مۇسانىڭ 1-جازباسى 39:1—23
39 ىسماعۇلدىقتار+ ٴجۇسىپتى مىسىرعا اكەلگەننەن كەيىن+، ونى پەرعاۋىننىڭ ساراي قىزمەتكەرى ٵرى باس قورعاۋشىسى پوتيفار ەسىمدى مىسىرلىق ساتىپ الدى+.
2 ەحوبا قۇداي جۇسىپكە جار بولعاندىقتان+، ول ٵربىر ىسىندە تابىستى بولىپ، مىسىرلىق قوجايىنىنىڭ ۇيىندە ٴبىراز مىندەتتەر اتقاردى.
3 قوجايىنى وعان ەحوبانىڭ جار بولىپ جۇرگەنىن جانە ەحوبا ونىڭ بارلىق ٸسىن وڭعارىپ جاتقانىن بايقادى.
4 ٴجۇسىپ قوجايىنىنىڭ كوڭىلىنەن شىققاندىقتان، ونى جەكە قىزمەتشىسى ەتىپ الدى. ول بۇكىل ٷيىن جانە يەلىگىندەگىنىڭ ٴبارىن ونىڭ قولىنا بەردى.
5 قوجايىنى بۇكىل ٷيى مەن يەلىگىندەگىنىڭ ٴبارىن وعان بەرگەن كەزدەن باستاپ، ەحوبا ٴجۇسىپ ٷشىن مىسىرلىقتىڭ ۇيىنە باتاسىن توكتى. ەحوبا ونىڭ ۇيدەگى بولسىن، دالاداعى بولسىن — بار يەلىگىن جارىلقادى+.
6 اقىرىندا، ول وزىندەگىنىڭ ٴبارىن جۇسىپكە سەنىپ تاپسىرىپ، جەيتىن تاماعىنان باسقا ەش نارسەنى ويلامادى. ۋاقىت وتە كەلە ٴجۇسىپ دەنە ٴبىتىمى كەلىستى، ادەمى جىگىت بولدى.
7 قوجايىنىنىڭ ايەلى جۇسىپكە كوز سالا باستادى. ٴسۇيتىپ، وعان: «مەنىمەن جات»،— دەدى.
8 ٴبىراق ٴجۇسىپ باس تارتىپ، بىلاي دەدى: «مەن وسىندا جۇرگەندىكتەن، قوجايىنىم ۇيىندەگى ەش نارسەنى ۋايىمدامايدى، ول ٴبارىن ماعان سەنىپ تاپسىرعان.
9 بۇل ۇيدە مەنەن جوعارى ەشكىم جوق. قوجايىنىم وزىڭىزدەن باسقانىڭ ٴبارىن قولىما بەردى، ويتكەنى ٴسىز ونىڭ زايىبىسىز. قالايشا مەن وسىنداي اۋىر قىلمىس جاساپ، قۇداي الدىندا كۇناعا باتپاقپىن+؟!»
10 ايەل كۇن سايىن وسىلاي مازالاعانىمەن، ٴجۇسىپ ەشقاشان ايتقانىنا كونىپ، ونىمەن جاقىنداسقان دا، بىرگە ۋاقىت وتكىزگەن دە ەمەس.
11 بىردە ول شارۋاسىمەن ۇيگە كىرگەندە، ىشتە قىزمەتشىلەردىڭ ەشقايسىسى جوق ەكەن.
12 سوندا ايەل ونىڭ كيىمىنەن ۇستاي الىپ: «مەنىمەن جاتشى»،— دەدى. ٴبىراق ٴجۇسىپ سىرتقا قاشا جونەلدى، كيىمى بولسا ايەلدىڭ قولىندا قالىپ قويدى.
13 كيىمىن تاستاپ، ونىڭ سىرتقا قاشا جونەلگەنىن كورگەن ايەل
14 سىرتتاعى قىزمەتشىلەرىنە ايعايلاپ: «قاراڭدارشى! كۇيەۋىم اكەلگەن مىنا ەۆرەي ٴبىزدى مازاق ەتپەكشى. ول ۇيگە كىرىپ، مەنى زورلاماق بولدى! ٴبىراق مەن بار داۋسىممەن ايقاي سالدىم.
15 جان داۋسىم شىققانى سول ەدى، ول كيىمىن تاستاعان كۇيى سىرتقا قاشا جونەلدى»،— دەدى.
16 سودان ول كۇيەۋى ۇيگە كەلگەنشە، ٴجۇسىپتىڭ كيىمىن جانىنا قويىپ قويدى.
17 كۇيەۋى كەلگەندە دە، ول: «الىپ كەلگەن ەۆرەي قۇلىڭ مەنى مازاق ەتپەك بولدى.
18 ٴبىراق مەن داۋىس كوتەرىپ ايعايلاعان سوڭ، كيىمىن تاستاي سالا قاشتى»،— دەدى.
19 ايەلىنىڭ «سەنىڭ قۇلىڭ ماعان وسىلاي دا وسىلاي ىستەدى» دەگەن سوزدەرىن ەستىگەندە، قوجايىن قاتتى اشۋلاندى.
20 ول ٴجۇسىپتى پاتشانىڭ تۇتقىندارى جاتقان تۇرمەگە قاماتىپ تاستادى. وسىلايشا ٴجۇسىپ تۇرمەدە جاتتى+.
21 ەحوبا جۇسىپكە جار بولىپ، وعان اينىماس سۇيىسپەنشىلىگىن توكتى، وسىنىڭ ارقاسىندا ول تۇرمە باستىعىنىڭ ىقىلاسىنا يە بولدى+.
22 سوندىقتان تۇرمە باستىعى بارلىق تۇتقىندى ٴجۇسىپتىڭ قاراماعىنا تاپسىردى. ول نە ايتسا، ولار سونى ىستەيتىن بولدى+.
23 تۇرمە باستىعى جۇسىپكە تاپسىرعان ٸستىڭ ەشقايسىسىن ۋايىمدامايتىن. ويتكەنى ەحوبا وعان جار بولدى جانە ەحوبا ونىڭ بارلىق ٸسىن وڭعارىپ وتىردى+.
