Israalikkut allamut saassimasut utaqqiin­narnagit iliuuseqaq­qaartuuvoq. Suli peqqissiminermik ersersitsin­ngitsut pruffiitini aallartittarpai. Soorlu atuagassiami matumani allaaserisat aappaanni eqqaaneqartoq, Jehovap isumassuinini ersersippaa pruffiitimi Hosseap nuliaminik suli ajortuliortumik saammaas­seqquneratigut. (Hos 3:1; Mal 3:7) Jehova ilaarlugu utoqqaanertat ajortuliortup uternissaa ilumoorlutik kissaatigaat, ajornar­tinniarsarisan­ngilaallu. – Jeremia 3:12 atuaruk.

8. Jiisusip ernermik tammartumik assersuusiaa Jehovap misigin­neqatigin­ninneranik nallittuineranillu qanoq ilinniarfigaarput? (Lukkarsi 15:7)

⁸ Jiisusip ernermik tammartumik assersuusiaa, atuagassiami matumani allaaserisat aappaanni eqqartugarput, eqqarsaatigiuk. Ernini angerlartoq takullugu ataataata “arpalluni ornippaa pakkuteriarlugulu kunillugu”. (Luk 15:20) Malugiuk ataataasup ernermi isumakkeerfigeq­qunissaa utaqqin­ngikkaa. Ataataasutulli asannittutut siulliulluni iliuuseqaq­qaartuuvoq. Utoqqaanertat qimagus­simasunut taamatut isiginnit­taaseqarput. Savat tammarsimasut angerlar­nissaat kissaatigaat. (Luk 15:22-24, 32) Ajortuliortoq uteraangat qilammi nunamilu nuannaarutigineqartarpoq! – Lukkarsi 15:7 atuaruk.

9. Jehovap ajortuliortut asannilluni qanoq kajumis­saarpai?

⁹ Soorlu sammereeripput, erseqqippoq ajortuliortut peqqissimin­ngitsut Jehovap ilagiin­niitiin­narnissaat akuerin­ngikkaa. Ajortuliortulli imminiigin­narnagit utertik­kusuppai. Ajortuliortut peqqissimisut pillugit Jehovap misigissusai Hosea 14:5-imi ima ersersin­neqarput: “Innuttakka tunussisimasut katsorsas­savakka nuannaarlungalu asassallugit uummatinnit pisumik. Kamaakkun­naassavakka.” Jehovap misigissusai nalunngin­namikkit utoqqaanertat inuk peqqissiminermik ersersitsinersoq maluginiar­tarpaat. Oqaatsillu taakku qimagus­simasut Jehovamit asaneqar­nerminnik utertik­kumaneqar­nerminnillu qularun­naassutigissavaat.

10-11. Utoqqaanertat siornatigut ilagiinnit peerneqarsimasunik qanoq ikiuiniassappat?

¹⁰ Siornatigummi, immaqa allaat ukiorpassuit qaangiuttut, ilagiinnit peerneqarsimasut? Imaassinnaavoq ilaasa peerneqar­nerminnut pissutaasoq inooriaaseriun­naarsimagaat. Immaqalu ilaasa sooq peerneqar­nerlutik allaat eqqaaman­ngilaat. Qanorluunniit ikkaluarpat utoqqaanertat taakku ujarlugillu pulaarniassavaat. Pulaarnerminni qimagus­simasoq qinoqatigiumassavaat asannil­lutillu ilagiinnut uteqqeq­qullugu. Soorunami ukiorpassuarni ilagiinnut ilaasiman­ngikkuni anersaakkut sanngiil­lisimassaaq. Taamaammat ilagiinnut uteqqik­kusuppat utoqqaanertat Biibilimik misissueqatigineqarnissaa isumagisin­naavaat, aamma ilagiinnut suli ilaalerseq­qinneqarsiman­ngikkaluarpal­luunniit. Biibilimik misissueqatigineqar­nissaanut tunngatillugu tamatigut utoqqaanertat aalajangiisus­saapput.

¹¹ Utoqqaanertat Jehovap misigin­neqatigin­ninnera ilaarniar­tarpaat. Taamaammat sapinngisamik amerlanerpaat Jehovamut uternis­saannut ikiorusuppaat. Ajortuliortoq peqqissiminermik ersersitsippat ajortulior­tarunnaarpallu ilaalerseq­qinneqarnissaa kinguarsar­neqassanngilaq. – Kor 2. 2:6-8.

12. (a) Ingammik qaqugukkut utoqqaanertat mianersor­tariaqarpat? (b) Sooq eqqarsas­sanngilagut ajortuliortut aalajangersimasut Jehovamit nallittor­neqarsin­naanngitsut? (Aamma quppernerup ataani ilanngussaq takuuk).

