MuJanuali 2021, Olutuwiliki ola li la shiivifa kutya opa pita oshilongifo shipe shokukonakona Ombiibeli, embo Nghee to dulu okuhafela onghalamwenyo fiyo alushe! a Owa li we linyenga ngahelipi eshi pwa ningwa eshiivifo olo? Matthew, wokoCanada, okwa ti: “Onda li nda tunhukwa! Onda twikila okukala nda tunhukwa eshi oipopiwa nosho yo ouvidio va li tava yelifa kutya omolwashike oshishangomwa osho sha nyanyangidwa nanghee sha ningilwa omalolelo. Onda halelela oku shi mona nokuhovela oku shi longifa.”

 Embo Nghee to dulu okuhafela onghalamwenyo fiyo alushe! ola eta po onghedi ipe yokuninga omakonakonombiibeli. Ndele nande ongaho halo ashike eyooloko li li pokati kembo olo lipe noilongifo ikulu. Ngeenge oho longifa embo Nghee to dulu okuhafela onghalamwenyo fiyo alushe! komudidi, otashi dulika wa didilika nghee la yooloka ko komambo makwao. Opo tu mone kutya omolwashike, natu tale nghee la nyanyangidwa.

 Ounene womafo alo. Omolwashike osho sha li sha pumbiwa? Embo Nghee to dulu okuhafela onghalamwenyo fiyo alushe! oli na omafano a twa e dulife po 600, oo e dule lwomapa omulongo embo Ombiibeli otai hongo! Embo olo lipe oli na omapandja, opo inapa shangwa sha, ile pehe na omafano. Oinima oyo ivali oya etifa po oupyakadi: Ngeenge efo ina li deka, omafano otaa dulu okulimonikila kombinga ikwao. Opo osho shiha ningwe, ovamwatate ovo ve li kOshikondo shOkunyanyangida mOunyuni Aushe (IPD), koWallkill, New York, U.S.A., ova li va ninga omalolelo omafo anhe a yoolokafana, oo haa longifwa moinyanyangido yetu. Okomitiye yOkushanga yOlutuwiliki oya li ya konakona omafo oo, ndele tai hoolola olo ihali limonikila noupu. Nonande efo olo oli na ondilo shi dulife efo olo hatu longifa moishangomwa yetu ihapu, ovakonakonimbiibeli otava dulu okulesha epandja keshe membo Nghee to dulu okuhafela onghalamwenyo fiyo alushe! nopehe na okupiyaanekwa komafano oo e li kepandja likwao.

 Oshipeko sha yooloka ko kuikwao. Oshipeko shembo olo lipe, osha yooloka ko koipeko yomambo makwao molwaashi osha amenwa. Ponhele yoshipeko shi kale tashi vema, oshipeko shembo lipe oshiwa neenghono noshe shi ningifa tashi shiiva, opo efano lokombada li kale li wetike. Oshipeko osho otashi amene embo, opo liha kulupe diva eshi tali longifwa luhapu. Ashike nande ongaho, oshipeko osho oshi na ondilo shi dule oshipeko osho hashi vema. Onghee hano, oitaimbelewa imwe oya li i na okulongela kumwe, opo i lande oipeko oyo ihe na ondilo unene.

 Omolwashike va hoolola okulongifa oilongifo oyo i na ondilo? Omumwatate umwe, oo ha longo kOshikondo shOkunyanyangida mOunyuni Aushe, okwa ti: “Molwaashi otwa teelela embo eli li ka longifwe nawa, otwa hala li kale monghalo iwa nonande otali longifwa luhapu.” Eduardo, oo ha longo mOmbelewa yOkunyanyangida koshitaimbelewa shaBrazil, okwa ti: “Ohashi tu hafifa okumona nghee ehangano laJehova la longifa oilongifo oyo i na ongushu, opo li nduluke po embo olo liwa nola pama, nopomhito opo tuu opo otali longifa nawa omayambidido.”

