42-زەرتتەۋ ماقالاسى
ٴسىز «مويىنسۇنۋعا دايىنسىز» با؟
«كوكتەن كەلگەن دانالىق... مويىنسۇنۋعا دايىن» (جاق. 3:17).
101-ٵن بىرلەسە قىزمەت ەتەيىك
اڭداتپا a
1. مويىنسۇنۋ بىزگە نەگە قيىن؟
سىزگە مويىنسۇنۋ قيىن با؟ داۋىتكە دە قيىن بولعان. ول ەحوبانى جاقسى كورسە دە، بىردە: «بويىمدا بويسۇنۋشىلىق رۋحىن وياتشى»،— دەپ دۇعا ەتكەن (ٴزاب. 51:12). بىزگە نەگە مويىنسۇنۋ وڭاي ەمەس؟ بىرىنشىدەن، ٴبىز ادام اتانىڭ ۇرپاعى بولعاندىقتان تۋمىسىمىزدان مويىنسۇنباۋعا بەيىمبىز. ەكىنشىدەن، شايتان ٴبىزدى ٶزى سياقتى بيلىككە قارسى شىعۋعا تۇرتپەكتەيدى دە تۇرادى (قور. 2-ح. 11:3). ۇشىنشىدەن، اينالامىزداعى ادامداردىڭ بارىندە «ٴتىلازار ادامدارعا اسەر ەتىپ جاتقان رۋح»، ياعني بۇلىكشىل رۋح بار (ەفەس. 2:2). سوندىقتان بىزگە ىشتەي كۇناكار بولمىسىمىزبەن كۇرەسۋمەن قاتار، سىرتتاي شايتان مەن مىنا دۇنيەنىڭ ىقپالىنا دا قارسى تۇرۋ كەرەك. دەمەك، ەحوباعا جانە ول تاعايىنداعان بيلىك يەلەرىنە مويىنسۇنۋ ٷشىن كوپ كۇش سالۋىمىز كەرەك.
2. «مويىنسۇنۋعا دايىن» بولۋ دەگەن نەنى بىلدىرەدى؟ (جاقىپ 3:17)
2 جاقىپ 3:17 وقىڭىز. قۇداي سوزىندە دانا ادامدار «مويىنسۇنۋعا دايىن» بولاتىنى جازىلعان. مويىنسۇنۋعا دايىن بولۋ دەگەن ەحوبا بەلگىلى ٴبىر شامادا بيلىك بەرگەن ادامدارعا بار ىقىلاسىمىزبەن مويىنسۇنۋىمىز كەرەكتىگىن بىلدىرەدى. ٴبىراق ەحوبانىڭ زاڭدارىن بۇزۋدى تالاپ ەتكەن جاعدايلاردا ٴبىز ولارعا باعىنبايمىز (ەل. ٸس. 4:18—20).
3. بيلىگى بارلارعا مويىنسۇنعانىمىز ەحوبا ٷشىن نەگە ماڭىزدى؟
3 ٴبىز ادامدارعا قاراعاندا ەحوباعا مويىنسۇنۋ جەڭىل دەرمىز. ويتكەنى ونىڭ بەرەتىن نۇسقاۋلارىندا ەش ٴمىن جوق (ٴزاب. 19:7). ال بيلىگى بار ادامدار كەمەلسىز. سوعان قاراماستان ەحوبا اتا-انالارعا، بيلىك باسىنداعىلارعا جانە اقساقالدارعا ٴبىرشاما بيلىكتى سەنىپ تاپسىرعان (ناق. س. 6:20؛ سال. 1-ح. 5:12؛ پەت. 1-ح. 2:13، 14). دەمەك، ولارعا مويىنسۇنعانىمىز — ەحوباعا مويىنسۇنعانىمىز. ەندەشە، كەيدە بىزگە ەحوبا بيلىك بەرگەن ادامداردىڭ ايتقاندارىمەن كەلىسۋ، ٴتىلىن الۋ قيىن بولسا دا، ولارعا مويىنسۇنۋعا نە كومەكتەسەتىنىن قاراستىرايىق.
