Киелі кітапта “әке-шешеңді құрметте” деген өсиет жиі келтіріледі (Мұсаның 2-жазбасы 20:12; Мұсаның 5-жазбасы 5:16; Матай 15:4; Ефестіктерге 6:2, 3). Қазір ата-ананы құрметтеудің негізгі төрт жолын қарастырайық.

1.   Бағалау. Ата-анамыздың біз үшін жасаған барлық жақсылығын бағаласақ, оларды құрметтейтін боламыз. Бұған олардың берген ақыл-кеңесіне ризашылық білдіру де жатады (Нақыл сөздер 7:1, 2; 23:26). Киелі кітап бізді ата-анамызды мақтан тұтуға шақырады (Нақыл сөздер 17:6).

2.   Тілін алу. Әсіресе жас кезімізде, Құдайдың ата-анаға құзыр бергенін мойындайтын болсақ, оларды құрметтейтінімізді көрсетеміз. Киелі кітапта жастарға қатысты: “Балалар, әрдайым ата-аналарыңа мойынсұныңдар, өйткені бұл Иемізге ұнайды”,— деген сөздер бар (Қолостықтарға 3:20). Тіпті Иса пайғамбардың өзі бала кезінде ата-анасына мойынсұнған (Лұқа 2:51).

3.   Қадірлеу (Мұсаның 3-жазбасы 19:3; Еврейлерге 12:9). Бұл жиі біздің оларға не айтатынымыздан және қалай айтатынымыздан көрінеді. Рас, кейде ата-анамыздың кейбір әрекетінен оларды құрметтеу қиындау болатын шығар. Бірақ ондай жағдайда да, дөрекі сөзден не өрескел әрекеттен аулақ болуымыз керек (Нақыл сөздер 30:17). Киелі кітап әке-шешеге тіл тигізу ауыр күнә екенін айтады (Матай 15:4).

4.   Қамын жасау. Ата-ана қартайған кезде көмекке зәру болады. Осындайда мейлінше қамдарын жасайтын болсақ, оларды құрмет тұтатынымызды көрсетеміз (Тімөтеге 1-хат 5:4, 8). Мысалы, Иса пайғамбар да қайтыс боларының алдында анасының қамын жасап кеткен (Жохан 19:25—27).

 Қате пікір: Ата-анасын құрмет тұтатын адам ата-баба аруағына сиынуға міндетті.

 Шындық: Құдай Сөзі Киелі кітапта: “Ехоба Құдайыңа ғибадат етіп, тек соған ғана қызмет ет”,— делінген (Лұқа 4:8). Ата-баба аруағына сиынатын адамды Құдай жаратпайды. Оның үстіне, Киелі кітапта “өлгендердің ештеңе білмейтіні” айтылған. Олар өздеріне құрмет көрсетіліп жатқанынан мүлдем бейхабар. Ал тірі адамдарға олар жақсылық та, жамандық та жасай алмайды (Уағыздаушы 9:5, 10; Ишая 8:19).