 Otwa li twa hovela okupilinda embo Nghee to dulu okuhafela onghalamwenyo fiyo alushe! muMarsa 2021. Osho osha li sha ningwa pefimbo lomukifi wekomba, naasho osha li sha etifa omashongo. Molwaashi Obetel oya li mo-lockdown, ovaliyambi kava li tava dulu okukwafela koshinyanyangido nokatwa li twa dula okushiva ovamwatate vape ve uye va longe kObetel. Oshidjemo, oinyanyangido imwe kaya li i na ovanhu va wana, naimwe oya li i na okupatwa pakafimbo omolweendjidikila odo da tulwa po kepangelo.

 Ongahelipi va dula okufinda omashongo oo? Eshi va ka dula vali okulongifa oinyanyangido, ovamwatate novamwameme vokoikondo imwe ova li va pewa oshinakuwanifwa shopakafimbo, opo va ka kwafele mokunyanyangida. Joel, oo ha longo kOshikondo shOkunyanyangida mOunyuni Aushe, okwa ti: “Omhepo yavo yeliyambo nehalo lavo lokutambula ko oinakuwanifwa ipe, oye shi ningifa tashi shiiva tu dule okumanifa oshilonga eshi.”

 Nonande otwa li twa taalela omashongo, otwa dula okupilinda eekopi omamiliyona dembo Nghee to dulu okuhafela onghalamwenyo fiyo alushe! Opo tu dule okunyanyangida embo olo, otwa li twa pumbwa oilongifo ngaashi: printing plates, laminate film, omafo, ohinga nosho yo o-glue. Meemwedi ashike nhano eshi twa hovela okupilinda, otwa li twa longifa oimaliwa i dulife 34 523 000.00 moilongifo ashike oyo. Opo tu dule okuxupifa oshimaliwa, otwa pilinda ashike omuvalu womambo oo a pumbiwa komaongalo.

 Ovahongi vOmbiibeli nosho yo ovakonakonimbiibeli vavo, ove uditile ngahelipi oshilongifo osho shipe shokukonakona Ombiibeli? Paul, omumwatate wokoAustralia, okwa ti: “Ohandi hafele okulongifa embo Nghee to dulu okuhafela onghalamwenyo fiyo alushe! nohandi kala nda halelela okuninga omakonakonombiibeli. Embo otali monika nawa noli li monghedi yeenghundafana. Oli na omauyelele a yela, omapulo taa kumu omutima, ouvidio, omafano, oimhungu nosho yo omalalakano oo omukonakonimbiibeli ta dulu okuhanga. Oikwafifo oyo i li membo olo oya kwafela nge ndi xwepopaleke ehongo lange.”

 Omukonakonimbiibeli umwe wokoUnited States okwa ti: “Ondi hole unene embo eli lipe. Omafano ohaa kwafele nge ndi ude ko oitwa oyo ya fimana. Ouvidio ohava kumu omutima wange nohave linyengifa nge ndi katuke eenghatu.” Omukonakonimbiibeli oo, oha konakona luvali moshivike noha kala pokwoongala pandjikilile.

 Natango ope na eekopi omamiliyona dembo Nghee to dulu okuhafela onghalamwenyo fiyo alushe! odo da pumbwa okupilindwa momalaka mahapu. Fiyo opapa, olutuwiliki ola yandja epitikilo opo ku nyanyangidwe embo olo momalaka 710, omuvalu oo wu dule lwo 340 oo wa li wa nyanyangidwa kembo Omahongo Ombiibeli!

 Oimaliwa oyo ya futwa, opo ku longekidwe embo olo, oya dja peni? Omokuyandja omayambidido oilonga yomounyuni aushe, oo vahapu hamu yandje okupitila ko-donate.jw.org. Ohatu pandula omhepo yeni yokuyandja, oyo ye tu kwafela opo tu nyanyangide oilongifo yokukonakona Ombiibeli yaavo va hala okulihonga kombinga yaJehova ‘nokuhafela onghalamwenyo fiyo alushe.’ — Epsalme 22:26.