اتا-اناڭنىڭ ٴتىلىن ال
4. نەگە جاستاردىڭ كوبى اتا-انالارىنا مويىنسۇنبايدى؟
4 بۇگىندە مىنا دۇنيەدەگى جاستاردىڭ دەنى «اتا-انالارىنا مويىنسۇنبايدى» (ٴتىم. 2-ح. 3:1، 2). نەگە بۇلاي؟ ويتكەنى ولار: «اتا-انامىز ەكىجۇزدى، وزدەرى ىستەمەيتىندى بىزدەن تالاپ ەتەدى»،— دەيدى. ال باسقا بالالار اتا-انالارىن تىم قاتال، اقىل-كەڭەستەرىن زاماننان قالىپ قويعان، ٴتيىمسىز دەپ سانايدى. قىمباتتى ٴبىزدىڭ جەتكىنشەگىمىز، سەن دە سونداي ويداسىڭ با؟ كوپ جاستارعا «بالالار، اتا-انالارىڭا مويىنسۇنىڭدار، ويتكەنى بۇل قۇدايدىڭ ەركىنە ساي ٵرى دۇرىس» دەگەن نۇسقاۋعا قۇلاق اسۋ وڭاي ەمەس (ەفەس. 6:1). وسى ورايدا ساعان نە كومەك بولادى؟
5. لۇقا 2:46—52 تارماقتاردا ايتىلعانداي، يسانىڭ ٴتىلالعىشتىعى نەسىمەن ٴبىزدى تاڭعالدىرادى؟
5 مويىنسۇنۋشىلىقتىڭ ەڭ ۇزدىك ۇلگىسى — يسا (پەت. 1-ح. 2:21—24). ٶزى كەمەلدى بولسا دا، ول كەمەلسىز اتا-اناسىنىڭ ٴتىلىن العان. اتا-اناسى قاتەلىك جاساپ، ونى تۇسىنبەگەن كەزدە دە يسا ولاردى قۇرمەتتەي بەرگەن (مۇس. 2-ج. 20:12). 12 جاسىندا ول وتباسىمەن بىرگە يەرۋساليمدەگى مەيرامعا بارعان كەزىن الايىق (لۇقا 2:46—52 وقىڭىز). يەرۋساليمنەن قايتار جولدا اتا-اناسى يسانىڭ قاستارىندا جوق ەكەنىن بايقايدى. نەگىزىندە، بالالارىن قاراۋسىز قالدىرماي، وزدەرىمەن بىرگە الىپ ٴجۇرۋ اتا-اناسىنىڭ مىندەتى ەدى. ٴبىراق ٴماريام يساعا «بۇل نە قىلعانىڭ؟» دەپ، ٶزىن كىنالاپ جىبەردى. سول كەزدە يسا ولارعا «بۇلارىڭ دۇرىس ەمەس، ادىلدىككە جاتپايدى» دەگەن جوق. قايتا، ولارعا كوپ ٴسوز ايتپاي-اق، قۇرمەتپەن جاۋاپ بەردى. سوندا دا ٴجۇسىپ پەن ٴماريام «ونىڭ سوزدەرىن تۇسىنبەدى». سوعان قاراماستان يسا «ولارعا ٵرى قاراي دا مويىنسۇنىپ ٴجۇردى».
6، 7. نەنى ويدا ۇستاعانىڭ ساعان اتا-اناڭا مويىنسۇنۋعا كومەكتەسەدى؟
6 قىمباتتى جاستار، سەندەرگە دە اتا-انالارىڭ قاتەلەسكەندە يا سەندەردى تولىق تۇسىنبەگەندە مويىنسۇنۋ قيىن شىعار. سوندايدا نە ىستەسەڭدەر بولادى؟ بىرىنشىدەن، ەحوبانىڭ نە سەزىنەتىنىن ويلاڭدار. كيەلى كىتاپتا ايتىلعانداي، بالالار اتا-اناسىنا مويىنسۇنسا، «بۇل يەمىزگە ۇنايدى» (قول. 3:20). اتا-انالارىڭنىڭ كەي كەزدە سەندەردى تۇسىنبەي جاتاتىنىن نەمەسە قيىن ەرەجەلەر ورناتۋى مۇمكىن ەكەنىن ەحوبا جاقسى بىلەدى. ٴبىراق سوعان قاراماي ولارعا مويىنسۇنا بەرسەڭدەر، ەحوبا قاتتى قۋانادى.
