30-زەرتتەۋ ماقالاسى
ەڭ العاشقى پايعامبارلىقتىڭ ٵرقايسىسىمىز ٷشىن ماڭىزى
«سەنىڭ ۇرپاعىڭ مەن ايەلدىڭ ۇرپاعىن ٶزارا وشتەستىرىپ قويامىن» (مۇس. 1-ج. 3:15).
15-ٵن ەحوبانىڭ تۇڭعىشىن ماداقتاڭدار!
اڭداتپا *
1. ادام مەن حاۋا كۇنا جاساعاننان كەيىن، ەحوبا ارتىنشا نە ىستەدى؟ (مۇسانىڭ 1-جازباسى 3:15)
ادام مەن حاۋا كۇناعا باتقاننان كەيىن، ەحوبا ولاردان تارايتىن ۇرپاققا ٷمىت سيلايتىن ٴبىر تاماشا پايعامبارلىق ايتتى. ول مۇسانىڭ 1-جازباسى 3:15 تە جازىلعان (وقىڭىز).
2. مۇسانىڭ 1-جازباسى 3:15 تەگى پايعامبارلىقتىڭ ەرەكشەلىگى نەدە؟
2 مۇسانىڭ 1-جازباسى 3:15 تەگى پايعامبارلىق كيەلى جازبالاردىڭ العاشقى كىتابىندا جازىلعانمەن، ول قالعان كىتاپتاردىڭ بارلىعىمەن استاسا بايلانىسىپ جاتىر. ونى كيەلى جازبالاردىڭ وزەگى دەۋگە بولادى. جازبالارعا كىرەتىن كىتاپتاردىڭ بارلىعى سول پايعامبارلىقتا ايتىلعان ٴبىر حابارعا الىپ كەلەدى. بۇل حابار قۇدايدىڭ ٸبىلىس پەن ونىڭ زۇلىم جاقتاستارىن جوياتىن قۇتقارۋشى جىبەرەتىنى جايلى *. سول كەز ەحوبانى سۇيەتىندەر ٷشىن كەرەمەت شاق بولماق!
3. بۇل ماقالادا نە تۋرالى قاراستىرامىز؟
3 وسى ماقالادا مۇسانىڭ 1-جازباسى 3:15 كە قاتىستى مىناداي سۇراقتارعا جاۋاپ الامىز: بۇل پايعامبارلىقتاعى كەيىپكەرلەر كىمدەردى بىلدىرەدى؟ ول قالاي ورىندالدى؟ بۇل پايعامبارلىقتىڭ قانداي يگىلىگىن كورىپ ٴجۇرمىز؟
پايعامبارلىقتاعى كەيىپكەرلەر كىمدەر؟
4. «جىلان» دەگەن كىم جانە ونى قايدان بىلەمىز؟
4 مۇسانىڭ 1-جازباسى 3:14، 15 تەگى كەيىپكەرلەر: «جىلان»، جىلاننىڭ «ۇرپاعى»، «ايەل» جانە ايەلدىڭ «ۇرپاعى». كيەلى كىتاپتىڭ كومەگىمەن ولاردىڭ كىمدى بىلدىرەتىنىن انىقتاي الامىز *. الدىمەن، جىلاننان باستايىق. كادىمگى جىلان ەحوبانىڭ ەدەم باعىندا شىعارعان ۇكىمىن تۇسىنبەس ەدى. دەمەك، ول سانالى ٴبىر جاراتىلىس بولۋ كەرەك. جىلاننىڭ بەتپەردەسى ايان 12:9 دا شەشىلەدى. وندا «ەجەلگى جىلاننىڭ» ٸبىلىس ٵرى شايتان ەكەنى انىق ايتىلعان. ال ونىڭ ۇرپاعىنا كىم جاتادى؟
جىلان
شايتان ٸبىلىس. ول ايان 12:9 دا «ەجەلگى جىلان» دەپ اتالعان (4-ابزاستى قاراڭىز)
5. جىلاننىڭ ۇرپاعىنا كىمدەر جاتادى؟
5 كيەلى كىتاپتا «ۇرپاق» دەگەن ٴسوز بەينەلى ماعىنادا قولدانىلعاندا، ول بەينەلى اكەلەرى سياقتى ويلانىپ، سول اكەلەرى سياقتى ارەكەت ەتەتىندەردى بىلدىرەدى. دەمەك، جىلاننىڭ ۇرپاعى دەپ ەحوبا قۇدايمەن جانە ونىڭ حالقىمەن شايتان سياقتى قارسىلاساتىن رۋحاني جاراتىلىستار مەن ادامداردى ايتامىز. ولارعا نۇحتىڭ زامانىندا كوكتەگى ورىندارىن تاستاپ كەتكەن جىندار مەن اكەلەرى ىبىلىستىكىندەي مىنەز تانىتاتىن زۇلىم ادامدار جاتادى (مۇس. 1-ج. 6:1، 2؛ جوح. 8:44؛ جوح. 1-ح. 5:19؛ ياھد. 6).