 ¹² Pissutsit ilaanni utoqqaanertat ilaalersitseq­qiiniarlutik aalajangiin­nginnerminni mianersor­tariaqarput. Assersuutigalugu pineqartoq meeqqamik atornerluisimappat, tunussisuusimappat katisimanermil­luunniit peqqusersusaarluni kipititsisimappat utoqqaanertat taanna ilumoorluni peqqissiminersoq qulakkeer­tariaqarpaat. (Mal 2:14; Tim 2. 3:6) Ilagiit illersor­tariaqarpaat. Aammali eqqaamas­savarput ajortuliortoq kinaluunniit peqqissimisoq iliuutsiminnillu allannguisoq Jehovap isumakkeerfigerusukkaa. Tassa peqqusersusaarlutik ajortuliorsimasut pillugit  utoqqaanertat mianersor­tariaqaraluarlutik isumaqas­sanngillat ajortuliortut ilaat Jehovamit nallittor­neqarsin­naanngitsut. b – Pet 1. 2:10.

ILAGIIN­NIITTUT SUSINNAASUT

13. Utoqqaanertanit oqaaqqis­saarneqarsimasoq ilagiinnillu peerneqarsimasoq qanoq assigiin­ngitsumik pisarpagut?

¹³ Soorlu allaaserisap siuliani eqqartoripput, ilaannikkut oqaaqqis­saarisoqarsimaneranik nalunaaruteqar­toqartarpoq. Taamaappat pineqartoq suli ilagisarsin­naavarput nalunngin­natsigu peqqissimillunilu iliuutsini ajortut unitsis­simagai. (Tim 1. 5:20) Suli ilagiinnut ilaavoq uppeqatiminillu peqateqar­tarnermigut qiimmas­sarneqar­tariaqarluni. (Hebr 10:24, 25) Ilagiinnilli peerneqarsimasumut tunngatillugu allaaneruvoq. Taanna ‘ilagisarun­naarlugulu nereqatigisarun­naassavarput’. – Kor 1. 5:11.

14. Ilagiinnit peerneqarsimasoq qanoq pisassanerlugu kristumiu qanoq aalajangersinnaava? (Aamma asseq takuuk).

¹⁴ Tassa imaappa ilagiinnit peerneqarsimasoq alarluin­nassagipput? Taamaat­tariaqanngilaq. Soorunami ilagisas­sanngilarput. Kisianni kristumiut ilagiinnit peerneqarsimasoq – immaqa ilaqutartik qanigisimasar­tilluunniit – ataatsimiinnermut qaaqqus­sanerlugu nalunngeqatigin­nissutertik Biibilimit ilinniar­tinneqarsimasoq atorlugu namminneq aalajangiisin­naapput. Takkuppammi? Siornatigut peerneqarsimasut ilassisar­nikuunngilagut. Aamma tamatumunnga tunngatillugu kristumiut nalunngeqatigin­nissutertik Biibilimit ilinniar­tinneqarsimasoq atorlugu namminneq aalajangiissapput. Ilaat ilassil­luguluunniit ataatsimiinnermut tikilluaq­quserusussapput. Sivisuumilli oqaloqatiginagulu ilaginavian­ngilarput.

15. Ajortuliornerit suut Johannesimit allakkat aappaat 9-11 eqqaaneqarpat? (Aamma takuuk ungalusaq “ Johannesip Paulusillu ajortulioriaatsit eqqartugaat assigiippat?”)

¹⁵ Immaqa ilaat ima eqqarsassapput: ‘Biibilimi allaqqanngila kristumiu taama ittumik  ilassinnittoq ajortuliaanik tapersersuisuusoq?’ (Johannesimit 2. 9-11 atuakkit). Allassimaffiit ataqatigiin­neranni erserpoq ilitsersuut tamanna tunussisunut allanullu ajortulior­nissamut sunniiniartunut tunngasuusoq. (Saqq 2:20) Taamaattumik tunussisut ilinniar­titsissutaannik ajortulior­nermillu allamik siuarsaasoq utoqqaanertanit pulaarneqar­navianngilaq. Soorunami neriunnarpoq peqqissimissasoq. Tamannali pitinnagu taanna ilassisarnagulu ataatsimiinnernut qaaqqunavian­ngilarput.

JEHOVAP ISUMASSUINERANIK NALLITTUINERANILLU ILAARSINEQ

16-17. (a) Jehova ajortuliortut pillugit qanoq kissaateqarpa? (Ezekieli 18:32) (b) Utoqqaanertat Jehovamik qanoq suleqateqarsin­naappat?

¹⁶ Atuagassiami matumani suna ilinniarparput? Jehovap kissaatiginngilaa kinaluunniit suujunnaarsin­neqassasoq. (Ezekieli 18:32 atuaruk). Ajortuliortut imminut saammaan­narsinissaat kissaatigaa. (Kor 2. 5:20) Taamaammat oqaluttuarisaanerup ingerlanerani Jehovap innuttani, aamma kiffani ataasiakkaat , qimagus­simasut peqqissiminis­saannut uternis­saannullu kajumis­saartuartarpai. Ajortuliortunik peqqissiminissamut ikiuiniar­nerminni utoqqaanertat Jehovamik suleqateqarnertik immikkut pisinnaatitaaffigaat. – Rom 2:4; Kor 1. 3:9.

¹⁷ Takorlooruk ajortuliortut peqqissimigaangata qanoq qilammi nuannaar­tigisarnersut. Ataatarput qilammiusoq Jehova savaatiminik utertoqaraangat nuannaangaartarpoq. Jehovap isumassuinera, nallittuinera ajunngisaangaarneralu eqqarsaatigigaangatsigit asaneruler­tarparput. – Luk 1:78.