ЖАСТАРЫ отыздан асқан Чунг Кион мен Джули есімді ерлі-зайыпты осыдан бес жыл бұрын Австралияның Сидней қаласында жалпы ізашар болып қызмет етіп жүрген еді. “Біз көп уақыт алмайтын жұмыс істеп, өзімізге ыңғайлы өмір кешіп жатқанбыз,— дейді Чунг Кион.— Тұрып жатқан жерімізде ауа райы керемет, елдің тұрмыс жағдайы жақсы болатын. Туыстарымыз бен достарымыз жақын маңда тұратын”. Соған қарамастан Чунг Кион мен Джули өмірлерінде бірдеңе жетіспейтіндей сезінді. Себебі олар Ехобаға көбірек қызмет етуге мүмкіндіктері бар екенін білсе де, өзгерістер жасаудан тартынып жүрді.

2009 жылы өткен конгресте бір баяндама оларға қатты әсер етті. Баяндамашы қызмет аясын кеңейту жайлы айтып жатып, келесідей мысал келтірді: “Жүргізуші көлік қозғалғанда ғана оны оңға не солға бұра алады. Сол сияқты біз қызмет аясын кеңейту үшін әрекетке кіріскенде ғана, яғни мақсатымызға жету үшін күш салғанда ғана, Иса бізді бағыттайды” *. Баяндаманы тыңдап отырған әлгі ерлі-зайыпты бұл сөздерді тікелей өздеріне айтылғандай қабылдады. Сол конгресте Тайваньда миссионер болып қызмет ететін бір ерлі-зайыпты сұхбат берді. Олар қызметтеріндегі қуаныштарымен бөлісіп қана қоймай, онда әлі де үлкен қажеттіліктің бар екеніне баса назар аударды. Бұл сөздер де Чунг Кион мен Джулиге қатты әсер етті.

“Сол конгрестен кейін біз Ехобаға дұға айтып, Тайваньға көшу үшін батылдық сұрадық,— дейді Джули.— Дегенмен бізде қорқыныш болды. Біз өзімізді суға алғаш рет секірейін деп тұрған баладай сезіндік”. Қорқынышты жеңуге оларға Уағыздаушы 11:4-тегі (ЖД) сөздер көмектесті. Онда: “Жел баққан тұқым сеппес, бұлт аңдыған  өнім жинамас”,— делінген. “Содан біз “жел бағып, бұлт аңдудың” орнына “сеуіп, өнім жинауға” кірісуді шештік”,— дейді Чунг Кион. Бұл ерлі-зайыпты көп дұға етті, миссионерлердің өмірбаяндарын оқыды және Тайваньда қызмет етіп жүрген бауырластармен хат алысты. Сөйтіп, үш айдан кейін дүние-мүліктерін сатып, Тайваньға көшті.

Қазіргі кезде Тайваньның қажеттілік бар аумақтарында жүзден аса шетелдік бауырласымыз қызмет етуде. Олар Австралия, Британия, Канада, Франция, Жапония, Корея, Испания және Құрама Штаттарынан келген жастары 21—73 аралығындағы бауырластар. Солардың арасында елуден астам салтбасты әйел бауырлас бар. Бұл құлшынысты жариялаушыларға шетелде қызмет етуге не көмектесіп жүр? Сол жайында білейік.

Канадалық Лаура есімді салтбасты бауырласымыз батыс Тайваньда жалпы ізашар болып қызмет етеді. Он жылдай уақыт бұрын ол қызметке мүлдем шыққысы келмей қалған екен. Лаураның айтуынша, бұған “қызметке жиі шықпай, тәжірибе жинамағандығы” себеп болыпты. Сол кездері Канададағы достары оны Мексикаға бірге барып, бір ай қызмет етуге шақырады. “Алғаш рет көп уағыздағаным — осы. Бұл бір керемет екен!”— деп есіне алады Лаура.

Мексикадағы қызметтің Лаураға ұнағаны соншалық, Канадаға оралғанда ол шет тілді қауымға ауысуды ойлай бастады. Ол қытай тілін үйрену үшін курсқа жазылып, сол тілдегі топта қызмет етті. Кейін Тайваньда қызмет етуді мақсат етіп, 2008 жылдың қыркүйегінде сол жерге көшіп барды. “Жаңа ортаға үйренуім үшін маған бір жылдай уақыт қажет болды,— дейді Лаура.— Қазір Канадаға оралуды ойламаймын да”. Лаура уағыздауға ықыласының артқанын айтып: “Уағыздау маған қатты ұнайды. Киелі кітапты зерттейтін адамдардың Ехоба жайлы біліп, өмірлерін өзгертіп жатқанын көруден артық еш нәрсе жоқ екен. Тайваньда мен қызметтен келетін зор қуаныштың дәмін татудамын”,— деді.

