Eepelesenda di dulife po 60 dovatoloki otadi longele keembelewa dokutoloka odo de likalela, ndele hakoitaimbelewa. Ongahelipi omalongekido oo taa eta ouwa? Ovatoloki ova pumbwa oikwa noipangifo ilipi opo va dule okulongela keembelewa odo de likalela? Ongushu yetoloko lavo otai dulu okukumwa ngahelipi koitukulwa oko tava longele?

 Ombelewa yokutoloka otai dulu okukala moshitukulwa omo hamu popiwa elaka lavo. Karin, omutoloki wOshilow German, okwa ti: “Paife eshi twa tembukila kombelewa yokutoloka koCuauhtémoc, Chihuahua moMexico, ohatu popi alushe Oshilow German novatoloki vakwetu, ngeenge tu li moukalele nongeenge twa ya keefitola. Otwa dingililwa kovapopi velaka letu. Ohatu udu omipopyofano odo twa efa nale, nohatu kendabala okulongifa omautumbulilo oo taa longifwa kovanhu vomoshitukulwa.”

 James, oo ha longo kombelewa yokutoloka Oshifrafra moGhana, okwa dimina kutya omafimbo amwe oha kala a djuulukwa oukwaneumbo waBetel koshitaimbelewa. Okwa weda ko a ti: “Ashike ondi hole okulongela oku kombelewa yokutoloka. Ngeenge handi udifa melaka lomoshitukulwa nokumona nghee ovanhu tave linyenge konghundana iwa, ohashi kumu omutima wange.”

 Ovamwatate ohava tokola ngahelipi kutya ombelewa yokutoloka otai kala peni? Joseph, oo ha longo kOshikondo shOkuduta nOkutunga mOunyuni aushe koWarwick, New York, moU.S.A okwa ti: “Omashongo amwe oo hatu shakeneke moitukulwa imwe, ongaashi oupyakadi wolusheno, omeva nointaneta, oinima oyo ovatoloki va pumbwa opo va longe noupu. Onghee ngeenge hatu hoolola onhele opo tapa kala ombelewa yokutoloka, ihatu yandje ashike elitulemo kelaka.”

 Luhapu ohatu longifa Omalupale Oyoongalele, Olupale lOuhamba, ile eumbo lovatumwa li li onga ombelewa yokutoloka, novatoloki otava dulu okukala hava longo tava di komaumbo nokungaho ohatu xupifa shihapu. Ngeenge kape na onhele, ovamwatate ohava pewa ediminino va lande oufleta nonhele yeembelewa, omo ovatoloki tava dulu okukala hava di nokulongela. Ngeenge omhumbwe yospaana oya lunduluka, omatungo oo otaa dulu okulandifwa po, noshimaliwa osho ohashi ka longifwa vali opo pe na omhumbwe.

 Momukokomoko womudo woilonga 2020 otwa longifa eedola daNamibia eemiliyona 194 lwaapo opo oilonga keembelewa dokutoloka i pule komesho. Eespana dokutoloka oda pumbwa eekombiyuta, ee-software, oikwa noipangifo yokukwata omawi, ointaneta naikwao ihapu. Okombiyuta noinima yayo aishe ye lixwa po otai dulu okupula eedola daNamibia 11 000 lwaapo. Meekombiyuta ohamu tulwa ee-software nosho yo o-Watchtower Translation System, oprograma oyo hai kwafele ovatoloki va unganeke nawa oilonga yavo nokuninga omapekapeko.

 Ovatoloki ohava pewa yo oikwanoipangifo yokukwata omawi. Oikwanoipangifo oyo oi li ekwafo linene, molwaashi eshi omukifi wekomba wa hovela, ovatoloki ove i twaalela komaumbo avo notava twikile nokulikwata omawi.

 Luhapu ovaliyambi vomoshitukulwa ohava kwafele mokuleshulula oishangomwa nokupangela oinima yonhumba keembelewa dokutoloka. Cirstin, oo ha longo kombelewa yokutoloka Oshiafrikaans koCape Town, moSouth Africa, okwa ti: “Ovaudifi vahapu nosho yo ovakokolindjila vondjikilile otava dulu okulongifa omhito oyo opo va longife ounghulungu wavo.”

 Ovaliyambi ovo ohava tyapula oufembanghenda wa tya ngaho. Omumwameme umwe oo ha kwafele kombelewa yokutoloka okwa ti kuye oshi li “oshinima osho ito pewa luvali.” Ovamwatate novamwameme vamwe vomoshitukulwa ohave liyambe va ka kwatwe omawi. Juana, omutoloki wOshitotonac koshilando shaVeracruz, moMexico, okwa ti: “Paife eshi ombelewa yokutoloka i li popepi needolopa omo elaka letu hali popiwa kuvahapu, oshipu neenghono kovamwatate novamwameme ve uye okukwatwa omawi.”

 Mbela eembelewa odo oda kwafela ngoo mongushu yokutoloka? Ovaleshi vetu vahapu ova ti heeno. Cédric, oo ha longo kospana yokutoloka Oshikongo moDemocratic Republic of Congo, okwa ti: “Ovamwatate novamwameme vahapu ova li hava ifana etoloko letu ‘Oshikongo shomoishangomwa yo-Watch Tower,’ molwaashi inali tolokwa monghedi oyo hai popiwa kOvakongo. Ashike paife otava ti oishangomwa yetu oya tolokwa mOshikongo osho hashi popiwa kunena.”

 Andile, oo ha longo kospana yokutoloka Oshixhosa moSouth Africa, naye oku na oshimoniwa sha faafana. Okwa ti: “Vahapu ova didilika elunduluko mokutoloka kwetu. Nokuli nounona ovo va li hava lesha Oshungonangelo mOshiingilisha, paife ohave i lesha mOshixhosa. Ova lenga neenghono onghedi yopaushitwe oyo ya longifwa mo-New World Translation oyo ya pepalekwa.”

 Eefuto adishe odo hadi longifwa mokutunga, mokuwapekulula nokuningifa oilonga yokeembelewa dokutoloka i pule komesho ohadi kufwa momayambidido oo haa yandjwa nehalo liwa mounyuni aushe, mwa kwatelwa oo haa yandjwa okupitila ko donate.jw.org.