جىلاننىڭ ۇرپاعى
ەحوبا قۇدايعا جانە ونىڭ حالقىنا قارسىلاساتىن زۇلىم رۋحاني جاراتىلىستار مەن ادامدار (5-ابزاستى قاراڭىز)
6. پايعامبارلىقتاعى ايەل نەگە حاۋا ەمەس؟
6 ال پايعامبارلىقتاعى ايەل شە؟ ول حاۋانى بىلدىرە مە؟ بۇلاي دەپ ايتا المايمىز. ويتكەنى ايەلدىڭ ۇرپاعى جىلاننىڭ باسىن «مىجيتىنى» ايتىلعان. ال جىلان، الدىندا ايتىلىپ كەتكەندەي، رۋحاني جاراتىلىس — شايتاندى بىلدىرسە، وندا حاۋادان تاراعان ادامداردىڭ ەشقايسىسى ونىڭ باسىن مىجي الماس ەدى. سوندا ول ايەل كىمدى بىلدىرەدى؟
7. ايان 12:1، 2، 5، 10-تارماقتار كورسەتەتىندەي، ايەل كىمدى بىلدىرەدى؟
7 مۇسانىڭ 1-جازباسى 3:15 تەگى ايەلدىڭ كىم ەكەنى كيەلى كىتاپتىڭ سوڭعى كىتابىندا اشىلادى (ايان 12:1، 2، 5، 10 وقىڭىز). ول — اياعىنىڭ استىندا اي، ال باسىندا 12 جۇلدىزدان ٴتاجى بار وتە ەرەكشە ايەل! بۇل ايەل ەشكىمگە ۇقسامايتىن ٴبىر دارا ۇل بالانى، ياعني قۇداي پاتشالىعىن دۇنيەگە اكەلەدى. قۇداي پاتشالىعى كوكتە بولعاندىقتان، ونى بوسانعان ايەل دە كوكتە بولۋى كەرەك. دەمەك، پايعامبارلىقتاعى ايەل ەحوبانىڭ ۇيىمىنىڭ ادال رۋحاني جاراتىلىستاردان تۇراتىن كوكتەگى بولىگىن بىلدىرەدى (عال. 4:26).
ايەل
ەحوبانىڭ ۇيىمىنىڭ كوكتەگى بولىگىن قۇرايتىن ادال رۋحاني جاراتىلىستار (7-ابزاستى قاراڭىز)
8. ايەلدىڭ ۇرپاعىنىڭ نەگىزگى بولىگى كىم جانە ول قاي كەزدە ۇرپاقتىڭ نەگىزگى بولىگى بولدى؟ (مۇسانىڭ 1-جازباسى 22:15—18)
8 قۇدايدىڭ سوزىنەن ايەلدىڭ ۇرپاعىنىڭ نەگىزگى بولىگى كىم ەكەنىن دە بىلۋگە بولادى. پايعامبارلىققا ساي، ول ىبىرايىمنان تاراعان ۇرپاق بولۋى كەرەك ەدى (مۇسانىڭ 1-جازباسى 22:15—18 وقىڭىز). شىنىمەن-اق، يسا ىبىرايىمنىڭ تىكەلەي ۇرپاعى بولدى (لۇقا 3:23، 34). ٴبىراق ول شايتان ٸبىلىستىڭ باسىن مىجىپ، كوزىن قۇرتۋ ٷشىن، ەت پەن سۇيەكتەن تۇراتىن ادامنان دا كۇشتى بولۋى كەرەك ەدى. سودان، شامامەن 30 جاسىندا يسا قۇدايدىڭ كيەلى رۋحىمەن مايلاندى. مايلانعان سوڭ ول ايەلدىڭ ۇرپاعىنىڭ نەگىزگى بولىگىنە اينالدى (عال. 3:16). ال يسا ٶلىپ، قايتا تىرىلگەن سوڭ، قۇداي وعان «ۇلىلىق پەن قۇرمەتتى ٴتاج ەتىپ كيگىزدى» جانە «كوك پەن جەردەگى بارلىق بيلىكتى» بەردى. بۇعان «ٸبىلىستىڭ ىستەرىن تالقانداۋ» بيلىگى دە كىرەدى (ەۆر. 2:7؛ مات. 28:18؛ جوح. 1-ح. 3:8).
