1،‏ 2.‏ جاقىنىن جوقتاپ جۇرگەندەردى جۇباتۋ تۋرالى ٴ‌سوز قوزعاعانىمىز نەگە ماڭىزدى؟‏ (‏ماقالانىڭ باسىنداعى سۋرەتتى قاراڭىز.‏)‏

‏«ۇلىمىزدىڭ ولىمىنەن سوڭ ٴ‌بىر جىلداي قايعىدان قابىرعامىز قايىسىپ ٴ‌جۇردى»،‏—‏ دەيدى سيۋزي.‏ ال ايەلى اياقاستىنان قايتىس بولعان ٴ‌بىر ەر باۋىرلاس بويىندا «ادام ايتقىسىز اۋرۋدى» سەزىنگەنىن ايتادى.‏ وكىنىشكە قاراي،‏ وسىنداي ازاپتى باستان وتكىزىپ جاتقاندار از ەمەس.‏ ماسىحشىلەر قاۋىمىنداعى باۋىرلاستاردىڭ كوبى ارماگەددون كەلگەنشە جاقىن ادامدارىنان ايىرىلىپ قالامىز دەپ ويلاماعان شىعار.‏ بالكىم،‏ ٴ‌سىز دە جانىڭىزعا قىمبات ادامدى جوعالتقان بولارسىز،‏ ٴ‌يا بولماسا قايعى جامىلعان وزگە بىرەۋدى بىلەرسىز.‏ ەندەشە،‏ كوكەيىڭىزدە:‏ «قايعى جۇتقان ادام قايدان جۇبانىش تابا الادى؟‏»—‏ دەگەن ساۋال تۋار.‏

² كەيبىرەۋلەر «ۋاقىت —‏ ەمشى» دەپ جاتادى.‏ ٴ‌بىراق بارلىق كەزدە سولاي ما؟‏ ٴ‌بىر جەسىر ايەل:‏ «مەنىڭشە،‏ ادامنىڭ سول ۋاقىتتى قالاي پايدالانعانى جان جاراسىن ەمدەۋگە كومەكتەسەدى دەۋ الدە قايدا تۋرا بولار ەدى»،‏—‏ دەيدى.‏ تانگە تۇسكەن جارا جازىلۋ  ٷشىن ۋاقىت پەن جاقسى كۇتىم قاجەت.‏ جان جاراسىن ەمدەۋ ٷشىن دە تاپ وسىلاي.‏ قايعى دەرتىن جەڭىلدەتكىسى كەلەتىندەرگە اسىرەسە نە كومەكتەسەدى؟‏

3،‏ 4.‏ ەحوبا قاسىرەتىمىزدى تۇسىنەتىنىنە نەگە سەنىمدى بولا الامىز؟‏

³ جاناشىر اكەمىز ەحوبا —‏ بىزگە كەرەكتى جۇبانىشتىڭ ٴ‌تۇپ قاينارى ‏(‏قورىنتتىقتارعا 2-‏حات 1:‏3،‏ 4 وقىڭىز)‏.‏ جاناشىرلىقتىڭ ەڭ كەرەمەت ۇلگىسىن كورسەتەتىن ول ٶز حالقىنا:‏ «سەندەردى مەن ٶزىم جۇباتامىن»،‏—‏ دەپ ۋادە ەتەدى (‏يشايا 51:‏12؛‏ ٴ‌زابۇر 119:‏50،‏ 52،‏ 76‏)‏.‏

⁴ سۇيىسپەنشىلىگى مول اكەمىز دە كەزىندە ىبىرايىم،‏ ىسقاق،‏ جاقىپ،‏ مۇسا جانە ٴ‌داۋىت پاتشا سياقتى جانىنا قىمبات ادامدارىن جوعالتقان (‏مۇسانىڭ 4-‏جازباسى 12:‏6—‏8؛‏ ماتاي 22:‏31،‏ 32؛‏ ەلشىلەردىڭ ىستەرى 13:‏22‏)‏.‏ كيەلى كىتاپتان كورىنەتىندەي،‏ ەحوبا سول ادال جانداردى قايتا تىرىلتەتىن كۇندى اسىعا كۇتۋدە (‏ٵيۇپ 14:‏14،‏ 15‏)‏.‏ سول كەزدە ولاردىڭ كوڭىلدەرى اسىپ-‏تاسىپ،‏ دەنساۋلىقتارى دا تاماشا بولادى.‏ ەحوبا تۇڭعىشى ٵرى سۇيىكتى ۇلى بولعان يسانىڭ دا ٶلىمىن كوردى (‏ماتاي 3:‏17‏)‏.‏ ۇلىنىڭ ازاپتى ولىممەن ولگەنىن كورگەندە،‏ ەحوبانىڭ جۇرەگى قالاي قارس ايىرىلعانىن ەلەستەتۋدىڭ ٶزى قيىن!‏ (‏جوحان 5:‏20؛‏ 10:‏17‏)‏.‏

