Марқа 4:1—41
4 Иса қайтадан теңіз жағасында тәлім бере бастады. Қасына көп халық жиналғандықтан, ол қайыққа отырып, жағадан әрірек жүзіп барды. Ал барша халық жағада тұрды+.
2 Иса оларға мысалдармен көп тәлім берді+. Ол былай деді+:
3 “Тыңдаңдар! Бір диқан тұқым себуге шығыпты+.
4 Ол сеуіп жүргенде, тұқымның кейбірі жол бойына түседі де, құстар келіп, шоқып жеп кетеді.
5 Ал өзге біреулері топырағы аз, тастақ жерге* түседі. Топырақ жұқа болғандықтан, тұқым тез өніп шығады+.
6 Бірақ тамыр жаймаған соң, күн шыққанда күйіп, қурап қалады.
7 Тағы біреулері тікен арасына түседі. Тікен өсіп, тұншықтырып тастағандықтан, олар өнім бермейді+.
8 Ал өзге тұқымдар жақсы топыраққа түседі. Олар көктеп, бой көтеріп, отыз, алпыс және жүз еседен өнім береді+”.
9 Бұдан кейін ол: “Құлағы барлар тыңдап алсын!”— деп қосты+.
10 Ол оңаша қалғанда, 12 елшісі мен басқа шәкірттері келіп, мысалдарына қатысты сұрақтар қоя бастады+.
11 Ол былай деп жауап берді: “Құдай Патшалығының қасиетті құпиясын+ түсіну сендерге берілген, ал басқалар үшін естігендерінің бәрі тек мысал күйінде қалады+.
12 Бұл олар қараса да, көрмеу үшін, естіп тұрса да, мәнін ұқпау үшін осылай болды, сондықтан олар ешқашан теріс жолдан қайтпайды және кешірімге ие болмайды+”.
13 Содан кейін ол: “Осы мысалды түсінбесеңдер, басқаларын қалай түсінесіңдер?”— деді.
14 “Диқан Құдай сөзін себеді+.
15 Жол бойына түскендері мынадай адамдарды бейнелейді: олар оны естісімен-ақ, Шайтан келіп+, жүректеріне себілген сөзді алып кетеді+.
16 Ал тастақ жерге түскендері мынаны білдіреді: олар сөзді естіген бойда, қуанышпен қабыл алады+.
17 Бірақ тамыр жаймағандықтан ұзаққа бармайды: Құдай сөзі үшін қиындық пен қуғын-сүргінге кезіге сала, оған сенуден қалады.
18 Сондай-ақ тікен арасына түскендері де бар, олар мынаны бейнелейді: мұндайлар сөзді естігенмен+,
19 осы заманның уайым-қайғысы+, алдамшы байлық*+ пен басқа да құмарлықтар+ жүректерін шырмап алып, сөзді тұншықтырып, өнімсіз етеді.
20 Ал жақсы топыраққа түскендер сөзді тыңдап, шын көңілмен қабылдағандарды білдіреді. Олар отыз, алпыс және жүз еседен өнім береді+”.
21 Ол тағы былай деді: “Жағылған шамды ыдыстың не төсектің астына қоя ма? Оны шамдалға қояды емес пе+?
22 Жасырын нәрсенің бәрі ақырында мәлім болады, жақсылап тығылған нәрсе ашылады+.
23 Құлағы барлар тыңдап алсын+!”
24 Сосын ол мынаны айтты: “Не естіп тұрғандарыңа ден қойыңдар+. Қандай өлшеммен өлшеп берсеңдер, сендерге де сондай өлшеммен беріледі, тіпті қосып беріледі.
25 Өйткені кімде бар болса, соған тағы беріледі+, ал кімде жоқ болса, өзінде бары да алынып қойылады+”.
26 Иса сөзін былай деп жалғады: “Құдай Патшалығы мынаған ұқсас: біреу жерге тұқым себеді де,
27 түнде ұйықтап, таңертең тұрып, тіршілік ете береді. Ал тұқым көктеп шығып, өсе бастайды. Әлгі кісі оның қалай өсіп жатқанын білмейді.
28 Жер өздігінен бірте-бірте өнім әкеледі: алдымен, көк өскін; сосын, масақ шығады; ақырында, масақ дәнмен толысады.
29 Егін пісіп, науқан уақыты келгенде, ол дереу орақ салады”.
30 Сосын Иса былай деді: “Құдай Патшалығын неге теңеп, қандай мысалмен түсіндіруге болады?
31 Ол қыша дәніне ұқсайды. Жерге себілгенде тұқым атаулының ең кішкентайы болса да+,
32 ол өсіп шыққанда, басқа дақылдардың бәрінен биік болып, бұтақтарын кең жаяды да, оған аспан құстары қонақтап, саясын паналай алады”.
33 Иса Құдай сөзін осы сияқты көптеген мысалмен+ жұрт тыңдай алғанша уағыздайтын.
34 Оларға мысалсыз ештеңе айтпайтын, бірақ шәкірттеріне оңашада бәрін түсіндіріп отыратын+.
35 Сол күні кеш бата Иса оларға: “Арғы жағаға өтейік”,— деді+.
36 Олар жұртты таратып жіберді де, Исамен қайыққа отырып жүзіп кетті. Сол жерде басқа да қайықтар тұрған еді+.
37 Бір уақытта сұрапыл дауыл көтеріліп, толқындар қайықты соққылап, оның іші суға толуға шақ қалды+.
38 Иса қайықтың арт жағында көпшік жастанып ұйықтап жатты. Шәкірттері оны оятып: “Ұстаз, құритын болдық! Сізге бәрібір ме?”— деді.
39 Ол тұрып, желге тыйым салды да, теңізге: “Тына қал, басыл!”— деп бұйырды+. Сонда жел басылып, жым-жырт тыныштық орнады.
40 Сөйтіп, шәкірттеріне: “Неге сонша қорқасыңдар? Әлі де сенімдерің жоқ па?”— деді.
41 Бірақ оларды қатты үрей билеп, өзара: “Жел де, теңіз де бағынатын бұл кім өзі?”— десті+.
Сілтемелер
^ Мұнда сол өлкеде кездесетін бетінде жұқа топырағы бар жалпақ жартас жөнінде айтылып тұр.
^ Сөзбе-сөз “байлықтың арбаушы күші”.
