23-زەرتتەۋ ماقالاسى
2-ٵن سەنىڭ ەسىمىڭ — ەحوبا
ەحوبانىڭ ەسىمى ٴبىز ٷشىن بارىنەن دە ماڭىزدى
«سەندەر مەنىڭ كۋاگەرلەرىمسىڭدەر،— دەيدى ەحوبا» (يشايا 43:10).
نەگىزگى وي
ەحوبانىڭ ەسىمىنىڭ اقتالىپ، كيەلى بولۋىنا ٴبىز دە ۇلەس قوسا الامىز.
1، 2. يسا ٷشىن ەحوبانىڭ ەسىمى بارىنەن دە ماڭىزدى ەكەنىن قايدان بىلەمىز؟
يسا ٷشىن ەحوبانىڭ ەسىمى بارىنەن دە ماڭىزدى. ول — ەحوبانىڭ ەسىمىن قىزعىشتاي قورعاپ جۇرگەن باستى تۇلعا. الدىڭعى ماقالادان بىلگەنىمىزدەي، اكەسىنىڭ ەسىمى كيەلى بولۋ ٷشىن ول جانىن قيۋعا دەيىن باردى (مار. 14:36؛ ەۆر. 10:7—9). ال مىڭجىلدىق بيلىگى اياقتالعاندا يسا ەحوبانىڭ ەسىمى تولىقتاي داڭقتالۋ ٷشىن وعان بار بيلىكتى قايتارىپ بەرەدى (قور. 1-ح. 15:26—28). اكەسىنىڭ ەسىمى ٷشىن ەش ايانبايتىن سەبەبى — يسا ونى بار جۇرەگىمەن جاقسى كورەدى.
2 يسا جەر بەتىنە اكەسىنىڭ اتىنان وكىلى رەتىندە كەلدى (جوح. 5:43؛ 12:13). ول سوڭىنان ەرگەن شاكىرتتەرىنە اكەسىنىڭ ەسىمىن اشتى (جوح. 17:6، 26). ٴتالىم بەرگەندە دە، كەرەمەت جاساعاندا دا ٴبارىن ەحوبانىڭ اتىنان ىستەدى (جوح. 10:25). ەحوبادان شاكىرتتەرىن قورعاۋدى وتىنگەندە دە بۇنى «ٶز ەسىمى ٷشىن» ىستەۋدى سۇرادى (جوح. 17:11). بايقاساق، يسا نە ىستەسە دە، اكەسىنىڭ ەسىمىن ويلاپ جۇرگەن. بىلايشا ايتقاندا، سول ەسىم ٷشىن ٶمىر سۇرگەن. ولاي بولسا، كەيبىرەۋلەر وزدەرىن يسانىڭ شاكىرتىمىز دەي تۇرا، قالاي عانا ونىڭ اكەسىنىڭ ەسىمىن بىلمەيدى، ال بىلەتىندەر قالاي عانا اۋىزدارىنا المايدى؟
3. بۇل ماقالادا ٴبىز نە قاراستىرامىز؟
3 ٴبىز يسانىڭ «ىزىمەن تۋرا جۇرەتىن» ماسىحشىلەر بولعاندىقتان، ونىڭ اكەسىنىڭ ەسىمى ٴبىز ٷشىن دە قىمبات (پەت. 1-ح. 2:21). بۇل ماقالادا ەحوبا ىزگى حاباردى جاريالايتىن قىزمەتشىلەرىنە قاي ماعىنادا ٶز ەسىمىن بەرگەنىن قاراستىرامىز (مات. 24:14). سونداي-اق ەحوبانىڭ ەسىمى ٴبىز ٷشىن بارىنەن جوعارى تۇرعانىن قالاي كورسەتە الاتىنىمىزدى تالقىلايمىز.
