وقىرمان ساۋالدارى
ٴداۋىت ٴزابۇر 61:8 دە قۇدايدىڭ ەسىمىن «ماڭگى باقي» ماداقتايمىن دەۋىمەن اسىرا سىلتەپ جىبەرگەن جوق پا؟
جوق، ٴداۋىت مۇندا شىندىقتى ايتتى.
قازىر ونىڭ سول تارماقتا جانە سوعان ۇقساس باسقا دا تارماقتاردا ايتقان سوزدەرىنە نازار اۋدارايىق. ول بىلاي دەگەن: «ال مەن ەسىمىڭدى انگە قوسىپ، ماڭگى باقي ماداقتايمىن، بەرگەن انتتارىمدى كۇن سايىن ورىندايمىن»؛ «ۋا، ەحوبا قۇدايىم، سەنى بار جۇرەگىممەن داڭقتايمىن، ماڭگىلىك بويى ەسىمىڭدى ماداقتايمىن»؛ «ەسىمىڭدى ماڭگى باقي ماداقتايمىن» (ٴزاب. 61:8؛ 86:12؛ 145:1، 2).
بۇل جەردە ٴداۋىت «سول كۇيى ولمەي، ماڭگى باقي ٶمىر ٴسۇرىپ كەتەمىن» دەپ ويلاماعان. ول ادامداردىڭ كۇنانىڭ كەسىرىنەن ولەتىنىن جاقسى بىلگەن جانە ٶزىنىڭ دە كۇناكار ەكەندىگىن مويىنداعان (مۇس. 1-ج. 3:3، 17—19؛ ٴزاب. 51:4، 5). ول ٴتىپتى ىبىرايىم، ىسقاق، جاقىپ سياقتى ادال كىسىلەردىڭ دە ومىردەن وتكەنىن بىلەتىن (ٴزاب. 37:25؛ 39:4). ٴداۋىت ٶزىنىڭ دە كۇندەردىڭ كۇنىندە كوز جۇماتىنىن بىلگەن. ٴبىراق ٴزابۇر 61:8 دەگى سوزدەرى ونىڭ قۇدايدى ماڭگى باقي ماداقتاعىسى كەلەتىنىن جانە ماڭگى ماداقتاۋعا بەكىنگەنىن كورسەتەدى، ياعني ٴداۋىت سوڭعى دەمى شىققانشا سولاي ەتپەك ەدى (سام. 2-ج. 7:12).
ٴداۋىت كەيبىر جىرلارىندا باسىنان وتكەن وقيعالاردى جازعان. بۇعان 18 ٸنشى، 51 مەن 52 ٴنشى ٴزابۇر جىرلارىنىڭ كىرىسپە سوزدەرى دالەل. ٶزى باعۋشى بولعاندىقتان ٴداۋىت 23 ٸنشى جىرىندا ەحوبانى قويلارىن جەتەلەيتىن، جۋساتاتىن جانە قورعايتىن باعۋشىعا تەڭەيدى. ول وسىنداي قامقور باعۋشى ەحوباعا قىزمەت ەتۋگە «بار عۇمىرىن» ارناعىسى كەلگەن (ٴزاب. 23:6).
ەستە ۇستايتىن ٴبىر جايت — ٴداۋىتتى بارلىق جىرلارىن جازۋعا ەحوبانىڭ ٶزى تالپىندىرعان. ونىڭ جازعاندارىنىڭ كەيبىرى كوپ ۋاقىتتان كەيىن ورىندالاتىن پايعامبارلىقتار ەدى. مىسالى، ٴزابۇر 110 ىنشى جىرىندا ٴداۋىت يەسىنىڭ كوكتە «قۇدايدىڭ وڭ جاعىندا وتىرىپ»، زور بيلىككە يە بولاتىنىن جازعان. ول قۇدايدىڭ جاۋلارىن باعىندىرىپ، جەردەگى «حالىقتارعا شىعارعان ۇكىمىن جۇزەگە اسىرماق» ەدى. ٴداۋىت كوكتە بيلىك ەتەتىن جانە «ماڭگىلىككە ٴدىني قىزمەتكەر» بولاتىن وسى ٴماسىحتىڭ ٴتۇپ اتاسى بولدى (ٴزاب. 110:1—6). كەيىن يسا وسى پايعامبارلىقتىڭ ٶزى جايلى ەكەنىن جانە بولاشاقتا ورىندالاتىنىن راستاعان (مات. 22:41—45).
ٴداۋىت كيەلى رۋحتىڭ جەتەلەۋىمەن ٶز زامانى جايلى جانە بولاشاقتا قايتا ٴتىرىلىپ، ەحوبانى ماڭگى باقي ماداقتاي الاتىن كەز تۋرالى جازعان. ٴزابۇر 37:10، 11، 29 داعى سوزدەردىڭ دە ەجەلگى ٴيسرايلدىڭ زامانىنا، سونداي-اق ەحوبا بۇكىل دۇنيەجۇزى بويىنشا ۋادەلەرىن ورىندايتىن بولاشاققا دا قاتىسى بار دەي الامىز (وسى جۋرنالداعى «مەنىمەن بىرگە جۇماقتا بولاسىڭ» دەگەن ماقالانىڭ 8-ابزاسىن قاراڭىز).
ەندەشە، ٴزابۇر 61:8 بەن سوعان ۇقساس تارماقتار ٴداۋىت ەحوبانى سوڭعى دەمى شىققانشا ماداقتاعىسى كەلگەنىن كورسەتەدى. سونداي-اق بۇل سوزدەردەن ەحوبا بولاشاقتا ونى تىرىلتكەندە دە، ٴداۋىتتىڭ نە ىستەگىسى كەلەتىنىن كورەمىز.