7 ەكىنشىدەن، اتا-اناڭدى قۋانتاتىنىڭدى ويلا. ٴتىلىن العان كەزدە اتا-اناڭ ساعان ريزا بولىپ، ودان بەتەر سەنىم ارتاتىن بولادى (ناق. س. 23:22—25). سونداي-اق ولارعا جاقىنداي تۇسەسىڭ. بەلگيادا تۇراتىن الەكساندر باۋىرلاس بىلاي دەيدى: «اتا-اناما كوبىرەك قۇلاق اسا باستاپ ەدىم، ارامىز ودان سايىن جاقىنداپ، بۇرىنعىدان دا قۋانىشتى بولىپ جۇرەتىن بولدىق» b. ۇشىنشىدەن، اتا-اناڭا مويىنسۇنساڭ، الدا مۇنىڭ زور پايداسىن كورەسىڭ. «اتا-انامنىڭ ٴتىلىن الىپ جۇرگەننىڭ ارقاسىندا مەن كەيىن ەحوباعا جانە بيلىگى بار ادامدارعا باعىنۋدى ۇيرەندىم»،— دەيدى برازيليالىق پاۋلو. كيەلى كىتاپتا اتا-انامىزعا مويىنسۇنۋدىڭ وتە ٴبىر كەلەلى سەبەبى جازىلعان: «سوندا وزىڭە جاقسى بولادى، ٵرى جەردە ۇزاق عۇمىر كەشەسىڭ» (ەفەس. 6:2، 3).
8. نەلىكتەن كوپ جاستار اتا-اناسىنىڭ ٴتىلىن الىپ ٴجۇر؟
8 كوپ جاستار اتا-اناسىن تىڭداعاندا ۇتپاسا، ەش ۇتىلمايتىندارىن بايقاپتى. برازيليادا تۇراتىن لۋيزاعا اتا-اناسى كەزىندە تەلەفون ۇستاۋعا رۇقسات بەرمەگەن ەكەن. باسىندا ول اتا-اناسىنىڭ ورناتقان ەرەجەسىن ەش تۇسىنبەي، «باسقالارعا بولادى، نەگە ماعان بولمايدى؟» دەپ ويلاعان. كەيىن ول اتا-اناسىنىڭ ونى جاماندىقتان ساقتاعىسى كەلەتىنىن ٴتۇسىندى. «اتا-اناڭا مويىنسۇنۋ قولىڭا كىسەن سالۋ ەمەس، قاۋىپسىزدىك بەلبەۋىن تاعۋ سياقتى ەكەن»،— دەيدى ول. ال قۇراما شتاتتاردا تۇراتىن ەليزابەتكە اتا-اناسىنا مويىنسۇنۋ ٵلى دە قيىن بولىپ تۇرادى ەكەن. ول بىلاي دەيدى: «اتا-انامنىڭ ورناتقان ەرەجەسى ميىما قونباي جاتسا، وسىعان دەيىن ولارعا مويىنسۇنعاندا، پايداسىن كورگەنىمدى ەسكە الامىن». ارمەنيالىق مونيكا دەگەن قىزدىڭ بايقاۋىنشا، اتا-اناسىنىڭ ٴتىلىن الماعاندا ەمەس، قايتا العان كەزدە ٴبارى جاقسى بولادى ەكەن.
«بيلىك باسىنداعىلارعا» مويىنسۇنىڭىز
9. زاڭعا باعىنۋعا قاتىستى كوپشىلىك قانداي ويدا؟
9 كوپشىلىك ۇكىمەتتىڭ قاجەت ەكەنىن مويىندايدى، ولار «بيلىك باسىنداعىلاردىڭ» كەيبىر زاڭدارىنا مويىنسۇنادى دا (ريم. 13:1). ٴبىراق وزدەرىنە ۇناماسا نەمەسە ادىلەتسىز بولىپ كورىنسە، زاڭعا باعىنعىسى كەلمەيدى. مىسالى، سالىق تولەگىسى كەلمەيدى. ەۋروپانىڭ ٴبىر ەلىندە كوپتەگەن ازاماتتار «ادىلەتسىز دەپ ساناساڭ، سالىقتى تولەمەۋگە بولادى» دەپ ەسەپتەيدى. سول سەبەپتى بۇل ەلدە ۇكىمەتكە تيەسىلى سالىقتىڭ ۇشتەن ەكى بولىگى عانا تولەنەدى ەكەن.