«ٶز اتىمەن اتالاتىن حالىق»
4. ا) كوككە ورالماس بۇرىن، يسا شاكىرتتەرىنە نە دەدى؟ ٵ) بۇل رەتتە قانداي قىزىق سۇراق تۋىندايدى؟
4 كوككە ورالماس بۇرىن، يسا شاكىرتتەرىنە: «وزدەرىڭە كيەلى رۋح قونعاندا كۇش-قۋاتقا يە بولىپ، يەرۋساليمدە، بۇكىل ياھۋدەيا مەن ساماريادا جانە جەردىڭ قيىر شەتىنە دەيىن مەن جايلى كۋالىك ەتەسىڭدەر»،— دەگەن (ەل. ٸس. 1:8). بۇل سوزدەرگە قاراساق، ىزگى حابار ەندى تەك يسرايلدە عانا ەمەس، باسقا جەرلەردە دە ۋاعىزدالماق ەدى. دەمەك، بارلىق حالىقتان شىققان ادامدار يسانىڭ ٸزباسارى بولماق-تىن (مات. 28:19، 20). ال ٴسوزىنىڭ اياعىندا يسا: «مەن جايلى كۋالىك ەتەسىڭدەر»،— دەگەن (سوزبە-ٴسوز: «مەنىڭ كۋاگەرىم بولاسىڭدار»). سوندا قالاي، جاڭا شاكىرتتەر يسانىڭ كۋاگەرى بولماق پا ەدى؟ جوق الدە ولار ەحوبانىڭ ەسىمىن تانىپ-ٴبىلىپ، ول جايلى دا كۋالىك ەتپەك پە ەدى؟ بۇل قىزىق سۇراقتىڭ جاۋابىن ەلشىلەردىڭ ىستەرى 15-تاراۋدان تابامىز.
5. يسانىڭ جاڭا شاكىرتتەرى ەحوبانىڭ ەسىمىن تانىپ-ٴبىلۋ كەرەكتىگىن ٴبىرىنشى عاسىرداعى باسقارۋشى كەڭەس قالاي ٴتۇسىندى؟ (سۋرەتتى دە قاراڭىز.)
5 ب. ز. 49-جىلى ەلشىلەر مەن اقساقالدار يەرۋساليمدە باس قوسىپ، سۇندەتتەلمەگەن وزگە ۇلت ادامدارى ٴماسىحشى بولۋ ٷشىن نە ىستەۋ كەرەكتىگىن تالقىلادى. تالقىلاۋدىڭ سوڭىندا يسانىڭ باۋىرى جاقىپ بىلاي دەدى: «قۇداي ٶز اتىمەن اتالاتىن حالىقتى تاڭداپ الۋ ٷشىن باسقا ۇلت ادامدارىنا العاش رەت نازار اۋدارعانىن [پەتىر] بىزگە ەگجەي-تەگجەيلى ايتىپ بەردى». ارتىنان اموس پايعامباردىڭ دا ٴسوزىن كەلتىرىپ بىلاي دەدى: «مۇنى وسى حالىقتان قالعان تامتىق مەنىڭ اتىممەن اتالاتىن باسقا حالىقتاردىڭ ادامدارىمەن بىرگە، مەنى، ەحوبانى، جان-تاندەرىمەن ىزدەسىن دەپ ىستەيمىن،— دەيدى ەحوبا» (ەل. ٸس. 15:14—18). جاقىپتىڭ وسى سوزدەرىنە قاراساق، جاڭا شاكىرتتەر ەحوبانىڭ اتىمەن اتالماق ەدى. بۇل دەگەن ٴسوز، ولار ەحوبانىڭ ەسىمىن تانىپ-ٴبىلىپ، سول ەسىم جايلى وزگەلەرگە كۋالىك ەتپەك-ٴتىن.
