Жақып 3:1—18
3 Бауырластарым, бізге қатаңырақ төрелік айтылатынын білесіңдер, сондықтан бәрің бірдей ұстаз болмаңдар+.
2 Бәріміз де көп сүрінеміз+. Кімде-кім сөзден сүрінбесе, ол — бүкіл денесін ауыздықтай алатын кемелді адам.
3 Өз ырқымызға көндіру үшін жылқыға ауыздық салсақ, бүкіл денесін басқарамыз.
4 Кеме де солай: қаншама үлкен болып, күшті желдің айдауымен жүрсе де, кішкентай меңгерікпен басқарылып, оны ұстап тұрған кісінің қалаған жағына жүзеді.
5 Сол іспетті, тіл де дененің кішкентай ғана мүшесі бола тұра, тым көп мақтанады. Қалың орманды өртеу үшін кішкене оттың өзі де жетеді!
6 Тіл де — от+. Ол — дененің әділетсіздікке толы мүшесі. Өйткені ол бүкіл денені былғайды+, өзі жаһаннамнан* тұтанып, адамның өмір жолын өртке орайды.
7 Адам жабайы аңдардың, құстардың, бауырымен жорғалаушылар мен теңіз жануарларының қай-қайсысын да бағындыра алады, бағындырып та жүр.
8 Бірақ ешбір адам өз тілін бағындыра алмайды. Тіл бағындыруға келмейді, әрі жамандық пен кісі өлтіретін уға толы+.
9 Біз тілімізбен Ехоба Әкені мадақтаймыз, сөйте тұра сол тілімізбен “Құдайға ұқсас етіп” жаратылған адамдарды+ қарғаймыз.
10 Осылай мадақ та, қарғыс та бір ауыздан шығады.
Бұл дұрыс емес, бауырластарым, бұлай жалғаса бермеу керек+.
11 Бір бұлақтан тұщы да, ащы да су шығушы ма еді?
12 Бауырластарым, інжір ағашы зәйтүн жемісін яки жүзім бұтасы інжір жемісін бере алушы ма еді+? Сол секілді, ащы су шығатын бұлақтан тұщы су шықпайды.
13 Араларыңдағы қайсысың дана әрі саналысың? Ол мұнысын жақсы жүріс-тұрысымен және даналыққа тән жұмсақтықпен атқарған істерімен көрсетсін.
14 Ал егер жүректерің удай қызғанышқа толы+, жанжалқұмар болсаңдар*+, мақтанбаңдар+. Бұлай етсеңдер, шындықты бұрмалайсыңдар.
15 Бұл — көктен келген даналық емес, осы дүниеге+, тәннің жетегінде жүретіндерге, жындарға тән даналық.
16 Өйткені қызғаныш пен жанжалқұмарлық* бар жерде тәртіпсіздік пен жамандық атаулының бәрі де болады+.
17 Ал көктен келген даналық ең алдымен таза+, сосын тату+, иліккіш+, мойынсұнуға дайын, мейірім мен игі істерге бай+ әрі ешкімді алаламайды+, екіжүзді де емес+.
18 Оның үстіне, әділдіктің жемісін әкелетін тұқым татуластырушылар+ үшін татулық орнаған жерде себіледі*+.
Сілтемелер
^ Түсіндірмені қараңыз.
^ Мүмкін: “тек қара бастарыңның абыройын ойлайтын болсаңдар”.
^ Мүмкін: “тек қара бастың абыройын ойлау”.
^ Мүмкін: “әділдіктің жемісін әкелетін тұқымды татуластырушылар татулық орнаған жерде себеді”.
