Даниял 7:1—28
7 Бабыл патшасы Белшазардың+ билік құруының бірінші жылы Даниял төсегінде жатып, түс көрді+. Сонда ол түсіндегі көріністерді жазып+, болған жайттарды түгел баяндады.
2 Даниял былай деді:
“Түнде осы көріністерді көріп жатып, қарасам, аспанның төрт желі ұлан-ғайыр теңіздің астан-кестенін шығарып жатыр екен+.
3 Сосын теңізден бір-біріне ұқсамайтын үлкен-үлкен төрт аң+ шықты.
4 Біріншісі арыстанға+ ұқсайды екен, оның бүркіттікіндей+ қанаттары бар. Қарап тұрғанымда, оның қанаттары жұлынып тасталды. Сосын аң жерден көтеріліп, артқы екі аяғына адам сияқты тұрғызылды. Сондай-ақ оған адамның жүрегі берілді.
5 Сосын басқа бір аңды көрдім, осы екінші аң аюға+ ұқсайды екен. Оның бір аяғы көтеріліп тұрды, аузында тістеген үш қабырға бар екен. Оған: “Орныңнан тұр да, көп ет же”,— делінді+.
6 Одан әрі қарап тұрғанымда, қабыланға+ ұқсаған тағы бір аң көрінді. Аңның арқасында құстікіндей төрт қанаты бар екен, сондай-ақ оның төрт басы болды+. Оған билік берілді.
7 Түнгі көрініске әлі де қарап тұрғанымда, төртінші аң көрінді. Ол өте қорқынышты, жан түршіктіретін, ерекше күшті еді. Оның үлкен темір тістері болды. Аң бәрін жалмап, қиратып, қалғанын аяқтарымен таптап жаншыды+. Ол өзіне дейінгі аңдардың ешқайсысына ұқсамады. Оның басында он мүйізі бар еді.
8 Осы мүйіздерге назар салып тұрғанымда, арасынан бір кішкентай мүйіз шықты+, оның алдында әлгі мүйіздердің үшеуі жұлынып тасталды. Бұл мүйіздің адамдікіне ұқсаған көздері және паңдана* сөйлеп тұрған аузы бар екен+.
9 Әлі де қарап тұрдым, сонда тақтар қойылып, Ежелден бар Тәңір Ие+ өз тағына отырды+. Оның киімі аппақ қардай+, шашы аппақ* жүндей екен. Отырған тағы лаулаған жалындай, ал тақтың дөңгелектері жанып тұрған оттай еді+.
10 Тағының алдынан отты өзен шығып, ағып жатты+. Оған миллиондаған періште қызмет етіп, жүз миллиондағаны алдында тұрды+. Сот+ өз ісін бастап, кітаптар ашылды.
11 Мен мүйіздің паңдана сөйлеп жатқанын+ естіп, қарап тұра бердім. Содан әлгі аң өлтіріліп, денесі отқа тасталып, жойылды.
12 Ал қалған аңдардан+ билік алынып қойылды. Әйтсе де өмірлері белгілі бір уақытқа, мерзімге дейін ұзартылды.
13 Сол түнгі көрініске қарап тұрғанымда, адам ұлына+ ұқсаған біреудің бұлттармен келе жатқанын көрдім. Оған Ежелден бар Тәңір Иенің+ алдына баруға рұқсат етілді, ол соның алдына апарылды.
14 Оған халықтар, ұлттар мен әртүрлі тілдің адамдары қызмет ету үшін, қолына билік+, даңқ+ пен патшалық берілді+. Оның билігі — еш бітпейтін мәңгілік билік, патшалығы ешқашан жойылмайды+.
15 Сонда мен, Даниял, көрген көріністерімнен қорқып, қатты абыржыдым+.
16 Осы жайттардың шынайы мәнін сұрау үшін, сол жерде тұрғандардың біріне бардым. Ол маған тіл қатып, бұлардың мәнін түсіндіріп берді:
17 “Үлкен-үлкен төрт аң+ жер бетінен шығатын төрт патшаны білдіреді+.
18 Бірақ Алла Тағаланың қасиеттілері+ патшалыққа ие болады+. Олар патшалықты ұзақ уақыт, тіпті мәңгілік бойы иемденеді+”.
19 Кейін мен басқаларына ұқсамайтын төртінші аң жайлы көбірек білгім келді. Бұл темір тістері мен мыс тырнақтары бар өте қорқынышты аң еді. Ол бәрін жалмап, қиратып, қалғанын аяқтарымен таптап жаншып жатты+.
20 Мен оның басындағы он мүйіз жайлы+, сондай-ақ кейін шыққан мүйіз жайлы да білгім келді. Осы мүйіздің алдында үш мүйіз түсіп қалған еді+, оның көздері және паңдана сөйлеп жатқан аузы болды. Ол басқа мүйіздерге қарағанда үлкенірек еді.
21 Мен қарап тұрғанда, осы мүйіз қасиеттілерге қарсы соғысып, олардан басым түсіп отырды+.
22 Сосын Ежелден бар Тәңір Иеге+ келіп, Алла Тағаланың қасиеттілерінің мүддесін қорғап үкім шығарды+. Сөйтіп, қасиеттілер патшалықты иемденетін алдын ала белгіленген уақыт келіп жетті+.
23 Ол былай деді: “Төртінші аң жер бетінде пайда болатын төртінші патшалықты білдіреді. Бұл патшалық басқа патшалықтардан өзгеше болады. Ол бүкіл жерді жалмап, таптап, талқандайды+.
24 Ал он мүйіз осы патшалықтан шығатын он патшаны білдіреді. Солардан кейін тағы бір патша шығады. Ол алдыңғыларға ұқсамайды, үш патшаны өзіне бағындырады+.
25 Ол Алла Тағалаға қарсы сөйлейтін болады+ және Алла Тағаланың қасиеттілерінің тынбай мазасын алады. Ол уақыттар мен заңды өзгертпек болады және оның қолына қасиеттілер бір уақыт, екі уақыт және жарты уақытқа* беріледі+.
26 Алайда Сот өз ісін бастап, оны жойып, көзін біржолата құрту үшін, одан билікті алып қойды+.
27 Аспан астындағы патшалықтардың патшалығы, билігі мен сән-салтанаты Алла Тағаланың қасиетті халқына берілді+. Олардың патшалығы — мәңгілік патшалық+, барлық үкімет оларға қызмет етіп, мойынсұнатын болады”.
28 Осымен менің көріп-естіген жайттарым аяқталды. Мен, Даниял, өз ойымнан қатты шошып, өңім құп-қу болып кетті. Сонда да бәрін көңіліме түйіп алдым”.
Сілтемелер
^ Немесе “мақтана”.
^ Сөзбе-сөз “тап-таза”.
^ Сөзбе-сөз “уақыт, уақыттар және жарты уақыт”.