5،‏ 6.‏ ەحوبا ٴ‌بىزدى قالاي جۇباتادى؟‏

⁵ ەحوبا بىزگە كومەك قولىن سوزاتىنىنا قالتقىسىز سەنسەك بولادى.‏ ولاي بولسا،‏ وعان ەش تارتىنباستان دۇعا ەتىپ،‏ جان ازابىمىزدى ايتۋىمىز كەرەك.‏ ەحوبانىڭ جانىمىزدى تۇسىنەتىنى ٵرى قاجەتتى جۇبانىشتى سىيلايتىنى كوڭىلىمىزگە جاي بەرەدى ەمەس پە؟‏!‏ الايدا ول ٴ‌بىزدى قالاي جۇباتادى؟‏

⁶ ەحوبا ٴ‌بىزدى كوپتەگەن جولدارمەن جۇباتادى،‏ سولاردىڭ ٴ‌بىرى —‏ كيەلى رۋحى ارقىلى (‏ەلشىلەردىڭ ىستەرى 9:‏31 سىلتەمە)‏.‏ اكەمىزدىڭ «وزىنەن سۇراعانداردىڭ» بارىنە كيەلى رۋحىن بەرەتىنىن يسا ۋادە ەتكەن (‏لۇقا 11:‏13‏)‏.‏ ماقالانىڭ ەڭ باسىندا ٴ‌سوزى كەلتىرىلگەن سيۋزي بىلاي دەدى:‏ «ٴ‌بىز تالاي رەت تىزەرلەي كەتىپ،‏ ەحوبادان جۇبانىش تىلەپ جالىنۋشى ەدىك.‏ سونداي كەزدىڭ بارىندە ەحوبانىڭ تىنىشتىعى راسىندا دا ٴ‌بىزدىڭ جۇرەگىمىز بەن وي-‏سانامىزدى ساقتايتىن» ‏(‏فىلىپىلىكتەرگە 4:‏6،‏ 7 وقىڭىز)‏.‏

7،‏ 8.‏ نەگە يسانىڭ ٴ‌بىزدى جۇباتا الاتىنىنا ەش ش‍ۇبالانباساق بولادى؟‏

⁷ جەردە بولعان كەزىندە يسا سوزىمەن دە،‏ ىسىمەن دە كوكتەگى اكەسىنىڭ جاناشىرلىعىن كەمەلدى تۇردە كورسەتكەن (‏جوحان 5:‏19‏)‏.‏ ەحوبا ونى «جۇرەگى جارالىلار» مەن «قايعىرىپ جۇرگەندەردىڭ ٴ‌بارىن» جۇباتۋ ٷشىن جەرگە جىبەردى (‏يشايا 61:‏1،‏ 2؛‏ لۇقا 4:‏17—‏21‏)‏.‏ يسا وزدەرىنىڭ  قاسىرەتىن تۇسىنەتىنىن ٵرى شىن نيەتپەن كومەكتەسكىسى كەلەتىنىن ادامدار بىلگەن (‏ەۆرەيلەرگە 2:‏17‏)‏.‏

⁸ جاستىق شاعىندا يسانىڭ كەي جاقىن دوستارى مەن تۋىستارى قازا بولعانى ٴ‌شۇباسىز.‏ مىسالى،‏ يسا بوزبالا كەزىندە وگەي اكەسى جۇسىپتەن ايىرىلعان بولسا كەرەك *‏.‏ وسىنداي قاسىرەتكە دۋشار بولعان كەزدە جۇرەگى جۇمساق جاس يساعا وزىنىڭ قايعىسىمەن قويماي،‏ اناسى مەن باۋىرلارىنىڭ دا قايعىسىن كوتەرۋ قانداي قيىن بولدى دەسەڭىزشى!‏