ٴبىرىنشى عاسىرداعى باسقارۋشى كەڭەس ماسىحشىلەر ەحوبانىڭ اتىمەن اتالاتىن حالىق بولاتىنىن انىق تۇسىنگەن (5-ابزاستى قاراڭىز)
6، 7. ا) يسا جەرگە نە ٷشىن كەلدى؟ ٵ) يسانىڭ جەرگە كەلۋىنىڭ ەڭ باستى سەبەبى قانداي؟
6 يسانىڭ ەسىمى «ەحوبا قۇتقارۋشى» دەگەندى بىلدىرەتىنى بەكەر ەمەس. ەحوبا يسا ارقىلى ادامزاتتى قۇتقارماق ەدى. سول ٷشىن دە يسا جەرگە كەلىپ، ٶز ٶمىرىن قۇربان ەتتى (مات. 20:28). سونىڭ ارقاسىندا وسى تولەم قۇرباندىعىنا سەنىم ارتقان ٵربىر ادامنىڭ قۇتقارىلىپ، ماڭگى ٶمىر سۇرۋگە مۇمكىندىگى پايدا بولدى (جوح. 3:16).
7 ٴبىراق ادامزات قۇتقارىلۋعا نە ٷشىن مۇقتاج ەدى؟ الدىڭعى ماقالادا قاراستىرعانىمىزداي، ەدەم باعىندا ادام مەن حاۋا ەحوباعا قارسى شىعىپ، ماڭگىلىك ومىردەن قۇرالاقان قالدى (مۇس. 1-ج. 3:6، 24). سونىڭ كەسىرىنەن ولاردىڭ ۇرپاقتارى كۇنا مەن ولىمگە دۋشار بولدى (مۇس. 1-ج. 3:4، 5). ادام مەن حاۋانىڭ ۇرپاقتارىن قۇتقارۋ ٷشىن يسا جەرگە كەلدى. ٴبىراق ونىڭ جەرگە كەلۋىنىڭ تاعى ٴبىر سەبەبى بار ەدى جانە ول ادامزاتتىڭ قۇتقارىلۋىنان الدەقايدا ماڭىزدى بولدى. ەسىمىزدە بولسا، ەدەم باعىندا شايتان ادام مەن حاۋانى كۇناعا ازعىرىپ قانا قويماي، ەحوبانىڭ كيەلى ەسىمىنە جالا جاپقان ەدى. دەمەك، ادامزات قۇتقارىلۋ ٷشىن ەڭ الدىمەن ەحوبانىڭ ەسىمى اقتالۋ كەرەك-ٴتىن. بۇل رەتتە يسانىڭ ٴرولى ەرەكشە ەدى. ول ەحوبانىڭ اتىنان كەلگەن وكىل بولعاندىقتان، ەحوبانىڭ ەسىمىن قورعاي الاتىن بىردەن-ٴبىر تۇلعا بولدى.
كەيبىرەۋلەر وزدەرىن يسانىڭ شاكىرتىمىز دەي تۇرا، قالاي عانا ونىڭ اكەسىنىڭ ەسىمىن بىلمەيدى، ال بىلەتىندەر قالاي عانا اۋىزدارىنا المايدى؟
8. يسانىڭ شاكىرتى بولعىسى كەلەتىن ٵربىر ادام نەنى ٴتۇسىنۋ قاجەت ەدى؟
8 يسانىڭ شاكىرتى بولعىسى كەلەتىن ٵربىر ادام يسانىڭ اكەسى ەحوبانىڭ ارقاسىندا عانا قۇتقارىلا الاتىنىن مويىنداۋ كەرەك-ٴتىن (جوح. 17:3). يسا سياقتى ولار دا ەحوبانىڭ ەسىمىن الىپ جۇرەتىندىكتەن، ەحوبانىڭ ەسىمىنىڭ اقتالۋى قانشالىقتى ماڭىزدى ەكەنىن جانە قۇتقارىلۋلارى سوعان تىكەلەي بايلانىستى ەكەنىن تۇسىنۋلەرى قاجەت ەدى (ەل. ٸس. 2:21، 22). سونداي-اق ولاردىڭ ەحوبانى عانا ەمەس، يسانى دا تانىپ-بىلگەندەرى اسا ماڭىزدى ەدى. ويتكەنى يسا ٶز دۇعاسىندا بىلاي دەگەن: «سەن مەنى قالاي سۇيسەڭ، بۇلار دا وزگەلەردى سولاي ٴسۇيۋ ٷشىن ٵرى ولارمەن بىرلىكتە بولۋىم ٷشىن، ولارعا ەسىمىڭدى اشتىم جانە اشا بەرەمىن» (جوح. 17:26).
