كيەلى كىتاپ پايعامبارلىقتارى مەن تاريحي دەرەكتەر يسانىڭ 1914-‏جىلى كوكتە بيلىك ەتە باستاعانىن جانە شايتان بيلەگەن دۇنيەنىڭ اقىرى،‏ ياعني سوڭعى كۇندەردىڭ باستالعانىن ايقىن ەتەدى.‏ يسا پاتشا تاعىنا وتىرعاننان كەيىن نە ىستەدى؟‏ ول بىردەن جەردەگى قىزمەتشىلەرىن ۇلى بابىلدىڭ تۇتقىندىعىنان بوساتتى ما؟‏ ول 1914-‏جىلى «ادال دا اقىلدى قۇلدى» تاعايىنداپ،‏ ەگىن جيناۋ ىسىنە كىرىستى مە؟‏ (‏مات.‏ 24:‏45‏)‏.‏

جوق،‏ ولاي دەي المايمىز.‏ ەسىڭىزدە بولسا،‏ ەلشى پەتىر رۋحتىڭ جەتەلەۋىمەن سوتتىڭ «قۇداي ۇيىنەن باستالاتىنىن» ايتقان بولاتىن (‏پەت.‏ 1-‏ح.‏ 4:‏17‏)‏.‏ مالاحي پايعامبار دا ەحوبا ٶز عيباداتحاناسىنا «كەلىسىم حابارشىسىمەن» بىرگە،‏ ياعني يسامەن بىرگە كەلەتىن ۋاقىت جايىندا الدىن الا ايتقان (‏مالح.‏ 3:‏1—‏5‏)‏.‏ بۇل —‏ سىناق پەن تازارۋدان ٶتۋ كەزەڭى.‏ تاريحي دەرەكتەر وسى ايتىلعان پايعامبارلىق سوزدەردى راستاي ما؟‏

 البەتتە!‏ 1914-‏جىلدان باستاپ 1919-‏جىلدىڭ باسىنا دەيىن كيەلى كىتاپ زەرتتەۋشىلەرى (‏كەيىنىرەك ەحوبا كۋاگەرلەرى دەپ اتالعان)‏ سىناق پەن تازارۋ كەزەڭىنەن ٶتتى.‏ 1914-‏جىلى دۇنيەنىڭ سوڭى كەلەدى دەگەن ۇمىتتەرى اقتالماي،‏ كوبىسىنىڭ قاتتى كوڭىلى قالدى.‏ ال 1916-‏جىلى قۇداي حالقىنا بەلسەنە جەتەكشىلىك ەتكەن چارلز ت.‏ راسسەلل كوز جۇمعاندا،‏ جاعداي ودان بەتەر ۋشىقتى.‏ راسسەلل باۋىرلاسقا قاتتى ۇيرەنىپ قالعان كەيبىرەۋلەر ونىڭ ورنىنا تاعايىندالعان دجوزەف ف.‏ رۋتەرفوردقا قارسى شىعۋلارىن قويمادى.‏ الاۋىزدىق كۇشەيگەن ۇستىنە كۇشەيىپ،‏ 1917-‏جىلى ۇيىم ەكىگە بولىنۋگە شاق قالدى.‏ ول —‏ ول ما،‏ 1918-‏جىلى ٴ‌دىنباسىلاردىڭ ۇگىتتەۋىمەن بولسا كەرەك،‏ رۋتەرفورد باۋىرلاس پەن تاعى جەتى باۋىرلاسقا جالعان ايىپ تاعىلىپ،‏ ولار تۇرمەگە قامالدى.‏ ارتىنشا برۋكليندەگى باس باسقارما دا جابىلدى.‏ ٴ‌يا،‏ قۇداي حالقى ٵلى دە ۇلى بابىلدىڭ تۇتقىندىعىندا ەدى!‏

ٴ‌بىراق 1919-‏جىلى جاعداي قاس قاعىمدا وزگەرىپ شىعا كەلدى!‏ وسى جىلدىڭ باسىندا رۋتەرفورد باۋىرلاس پەن ونىڭ سەرىكتەرى تۇرمەدەن بوساتىلدى.‏ سوسىن ولار ەش كىدىرمەستەن ىسكە كىرىستى.‏ قىسقا ۋاقىتتىڭ ىشىندە كونگرەسس ۇيىمداستىرىلدى.‏ سول ايتۋلى كونگرەستە «التىن عاسىر» (‏قازىر «ويانىڭدار!‏»)‏ جۋرنالى جارىق كوردى.‏ بۇل جۋرنال ۋاعىز ناۋقاندارىندا قولدانۋعا ارنالعان قۇرال بولماق ەدى.‏ بۇعان قوسا،‏ ٵر قاۋىمدا ۋاعىز ٸسىن ۇيىمداستىرىپ،‏ ونى العا جىلجىتاتىن باقىلاۋشى تاعايىندالدى.‏ وسى ٸستى ۇيىمداستىرۋعا ۇلكەن قولعابىس بولاتىن «بيۋللەتەن» اتتى باسىلىم دا (‏قازىر «ماسىحشىلىك ٶمىرىمىز بەن قىزمەتىمىز» جۇمىس داپتەرى)‏ ٴ‌دال وسى 1919-‏جىلى جارىق كوردى.‏

بۇنىڭ ٴ‌بارى نەنى ٴ‌بىلدىردى؟‏ ٴ‌يا،‏ ٴ‌ماسىح ٶز حالقىن ۇلى بابىلدىڭ تۇتقىندىعىنان بوساتتى!‏ ٴ‌دال وسى جىلى يسا «ادال دا اقىلدى قۇلدى» تاعايىندادى،‏ ەگىن جيناۋ جۇمىسىنا باستاما بەردى.‏ وسى جىلدان بەرى ۋاعىز ٸسى زور قارقىنمەن العا جىلجىپ كەلەدى.‏ راسىندا دا،‏ 1919-‏جىل —‏ ەلەۋلى جىل!‏