ايەلدىڭ ۇرپاعى
يسا ٴماسىح جانە ونىمەن بىرگە بيلىك ەتەتىن 144000 مايلانعان (8، 9-ابزاستى قاراڭىز)
9، 10. ا) ايەلدىڭ ۇرپاعىنا تاعى كىمدەر كىرەدى جانە قاي كەزدە ولار ۇرپاقتىڭ ٴبىر بولىگى بولىپ ەسەپتەلەدى؟ ٵ) ٵرى قاراي نە تۋرالى بىلەمىز؟
9 ۇرپاقتىڭ ەكىنشى بولىگى دە بار. ەلشى پاۋىل ۇرپاقتىڭ وسى بولىگىنە مەڭزەپ، ەۆرەي جانە باسقا ۇلتتان شىققان مايلانعاندارعا بىلاي دەپ ايتتى: «ماسىحكە تيەسىلى بولعاندىقتان، سەندەر شىنىمەن ىبىرايىمنىڭ ۇرپاعىسىڭدار، بەرىلگەن ۋادە بويىنشا مۇراگەرسىڭدەر» (عال. 3:28، 29). ەحوبا ٴماسىحشىنى كيەلى رۋحپەن مايلاعاندا، ول ايەلدىڭ ۇرپاعىنىڭ ٴبىر بولىگى بولادى. سونىمەن، ۇرپاق يسا ماسىحتەن جانە ونىمەن بىرگە بيلىك ەتەتىن 144000 مايلانعاننان تۇرادى (ايان 14:1). ولاردىڭ ٴبارى اكەلەرى ەحوبا سياقتى ويلانىپ، ەحوبا سياقتى ارەكەت ەتەدى.
10 جوعارىدا مۇسانىڭ 1-جازباسى 3:15 تەگى كەيىپكەرلەر كىمدەردى بىلدىرەتىنىن جاقسىلاپ انىقتاپ الدىق. ال ەندى ەحوبا سول پايعامبارلىقتى قالايشا بىرتە-بىرتە جۇزەگە اسىرعانىن جانە بۇنىڭ بىزگە قانداي كومەگى ٴتيىپ جاتقانىن قاراستىرايىق.
پايعامبارلىقتىڭ ورىندالۋى
11. جىلان قاي ماعىنادا ايەلدىڭ ۇرپاعىنىڭ «وكشەسىن شاقتى»؟
11 مۇسانىڭ 1-جازباسى 3:15 تە جىلان ايەلدىڭ ۇرپاعىنىڭ «وكشەسىن شاعاتىنى» ايتىلعان. شايتان ەۆرەيلەر مەن ريمدىكتەردى ايداپ سالىپ، قۇدايدىڭ ۇلىن ولتىرتكەندە، وسى پايعامبارلىق جۇزەگە استى (لۇقا 23:13، 20—24). وكشەسى جاراقاتتانعان ادام ٴبىراز ۋاقىت ٴجۇرىپ-تۇرا المايتىنداي، يسا دا ولگەن كەزدە ٷش كۇندەي كوردە جاتىپ، ارەكەتسىز كۇيدە بولدى (مات. 16:21).