«سەندەر مەنىڭ كۋاگەرلەرىمسىڭدەر»
9. يسانىڭ ٵربىر ٸزباسارى ٷشىن نە ماڭىزدى بولۋ كەرەك؟
9 كورگەنىمىزدەي، يسانىڭ شىنايى ٸزباسارلارى ٷشىن ەحوبانىڭ ەسىمى بارىنەن جوعارى تۇرۋ كەرەك. ٴبىز ەحوبانىڭ ەسىمىنىڭ كيەلى بولعانىن بار جۇرەگىمىزبەن قالايمىز (مات. 6:9، 10). ەحوبانىڭ ەسىمى كيەلى بولۋ ٷشىن ٴبىز ٶز تاراپىمىزدان قانداي ۇلەس قوسا الامىز؟
10. يشايا 42—44 تاراۋلاردا قانداي سوت ٸسى جايلى ايتىلعان؟ (يشايا 43:9؛ 44:7—9) (سۋرەتتى دە قاراڭىز.)
10 ەحوبانىڭ ەسىمىنىڭ كيەلى بولۋىنا قالاي ۇلەس قوسا الاتىنىمىزدى ٴتۇسىنۋ ٷشىن، يشايا كىتابىنىڭ 42—44 تاراۋلارىنا نازار اۋدارايىق. بۇل تاراۋلاردا بەينەلى ماعىناداعى سوت ٸسى جايلى ايتىلادى. بۇل سوت وتىرىسىندا كىمنىڭ شىنايى قۇداي ەكەنى قاراستىرىلىپ جاتىر. ەحوبا بۇل سوتقا وزدەرىن قۇداي دەيتىندەردى جانە ولاردىڭ كۋاگەرلەرىن شاقىرىپ، ولاردان دالەلدەر كەلتىرۋدى تالاپ ەتەدى. ٴبىراق ولار ەشتەڭەنى دە دالەلدەي المايدى (يشايا 43:9؛ 44:7—9 وقىڭىز).
ەحوبانىڭ كۋاگەرلەرى رەتىندە ٴبىز سوت ىسىنە قاتىسىپ جاتىرمىز (10، 11-ابزاستاردى قاراڭىز)
11. يشايا 43:10—12 تارماقتاردا ەحوبا ٶز قىزمەتشىلەرىنە نە دەگەن؟
11 يشايا 43:10—12 وقىڭىز. ەحوبا ٶزىنىڭ قىزمەتشىلەرىنە: «سەندەر مەنىڭ كۋاگەرلەرىمسىڭدەر،.. ال مەن قۇدايمىن»،— دەگەن. ول ٶزىنىڭ كۋاگەرلەرىنەن: «مەنەن باسقا قۇداي بار ما؟»— دەپ سۇراعان (يشايا 44:8). بۇل سۇراققا جاۋاپ بەرىپ، قۇدايىمىزدى قورعاپ كۋالىك بەرۋ نەتكەن مارتەبە! بۇگىندە ٴبىز ەحوبا جالعىز شىنايى قۇداي ەكەنىن جانە ونىڭ ەسىمى بارلىق ەسىمنەن ۇلى ەكەنىن سوزىمىزبەن دە، ىسىمىزبەن دە راستاپ ٴجۇرمىز. شايتان بىزگە قانشا كەدەرگى جاساۋعا تىرىسپاسىن، ٴبىز ەحوبانى جاقسى كورەتىنىمىزدى، وعان ادال ەكەنىمىزدى دالەلدەپ كەلەمىز. وسىلاي ٴبىز ەحوبانىڭ ەسىمىنىڭ كيەلى بولۋىنا ۇلەس قوسىپ ٴجۇرمىز.