ٴجۇسىپ پەن ٴماريامنان مويىنسۇنۋعا قاتىستى نە ۇيرەنەمىز؟ (10—12-ابزاستاردى قاراڭىز) c
10. نەلىكتەن ٴبىز قالاماساق تا، زاڭدارعا مويىنسۇنۋىمىز قاجەت؟
10 راس، كيەلى كىتاپتا ادامي ۇكىمەتتەردىڭ قايعى-قاسىرەت تۋدىراتىنى، شايتاننىڭ قول استىندا ەكەنى جانە جاقىندا جويىلاتىنى ايتىلعان (ٴزاب. 110:5، 6؛ ۋاع. 8:9؛ لۇقا 4:5، 6). ٴبىراق وندا «بيلىككە قارسى شىققان ادام قۇداي ورناتقان قۇرىلىمعا دا قارسى شىعاتىنى» ايتىلعان. ەحوبا الەمدە ٴتارتىپ بولۋ ٷشىن ۇكىمەتتەرگە ۋاقىتشا بيلىك بەرگەن، سوندىقتان ٴبىز ولارعا مويىنسۇنۋىمىز كەرەك. ٴبىز «اركىمگە ٴتيىستىسىن بەرىپ»، سالىق تولەيمىز، بيلىك يەلەرىن قۇرمەتتەپ، مويىنسۇنامىز (ريم. 13:1—7). الايدا قولايسىز، ادىلەتسىز كورىنگەندىكتەن يا قىمباتقا تۇسەتىندىكتەن كەيبىر زاڭدارعا مويىنسۇنعىمىز كەلمەيتىن شىعار. ٴبىراق ٴبىز ەحوباعا مويىنسۇنامىز، ال ەحوبا ونىڭ زاڭدارىنا قايشى كەلمەسە، ۇكىمەتكە باعىنۋدى تالاپ ەتەدى (ەل. ٸس. 5:29).
11، 12. لۇقا 2:1—6 تارماقتارعا ساي، ٴجۇسىپ پەن ٴماريام ىڭعايسىز بولسا دا، زاڭعا باعىنۋ ٷشىن نە ىستەدى جانە ناتيجەسى قانداي بولدى؟ (سۋرەتتەردى دە قاراڭىز.)
11 ٴبىز قيىن بولسا دا بيلىككە باعىنعان ٴجۇسىپ پەن ٴماريامنان نە ۇيرەنەتىنىمىزدى كورەيىك (لۇقا 2:1—6 وقىڭىز). ريم يمپەراتورى اۆگۋست اركىم ساناقتان ٶتۋ ٷشىن ٶز قالاسىنا بارىپ تىركەلسىن دەگەن جارلىق شىعارادى. ال بۇل كەزدە ٴماريامنىڭ بوساناتىن ايى-كۇنى جەتىپ تۇرعان ەدى. بەتلەحەمگە ويلى-قىرلى جولدارمەن 150 شاقىرىمداي جول ٴجۇرۋ كەرەكتىگىن ويلاعاندا، ولار ابدەن ۋايىمداعان شىعار. ٴماريام جولدى كوتەرە الا ما؟ ىشتەگى سابيگە قاۋىپ تونبەي مە؟ جارتى جولدا تولعاق ۇستاپ قالسا نە ىستەيدى؟ ٴماريامنىڭ قۇرساعىندا جاتقان بالا ۋادە ەتىلگەن ٴماسىح ەمەس پە؟! وسىلاردى سەبەپ قىلىپ، ٴجۇسىپ پەن ٴماريام ۇكىمەتكە باعىنباي قويدى ما؟
12 ۋايىمدايتىن جايتتارى بولسا دا، ٴجۇسىپ پەن ٴماريام زاڭعا باعىندى. ال ەحوبا ولاردى مويىنسۇنعاندارى ٷشىن جارىلقادى. ٴماريام بەتلەحەمگە امان-ەسەن جەتىپ، ساپ-ساۋ بالانى دۇنيەگە اكەلدى. ولار كيەلى كىتاپتاعى پايعامبارلىقتى دا ورىندادى (ميحا 5:2).
