نەحەميا 9:1—38
9 سول ايدىڭ جيىرما ٴتورتىنشى كۇنى يسرايلدىكتەر جينالدى. ولار ازالى كيىم* كيىپ، باستارىنا توپىراق شاشىپ، ورازا تۇتتى+.
2 يسرايلدىڭ وسى ٷرىم-بۇتاعى جاتجەرلىكتەردەن ٴبولىنىپ شىقتى+. ولار تۇرىپ، وزدەرىنىڭ كۇنالارى مەن اكەلەرىنىڭ قىلمىستارىن مويىندادى+.
3 سول جەردە تۇرعان جۇرتقا ٷش ساعات بويى* ەحوبا قۇدايلارى بەرگەن زاڭ كىتابى وقىلدى+. كەيىنگى ٷش ساعاتتا ولار كۇنالارىن مويىنداپ، ەحوبا قۇدايلارىنا تاعزىم ەتتى.
4 ەشۋا، باني، كادميەل، شەبانياح، بۋني، شەرەبياح+، باني جانە كەناني لەۋىلىكتەرگە ارنالعان مىنبەگە شىعىپ+، ەحوبا قۇدايلارىنا داۋىستاپ جالبارىندى.
5 سوسىن لەۋىلىكتەر، اتاپ ايتقاندا: ەشۋا، كادميەل، باني، حاشابنەياح، شەرەبياح، حودياح، شەبانياح جانە پەتاقيا — حالىققا بىلاي دەدى: «ورىندارىڭنان تۇرىپ، ەحوبا قۇدايلارىڭدى ماڭگى باقي ماداقتاڭدار+! ۋا، قۇداي، ٶز ەسىمىڭنىڭ داڭقىن شىعارا كور، ويتكەنى ول بارلىق ماداق پەن داڭق اتاۋلىدان جوعارى!
6 ەحوبا، سەن جالعىز قۇدايسىڭ+. كوكتى، كوكتەردىڭ كوگىن جانە ونداعىنىڭ ٴبارىن*، جەر مەن ونداعىنىڭ ٴبارىن، تەڭىز بەن ونداعىنىڭ ٴبارىن جاراتقان — سەنسىڭ. ولار سەنىڭ ارقاڭدا تىرشىلىك ەتۋدە. كوك اسكەرى ساعان ٴيىلىپ تاعزىم ەتەدى.
7 ەحوبا، سەن ىبىرامدى+ حالدەيلەردىڭ ۋر قالاسىنان الىپ شىعىپ+، وعان ىبىرايىم دەپ ەسىم بەرگەن+ شىنايى قۇدايسىڭ.
8 ونىڭ جۇرەگى وزىڭە ادال ەكەنىن كوردىڭ+، سوندىقتان ونىمەن كەلىسىم جاساپ، قاناحاندىقتاردىڭ، حەتتىكتەردىڭ، امورلىقتاردىڭ، پەرەزدىكتەردىڭ، ەبۋستىكتەر مەن گەرگەستىكتەردىڭ جەرىن وعان، ونىڭ ۇرپاقتارىنا، بەرۋدى ۋادە ەتتىڭ+. ٴسۇيتىپ، ۋادەلەرىڭدى ورىندادىڭ، ويتكەنى سەن ٵدىلسىڭ.
9 سەن اتا-بابالارىمىزدىڭ مىسىردا قالاي ازاپ شەككەنىن كوردىڭ+، قىزىل تەڭىزدىڭ جاعاسىندا ايعايلاپ جالىنعانىن ەستىدىڭ.
10 سوندا مەنمەنسىپ حالقىڭا ٴجابىر كورسەتكەن+ پەرعاۋىن مەن ونىڭ قىزمەتشىلەرىنە جانە سول ەلدىڭ كۇللى حالقىنا قارسى بەلگىلەر كورسەتىپ، كەرەمەتتەر جاسادىڭ+. وسىلاي ەسىمىڭنىڭ داڭقىن شىعاردىڭ، بۇل ٵلى كۇنگە دەيىن سولاي+.
11 حالقىڭنىڭ الدىندا تەڭىزدى قاق جاردىڭ، ولار تەڭىز ورتاسىنداعى قۇرعاق جەرمەن ارعى بەتكە ٶتتى+. ال قۋعىنشىلارىن بۋىرقانعان سۋعا لاقتىرعان تاستاي تەڭىز تۇبىنە باتىردىڭ+.
12 سەن حالقىڭدى كۇندىز بۇلت باعاناسى ارقىلى، ال تۇندە جۇرەتىن جولدارىنا جارىق ٴتۇسىرۋ ٷشىن وت باعاناسى ارقىلى جەتەلەپ وتىردىڭ+.
13 سيناي تاۋىنا ٴتۇسىپ+، كوكتەن ٴتىل قاتىپ+، ٵدىل شەشىمدەرىڭدى، اقيقات زاڭدارىڭدى*، ىزگى نۇسقاۋلارىڭ مەن بۇيرىقتارىڭدى بەردىڭ+.