12. جىلاننىڭ باسى قاشان جانە قالاي مىجىلادى؟
12 مۇسانىڭ 1-جازباسى 3:15 تەگى پايعامبارلىققا قاراساق، يسانىڭ كوردە قالمايتىنىن تۇسىنەمىز. ويتكەنى ايەلدىڭ ۇرپاعى جىلاننىڭ باسىن مىجۋى كەرەك ەدى. دەمەك، وكشەسى شاعىلعان يسا جاراقاتىنان ايىعىپ كەتۋى كەرەك. شىنىمەن دە، يسا ولتىرىلگەننەن كەيىن ٷشىنشى كۇنى ولمەس رۋحاني جاراتىلىس بولىپ قايتا ٴتىرىلدى. ول قۇداي بەلگىلەگەن ۋاقىتتا شايتاننىڭ باسىن مىجىپ، كوزىن قۇرتادى (ەۆر. 2:14). جىلاننىڭ ۇرپاعىن، ياعني قۇدايدىڭ بارلىق جاۋلارىن، جەر بەتىنەن تۇبەگەيلى جويۋعا ماسىحپەن بىرگە بيلىك ەتەتىندەر دە اتسالىسادى (ايان 17:14؛ 20:4، 10) *.
پايعامبارلىقتىڭ بىزگە تيگىزىپ جاتقان پايداسى
13. مۇسانىڭ 1-جازباسى 3:15 تەگى پايعامبارلىقتىڭ ورىندالۋى بىزگە قانداي پايداسىن تيگىزىپ جاتىر؟
13 وسى پايعامبارلىقتىڭ ورىندالۋى قۇدايدىڭ باعىشتالعان قىزمەتشىلەرىنە قانداي پايداسىن تيگىزىپ جاتقانىن ويلاڭىزشى. يسا جەر بەتىنە كەلگەندە، اكەسىنىڭ قانداي قۇداي ەكەنىن ٴمىنسىز تۇردە كورسەتىپ كەتتى (جوح. 14:9). سونىڭ ارقاسىندا ٴبىز ەحوبانى جاقىننان تانىپ، ونى قاتتى جاقسى كورىپ كەتتىك. يسانىڭ تالىمدەرىنىڭ دە، بۇگىندە ماسىحشىلەر قاۋىمىندا بەرىپ وتىرعان نۇسقاۋلارىنىڭ دا كوپ پايداسىن كورىپ كەلەمىز. ول بىزگە ەحوبانىڭ كوڭىلىنەن شىعاتىنداي ٶمىر ٴسۇرۋدى كورسەتىپ كەتكەنىنە دە ريزامىز. ٴتىپتى ونىڭ وكشەسى شاعىلعانى، ياعني ٶلىمى دە بۇكىل ادامزاتقا يگىلىك اكەلدى. قالاي؟ يسا قايتا تىرىلگەن سوڭ، قانىنىڭ قۇنىن «ٴبىزدى بارلىق كۇنادان تازارتاتىن» كەمەلدى قۇرباندىق رەتىندە ۇسىندى (جوح. 1-ح. 1:7).
14. ەدەمدە ايتىلعان پايعامبارلىقتىڭ سول كەزدە ەمەس، ۋاقىت وتە ورىندالۋى كەرەك بولعانىن نەدەن بىلەمىز؟ ٴتۇسىندىرىڭىز.
14 ەحوبانىڭ ەدەمدە ايتقان سوزدەرىنەن پايعامبارلىقتىڭ سول كەزدە ەمەس، ۋاقىت وتە ورىندالاتىنىن تۇسىنەمىز. ايەلدىڭ ۇرپاعى پايدا بولۋ ٷشىن، ٸبىلىس ٶز جاقتاستارىن جيناۋى ٷشىن جانە سول ەكى توپتىڭ اراسىندا وشپەندىلىك پايدا بولۋ ٷشىن، شىنىمەن دە، ٴبىراز ۋاقىت كەرەك ەدى. بۇل پايعامبارلىقتى ٴبىلۋدىڭ پايداسى — سونىڭ ارقاسىندا شايتان بيلەگەن دۇنيە ەحوبانىڭ قىزمەتشىلەرىن جەك كورەتىنىن ەستە ۇستايمىز. يسا دا شاكىرتتەرىن وسى جايلى ەسكەرتكەن (مار. 13:13؛ جوح. 17:14). پايعامبارلىقتىڭ وشپەندىلىككە قاتىستى وسى تۇسىنىڭ ورىندالعانى اسىرەسە سوڭعى 100-جىلدىڭ ىشىندە قاتتى بايقالدى. ٴقازىر سول تۋرالى بىلەيىك.
