Jesus okwa li a lombwela ovahongwa vaye a ti: “Otamu ka yandja oundombwedi kombinga yange . . . kombada yedu alishe.” (Oilonga 1:8) Kunena, Eendombwedi daJehova otadi wanifa po oshilonga osho nexwamo. Ashike, oitukulwa imwe kombada yedu, mwa kwatelwa imwe inene, inai udifilwa nawanawa. Moilongo imwe omu na Eendombwedi dinini. (Mateus 9:37, 38) Mbela ohatu ningi shike opo tu hange ovanhu vahapu ngaashi tashi dulika?

 Opo tu kwafelwe tu dulike koshipango shaJesus, Okomitiye yOilonga yOlutuwiliki yEendombwedi daJehova ohai tumine ovatumwa koitukulwa oko ku na omhumbwe mounyuni aushe. Eshi hatu popi ngaha, ope na ovatumwa 3 090 mounyuni aushe. a Vahapu ova deulwa kofikola yOmbiibeli, ngaashi Ofikola yOkudeula Ovaudifi vOuhamba. Ovatumwa ohava fiye po omaumbo avo nehalo liwa nokutembukila koshilando oko vehe shii. Molwaashi ovatumwa ovo vadiinini ova pyokoka, va deulwa nove na owino, ohava kwafele mokutandaveleka onghundana iwa nohava tulile po ovahongwa vape oshihopaenenwa shiwa.

 Koshitaimbelewa keshe, Oshikondo shOilonga yovatumwa vomoukalele ohashi longele kumwe nOkomitiye yOshitaimbelewa opo va file oshisho eemhumbwe dovatumwa, ngaashi, onhele yokukala tai wapalele, ouhaku nosho yo oshimaliwa shinini opo va fute eemhumbwe davo dakeshe efiku. Momukokomoko womudo woilonga womo 2020, Eendombwedi daJehova oda longifa eedola daNamibia 372 330 000 opo di file oshisho ovatumwa. Omolwomayambidido oo, ovatumwa ohava dulu okuyandja elitulemo nokulongifa eenghono davo mokuudifa nosho yo okupameka omaongalo omoshitukulwa shavo.

 Ongahelipi ovatumwa va kwafela moilonga yokuudifa? Frank Madsen, oo e li oshilyo shOkomitiye yOshitaimbelewa shaMalawi, okwa ti: “Omolwouladi nounghulungu wavo, ovatumwa ova kwafela omaongalo a hovele okuudifila koitukulwa oko kudjuu okuudifilwa, ngaashi meenhele omo ihamu iwa uhe na epitikilo, ile oitukulwa oko haku popiwa elaka loshinailongo. Navali, molwaashi ohava longo noudiinini opo ve lihonge elaka lomoshitukulwa nomifyuululwakalo, ohashi tu vamwe omukumo, nohava kwafele ovanyasha ve litulile po omalalakano okuya moilonga yefimbo li yadi. Ohatu pandula Jehova omolwovatumwa.”

 Oshilyo shOkomitiye yOshitaimbelewa moshilongo shimwe, osha ti: “Ovatumwa ove li oumbangi oo tau ulike kutya oshiwana shaJehova osha hangana mounyuni aushe. Nokuli naavo vehe fi Eendombwedi ohave shi limonene kutya inatu tukaulwa komifyuululwakalo, ndele otwa hanganifwa komahongo Ombiibeli.”

 Ovatumwa ohava kwafele ngahelipi ovaudifi vomoshitukulwa? Paulo, oo a dja koTimor-Leste, okwa pandula ovatumwa ovo va tuminwa keongalo lavo. Okwa ti: “Oshitukulwa shetu osha pupyala neenghono. Ashike nonande ovatumwa ova dja koshitukulwa oko kwa talala, inava efa nande onghalo yomhepo i va imbe okuudifa. Ohava kala alushe pelongekido lomoukalele ongula keshe. Ohandi va mono luhapu tava ningi omalishuneko moshanga shomutenya, nonande okwa pupyala neenghono, nosho yo komatango. Ova kwafela vahapu ve lihonge oshili, naame nda kwatelwa mo. Ohava longele Jehova onghalamwenyo yavo aishe nexwamo, naasho ohashi tu eongalo alishe omukumo opo nalo li mu longele pauyadi.”

 Ketti, omukokolindjila wondjikilile moMalawi, okwa popya nghee ovatumwa ovalihomboli vamwe va kwafela oukwaneumbo wavo, a ti: “Eshi ovatumwa ovalihomboli va tuminwa keongalo letu, aame ashike nda li Ondombwedi moukwaneumbo wetu. Ashike ovalihomboli ovo ova yambidida nge, nova panga oukaume noukwaneumbo wetu. Oshihopaenenwa shavo shiwa osha kwafela ovana vange va mone kutya okulongela Jehova ohashi eta ehafo nembilipalelo monghalamwenyo. Omolwenwefemo liwa lovatumwa ovo, ovanakadona vange vatatu paife ove li ovakokolindjila nomushamane wange okwa hovela okukala pokwoongala.”

 Eefuto dokukwafela ovatumwa ohadi di peni? Omolwomayambidido oilonga yomounyuni aushe, oo vahapu vomunye hamu yandje okupitila meenghedi odo tadi hangwa ko donate.jw.org. Ohatu mu pandula neenghono omolwomayambidido eni ehalo liwa.