9.‏ ەلازار قايتىس بولعاندا،‏ يسا جاناشىرلىعىن قالاي كورسەتتى؟‏

⁹ جەردەگى قىزمەتى بارىسىندا يسا ادامدارعا اسا تۇسىنۋشىلىكپەن قاراپ،‏ جاناشىرلىق تانىتتى.‏ مىسالى،‏ جاقىن دوسى ەلازار دۇنيە سالعاندا،‏ يسا جۇرەكتەرى سىزداعان ٴ‌ماريام مەن مارتانىڭ جان قايعىسىن سەزدى.‏ ونىڭ جانى اشىعانى سونشا—‏ەلازاردى قايتا تىرىلتەتىنىن بىلسە دە،‏ جۇرەگى قارس ايىرىلىپ،‏ كوز جاسىنا ەرىك بەردى (‏جوحان 11:‏33—‏36‏)‏.‏

10.‏ يسا ٴ‌بىزدىڭ قايعىمىزعا تۇسىنۋشىلىكپەن قارايتىنىنا نەگە سەنىمدى بولا الامىز؟‏

¹⁰ يسانىڭ بۇرىن كورسەتكەن جۇبانىشىنىڭ بۇگىنگى تاڭدا بىزدەرگە قانداي كومەگى بار؟‏ كيەلى كىتاپتا ونىڭ ەش وزگەرمەگەنى انىق ايتىلعان:‏ «يسا ٴ‌ماسىح كەشە قانداي بولسا،‏ بۇگىن دە،‏ ماڭگىلىك بويى دا سونداي بولىپ قالا بەرمەك» (‏ەۆرەيلەرگە 13:‏8‏)‏.‏ ماڭگى ٶمىر سۇرۋىمىزگە جول اشقاندىقتان،‏ ول «ٶمىر بەرەتىن باس جەتەكشى» دەپ اتالعان.‏ قايعىرۋدىڭ نە ەكەنىن ٶز باسىنان بىلەتىن يسا «سىنالىپ جاتقاندارعا كومەككە كەلە الادى» (‏ەلشىلەردىڭ ىستەرى 3:‏15؛‏ ەۆرەيلەرگە 2:‏10،‏ 18‏)‏.‏ سوندىقتان قازىرگى كەزدە دە بىرەۋ قاسىرەت شەكسە،‏ يسا بۇعان بەي-‏جاي قارامايتىنىنا كۇماندانباساق بولادى.‏ ول قايعى جامىلعانداردىڭ سەزىمىن تۇسىنەدى،‏ ٵرى ولاردى «مۇقتاج كەزىندە» جۇباتا الادى ‏(‏ەۆرەيلەرگە 4:‏15،‏ 16 وقىڭىز)‏.‏

11.‏ قاي جازبا ورىندارى سىزگە ەرەكشە جۇبانىش سىيلايدى؟‏

¹¹ ەلازار قايتىس بولعاندا يسانىڭ قاتتى قايعىرعانى تۋرالى وقيعا—‏جازبالارداعى جۇبانىش سىيلايتىن كوپتەگەن تارماقتاردىڭ ٴ‌بىرى عانا.‏ ٴ‌يا،‏ مۇنداي جازبا ورىندارى كوپ بولۋى دا كەرەك،‏ ويتكەنى «بۇرىن جازىلعانداردىڭ ٴ‌بارى بىزگە ٴ‌تالىم بولسىن دەپ جازىلعان.‏ وسىلايشا تاباندىلىعىمىز ارقىلى جانە جازبالاردان العان جۇبانىشىمىز ارقىلى ۇمىتكە يە بولا الامىز» (‏ريمدىكتەرگە 15:‏4‏)‏.‏ ەگەر ٴ‌سىز جاقىنىڭىزدى جوقتاپ جۇرگەن بولساڭىز،‏ مىنا جازبا ورىندارى كوڭىلىڭىزگە مەدەۋ بولا الادى:‏

• «جۇرەگى جارالى جانعا ەحوبا جاقىن تۇرادى،‏ ساعى سىنعانداردى قۇتقارادى» (‏ٴ‌زابۇر 34:‏18،‏ 19‏)‏.‏

• «سارى ۋايىمعا سالىنعانىمدا،‏ سەن [ەحوبا] مەنى جۇباتىپ،‏ جانىما جاي بەردىڭ» (‏ٴ‌زابۇر 94:‏19‏)‏.‏

• «ٴ‌بىزدى ٴ‌سۇيىپ،‏ راقىمىمەن ماڭگىلىك جۇبانىش ٵرى بەرىك ٷمىت بەرگەن قۇداي اكەمىز جانە يەمىز يسا ٴ‌ماسىحتىڭ ٶزى سەندەردى جۇباتىپ.‏.‏.‏ نىعايتسىن» (‏سالونيكالىقتارعا 2-‏حات 2:‏16،‏ 17‏)‏ *‏.‏

