اقىرعى ۋاقىتتا تەكەتىرەسەتىن پاتشالار
بۇل كەستەدەگى كەيبىر پايعامبارلىقتار ٴبىر ۋاقىتتا بولعان وقيعالاردى سيپاتتايدى. وسى پايعامبارلىقتاردىڭ ٴبارى ٴبىزدىڭ «اقىرعى ۋاقىتتا» ٶمىر ٴسۇرىپ جاتقانىمىزدى راستايدى (دان. 12:4).
تارماقتار: ايان 11:7؛ 12:13، 17؛ 13:1—8، 12
پايعامبارلىق: «جىرتقىش اڭ» عاسىرلار بويى جەر بەتىنە بيلىك ەتەدى. اقىرعى ۋاقىتتا ونىڭ جەتىنشى باسى جارالانادى. كەيىنىرەك بۇل باستىڭ جاراقاتى جازىلىپ، «بۇكىل جەر بەتى» اڭنىڭ سوڭىنان ەرەدى. شايتان بۇل اڭدى ايەلدىڭ «ۇرپاعىنان قالعاندارمەن» سوعىسۋ ٷشىن قولدانادى.
ورىندالۋى: توپان سۋدان كەيىن ەحوباعا قارسى ۇكىمەتتەر ادامزاتتىڭ ۇستىنەن بيلىك ەتتى. كوپتەگەن عاسىردان سوڭ، ٴبىرىنشى دۇنيەجۇزىلىك سوعىستىڭ كەزىندە، بريتان يمپەرياسىنىڭ كۇشى قاتتى السىرەپ قالدى. ال قۇراما شتاتتارمەن بىرىككەندە، ول قايتادان مىقتى بولدى. شايتان بۇكىل ساياسي جۇيەسىن اسىرەسە اقىرعى ۋاقىتتا قۇداي حالقىن قۋعىنداۋ ٷشىن قولدانىپ كەلەدى.
تارماقتار: دان. 11:25—45
پايعامبارلىق: اقىرعى ۋاقىتتا سولتۇستىك پاتشاسى مەن وڭتۇستىك پاتشاسى تەكەتىرەسەدى.
ورىندالۋى: گەرمانيا مەن انگلو-امەريكا ٴبىر-بىرىمەن قاقتىعىستى. 1945-جىلى كەڭەس وداعى مەن ونىڭ وداقتاستارى سولتۇستىك پاتشاسى بولدى. 1991-جىلى كەڭەس وداعى كۇيرەدى، ال ۋاقىت وتە رەسەي مەن ونىڭ وداقتاستارى سولتۇستىك پاتشاسىنا اينالدى.
تارماقتار: يشايا 61:1؛ مالح. 3:1؛ لۇقا 4:18
پايعامبارلىق: ەحوبا ٴماسىحتىڭ پاتشالىعى كەلمەي تۇرىپ «جول دايىندايتىن» «حابارشىسىن» جىبەرەدى. بۇل توپ «مومىندارعا ىزگى حاباردى جاريالاي» باستايدى.
ورىندالۋى: 1870-جىلدان باستاپ چارلز راسسەلل مەن ونىڭ سەرىكتەرى كيەلى كىتاپ شىندىقتارىن ٴبىلۋ ٷشىن ونى زور قۇلشىنىسپەن زەرتتەدى. ال 1880-جىلدارى ولار قۇداي قىزمەتشىلەرى ۋاعىزداۋ كەرەك ەكەنىنە ەرەكشە نازار اۋدارا باستادى. سوندىقتان «1000 جاريالاۋشى قاجەت» جانە «ۋاعىزداۋ ٷشىن مايلانعاندار» دەگەن سياقتى ماقالالاردى باسىپ شىعاردى.
