71-تاراۋ
پارىزشىلدار زاعيپ بولعان كىسىمەن تەكەتىرەستى
-
كوزى اشىلىپ ساۋىققان كىسىمەن پارىزشىلدار تەكەتىرەستى
-
«سوقىر» ٴدىنباسىلار
پارىزشىلدار يسانىڭ زاعيپ ادامدى ساۋىقتىرعانىن مويىنداعىلارى كەلمەي، ونىڭ اتا-اناسىن شاقىرتتى. ولار پارىزشىلدارعا جاقپاي قالسا، وزدەرىنىڭ «ٴماجىلىسحانادان شىعارىلۋى» مۇمكىن ەكەنىن بىلەتىن (جوحان 9:22). ال ياھۋديلەردىڭ اراسىنان الاستاتىلعان وتباسى الەۋمەتتىك جاعىنان دا، قارجىلاي دا قاتتى قيىندىق كورەر ەدى.
پارىزشىلدار زاعيپ بولعان كىسىنىڭ اتا-اناسىنان: «زاعيپ بولىپ تۋىلدى دەگەن ۇلدارىڭ وسى ما؟ ول قالايشا كورەتىن بولدى؟»— دەپ سۇرادى. سوندا ولار: «مۇنىڭ ۇلىمىز ەكەنىن جانە زاعيپ بولىپ تۋىلعانىن بىلەمىز. ٴبىراق قالاي كورەتىن بولعانىن دا، كوزىن كىم اشقانىن دا بىلمەيمىز»،— دەپ جاۋاپ بەردى. ۇلدارى بولعان جايدى ايتىپ بەرگەن كۇننىڭ وزىندە، ولار ساقتىقپەن: «وزىنەن سۇراڭىزدار. بالا ەمەس قوي، ٶزى ايتىپ بەرسىن»،— دەدى (جوحان 9:19—21).
پارىزشىلدار ساۋىققان ادامدى قايتىپ شاقىرتىپ: «قۇداي الدىندا شىنىڭدى ايت! ٴبىز سول ادامنىڭ كۇناكار ەكەنىن بىلەمىز»،— دەدى. وسىلاي يساعا قارسى دالەل بار دەگەنگە مەڭزەپ، ونى قورقىتپاقشى. ٴبىراق الگى كىسى: «ول كۇناكار ما، جوق پا، بىلمەيمىن. بار بىلەتىنىم — زاعيپ ەدىم، ال قازىر كورەتىن بولدىم»،— دەپ، ولاردىڭ ايىپتاۋى ورىنسىز ەكەنىن كورسەتتى (جوحان 9:24، 25).
ماسەلەنىڭ وسىمەن بىتكەنىن قالاماعان پارىزشىلدار تاعى دا: «ول ساعان نە ىستەدى؟ كوزىڭدى قالاي اشتى؟»— دەپ سۇرادى. سوندا زاعيپ بولعان كىسى تايسالماستان: «سىزدەرگە ايتتىم عوي، ٴبىراق تىڭدامادىڭىزدار. نەگە بۇنى تاعى ەستىگىلەرىڭىز كەلەدى؟ الدە سىزدەر دە ونىڭ شاكىرتى بولعىلارىڭىز كەلە مە؟»— دەپ جاۋاپ قايىردى. بۇعان زىعىردانى قايناعان پارىزشىلدار: «ٶزىڭ سونىڭ شاكىرتىسىڭ، ال ٴبىز مۇسانىڭ شاكىرتىمىز! ٴبىز قۇدايدىڭ مۇسامەن سويلەسكەنىن بىلەمىز، ال الگى ادامنىڭ قايدان ەكەنىن بىلمەيمىز»،— دەدى (جوحان 9:26—29).
مۇنداي جاۋاپقا ول ٶزىنىڭ تاڭعالعانىن جاسىرماي: «ونىڭ قايدان ەكەنىن بىلمەيتىندەرىڭىز قىزىق ەكەن. ول مەنىڭ كوزىمدى اشتى عوي»،— دەدى. سوسىن قۇدايدىڭ قانداي ادامدى تىڭدايتىنىنا جانە قولدايتىنىنا قيسىندى ٴۋاج كەلتىرىپ، بىلاي دەدى: «قۇدايدىڭ كۇناكارلاردىڭ دۇعاسىنا قۇلاق سالمايتىنىن بىلەمىز. ٴبىراق ودان قورقاتىن ٵرى ونىڭ ەركىن ورىندايتىن ادامعا قۇلاق اسادى. بىرەۋ زاعيپ بولىپ تۋىلعان ادامنىڭ كوزىن اشىپتى دەگەندى بۇعان دەيىن ەشكىم ەستىگەن ەمەس». سوندىقتان ول: «ەگەر بۇل ادام قۇدايدان بولماسا، ەشتەڭە ىستەي الماس ەدى»،— دەپ توقەتەرىن ايتتى (جوحان 9:30—33).
مۇنداي قيسىنعا ايتار ٴسوز تاپپاعان سوڭ، پارىزشىلدار: «سەن تۇلا بويىڭ كۇناكار بولىپ تۋىلدىڭ، ەندى ٴبىزدى ۇيرەتپەكسىڭ بە؟»— دەپ، قايىرشىنىڭ ٶزىن قورلاپ، ونى قۋىپ شىقتى (جوحان 9:34).
يسا كوزى اشىلعان كىسىمەن بولعان جايتتى ەستىدى. ونى كەزدەستىرگەندە: «ادام ۇلىنا سەنەسىڭ بە؟»— دەپ سۇرادى. ول: «مىرزا، ونىڭ كىم ەكەنىن ايتىڭىزشى، مەن وعان سەنەيىن»،— دەدى. يسا: «سەن ونى كوردىڭ. سەنىمەن سويلەسىپ تۇرعان — سول»،— دەپ اشىق ايتتى (جوحان 9:35—37).
بۇعان ول: «يەم، سەنەمىن»،— دەپ جاۋاپ بەردى دە، سەنەتىنىن جانە قۇرمەتتەيتىنىن كورسەتىپ، وعان تاعزىم ەتتى. سوندا يسا وعان: «مەن بۇل دۇنيەگە سوقىرلاردىڭ كوزى اشىلسىن، ال كورەتىندەر سوقىر بولسىن دەپ، وسى دۇنيەنىڭ سوتتالۋىنا نەگىز بەرۋ ٷشىن كەلدىم»،— دەپ ماڭىزدى جايتقا كوڭىل ٴبولدى (جوحان 9:38، 39).
سول جەردە تۇرعان پارىزشىلدار وزدەرىنىڭ سوقىر ەمەس ەكەندەرىن بىلەتىن. ٴبىراق ولاردىڭ رۋحاني جەتەكشى بولعانسىماق كەيىپتەرى شى؟ وزدەرىن قورعاۋ ٷشىن ولار: «سوندا ٴبىز دە سوقىرمىز با؟»— دەپ سۇرادى. بۇعان يسا: «ەگەر سوقىر بولساڭدار، كۇنالارىڭ بولماس ەدى. الايدا «كوزىمىز كورەدى» دەگەندەرىڭ ٷشىن كۇنالارىڭ مويىندارىڭدا قالادى»،— دەپ جاۋاپ قاتتى (جوحان 9:40، 41). ولار يسرايلدىڭ تالىمگەرلەرى بولماعاندا، يسانىڭ ٴماسىح ەكەنىن مويىندامايتىندارىن تۇسىنۋگە بولار ەدى. الايدا زاڭدى جەتىك بىلە تۇرا وسىلاي ىستەگەندەرى اۋىر كۇنا بولىپ تابىلادى.