Жастары отыз шамасындағы Брайан мен Мишель есімді ерлі-зайыпты сегіз жыл бұрын Құрама Штаттарынан Тайваньға көшіп барған еді. Алғашында олар қызметке ешбір үлес қосып жатпағандай сезінген болатын. Сонда бір тәжірибелі миссионер оларға былай деді: “Адамға бір трактат берудің өзі — уағыз ісіне қосылған үлкен үлес. Себебі ол адам Ехоба жайлы бірінші рет естіп тұрған болуы мүмкін”. Бұл сөздер Брайан мен Мишельге жігер беріп, күш сала беруге талпындырды. Ал басқа бір бауырлас оларға мынадай кеңес берді: “Ұнжырғаларың түспеу үшін, қытай тілін үйренудегі жетістіктеріңе күн сайын емес, конгресс сайын көңіл бөліңдер”. Уақыт өте Брайан мен Мишель тілді жақсы меңгеріп, қазір ізашарлық қызметтерінде көп нәтижеге қол жеткізіп жүр.

Шет тілін үйренуді қолға алуға сені не талпындыра алады? Қызмет еткің келген аумаққа барып, қауым кездесулеріне қатысып көр. Жергілікті бауырластармен араласып, олармен қызметке шық. Осыған қатысты Брайан былай дейді: “Көп адамның Патшалық жайлы ізгі хабарды тыңдағаны және бауырластардың ыстық сүйіспеншіліктері шетелде қызмет етудің қиындықтарына төтеп беруге көмектеседі”.

Тайваньға көшіп келгендердің кейбірі өздерін қамтамасыз ету үшін, жергілікті тұрғындарға ағылшын тілін үйретеді. Кристин мен Мишель болса теңіз өнімдерін сатады. Кристин былай дейді: “Мен мұндай кәсіппен бұрын-соңды айналыспаған едім, бірақ бұл жұмыс маған осы елде қалуыма мүмкіндік берді”. Уақыт өте Кристинның саудасы жүріп, тұрақты сатып алушылары пайда болды. Көп уақыт алмайтын сол жұмыстың арқасында ол отбасын асырап, басты ісі — ізашарлық қызметін атқарып жүр.

Уильям мен Дженифер есімді ерлі-зайыпты Құрама Штаттарынан Тайваньға сегіз жыл бұрын көшіп келген еді. Уильям былай деді: “Шет тілін үйрену, ізашарлық қызметті атқару, қауымның істерімен айналысу және отбасын қамтамасыз ету сияқты міндеттерді түгел алып жүреміз деп кейде қатты шаршайтынбыз”. Соған қарамастан бұл ерлі-зайыптыға қуаныштарын жоғалтпауға не көмектесті екен? Олар қолжетімді мақсаттар қоюға тырысты. Қытай тілін үйренуде өздерінен тым көп нәрсе талап етпеді. Бұл оларға тілді баяу меңгеріп жатса да, еңселерін түсірмеуге көмектесті.

Бірде бір аралаушы бақылаушы Уильямға “Болғанынан боладысы қызық” деп айтыпты. Басқаша айтқанда, алдымызға рухани мақсаттар қойғанда, соларға жету үшін жасап жатқан қадамдарымызға қуана білу керек. Уильямның айтуынша, бұл кеңес оларға жағдайға бейімделіп, жауапты бауырластардың кеңестеріне құлақ асуға және жаңа елде қызметтерін нәтижелі атқару үшін өзгерістер жасауға көмектесті. “Сондай-ақ біз бір сәт кідіріп, аралдың көз тоймас көрікті табиғатына тамсанатын да болдық”,— деп қосты Уильям.

Меган есімді салтбасты қыз бауырласымыз Құрама Штаттарынан Тайваньға көшіп барып, сонда ізашар болып қызмет етіп жүр. Уильям мен Дженифер сияқты, ол да қытай тілінде жақсырақ сөйлеуді мақсат ете жүріп, қызметтен қуаныш алуға тырысады. Демалыс сайын Меган бір топ бауырласпен бірге табиғаты тамаша Каосюн кемежайына барып уағыздайды. Мұнда ол кемеден кемеге жүріп, Бангладеш, Үндістан, Индонезия, Филиппин, Тайланд және Вануату сияқты түрлі елден келген балықшыларға ізгі хабарды жеткізеді. “Балықшылар кемежайда аз уақыт қана болатындықтан, біз олармен Киелі кітапты дәл сол жерде зерттейміз. Олардың  барлығына ізгі хабарды жеткізе алу үшін мен бір дегенде төрт-бес адаммен зерттеу өткіземін”,— дейді Меган. Ал тіл үйрену жайлы ол былай деді: “Тілді тезірек меңгергім келеді, бірақ бір бауырластың: — Қолыңнан келгенді істе, сонда Ехоба қызметіңе қолғабыс етеді — деген сөздерін есте ұстаймын”.