تارماقتار: مات. 13:24—30، 36—43
پايعامبارلىق: ٴبىر كىسى ەگىندىككە بيداي تۇقىمىن سەبەدى. كەيىن دۇشپانى كەلىپ، بيداي اراسىنا ٵرامشوپ سەۋىپ كەتەدى. ٵرامشوپ قاۋلاپ ٶسىپ، بيدايدى تاسالاپ قالادى. ال وراق كەزىندە ٵرامشوپ بيدايدان اجىراتىلادى.
ورىندالۋى: 1870-جىلدان باستاپ شىنايى ماسىحشىلەر مەن جالعان ماسىحشىلەردىڭ ايىرماشىلىعى ايقىن كورىنە باستادى. ال اقىرعى ۋاقىتتا شىنايى ماسىحشىلەر جينالىپ، جالعان ماسىحشىلەردەن اجىراتىلدى.
تارماقتار: دان. 2:31—33، 41—43
پايعامبارلىق: ٵرتۇرلى مەتالدان جاسالعان ٴمۇسىننىڭ تەمىر مەن سازدان تۇراتىن تابان جاعى.
ورىندالۋى: ساز انگلو-امەريكا دۇنيەجۇزىلىك دەرجاۆاسىنىڭ قول استىنا كىرەتىن ٵرى وسى ۇكىمەتكە قارسى شىعاتىن قاراپايىم حالىقتى بەينەلەيدى. وسى ادامدار بۇل دەرجاۆانىڭ تەمىر ىسپەتتى مىقتى بولۋىنا كەدەرگى كەلتىرىپ، ونى السىرەتەدى.
تارماقتار: مات. 13:30؛ 24:14، 45؛ 28:19، 20
پايعامبارلىق: «بيداي» «قامباعا» جينالىپ، «ۇيدەگى باسقا قۇلداردىڭ» ۇستىنەن «ادال دا اقىلدى قۇل» تاعايىندالادى. «پاتشالىق جايلى ىزگى حابار» «بۇكىل جەر بەتىندە» ۋاعىزدالا باستايدى.
ورىندالۋى: 1919-جىلى قۇداي حالقىنا «ادال دا اقىلدى قۇل» تاعايىندالدى. سول كەزدەن باستاپ كيەلى كىتاپ زەرتتەۋشىلەرى ۋاعىزداۋ ٸسىن قارقىنداتا ٴتۇستى. بۇگىنگى تاڭدا ەحوبا كۋاگەرلەرى 200 دەن استام ەلدە ۋاعىزداپ، 1000 نان اسا تىلدە كيەلى كىتاپقا نەگىزدەلگەن ماتەريالدار شىعارۋدا.
تارماقتار: دان. 12:11؛ ايان 13:11، 14، 15
پايعامبارلىق: قوس ٴمۇيىزى بار جىرتقىش اڭ جەتى باستى اڭنىڭ «ٴمۇسىنىن جاساۋعا» ىقپال ەتىپ، «وسى مۇسىنگە ٶمىر لەبىن» بەرەدى.
ورىندالۋى: انگلو-امەريكا دۇنيەجۇزىلىك دەرجاۆاسى ۇلتتار ليگاسىن قۇرۋعا باستاما بەردى. وسى ۇيىمدى باسقا حالىقتار دا قولدادى. اقىرىندا، سولتۇستىك پاتشاسى دا وسى ليگانىڭ مۇشەسى بولدى، ٴبىراق تەك 1926—1933 جىلدار ارالىعىندا عانا. ادامدار ۇلتتار ليگاسى تەك قۇداي پاتشالىعى عانا جۇزەگە اسىرا الاتىندى، ياعني دۇنيەجۇزىلىك بەيبىتشىلىكتى ورناتادى دەپ ۇمىتتەندى. جۇرت بۇۇ تۋرالى دا وسىنداي ويدا.
تارماقتار: دان. 8:23، 24
پايعامبارلىق: ٴتۇرى ىزعارلى ٴبىر پاتشا «عالامات ويران سالادى».