13. زاڭعا مويىنسۇنعانىمىزدىڭ باۋىرلاستارعا تيگىزەر پايداسى قانداي؟
13 بيلىك باسىنداعىلارعا باعىنعانىمىزدىڭ وزىمىزگە دە، وزگەلەرگە دە پايداسى بار. بىرىنشىدەن، زاڭعا باعىنىپ جۇرسەك، ەشقانداي جازاعا تارتىلمايمىز (ريم. 13:4). ەكىنشىدەن، بىزگە قاراپ بيلىك يەلەرى ەحوبا كۋاگەرلەرى جايلى جاقسى پىكىردە قالادى. مىسالى، وسىدان ونداعان جىل بۇرىن نيگەريادا ەل اراسىندا ەرەۋىلشىلەر شىعىپ، سالىق تولەۋگە قارسى بولىپ جاتتى. سول بۇلىكشىلەردى ىزدەپ جۇرگەن ساربازدار پاتشالىق سارايىنا كىرىپ كەلەدى. سوندا ولاردىڭ باسشىسى: «ەحوبا كۋاگەرلەرى ۇنەمى سالىق تولەيدى، بۇلىكشىلەرگە ولاردىڭ ەش قاتىسى جوق»،— دەپ ساربازدارىن الىپ كەتەدى. ٴسىز زاڭعا مويىنسۇنعان سايىن، ەحوبا كۋاگەرلەرىنىڭ ابىرويىن كوتەرەسىز. كىم ٴبىلسىن، كۋاگەرلەردىڭ وسىنداي جاقساتى كۇندەردىڭ كۇنىندە باۋىرلاستارىڭىزدىڭ ٶمىرىن ساقتاپ قالار (مات. 5:16).
14. ٴبىر باۋىرلاس بيلىگى بارلارعا باعىنۋدى قالاي ۇيرەندى؟
14 ٴبىراق كەيدە بيلىك يەلەرىنە باعىنعىمىز كەلمەي، ىشتەي قينالاتىن شىعارمىز. قۇراما شتاتتاردا تۇراتىن دجواننا ەسىمدى ايەل باۋىرلاس بىلاي دەدى: «مەنىڭ وتباسىمنىڭ كەيبىر مۇشەلەرى بيلىك يەلەرىنىڭ قولىنان ادىلەتسىزدىك كوردى. سوندىقتان ماعان ولارعا باعىنۋ قيىننىڭ قيىنى بولدى». دجواننا كوزقاراسىن وزگەرتۋى كەرەكتىگىن ٴتۇسىنىپ، كۇش سالدى. بىرىنشىدەن، ول بيلىك يەلەرىنە قاتىستى جاعىمسىز سەزىمدەرىن ورشىتەتىن الەۋمەتتىك جەلىلەردەگى پىكىرلەردى وقىمايتىن بولدى (ناق. س. 20:3). ەكىنشىدەن، ەحوباعا «ۇكىمەتتىڭ وزگەرۋىنە ەمەس، ساعان سەنىم ارتۋعا كومەكتەسشى» دەپ دۇعا ەتتى (ٴزاب. 9:9، 10). ۇشىنشىدەن، ادەبيەتتەردەن بەيتاراپتىققا قاتىستى مالىمەتتەردى وقىپ-زەرتتەدى (جوح. 17:16). قازىر دجواننا بيلىگى بارلاردى قۇرمەتتەپ، باعىنۋدى ۇيرەنگەن. سونىڭ ارقاسىندا جۇرەگىندە تىنىشتىق بار.
ەحوبانىڭ ۇيىمىنان كەلگەن نۇسقاۋلارعا مويىنسۇنىڭىز
15. ەحوبانىڭ ۇيىمىنان كەلگەن نۇسقاۋلارعا مويىنسۇنۋ نەگە كەيدە بىزگە قيىن؟
15 ەحوبا بىزگە قاۋىمدا «باسشىلىقتى قولعا العاندارعا مويىنسۇنىڭدار» دەيدى (ەۆر. 13:17). ٴبىزدىڭ كوسەمىمىز يسا كەمەلدى، ٴبىراق ول جاۋاپكەرشىلىك تاپسىرعان جەردەگى ادامدار كەمەلسىز. سوندىقتان ولارعا مويىنسۇنۋ قيىن بولۋى مۇمكىن، اسىرەسە ولار ٴبىز قالاماي تۇرعان نارسەنى ىستەۋدى سۇراعاندا. ەلشى پەتىردىڭ دە مويىنسۇنعىسى كەلمەگەن كەزدەرى بولعان. پەرىشتە وعان مۇسا زاڭى بويىنشا ارام سانالعان ەتتى جەۋدى ايتقاندا، ول ٴبىر ەمەس، ٷش رەت باس تارتقان! (ەل. ٸس. 10:9—16). بۇل بۇيرىقتى ورىنداۋ پەتىردىڭ اقىلىنا سيمادى، ويتكەنى ول ٶمىر بويى باسقاشا ىستەپ ۇيرەنىپ قالعان ەدى. پەتىرگە كەمەلدى پەرىشتەگە مويىنسۇنۋ قيىن بولعان بولسا، وندا بىزگە كەمەلسىز ادامعا مويىنسۇنۋ ودان دا قيىن ەكەنى ايتپاسا دا تۇسىنىكتى!
