Әйүп 38:1—41
38 Сонда Ехоба Әйүпке боран ішінен былай деп жауап берді+:
2 “Байыбына бармай сөйлеп,Менің байламымды көмескілеп жатқан бұл кім өзі+?
3 Кәне, нағыз ердей беліңді бушы,Мен сұрайын, ал сен жауап бер.
4 Түсінікке иемін деп ойласаң, айтшы,Мен жердің негізін қалағанда сен қайда едің+?
5 Оның өлшемдерін жасаған,Көлденең белдеу тартқан кім екенін білесің бе?
6 Оның тұғыры неге орналасқан?
Бұрыштық тасын кім қалаған+?
7 Таңғы жұлдыздар+ қуана айғайлағанда,Құдай ұлдарының*+ бәрі шаттана мадақ айтқанда, сен қайда едің?
8 Теңіз құрсақтан шығуға ұмтылғандай буырқанғанда,Қақпаларды жауып, жолына бөгет қойған кім+?
9 Мен оны бұлтқа орап, қара түнекпен құндақтап қойғанымда,
10 Оның шегарасын белгілеп,Қақпалары мен ысырмаларын орнатқанымда+,
11 Сосын оған: —Мына жерге дейін келесің, әрі қарай бармайсың,Тәкаппар толқындарың осы жерден тоқтасын!— дегенімде+, сен қайда едің?
12 Таңның атуына бұйрық етіп,Күннің қайдан шығуына нұсқау берген кезің болған ба+?
13 Таңға шапағын жердің шетіне дейін шашып,Оның үстінен зұлымдарды сілкіп тастауды бұйырғансың ба+?
14 Жарық түскенде жер сазға мөр басқандай айқындалып,Ондағының бәрі орын-орнына киімдей қона қалады.
15 Ал зұлымдар жарығынан айырылады,Жоғары көтерген қолдары сынады.
16 Сен теңіз түбіндегі қайнарларға дейін жеткенсің бе?
Су тұңғиықтарын шарлап зерттегенсің бе+?
17 Өлімнің қақпаларын+ тауып,Қара түнектің қақпаларын көрген бе едің+?
18 Ұшан-теңіз жердің ауқымын ұққансың ба+?
Осының бәрін білсең, айтшы, кәне.
19 Жарықтың тұрағына барар жол+,Қараңғылықтың мекені қайда?
20 Оларды өз жеріне жеткізіп салу үшін,Үйлеріне апаратын жолды біле аласың ба?
21 Осының бәрін білетіндей, сол заманда туылып,Соншалықты көп жасадың ба?
22 Қар сақталатын қамбаларға кіріп+,Бұршақ сақталатын қоймаларды көрген бе едің+?
23 Мен оларды апат келетін кез үшін,Шайқас пен соғыс болатын күн үшін сақтап отырмын+.
24 Жарық қай жақтан төгіліп*,Шығыс желі жер бетіне қай жақтан соғады+?
25 Ағын суға кім арна қазып,Күн күркірететін қара бұлтқа кім жол дайындайды+?
26 Бұлттар елсіз далаға,Тірі жан тұрмайтын шөл далаға жаңбыр болып түседі+,
27 Құлазыған иен даланы суарып,Оны жасыл желекке киіндіреді+.
28 Жаңбырдың әкесі бар ма+?
Шық тамшыларын дүниеге келтіретін кім+?
29 Мұз кімнің құрсағынан шығады?
Көктен түсетін қырауды кім туады+?
30 Қашан су беті таспен қапталғандай болып,Терең сулардың беті қатып қалады+?
31 Сен Кима шоқжұлдызының* шоғырын байлап,Кесил шоқжұлдызының* түйінін шеше аласың ба+?
32 Шоқжұлдызды* өз мезгілінде шығарып,Аш шоқжұлдызын* балаларымен қоса жетелеп жүре аласың ба?
33 Аспан денелерін басқаратын заңдарды білесің бе+?
Жер бетіне олардың* билігін орната аласың ба?
34 Даусыңды бұлттарға дейін жеткізіп,Үстіңе нөсер жаудыра аласың ба+?
35 Найзағай ойнату қолыңнан келе ме?
Олар саған келіп “Біз мұндамыз!” дей ме?
36 Бұлттарға* даналық дарытып+,Аспан құбылыстарына* түсінік берген кім+?
37 Бұлттарды есептеуге кімнің даналығы жетеді?
Аспан ыдыстарын кім төңкеріп тастай алады+?
38 Сонда шаң-тозаң балшыққа айналады,Топырақ кесектері бір-біріне жабысады.
39 Сен арыстанға жемтігін ұстап беріп,Жас арыстандардың қарнын тойдыра аласың ба+?
40 Апандарында шабуылға даярланыпНе тасада жемтігін аңдып жатқанда, тояттандыра аласың ба?
41 Қарғаның балапандары тамақ таппай,Құдайдан көмек сұрағанда,Қарғаға азық даярлап қоятын кім+?
Сілтемелер
^ “Құдай ұлдары” деген еврей тіліндегі тіркес періштелерге нұсқайды.
^ Мүмкін: “Найзағай қай жақтан жарқылдап”.
^ Торпақ шоқжұлдызындағы Үркер жұлдыз шоғыры жөнінде айтылып тұрса керек.
^ Үшарқар-Таразы шоқжұлдыздары жөнінде айтылып тұрса керек.
^ Сөзбе-сөз “Маззарот”. П2ж 23:5-те осы сөзбен түбірлес көпше түрдегі сөз зодиак шоқжұлдыздарына нұсқайды.
^ Жетіқарақшы шоқжұлдызы жөнінде айтылып тұрса керек.
^ Мүмкін: “оның”.
^ Мүмкін: “Адамға”.
^ Мүмкін: “Ой-санаға”.
