قايسىسى دۇرىس؟
قاتتى قوبالجىعان ٴماديدىڭ ماڭدايىنان شىپ-شىپ تەر شىقتى. بۇگىنگى ساباقتىڭ تاقىرىبى —ەۆوليۋسيا تەورياسى. ونىڭ قۇرمەت تۇتاتىن ٴمۇعالىمى بۇل ٸلىمنىڭ ٴتۇرلى اڭىز-اڭگىمەلەرگە شەك قويىپ، عىلىمعا زور ىقپال ەتكەنىن ايتىپ بولدى دا، وقۋشىلارىن ٶز ويلارىمەن بولىسۋگە شاقىردى.
ٴمادي ٶزىن جولايرىقتا تۇرعانداي سەزىندى. اتا-اناسى وعان جەر مەن ونداعى تىرشىلىك اتاۋلىنى قۇداي جاراتتى دەپ ۇيرەتكەن ەدى. ولاردىڭ ايتۋىنشا، كيەلى كىتاپتا سيپاتتالعان جاراتۋ ٸسى — سەنۋگە تۇرارلىق شىندىق، ال ەۆوليۋسيا ٸلىمى — جاي عانا تەوريا، ياعني دالەلدەنبەگەن بولجام. ٴمۇعالىمىنىڭ دە، اتا-اناسىنىڭ دا نيەتتەرى جاقسى ەكەنىندە كۇمان جوق. الايدا ٴمادي قايسىسىنا سەنۋ كەرەك؟
وسىعان ۇقساس جاعدايلار مەكتەپ قابىرعاسىندا جىل سايىن ورىن الىپ جاتادى. سوندا ماديدىكىندەي جاعدايعا ۇشىراعان وقۋشىلار نە ىستەۋ كەرەك؟ ارينە، الدىمەن وڭ مەن سولىن تانىپ العان سوڭ، وزدەرىنىڭ ناقتى ٴبىر توقتامعا كەلگەندەرى دۇرىس. ٴيا، ولاردىڭ ەۆوليۋسيا مەن جاراتۋ ىسىنە قاتىستى ايعاقتاردى مۇقيات قاراستىرىپ، سوسىن، قايسىسىنا سەنەتىندەرىن شەشىپ العاندارى ٴجون.
كيەلى كىتاپ وزگەلەردىڭ سوزىنە كوز جۇمىپ سەنە بەرمەۋگە شاقىرادى. وندا: «اڭعال كەز كەلگەن سوزگە نانار، ەستى قادامىن بايقاپ باسار»،— دەلىنگەن (ناقىل سوزدەر 14:15). سونداي-اق «اقىل-ويىمىزدى» قولدانىپ، ەستىپ-بىلگەندەرىمىزدىڭ دۇرىس-بۇرىستىعىنا كوز جەتكىزىپ وتىرۋىمىز كەرەكتىگى دە ايتىلعان (ريمدىكتەرگە 12:1، 2 جد).
بۇل كىتاپشا مەكتەپتە جاراتۋشى جايلى ٴسوز قوزعالعانىن قالايتىن ٴدىني توپتاردى قولداۋ ٷشىن جازىلعان جوق. ونىڭ ماقساتى — كيەلى كىتاپتاعى جاراتۋ ٸسىن جوققا شىعارىپ، تىرشىلىك كەزدەيسوق پايدا بولدى دەپ ۇيرەتەتىندەردىڭ كەلتىرىپ جۇرگەن دالەلدەرىن سارالاپ شىعۋ.
جاسۋشا ٵربىر ٴتىرى اعزانىڭ نەگىزى بولىپ تابىلادى، سول سەبەپتى اڭگىمە كوبىنشە سونىڭ توڭىرەگىندە ٶربيدى. بروشيۋرانى وقۋ بارىسىندا جاسۋشانىڭ قۇرىلىسىنا قاتىستى كەيبىر جايتتاردى ٴبىلىپ، تاڭعالۋىڭ ابدەن مۇمكىن. سونداي-اق ەۆوليۋسيا تەورياسىنا قاتىستى بولجامداردى سارالاپ كورۋگە مۇمكىندىگىڭ بولادى.
ەرتەلى-كەش ٵربىر ادام «تىرشىلىك جاراتىلدى ما، الدە ەۆوليۋسيانىڭ ناتيجەسىندە پايدا بولدى ما؟» دەگەن سۇراقپەن بەتپە-بەت كەلەدى. بۇل جايلى سەن دە ويلانعان بولارسىڭ. وسى بروشيۋرادا تىرشىلىكتىڭ جاراتۋشىسى بار ەكەنىنە كوپ ادامنىڭ كوزىن جەتكىزگەن دالەلدەر كەلتىرىلەدى.