12.‏ باسقالاردى قالاي جۇباتا الامىز؟‏

¹² قايعىرعان جاندار ماسىحشىلەردىڭ قاۋىمىنان دا جۇبانىش تابا الادى ‏(‏سالونيكالىقتارعا 1-‏حات 5:‏11 وقىڭىز)‏.‏ رۋحى كۇيرەگەندەردى ٴ‌سىز قالاي نىعايتىپ،‏ كوڭىلىنە مەدەۋ بولا الاسىز؟‏ (‏ناقىل سوزدەر 17:‏22‏)‏.‏ «ۇندەمەيتىن ۋاقىت،‏ سويلەيتىن ۋاقىت» بار ەكەنىن ەستە ۇستاعايسىز (‏ۋاعىزداۋشى 3:‏7‏)‏.‏ دالين ەسىمدى جەسىر ايەل بىلاي دەپ ٴ‌تۇسىندىردى:‏ «جاقىنىن جوعالتقان ادامدار وي-‏سەزىمدەرىن اشىپ ايتۋعا مۇقتاج.‏ سوندىقتان مۇنداي كەزدە قولىڭىزدان كەلەر ەڭ ماڭىزدى نارسە—‏ٴ‌سوزىن ەش بولمەي تىڭداۋ».‏ اعاسى ٶز ومىرىنە قول جۇمساعان يۋنيا بولسا بىلاي دەيدى:‏ «مەيلى،‏ ٴ‌سىز ول ادامنىڭ جان جاراسىن تولىقتاي تۇسىنە الماساڭىز دا،‏ ەڭ باستىسى —‏ ونىڭ سەزىمىن تۇسىنۋگە ىقىلاستى بولعانىڭىز».‏

13.‏ قايعىرۋعا بايلانىستى نەنى ۇمىتپاعانىمىز ٴ‌جون؟‏

¹³ قايعى-‏قاسىرەتتى ٴ‌بارىمىز دە بىردەي سەزىنىپ،‏ مۇنى بىردەي كورسەتە بەرمەيتىنىمىزدى ۇمىتپاعانىمىز ابزال.‏ كەيدە ىشتەي قانشالىقتى قينالىپ جۇرگەنىمىزدى سوزبەن ايتىپ جەتكىزۋ مۇمكىن ەمەس.‏ قۇداي سوزىندە:‏ «ٶز قايعىسى جۇرەكتىڭ وزىنە ايان،‏ قۋانىشىن دا تۇسىنبەس باسقا جان»،‏—‏ دەلىنگەن (‏ناقىل سوزدەر 14:‏10‏)‏.‏ بىرەۋ ىشكى سەزىمىن اشىپ ايتقان كۇندە دە،‏ كەيدە وزگەلەرگە ونىڭ نە ايتقىسى كەلىپ جاتقانىن ٴ‌تۇسىنۋ وڭاي بولا بەرمەيدى.‏

14.‏ ەڭسەسىن قايعى ەزگەن جانداردى جۇباتۋ ٷشىن نە ايتساق بولادى؟‏

¹⁴ جاقىنىن جوقتاپ جۇرگەن ادامعا نە ايتارىمىزدى بىلمەيتىن كەزدەر بولاتىن شىعار.‏ ايتسە دە كيەلى كىتاپتا «دانانىڭ ٴ‌تىلى ساۋىقتىرادى» دەلىنگەن (‏ناقىل سوزدەر 12:‏18‏)‏.‏ كوبىسى «‏جاقىن ادامىڭ قايتىس بولعاندا‏» (‏ور.‏)‏ كىتاپشاسىنان وزگەنى جۇباتاتىن سوزدەر تاپقان *‏.‏ الايدا كوپ جاعدايدا ٴ‌بىزدىڭ تاراپىمىزدان ەڭ جاقسى كومەك—‏«قايعىرعانداردىڭ قايعىسىنا ورتاق بولۋ»،‏ ياعني سولارمەن بىرگە جىلاۋ (‏ريمدىكتەرگە 12:‏15‏)‏.‏ كۇيەۋى قايتىس بولعان گابيدىڭ ايتۋىنشا،‏ كەيدە ول ىشكى سەزىمدەرىن تەك كوز جاسىمەن شىعارادى.‏ ول:‏ «سوندىقتان دوستارىم ماعان قوسىلىپ جىلاعاندا،‏ مەن ٴ‌بىراز جۇبانىپ قالامىن.‏ سونداي كەزدە ٶز قايعىممەن جاپادان-‏جالعىز قالىپ كەتكەندەي سەزىنبەيمىن»،‏—‏ دەيدى.‏