12. يشايا 40:3، 5 تە ايتىلعان پايعامبارلىق قالاي ورىندالدى؟
12 ەحوبانىڭ ەسىمىنىڭ كيەلى بولۋىنا ۇلەس قوسۋدىڭ تاعى ٴبىر جولى — يساعا ەلىكتەۋ. يشايا كىتابىندا يساعا قاتىستى: «ەحوباعا جول دايارلاڭدار!»— دەگەن پايعامبارلىق بار (يشايا 40:3). بۇل پايعامبارلىق شومىلدىرۋ ٴراسىمىن جاساۋشى جاقيا ەحوبانىڭ وكىلى يساعا جول دايىنداعان كەزدە ورىندالدى (مات. 3:3؛ مار. 1:2—4؛ لۇقا 3:3—6). كەيىن يشايا پايعامبار: «ەحوبانىڭ سالتاناتتى ۇلىلىعى پاش ەتىلەدى»،— دەپ قوسقان (يشايا 40:5). بۇل سوزدەر نەنى بىلدىرەدى؟ يسا جەرگە كەلگەندە ەحوبانىڭ ۇلىلىعىن كەمەلدى تۇردە پاش ەتكەنى سونشا — ەحوبانىڭ ٶزى جەرگە كەلگەندەي بولدى (جوح. 12:45).
13. ٴبىز يساعا قالاي ەلىكتەي الامىز؟
13 يسا سياقتى ٴبىز دە ەحوبانىڭ كۋاگەرلەرىمىز. ٴبىز دە ەحوبانىڭ ەسىمىن الىپ ٴجۇرمىز جانە ونىڭ كەرەمەت ىستەرى جايلى ٵربىر ادامعا كۋالىك ەتەمىز. ٴبىراق ەحوبا جايلى تۇبەگەيلى كۋالىك بەرۋ ٷشىن ٴبىز يسانىڭ ەرەكشە ٴرولى جايلى دا كۋالىك ەتۋىمىز قاجەت (ەل. ٸس. 1:8). ويتكەنى ول — ەحوبانىڭ ەڭ باستى كۋاگەرى. راسىندا دا، ٴبىز ٷشىن يسادان اسقان ۇلگى جوق (ايان 1:5). ەحوبانىڭ ەسىمىن بارىنەن جوعارى قوياتىنىمىزدى تاعى قالاي كورسەتسەك بولادى؟
ەحوبانىڭ ەسىمىن بارىنەن جوعارى قويامىز
14. ٴزابۇر 105:3 كە ساي، ٴبىز ەحوبانىڭ ەسىمىن قانشالىقتى جاقسى كورەمىز؟
14 ٴبىز ەحوبانىڭ ەسىمىن ماقتان تۇتامىز (ٴزابۇر 105:3 وقىڭىز). اتىن ايتىپ ماقتانعان سايىن ەحوبانىڭ جۇرەگىن قۋانىش كەرنەيدى (ەرم. 9:23، 24؛ قور. 1-ح. 1:31؛ قور. 2-ح. 10:17). قۇدايىمىزدىڭ ەسىمىن داڭقتاۋ كەرەمەت مارتەبە! سوندىقتان ارىپتەستەرىمىزگە، سىنىپتاستارىمىز بەن كورشىلەرىمىزگە ەحوبا كۋاگەرى ەكەنىمىزدى ايتۋدان ەش ۇيالمايىق. شايتاننىڭ قالايتىنى دا وسى عوي. ول ٴبىزدى ەحوبانىڭ ەسىمى جايلى مۇلدەم ايتپاسا ەكەن دەيدى (ەرم. 11:21؛ ايان 12:17). نەگىزى، شايتاننىڭ دا، ونىڭ جالعان پايعامبارلارىنىڭ دا بار كوكسەگەنى — ادامدارعا ەحوبانىڭ ەسىمىن ۇمىتتىرۋ (ەرم. 23:26، 27). ٴبىراق ٴبىز ەحوبانىڭ ەسىمىن جانىمىزدان ارتىق جاقسى كورەمىز جانە «كۇنى بويى» ونىڭ ەسىمىنە قۋانامىز (ٴزاب. 5:11؛ 89:16).