16. پاۋىل ٴبىر قاراعاندا اقىلعا قونبايتىن باسشىلىق العاندا، نە ىستەدى؟ (ەلشىلەردىڭ ىستەرى 21:23، 24، 26)
16 ەلشى پاۋىل اقىلعا سيمايتىنداي كورىنگەن باسشىلىق العان كەزدە دە «مويىنسۇنۋعا دايىن» بولدى. بىردە ياھۋدي ماسىحشىلەرگە پاۋىل «مۇسا زاڭىن ۇستانباۋعا ۇيرەتىپ ٴجۇر» دەگەن وسەك جەتەدى (ەل. ٸس. 21:21). سوندىقتان يەرۋساليمدەگى اقساقالدار پاۋىلعا قاسىنا ٴتورت ەر كىسىنى ەرتىپ عيباداتحاناعا بارۋدى، ٴسۇيتىپ، مۇسا زاڭىن ۇستاناتىنىن كورسەتۋ ٷشىن تازارۋ ٴراسىمىن جاساۋدى ايتادى. ٴبىراق ماسىحشىلەر بۇدان بىلاي مۇسا زاڭىن ۇستانبايتىن ەدى عوي. پاۋىل مۇنى بىلەتىن. ونىڭ ۇستىنە، ول ەشقانداي دا جامان نارسە ىستەمەگەن. دەسە دە پاۋىل اقساقالدارعا «سەندەردىڭ ايتىپ تۇرعاندارىڭ ٴجونسىز» دەمەدى. ولاردىڭ ٴسوزىن ەكى ەتپەي ورىنداپ، ەرتەسىنە «الگى كىسىلەردى ەرتىپ، سولارمەن بىرگە تازارۋ ٴراسىمىن جاسادى» (ەلشىلەردىڭ ىستەرى 21:23، 24، 26 وقىڭىز). پاۋىلدىڭ مويىنسۇنعانىنىڭ ارقاسىندا قاۋىمنىڭ ىنتىماعى بۇزىلمادى (ريم. 14:19، 21).
17. ٴسىز ستەفانيدەن نە ۇيرەندىڭىز؟
17 ستەفاني باۋىرلاسقا جاۋاپتى باۋىرلاستاردىڭ قابىلداعان شەشىمىمەن كەلىسۋ باسىندا قيىن بولعان ەكەن. ولار كۇيەۋى ەكەۋى شەت ٴتىلدى توپتاعى قىزمەتتىڭ قىزىعىنا باتىپ جۇرگەن ەدى. ٴبىراق كەيىن فيليال بۇل توپتى جاۋىپ، ولاردى قايتادان وزدەرىنىڭ انا تىلىندەگى قاۋىمعا تاعايىنداپتى. «مەنىڭ قاتتى كوڭىلىم ٴتۇسىپ كەتتى. ٴبىزدىڭ تىلىمىزدە قاجەتتىلىك جوق قوي دەپ ويلادىم»،— دەيدى ستەفاني. سوندا دا ول وسى شەشىمدى قولداپ، مويىنسۇنادى. «ۋاقىت وتە كەلە مەن بۇل شەشىمنىڭ دۇرىس بولعانىن ٴتۇسىندىم. وتباسىلارىنان وزدەرى عانا شىندىقتا جۇرگەن بىرنەشە باۋىرلاسقا ٴبىز رۋحاني اكە-شەشە بولدىق. قازىر مەن ٴبىر كەزدەرى ۋاعىزداماي كەتىپ، قىزمەتىن قايتادان قولعا العان ايەل باۋىرلاسپەن زەرتتەۋ وتكىزەمىن. جەكە زەرتتەۋگە ارنالعان ۋاقىتىم دا كوبىرەك. ۇيىمنىڭ شەشىمىنە مويىنسۇنۋ ٷشىن بارىمدى سالعانىما قۋانامىن، ار-ۇجدانىم دا تازا»،— دەيدى ول.