15. قۇداي حالقىنا دەگەن جەككورۋشىلىك نەگە ۇدەپ كەتتى جانە نەگە شايتاننان قورقۋدىڭ قاجەتى جوق؟
15 يسا 1914-جىلى قۇداي پاتشالىعىنىڭ تاعىنا وتىرعاننان كەيىن، شايتاندى كوكتەن قۋىپ شىقتى. ەندى شايتاننىڭ ەركىندىگى تەك جەر بەتىمەن شەكتەلگەن ٵرى وعان ٶلىم جازاسى بەرىلگەن (ايان 12:9، 12). ٴبىراق ول ٶزىنىڭ اقىرىن جاي كۇتىپ وتىرعان جوق. ەكى كوزىن قان قاپتاعان ىزالى شايتان بار قاھارىن قۇدايدىڭ حالقىنا توگىپ جاتىر (ايان 12:13، 17). سول سەبەپتەن دە قۇداي حالقىنا دەگەن جەككورۋشىلىك ۇدەپ كەتتى. الايدا شايتاننان دا، ونىڭ جاقتاستارىنان دا قورقۋدىڭ قاجەتى جوق. ەلشى پاۋىل ايتقانداي، «قۇداي بىزگە جاق بولسا، كىم بىزگە قارسى شىعا الادى؟» (ريم. 8:31). قۇدايىمىز ەحوباعا تولىقتاي سەنىمدى بولايىق، سەبەبى، كورىپ وتىرعانىمىزداي، مۇسانىڭ 1-جازباسى 3:15 تەگى پايعامبارلىقتىڭ باسىم بولىگى ورىندالىپ قويدى.
16—18. مۇسانىڭ 1-جازباسى 3:15 ٴتى تۇسىنگەندەرى كيورتيس، ۋرسۋلا، دجەسيكا باۋىرلاستارىمىزعا قانداي كومەگىن تيگىزدى؟
16 ەحوبانىڭ مۇسانىڭ 1-جازباسى 3:15 تەگى ۋادەسى كەز كەلگەن سىناقتا بىزگە تىرەك بولا الادى. گۋام ارالىندا ميسسيونەر بولىپ قىزمەت ەتەتىن كيورتيس دەگەن باۋىرلاس بىلاي دەيدى: «مەنىڭ ەحوباعا دەگەن ادالدىعىمدى سىناعان قيىندىقتار مەن كوڭىلىم قالعان جاعدايلار بولدى. الايدا مۇسانىڭ 1-جازباسى 3:15 تەگى پايعامبارلىق تۋرالى ويلانىپ-تولعانعاننىڭ ارقاسىندا كوكتەگى اكەمە دەگەن سەنىمىمدى شايقالتپاي، بەرىك ساقتاپ قالدىم». كيورتيس باۋىرلاس قيىندىقتارىمىز كەلمەسكە كەتەتىنىن ۋاقىتتى اسىعا كۇتىپ ٴجۇر.
17 باۆاريادا تۇراتىن ۋرسۋلا دەگەن ايەل باۋىرلاس مۇسانىڭ 1-جازباسى 3:15 تەگى سوزدەردى تۇسىنگەننىڭ ارقاسىندا كيەلى كىتاپتىڭ قۇدايدان كەلگەنىنە كوزى جەتە ٴتۇسىپتى. پايعامبارلىقتاردىڭ بارلىعى وسى تارماقتاعى پايعامبارلىقپەن بايلانىستى ەكەنىن كورگەندە، ول «ياپىر-اي!» دەپ تاڭعالعان ەكەن. «ەحوبا ادامزاتتى ٷمىتسىز قالدىرماۋ ٷشىن بىردەن ارەكەت ەتكەنىن تۇسىنگەنىمدە، مەن ونى ودان سايىن جاقسى كورىپ كەتتىم»،— دەيدى ۋرسۋلا.