15.‏ ادامعا جەكە جولىعۋ قيىنعا سوقسا،‏ باسقا قانداي جولدارمەن جۇباتا الامىز؟‏ (‏«‏ كوڭىلگە مەدەۋ بولاتىن سوزدەر‏» دەگەن قورشاۋدى دا قاراڭىز.‏)‏

¹⁵ ادامنىڭ جەكە وزىنە جۇباتۋ سوزدەرىن ايتۋعا قينالساڭىز،‏ وعان حات،‏ اشىق حات،‏ كەلتە حات نە ەلەكتروندى حات جازعان وڭاي بولاتىن شىعار.‏ جاي عانا جۇبانىش سىيلايتىن جازبا ورنىن كەلتىرسەڭىز،‏ قايتىس بولعان ادامنىڭ ەسىڭىزدە قالعان  ٴ‌بىر ەرەكشە قاسيەتىن نەمەسە ٴ‌سىز ٷشىن قىمبات ساتتەردى جازساڭىز بولادى.‏ «جىگەر بەرەتىن قىسقا حات الۋ نە باۋىرلاستىڭ بىرگە ۋاقىت وتكىزۋگە شاقىرعانى مەن ٷشىن زور دەمەۋ،‏—‏ دەيدى يۋنيا.‏—‏ وسىنداي لەبىز بىلدىرگەندە ادامداردىڭ مەنى جاقسى كورەتىنىن جانە قامىمدى ويلايتىنىن سەزىنەمىن».‏

16.‏ وزگەلەردى جۇباتۋدىڭ وتە جاقسى جولى قانداي؟‏

¹⁶ ەڭسەسىن قايعى باسقان باۋىرلاستارىمىز ٷشىن ٴ‌بىزدىڭ دۇعامىزدىڭ دا پايداسى زور.‏ ولار ٷشىن نە ٴ‌تىپتى ولارمەن بىرگە دۇعا ەتسەك بولادى.‏ دۇعا ايتا الماي،‏ جىلاپ جىبەرەرمىن دەپ ويلاعانىڭىزبەن،‏ ٴ‌سىزدىڭ جۇرەكتەن شىققان دۇعاڭىز كۇشتى جۇبانىش سىيلاي الادى.‏ دالين بىلاي دەپ ەسىنە الدى:‏ «كەيدە مەنى جۇباتۋعا كەلگەن ايەل باۋىرلاستاردان دۇعا ەتە الاسىڭ با دەپ سۇرايتىنمىن.‏ كوبىنەسە باسىندا ولار كۇمىلجىپ ازەر سويلەگەنمەن،‏ داۋىستارى بىرتە-‏بىرتە كۇشەيىپ،‏ بار جۇرەكتەرىمەن كەرەمەت دۇعا ايتادى.‏ ولاردىڭ سەنىمى،‏ سۇيىسپەنشىلىگى مەن قامقورلىعى سەنىمىمدى نىعايتادى».‏

17—‏19.‏ نەگە وزگەلەردى جۇباتۋدان تالماۋىمىز كەرەك؟‏

¹⁷ ادامنىڭ قايعىسى قانشا ۋاقىتقا سوزىلاتىنىن ەشكىم دۇپ باسىپ ايتا المايدى.‏ جاقىن ادامى قايتىس بولعاندا،‏ العاشقىدا ادامنىڭ دوستارى مەن تۋىستارى جۇباتۋ ٷشىن اعىلىپ كەلەدى.‏ ٴ‌بىراق ولار كۇندەلىكتى ومىرلەرىنە ورالعان سوڭ،‏ قايعىرىپ جۇرگەندەر ٵلى دە جۇبانىشقا ٴ‌زارۋ بولادى.‏ سوندىقتان كومەك قولىن سوزۋعا دايار بولىڭىز.‏ «ناعىز دوس ٵرقاشان جاقسى كورەر،‏ ول —‏ باۋىرىڭ  قيىن شاقتا ارقا سۇيەر»،‏—‏ دەلىنگەن كيەلى كىتاپتا (‏ناقىل سوزدەر 17:‏17‏)‏.‏ جاقىنىن جوقتاپ جۇرگەندەر قانشا ۋاقىت قاجەت ەتسە،‏ سونشا ۋاقىت بويى ولارعا دەم بەرىپ وتىرعانىمىز ٴ‌جون ‏(‏سالونيكالىقتارعا 1-‏حات 3:‏7 وقىڭىز)‏.‏