14 قاسيەتتى دەمالىس كۇنىن* جاريالادىڭ+، قىزمەتشىڭ مۇسا ارقىلى بۇيرىقتارىڭدى، نۇسقاۋلارىڭ مەن زاڭدارىڭدى بەردىڭ.
15 اشىققاندا، كوكتەن نان بەردىڭ+، شولدەگەندە، جارتاستان سۋ شىعاردىڭ+. ولارعا بەرەمىن دەپ قولىڭدى كوتەرىپ انت ەتكەن جەرگە كىرىپ، ونى يەمدەنىڭدەر دەدىڭ.
16 ٴبىراق اتا-بابالارىمىز مەنمەندىكپەن ارەكەت ەتىپ+، توڭمويىن بولىپ+، زاڭدارىڭا مويىنسۇنباي قويدى.
17 ولار ساعان قۇلاق اسۋدان باس تارتتى+، ارالارىندا جاساعان كەرەمەت ىستەرىڭدى ۇمىتتى. توڭمويىندىققا سالىنىپ، مىسىرداعى قۇلدىققا قايتۋ ٷشىن وزدەرىنە باسشى تاعايىنداپ الدى+. ٴبىراق سەن كەشىرىمشىل، جاناشىر دا مەيىرىمدى، اشۋعا باياۋ، اينىماس سۇيىسپەنشىلىگىڭ مول قۇدايسىڭ+، سوندىقتان ولاردى تاستامادىڭ+.
18 ٴتىپتى بالقىتىپ بۇزاۋ ٴمۇسىنىن جاساپ الىپ: «مىناۋ — سەنى مىسىردان الىپ شىققان قۇدايىڭ»،— دەپ+، سەنى قورلايتىن ىستەر جاساعاندا دا،
19 مەيىرىمىڭ زور بولعاندىقتان، ولاردى شولدە تاستاپ كەتكەن جوقسىڭ+. كۇندىز جول كورسەتىپ كەلە جاتقان بۇلت باعاناسى، تۇندە جولدارىنا جارىق ٴتۇسىرىپ كەلە جاتقان وت باعاناسى ولاردى قالدىرمادى+.
20 اقىل-پاراسات دارىتۋ ٷشىن ىزگى رۋحىڭدى بەردىڭ+. ماننادان ايىرمادىڭ+، شولدەگەندە، سۋ بەرىپ تۇردىڭ+.
21 ٴشول دالادا 40 جىل بويى تاماقپەن قامتاماسىز ەتتىڭ+. ولار ەش نارسەدەن تارىقپادى. كيىم-كەشەكتەرى توزبادى+، اياقتارى دا ىسىنبەدى.
22 سەن پاتشالىقتار مەن حالىقتاردى ولاردىڭ قولىنا بەرىپ، جەرلەرىن ۇلەستىردىڭ+. وسىلايشا ولار حەشبون+ پاتشاسى سيحوننىڭ جانە باشان پاتشاسى وگتىڭ جەرىن يەمدەنىپ الدى+.
23 ولاردىڭ ٷرىم-بۇتاعىن اسپانداعى جۇلدىزدارداي سانسىز ەتىپ كوبەيتتىڭ+. اتا-بابالارىنا ۋادە ەتكەن جەرگە، ياعني كىرىپ، يەمدەنۋلەرى كەرەك جەرگە الىپ كەلدىڭ+.
24 سودان حالقىڭ كىرىپ، سول ەلدى يەمدەنىپ الدى+. سونداي-اق سول جەردىڭ تۇرعىندارى — قاناحاندىقتاردى باعىندىردىڭ+. سول جەردىڭ پاتشالارى مەن حالىقتارىنا قالاعاندارىن ىستەتۋ ٷشىن، ولاردىڭ قولىنا بەردىڭ.
25 بەكىنىستى قالالار+ مەن قۇنارلى جەرلەرىن+ باسىپ الىپ، دۇنيە-مۇلىككە تولى ۇيلەرىن، دايىن سۋ قويمالارىن، جۇزىمدىكتەرىن، ٴزايتۇن باقتارى+ مەن كوپتەگەن ماۋەلى اعاشتارىن يەمدەندى. ولار ٸشىپ-جەپ تويىندى، سەمىرىپ، سەنىڭ ىزگىلىگىڭنىڭ راقاتىن كوردى.
26 الايدا اتا-بابامىز ساعان مويىنسۇنباي، قارسى شىقتى+، زاڭىڭنان تەرىس اينالدى. وزىڭە قايتارۋ ٷشىن ەسكەرتۋ ايتقان پايعامبارلارىڭدى ٶلتىردى، سوراقى ىستەر جاساپ، سەنى قورلادى+.
27 سول ٷشىن دۇشپاندارىنىڭ قولىنا بەردىڭ+، ولار حالىققا ازاپ شەككىزدى+. ازاپ كورگەن كەزىندە حالقىڭ ساعان جالبارىنىپ ايقايلادى، سوندا كوكتەن ولاردى ەستىدىڭ. مەيىرىمىڭ زور بولعاندىقتان، قۇتقارۋشىلار جىبەرىپ، جاۋلارىنىڭ قولىنان ولاردى ازات ەتىپ وتىردىڭ+.