18. مويىنسۇنعىش بولساق، قانداي پايداسىن كورەمىز؟
18 ٴبىز مويىنسۇنۋدى ۇيرەنە الامىز. يسا جاعدايى كەرەمەت بولعاندا ەمەس، «شەككەن ازاپتارى ارقىلى مويىنسۇنۋدى ۇيرەندى» (ەۆر. 5:8). ٴبىز دە كوبىنەسە باسىمىزعا قيىن جاعدايلار تۇسكەندە مويىنسۇنۋدى ۇيرەنىپ جاتامىز. ماسەلەن، 19-COVID پاندەمياسى باستالعاندا، پاتشالىق سارايىنا جينالمايمىز، ۇيمە-ٷي ۋاعىزدامايمىز دەگەن نۇسقاۋعا باعىنۋ بىزگە قيىن بولعان شىعار. ٴبىراق سوعان باعىنعاننىڭ ارقاسىندا امان-ساۋ جۇردىك، باۋىرلاستارمەن بىرلىكتە بولدىق، ەحوبانى دا قۋانتتىق. ەندى زور الاپاتتا قانداي باسشىلىقتار كەلسە دە، مويىنسۇنۋعا بۇرىنعىعا قاراعاندا دايىنبىز. سول كەزدە امان قالۋ-قالماۋىمىز مويىنسۇنۋىمىزعا بايلانىستى بولادى (ٵيۇپ 36:11).
19. ٴبىز ەڭ الدىمەن نە سەبەپتى مويىنسۇنعىش بولعىمىز كەلەدى؟
19 ٴبىز مويىنسۇنۋدىڭ پايداسى وتە كوپ ەكەنىن بىلدىك. ٴبىراق ەحوباعا بارىنەن بۇرىن نە ٷشىن مويىنسۇنامىز؟ ٴبىز ونى جاقسى كورەمىز ٵرى وعان ۇنامدى بولعىمىز كەلەدى (جوح. 1-ح. 5:3). ەحوبانىڭ جاساعان بار جاقسىلىعىن ەشقاشان دا وتەي المايمىز (ٴزاب. 116:12). ٴبىراق وعان جانە ول بيلىك بەرگەن ادامدارعا مويىنسۇنا الامىز. مويىنسۇنعىش بولساق، اقىلدى ەكەنىمىزدى كورسەتەمىز. وسىلاي ەحوبانىڭ جۇرەگىن قۋانتامىز (ناق. س. 27:11).
89-ٵن قۇدايعا قۇلاق اسىپ، باتاعا كەنەل
a ادامنىڭ باسشىلىق ەتۋگە قۇقى بار ەكەنىن ٴبىلىپ تۇرساق تا، كەمەلسىز بولعاندىقتان، مويىنسۇنۋ كەيدە بىزگە قيىن. بۇل ماقالادا اتا-انامىزعا، «بيلىك باسىنداعىلارعا» جانە قاۋىمدا جەتەكشىلىكتى قولعا العاندارعا مويىنسۇنساق، مۇنىڭ قانداي يگىلىگىن كورەتىنىمىزدى بىلەمىز.
b اتا-اناڭنىڭ ورناتقان ەرەجەلەرىنە باعىنۋ قيىن بولسا، ولارمەن بۇل جايلى سويلەسۋگە jw.org تور بەكەتىندەگى «ۇيدە ەرەجەلەر ورناتۋدىڭ نە قاجەتى بار؟» دەگەن ماقالا كومەكتەسەدى.
c سۋرەت سيپاتتاماسى: ٴجۇسىپ پەن ٴماريام بيلەۋشىنىڭ جارلىعىنا باعىنىپ، تىركەلۋ ٷشىن بەتلەحەمگە باردى. ماسىحشىلەر دە «بيلىك باسىنداعىلار» ورناتقان جول ەرەجەسىنە، سالىق زاڭدارىنا، دەنساۋلىققا قاتىستى ەسكەرتۋلەرگە مويىنسۇنادى.