¹⁸ جانى جارالى ادامدى كەز كەلگەن ۋاقىتتا قايعى-‏مۇڭ باسىپ قالۋى مۇمكىن ەكەنىن ۇمىتپاڭىز.‏ بۇل قانداي دا ٴ‌بىر اتاۋلى كۇنگە،‏ اۋەنگە،‏ سۋرەتتەرگە،‏ ٸس-‏شارالارعا،‏ ٴ‌تىپتى ٴ‌بىر ٴ‌يىس،‏ دىبىس نە جىل مەزگىلىنە بايلانىستى بولۋى مۇمكىن.‏ جان جارىنان ايىرىلىپ،‏ جابىرقاعان ەر نە ايەل ادام ٴ‌بىرىنشى رەت جالعىز ٶزى ٴ‌بىر نارسە ىستەگەندە،‏ مىسالى كونگرەسكە نە ەسكە الۋ كەشىنە بارعاندا،‏ بۇل جانىنا باتۋى مۇمكىن.‏ ٴ‌بىر ەر باۋىرلاس بىلاي دەدى:‏ «ايەلىم قازا بولعاننان كەيىنگى العاشقى مەرەي توي كۇنى وتە قايعىلى وتەتىن شىعار دەپ كۇتكەنمىن.‏ ارينە،‏ بۇل وڭايعا سوقپادى.‏ ٴ‌بىراق بىرنەشە باۋىرلاس جالعىز قالماۋىم ٷشىن جان دوستارىمنىڭ باسىن قوسىپ،‏ كىشىگىرىم وتىرىس ۇيىمداستىرىپتى».‏

¹⁹ ەسىڭىزدە بولسىن،‏ قاسىرەت تارتىپ جۇرگەندەر جۇبانىشقا تەك ەرەكشە كۇندەردە عانا مۇقتاج ەمەس.‏ «قانداي دا ٴ‌بىر ەلەۋلى كۇنى بولماسا دا،‏ ماعان ۇسىنعان كومەك پەن دوستىق پەيىلدىڭ پايداسى كوپ،‏—‏ دەيدى يۋنيا.‏—‏ وسىنداي كۇتپەگەن ساتتەر وتە باعالى ٵرى زور جۇبانىش سىيلايدى».‏ راس،‏ ادامدى قايعىسى مەن جالعىزدىق سەزىمىنەن تۇبەگەيلى ارىلتا المايتىن شىعارمىز،‏ ٴ‌بىراق ولار ٷشىن بىردەڭە ىستەۋ ارقىلى قايعى جۇگىن جەڭىلدەتە الامىز (‏جوحاننىڭ 1-‏حاتى 3:‏18‏)‏.‏ گەبي بىلاي دەيدى:‏ «ٶمىرىمنىڭ ٵربىر قيىن اسۋىنان وتۋگە كومەكتەسكەن سۇيىسپەنشىلىگى مول اقساقالدار ٷشىن ەحوباعا شەكسىز ريزامىن.‏ سولاردىڭ ارقاسىندا ٶزىمدى ەحوبانىڭ ايالى قۇشاعىندا جۇرگەندەي سەزىنەم».‏

20.‏ نەگە ەحوبانىڭ ۋادەلەرى زور جۇبانىش بەرەدى؟‏

²⁰ جۇبانىش اتاۋلىنىڭ قاينار كوزى ەحوبا قۇدايىمىزدىڭ قايتا ٴ‌تىرىلۋ بولعان كەزدە قايعى اتاۋلىنى ٴ‌بىرجولاتا جوق قىلاتىنىن بىلگەنىمىز كوڭىلىمىزگە جاي بەرەدى (‏جوحان 5:‏28،‏ 29‏)‏.‏ ۋادەسىنە ساي،‏ ول «ٶلىمدى ٴ‌بىرجولا جوق قىلادى،‏ الەمنىڭ ٵمىرشىسى ەحوبا بارلىق كوز جاستى سۇرتەدى» (‏يشايا 25:‏8‏)‏.‏ سوندا بارلىعى «قايعىرعانداردىڭ قايعىسىنا» ەمەس،‏ «قۋانعانداردىڭ قۋانىشىنا ورتاق بولادى» (‏ريمدىكتەرگە 12:‏15‏)‏.‏