28 ٴبىراق ەركىن ٶمىر سۇرە باستاعاندا، كوز الدىڭدا قايتادان جامان ىستەر جاسايتىن+. سوندا حالقىڭدى قايتادان جاۋلارىنىڭ قولىنا بەرىپ، ولارعا ۇستەمدىك ەتكىزدىڭ+. سول شاقتا ولار وزىڭە قايتا بۇرىلىپ، كومەك سۇراپ جالبارىناتىن+. ال سەن جالبارىنىشتارىنا كوكتەن قۇلاق سالىپ، مەيىرىمىڭ زور بولعاندىقتان، قايتا-قايتا قۇتقارىپ وتىردىڭ+.
29 زاڭىڭا بەت بۇرعىزۋ ٷشىن قانشا ەسكەرتۋ ايتساڭ دا، ولار مەنمەنسىپ، زاڭدارىڭا قۇلاق اسۋدان باس تارتاتىن+. ۇستانعان ادامعا ٶمىر سيلايتىن نۇسقاۋلارىڭدى+ ورىنداماي، كۇنا جاسادى. قىڭىرلانىپ تەرىس اينالدى، توڭمويىن بولىپ، تىڭداۋدان باس تارتتى.
30 سەن ولارعا كوپ جىل بويى شىدامدىلىق تانىتتىڭ+، پايعامبارلارىڭا ٶز رۋحىڭدى دارىتىپ، سولار ارقىلى حالقىڭدى ەسكەرتتىڭ، ٴبىراق ٴبارىبىر قۇلاق اسپادى. اقىر سوڭىندا، اينالاداعى حالىقتاردىڭ قولىنا بەردىڭ+.
31 مەيىرىمىڭ زور بولعاندىقتان، ولاردى قۇرتىپ جىبەرمەدىڭ+ نە تاستاپ كەتپەدىڭ. ويتكەنى سەن جاناشىر دا مەيىرىمدى قۇدايسىڭ+.
32 ال ەندى، ۋا، قۇدايىمىز، ۇلى دا قۇدىرەتتى، ايبىندى، كەلىسىمىن بۇزبايتىن جانە اينىماس سۇيىسپەنشىلىك تانىتاتىن قۇدايىمىز+، ٴبىزدىڭ، پاتشالارىمىزدىڭ، باسشىلارىمىزدىڭ+، ٴدىني قىزمەتكەرلەر+ مەن پايعامبارلارىمىزدىڭ+، اتا-بابامىزدىڭ، بۇكىل حالقىڭنىڭ باسىنا اسسيريا پاتشالارىنىڭ+ كۇنىنەن بەرى ٴتۇسىپ كەلە جاتقان قيىندىقتاردى ەلەۋسىز قالدىرما!
33 باسىمىزعا نە تۇسسە دە، سەن ٵدىل بولدىڭ. قانشا ادالدىق تانىتساڭ دا، ٴبىز زۇلىم ىستەر جاساي بەردىك+.
34 پاتشالارىمىز دا، باسشىلارىمىز دا، ٴدىني قىزمەتكەرلەرىمىز بەن اتا-بابالارىمىز دا زاڭىڭدى ۇستانبادى، بۇيرىقتارىڭا جانە ساقتاندىرماق بولىپ ايتقان ەسكەرتۋلەرىڭە دەن قويمادى.
35 ٴتىپتى ٶز پاتشالىعىندا، سەن بەرگەن مول يگىلىكتىڭ راقاتىن كورىپ، ٶزىڭ سيلاعان بايتاق تا قۇنارلى ولكەدە تۇرىپ جاتسا دا، ولار ساعان قىزمەت ەتپەدى+، جامان ىستەرىن تاستامادى.
36 ەندى، مىنە، ٴبىز قۇلمىز+. ٴيا، ٶزىڭ اتا-بابامىزعا ٶنىمىن جەپ، يگىلىگىن كور دەپ بەرگەن جەردە قۇل بولىپ ٴجۇرمىز.
37 بۇل جەردىڭ مول ٶنىمىن جاتجەرلىك پاتشالار جەۋدە. ولاردى سەن كۇنامىز ٷشىن ۇستىمىزدەن بيلىك ەتكىزىپ قويدىڭ+. ولار وزىمىزگە دە، مالىمىزعا دا ٶز بىلگەندەرىنشە قوجايىن بولۋدا. سودان ٴبىز قاتتى ازاپ شەگۋدەمىز.
38 وسىنىڭ ٴبارىن ەسكەرىپ، بەرىك ۋادە بەرىپ تۇرمىز+. ونى جازىپ، باسشىلارىمىزدىڭ، لەۋىلىكتەر مەن ٴدىني قىزمەتكەرلەرىمىزدىڭ+ مورىمەن بەكىتتىك».
سىلتەمەلەر
^ تۇسىندىرمەنى قاراڭىز.
^ سوزبە-ٴسوز «كۇندىزگى ۋاقىتتىڭ تورتتەن ٴبىر بولىگى».
^ سوزبە-ٴسوز «كۇللى اسكەرىن».
^ نەمەسە «سەنىمدى زاڭدارىڭدى».
^ تۇسىندىرمەنى قاراڭىز.