Британдық Кэти есімді бауырласымыз шетелге көшпес бұрын, салтбасты қыз бауырластардың қызмет етуіне қай жердің қауіпсіз болатынын білуге тырысты. Осы уайымы жайлы Ехобаға көп дұға еткен соң, ол бірнеше филиалға қызмет ету қауіпсіз болатын елдер жайлы сұрастырып хат жазды. Содан кейін хаттарының жауабын мұқият оқып, Тайваньда қызмет ету қауіпсіз әрі қолайлы болатынын түсінді.

Содан 2004 жылы, 31 жасында Кэти Тайваньға көшіп барып, барынша қарапайым өмір сүруге тырысты. Кэти былай дейді: “Мен жергілікті бауырластардан жеміс-жидектер мен көкөністерді қай жерден арзан бағаға сатып алуға болатынын сұрастырдым. Олардың кеңестерінің арқасында жинаған қаржымды үнемдеуді үйрендім”. Қарапайым өмір салтын ұстана беруге оған не көмектеседі екен? “Мен Ехобаға ішер ас пен киер киімді қанағат етуге көмектесуін сұрап жиі дұға етемін. Ехоба осы дұғаларыма қажеттіліктерім мен қалауларымды ажыратуды үйрету арқылы жауап беретінін сеземін. Қарапайым өмір кешкенім маған көп қуаныш әкеледі, себебі бұл рухани істерді алаңдамай атқаруға көмектеседі”,— дейді Кэти.

Кэтидің өмірі қарапайым ғана емес, қуанышқа толы да. Мұның себебін түсіндіріп, ол былай дейді: “Бұл жерде шындыққа сусаған адамдар көп. Оларға уағыздау бір ғанибет!” Кэти ізашарлық қызметін бастаған қалада қазір қытай тілінде сөйлейтін жеті қауым бар. Тайваньға алғаш келгенде онда небәрі екі қауым болған еді. “Осындай таңғаларлық өсімнің куәсі болып, егін жинау ісіне атсалысып жатқаным әр күніме ерекше қуаныш сыйлайды”,— дейді Кэти.

Мақаланың басында аталып кеткен Чунг Кион мен Джули есімді ерлі-зайыпты Тайваньдағы қызметтерінен көп қуаныш алуда. Бірақ алғашында Чунг Кион қытай тілін жетік білмегендіктен, қауымға ешқандай үлес қосып жатпағандай сезінді. Алайда қауымдағы жауапты бауырластар олай ойламады. “Қауымымыз екіге бөлінгенде, қызмет көмекшісі ретінде маған көптеген қосымша міндет жүктелді. Сонда нағыз қажеттілік бар жерде қызмет етіп жатқанымды түсіндім. Менің де көмегім қажет екенін сезінгенде, төбем көкке жетті”,— деп күлімсірейді ол. Қазір Чунг Кион ақсақал болып қызмет етуде. Әйелі Джули былай дейді: “Біз бұрын-соңды сезінбеген бақытқа бөлендік. Осындай жетістіктерге жетіп жатқанымыз зор қанағат әкеледі. Біз бұл жерге көмек береміз деп келген едік, бірақ бастан өткергеніміз біз үшін зор көмек болғанға ұқсайды. Осы жерде қызмет етуге мүмкіндік бергеніне Ехобаға дән ризамыз!”

Көптеген елде рухани орақ ісінде әлі де жұмысшылар қажет. Сен мектепті бітірген соң өміріңді не нәрсеге арнайтыныңды ойлап жүрсің бе? Я болмаса салтбасты болғандықтан, Ехобаның ұйымымен көбірек қызмет еткің келетін шығар? Отбасың Ехобаға қызмет етіп, есте қаларлықтай қызықты өмір кешкенін қалайсың ба? Зейнетке шыққандықтан өмірлік тәжірибеңмен көбірек адаммен бөліскің келетін болар? Солай болса, жариялаушылар қажет жерде қызмет етсең, ағыл-тегіл баталарға кенелетініңе сенімді бол.