18 ميكرونەزيادا تۇراتىن دجەسيكا دەگەن باۋىرلاس بىلاي دەيدى: «شىندىقتى تاپقانىمدا ٶزىمدى قالاي سەزىنگەنىم ٵلى ەسىمدە. مۇسانىڭ 1-جازباسى 3:15 تەگى پايعامبارلىق كوز الدىمدا ورىندالىپ جاتتى. بۇل ماعان قازىرگى ٶمىردىڭ جالعان ەكەنىن، قۇدايدىڭ نيەتىنە مۇلدەم باسقا ٶمىر كىرەتىنىن ەستە ۇستاۋعا كومەكتەستى. وسى پايعامبارلىق تاعى مىناعان سەنىمىمدى نىعايتتى: ەحوباعا قىزمەت ەتسەم، قازىردىڭ وزىندە مۇمكىندىگىنشە ساپالى ٶمىر سۇرەمىن، ال بولاشاقتا ودان دا باقىتتى بولامىن».
19. پايعامبارلىقتىڭ ەكىنشى جارتىسى ورىندالاتىنىنا نەگە سەنىمدىمىز؟
19 بايقاعانىمىزداي، مۇسانىڭ 1-جازباسى 3:15 تەگى پايعامبارلىق ورىندالىپ جاتىر. ٴبىز ايەلدىڭ ۇرپاعى مەن جىلاننىڭ ۇرپاعى كىمدى بىلدىرەتىنىن انىق بىلەمىز. ايەلدىڭ ۇرپاعىنىڭ نەگىزگى بولىگى يسا وكشەسى شاعىلعاننان كەيىن ايىعىپ، ٴقازىر قۇدىرەتتى ٵرى ولمەس پاتشا بولىپ وتىر. ال سول ۇرپاقتىڭ ەكىنشى بولىگىن قۇرايتىنداردىڭ تاڭدالۋى اياقتالىپ كەلەدى. پايعامبارلىقتىڭ العاشقى جارتىسى ورىندالعانداي، ونىڭ ەكىنشى جارتىسى دا، ياعني جىلاننىڭ باسى مىجىلاتىنى دا مىندەتتى تۇردە ورىندالادى. قۇدايدىڭ اتا جاۋى شايتان ماڭگىلىككە جويىلعاندا، ادال ادامدار ٷشىن بۇل نەتكەن جەڭىلدىك بولماق! سول ۋاقىت كەلگەنشە نىق تۇرىڭىز، ەش بەرىلمەڭىز! اكەمىز ەحوبا — ٴبىر ٴسوزىن دە جەرگە تاستامايتىن سەنىمدى قۇداي. ول ايەلدىڭ ۇرپاعى ارقىلى «جەر بەتىندەگى بارلىق حالىقتارعا» باتاسىن قوندىرادى (مۇس. 1-ج. 22:18).
23-ٵن ەحوبا بيلىك ەتۋىن باستادى
^ مۇسانىڭ 1-جازباسى 3:15 تەگى پايعامبارلىقتى جاقسى تۇسىنبەي، كيەلى كىتاپتىڭ حابارىن تۇسىنەمىز دەپ ايتا المايمىز. ٴقازىر سول پايعامبارلىقتى جان-جاقتى قاراستىرىپ، ەحوباعا دەگەن جانە ونىڭ ۋادەلەرىنىڭ ەشقايسىسى ورىنداۋسىز قالمايتىنىنا دەگەن سەنىمىمىزدى نىعايتاتىن بولامىز.
^ «جاڭا دۇنيە اۋدارماسىنىڭ» «كيەلى كىتاپتاعى حابار» دەگەن ٵ1 قوسىمشاسىن قاراڭىز.
^ «مۇسانىڭ 1-جازباسى 3:14، 15 تەگى كەيىپكەرلەر» دەگەن قورشاۋدى قاراڭىز.
^ « مۇسانىڭ 1-جازباسى 3:15 تىڭ ورىندالۋىمەن بايلانىستى كەيبىر ماڭىزدى وقيعالار» دەگەن قورشاۋدى قاراڭىز.
