Omusika oi li oshali iwa ya dja kuJehova. Otai dulu okukuma omadiladilo etu, okulundulula omaliudo etu nosho yo oku tu nwefa mo. Osho osho naanaa shi li ngaho, shi na sha nomaimbilo etu oko-boardcasting. Ashike omusika oyo otai dulu oku shi tu ningila shihapu: otai dulu oku tu ehenifa popepi naJehova.

 Okudja 2014, opa ndulukwa omaimbilo oko-boardcasting e dulife 70, nokuli naamwe omuo oku li momalaka e dulife 500! Ndele otashi dulika u lipule kutya, ‘Oolyelye hava longo nomaimbilo oo, nohave a ndulukwa po ngahelipi?’

 Omaimbilo oko-boardcasting ohaa ndulukwa po kosipana oyo hai longo nomusika kOshikondo shOuvidio nOikwamawi, oyo hai pashukilwa kOkomitiye yOkuhonga yOlutuwiliki. Osipana yomusika omu na ovamwatate novamwameme 13, ovo hava kwafele mokutota nokukwata omusika, okuninga omalandulafano e na sha nokunduluka po omusika nokuyambidida ovo tava longo nayo. Shikwao vali, Okomitiye yOkuhonga oya pitika ovo hava longo ve li keenhele davo mounyuni aushe va kwafele moilonga ei, mwa kwatelwa ovatoti vomusika, ovadani voishikomwa novaimbi. Ovamwatate novamwameme ovo ohava longifa ounghulungu wavo nelininipiko, nopehe na okukonga efimano.

 Omaimbilo oko-broadcasting ohaa ndulukwa po ngahelipi? Tete, Okomitiye yOkuhonga ohai tokola omishangwa oko taku kala kwa kanghamena eimbilo nanghee tali ka kuma omaliudo ovapwilikini. Opo nee osipana yomusika ohai yandje oinakuwanifwa i na sha nokutota po omusika nokushanga oitya. Ohapa longekidwa oshihopaenenwa sha kwatwa momawi. Okomitiye yOkuhonga ohai talulula oshihopaenenwa osho sha kwatwa momawi nokuyandja ewiliko la wedwa po. Osipana yomusika ohai ningi omalunduluko meimbilo, ndele tai li kwata vali momawi lwa xuuninwa. Omaimbilo oo ohaa kwatelwa peenhele da yoolokafana, mwa kwatelwa omatungo oshitaimbelewa nee-studio domomaumbo.

 Ovamwatate ohava longifa eeprograma dokombiyuta dokukwata omawi, dokutuvikila nokuninga eenote domusika, opo va tote po nokukwata omaimbilo oko-broadcasting. Oilonga oyo ohai pula oilongifo ngaashi oishikomwa yomusika, oikwamashina yokulumbakanifa omusika, ee-amplifier nomambako okwiimbifa nokudanifa. Embako keshe lokwiimbifa otali dulu okulandwa noimaliwa okudja 1 564 00 fiyo opoimaliwa i dulife 15 640 00. Mo 2020, otwa longifa oimaliwa 1 814 240 00 moilongifo i na sha nokukwata omusika momawi.

 Eenghendabala dilipi da ningwa, opo ku xupifwe oimaliwa yomayambidido? Ponhele yokukala tu na osipana yomusika ya kula mObetel, ohaku longifwa ovaliyambi vahapu ovo hava longo ve li keenhele davo. Shikwao vali, ponhele ovadani voishikomwa vahapu ve uye pamwe ve likwate omawi, ovamwatate ohava toto nokunduluka po omusika tava longifa oikwaelektronika.

 Ovamwatate novamwameme ove hole okupwilikina komaimbilo oko-broadcasting. Tara, oo ha di koGermany, okwa ti: “Omaimbilo ohaa kwafele nge ndi kale nda pepelelwa, ngeenge ndi na oisho. Ngeenge handi a pwilikine melaka olo nda nyama, osha fa ashike Jehova ta papatele nge.” Omumwatate wokoKazakhstan wedina Dmitry okwa ti: “Ondi hole okupwilikina komaimbilo nopehe na okulipula ngeenge oku li ngoo metwokumwe nomafinamhango Ombiibeli. Natango, omaimbilo ohaa kwafele nge ndi kale handi yandje elitulemo kekwatafano lange naJehova.”

 Delia, womoSouth Africa, okwa popya nghee e udite shi na sha nomaimbilo oko-broadcasting a ti: “Okwa pameka eitavelo lange. Ngeenge nda wa poshi, ile nda taalela eshongo, ohapa kala alushe eimbilo olo hali kwafele nge monghalo yange. Onghedi omo omusika hai kwelengedja ohai lundulula nghee ndi udite!”

 Omaimbilo amwe oko-broadcasting ondi a hole unene. Lerato, oo naye e li moSouth Africa, okwa ti: “Eimbilo ‘Oparadisa oi li poduka’ nosho yo ‘Ounyuni mupe’ okwa ningifa nge ndi kale nda teelela nodjuulufi efimbo olo eshi handi ka hambelela meme. Efimbo keshe handi pwilikine omaimbilo oo, ohandi kala nda fa ndi mu wete ta tondoka a finda kwaame, a hala okupapatela nge.”

 Eimbilo limwe loko-broadcasting ola li la kwafela unene omunyasha umwe wokoSri Lanka. Okwa ti: “Omuhongi wange umwe oha ula nge oinima ii moipafi yovanhu vomongudu yetu, molwaashi ashike ndi li Ondombwedi yaJehova. Onda li nda tila, nokanda li ndi shii kutya nandi tye shike. Eshi nda ya keumbo, meme okwa ladipika nge ndi pwilikine keimbilo ‘Study Makes You Strong.’ Eimbilo olo ola li la kwafela nge ndi mone kutya onda pumbwa okuninga omapekapeko nokulilongekida omanyamukulo. Mefiku la shikula ko, onda li nda popya nomuhongi wange. Okwa li a pwilikina nge nokwa popya olupandu laye li na sha neitavelo lEendombwedi daJehova. Ohandi pandula ehangano laJehova eshi le tu longekidila omaimbilo taa tu omukumo.”

 Openi hatu hange oimaliwa oyo ya pumbiwa, opo tu nduluke po omaimbilo? Ohai di moimaliwa yomayambidido oilonga yomounyuni aushe, oo mahapu ha yandjwa okupitila ko-donate.jw.org. Tangi komayambidido eni ehalo liwa.