15. ەحوبانىڭ اتىن اتاپ شاقىرۋ دەگەن نەنى بىلدىرەدى؟
15 ٴبىز ەحوبانىڭ اتىن اتاپ شاقىرۋدان تالمايمىز (جوەل 2:32؛ ريم. 10:13، 14). ەحوبانىڭ اتىن اتاپ شاقىرۋ دەگەن — جاي ونىڭ اتىن اتاپ، اۋىزعا الۋدى عانا بىلدىرمەيدى. بۇل قۇدايدى تاني بەرۋدى، وعان سەنىم ارتۋدى، ودان كومەك پەن باعىت-باعدار سۇراۋدى دا بىلدىرەدى (ٴزاب. 20:7؛ 99:6؛ 116:4؛ 145:18). ەحوبانىڭ ەسىمى مەن ونىڭ تاماشا قاسيەتتەرى جايلى وزگەلەرگە جاريالاۋ دا ەحوبانىڭ اتىن اتاپ شاقىرۋعا جاتادى. ەحوبا جايلى وسىلاي كۋالىك ەتسەك، ادامدار وكىنىپ، ومىرلەرىن وزگەرتىپ، ونىڭ ىقىلاسىنا يە بولا الادى (يشايا 12:4؛ ەل. ٸس. 2:21، 38).
16. شايتاننىڭ وتىرىكشى ەكەنىن ٴبىز قالاي دالەلدەي الامىز؟
16 ٴبىز ەحوبانىڭ ەسىمى ٷشىن ازاپ شەگۋگە دايىنبىز (جاق. 5:10، 11). ەگەر ٴبىز قينالعان شاعىمىزدا ەحوباعا ادال بولىپ قالساق، شايتاننىڭ وتىرىكشى ەكەنىن دالەلدەيمىز. ٵيۇپتىڭ كۇندەرىندە شايتان ەحوبانىڭ قىزمەتشىلەرىنە قاتىستى: «ادام ٶز ٶمىرىن ساقتاپ قالۋ ٷشىن قولىنداعىنىڭ ٴبارىن بەرەدى»،— دەگەن (ٵيۇپ 2:4). ول قىزمەتشىلەرى ەحوباعا جاعدايلارى جاقسى كەزدە عانا قىزمەت ەتىپ، ٴسال قينالا قالسا، ودان تەرىس اينالىپ شىعا كەلەدى دەگەن. بۇنىڭ بارىپ تۇرعان وتىرىك ەكەنىن ٵيۇپ ٶز زامانىندا دالەلدەپ كەتتى. بۇگىندە ٴبىز دە شايتاننىڭ وتىرىكشى ەكەنىن دالەلدەي الامىز. ول باسىمىزعا قانداي قيىندىق سالماسىن، ٴبىز ەشقاشان ەحوبادان تەرىس اينالمايمىز. ويتكەنى ەحوبا ٴبىزدى ٶز ەسىمى ٷشىن قورعايتىنىنا كامىل سەنەمىز (جوح. 17:11).