ورىندالۋى: انگلو-امەريكا دۇنيەجۇزىلىك دەرجاۆاسى وتە ۇلكەن ويران سالدى. مىسالى، ەكىنشى دۇنيەجۇزىلىك سوعىستا قۇراما شتاتتار جاۋلارىنا قارسى ەكى اتوم بومباسىن تاستاعاندا، قانشاما ادام قىرىلىپ، عالامات ويران بولدى.
تارماقتار: دان. 11:31؛ ايان 17:3، 7—11
پايعامبارلىق: ون ٴمۇيىزدى «ال قىزىل جىرتقىش اڭ» تۇڭعيىقتان شىعىپ، سەگىزىنشى پاتشا بولادى. دانيال كىتابىندا بۇل پاتشا «قاڭىراتىپ بوس قالدىراتىن جەركەنىشتى نارسە» دەپ اتالعان.
ورىندالۋى: ەكىنشى دۇنيەجۇزىلىك سوعىس كەزىندە ۇلتتار ليگاسى ارەكەتسىز كۇيگە ٴتۇستى. سوعىستان كەيىن بۇۇ «ورنادى». ۇلتتار ليگاسى سياقتى، بۇۇ دا قۇداي پاتشالىعى ىستەيتىندى ىستەيمىن دەدى. بۇۇ دىندەرگە شابۋىلدايتىن بولادى.
تارماقتار: سال. 1-ح. 5:3؛ ايان 17:16
پايعامبارلىق: حالىقتار «بەيبىتشىلىك پەن قاۋىپسىزدىك!» دەپ جار سالادى. «ون ٴمۇيىز» بەن «جىرتقىش اڭ» «جەزوكشەگە» شابۋىل جاساپ، ونى جويادى. سودان كەيىن حالىقتار جويىلادى.
ورىندالۋى: حالىقتار بەيبىتشىلىك پەن قاۋىپسىزدىك ورناتتىق دەپ ايتۋى مۇمكىن. سوسىن بۇۇ-عا كىرەتىن حالىقتار جالعان ٴدىني ۇيىمداردى جويادى. بۇل زور الاپاتتىڭ باستاماسى بولماق. زور الاپات ارماگەددوندا شايتاننىڭ بۇكىل دۇنيەسىنىڭ جويىلۋىمەن اياقتالادى.
تارماقتار: ەزەك. 38:11، 14—17؛ مات. 24:31
پايعامبارلىق: گوگ قۇداي حالقىنىڭ جەرىنە شابۋىل جاسايدى. سوسىن پەرىشتەلەر «تاڭداپ الىنعانداردى» جينايدى.
ورىندالۋى: سولتۇستىك پاتشاسى باسقا ۇكىمەتتەرمەن بىرگە قۇداي حالقىنا شابۋىلدايتىن بولادى. وسى شابۋىل باستالعاننان كەيىن، مايلانعاندار تامتىعى كوككە جينالادى.
تارماقتار: ەزەك. 38:18—23؛ دان. 2:34، 35، 44، 45؛ ايان 6:2؛ 16:14، 16؛ 17:14؛ 19:20
پايعامبارلىق: «اق بوز اتتا وتىرعان» «تولىق جەڭىسكە جەتەدى»: ول گوگ پەن ونىڭ اسكەرىن جويادى. «جىرتقىش اڭ» «وتتى كولگە لاقتىرىلادى» جانە الىپ ٴمۇسىن قيراتىلادى.
ورىندالۋى: قۇداي پاتشالىعىنىڭ پاتشاسى يسا قۇدايدىڭ حالقىن قۇتقارۋعا كەلەدى. ول وزىمەن بيلىك ەتەتىن 144 مىڭمەن بىرگە جانە پەرىشتەلەردەن قۇرالعان اسكەرىمەن بىرگە وداقتاسقان حالىقتاردى جويىپ، شايتاننىڭ بارلىق ساياسي جۇيەسىن قۇرتادى.