17. پەتىردىڭ 1-حاتى 2:12 دە ايتىلعانداي، ەحوبانىڭ ەسىمىن ماداقتاۋ ٷشىن تاعى نە ىستەي الامىز؟
17 ٴبىز ەحوبانىڭ ەسىمىن تەرەڭ قاستەرلەيمىز (ناق. س. 30:9؛ ەرم. 7:8—11). ەحوبانىڭ وكىلى بولعاندىقتان جانە ونىڭ اتىمەن اتالىپ جۇرگەندىكتەن، ٴبىزدىڭ ٴجۇرىس-تۇرىسىمىز ونىڭ ەسىمىنە نە داڭق اكەلەدى، نە كىر كەلتىرەدى (پەتىردىڭ 1-حاتى 2:12 وقىڭىز). سوندىقتان سوزدەرىمىز بەن ىستەرىمىز ەحوباعا داڭق اكەلەتىندەي بولۋ ٷشىن بارىنشا تىرىسۋىمىز كەرەك. سوندا كەمەلسىز بولساق تا، ەحوبا اكەمىزدىڭ ەسىمىن ماداقتاي الامىز.
18. ەحوبانىڭ ەسىمى ٴبىز ٷشىن بارىنەن دە ماڭىزدى ەكەنىن تاعى قالاي كورسەتە الامىز؟ (سىلتەمەنى دە قاراڭىز.)
18 ٴبىز ٷشىن ەحوبانىڭ ەسىمى ٶز ابىرويىمىزدان دا ارتىق (ٴزاب. 138:2). ٴجيى ٴبىز ەحوباعا قىزمەت ەتكەنىمىز ٷشىن جاماناتتى بولىپ جاتامىز a. يسا دا ەحوبانىڭ ەسىمى داڭقتالۋ ٷشىن قىلمىسكەر رەتىندە ماسقارا ولىممەن ولگەن. ول بۇل «قورلىقتى ەلەمەدى»، ادامدار مەن جايلى نە ويلاپ قالادى دەپ ۋايىمعا دا بەرىلمەدى (ەۆر. 12:2—4). ويتكەنى ونىڭ بار ويى قۇدايدىڭ ەركىن ورىنداۋ بولدى (مات. 26:39).
19. ەحوبانىڭ ەسىمى ٴسىز ٷشىن قانشالىقتى ماڭىزدى؟
19 ٴبىز ەحوبانىڭ ەسىمىن ماقتان تۇتامىز. ەحوبا كۋاگەرى دەپ ونىڭ ەسىمىمەن اتالۋ ٴبىز ٷشىن ۇلكەن قۇرمەت. ونىڭ ەسىمى ٷشىن ٴبىز جاماناتتى بولۋعا دا، قورلىق كورۋگە دە دايىنبىز. ويتكەنى ەحوبانىڭ ەسىمى ٴبىز ٷشىن ٶز ابىرويىمىزدان دا ارتىق. ەندەشە، شايتان بىزگە قانشا قىسىم كورسەتپەسىن، ەحوبانى ٵرى قاراي دا تالماي داڭقتاي بەرەيىك. سوندا يسا سياقتى ەحوبانىڭ ەسىمىن بارىنەن جوعارى قوياتىنىمىزدى دالەلدەيمىز.
10-ٵن قۇدايىمىز ەحوبانى ماداقتايىق!
a قۇدايعا ادال بولعان ٵيۇپ بىردە ٶز ابىرويىن كوبىرەك ويلاپ كەتتى. بالالارىنان، بار جيعان-تەرگەنىنەن ٴبىر ساتتە ايىرىلىپ قالعاندا، ول «كۇنا جاسامادى، قۇدايدى دا جازعىرمادى» (ٵيۇپ 1:22؛ 2:10). ال ٷش تانىسى ونىڭ جاقساتىنا كىر كەلتىرگەنى سول ەدى، ول ٶز-ٶزىن قورعاپ، «اشىنا سويلەدى». قۇدايدى داڭقتاۋدىڭ ورنىنا، ٵيۇپ ٶز ابىرويىن ويلاپ كەتتى (ٵيۇپ 6:3؛ 13:4، 5؛ 32:2؛ 34:5).
