Onhumwafo kOvaroma 10:1-21
10 Ovamwatate, onda hala nohandi ilikana nomutima aushe kuKalunga va xupifwe.+
2 Ondi wete kutya ove na ouladi wokulongela Kalunga,+ ndele kave na eshiivo lashili.
3 Ndele molwaashi kave shii oiteelelwa yaKalunga i na sha nouyuki,+ ohava tokola kuvo vene kutya oshike sha yuka,+ nokungaho, ihava diinine ouyuki waKalunga.+
4 Omhango oya xulifwa po kuKristus,+ opo keshe ou e na eitavelo* a ninge omuyuki.+
5 Osheshi Moses okwa shanga kombinga youyuki oo u li mOmhango a ti: “Omunhu oo ha ningi oinima ei ota ka kala nomwenyo omolwayo.”+
6 Omishangwa Diyapuki oda ulika kutya omunhu oo e na eitavelo ota dulu okutalwa ko omuyuki. Oda ti: “Ino lipopila momutima woye+ to ti, ‘Olyelye ta londo meulu?’+ sha hala okutya, a ka tale Kristus,
7 Ile, ‘Olyelye ta i mombwili?’+ sha hala okutya, a ka nyumune Kristus koufi.”
8 Ndele oda ti ngahelipi? Oda ti: “Ondjovo oi li popepi nanye, momakanya eni nomomitima deni”;+ sha hala okutya, “ondjovo” yeitavelo oyo hatu udifa.
9 Ngeenge owa hepaulula nokanya moipafi kutya Jesus oye Omwene,+ nokukala u na eitavelo* momutima woye kutya Kalunga okwe mu nyumuna koufi, oto ka xupifwa.
10 Osheshi opo omunhu a kale omuyuki oku na okukala e na eitavelo momutima, ndele opo a xupifwe oku na okuhepaulula moipafi nokanya etumwalaka olo.+
11 Osheshi omushangwa owa ti: “Kape na nande oumwe oo e na eitavelo muye ta ka nyematekwa.”+
12 Osheshi kape na eyooloko pokati kOmujuda nOmugreka.+ Aveshe ove na Omwene umwe, oo ha nangeke noupuna* aveshe ovo hava ifana edina laye.
13 Osheshi “keshe ou ta ifana edina Jehova* ota ka xupifwa.”+
14 Ndele otave mu ifana ngahelipi, ngeenge kave na eitavelo muye? Nongahelipi tava dulu okukala neitavelo mwaau inava uda kombinga yaye? Ndele otava udu ngahelipi, ngeenge kape na ou te va udifile?
15 Otava udifa ngahelipi ngeenge inava tumwa?+ Ngaashi pa shangwa: “Eemhadi daavo hava udifa onghundana iwa inadi fewa tuu!”+
16 Ndele nande ongaho, haaveshe va tambula ko onghundana iwa. Onghee Jesaja okwa ti: “Jehova,* olyelye a itavela osho a uda kufye?”*+
17 Onghee hano eitavelo ohali di mokuuda.+ Natango, omunhu oha udu ashike kombinga yaKristus, ngeenge a udifilwa kuumwe.
18 Ndele ohandi pula kutya: Mbela inava uda etumwalaka olo? Ove li uda! Ndele omolwashike? “Ondaka yayo oya ya kombada yedu alishe, netumwalaka layo ola ya fiyo okominghulo dedu, oko ku liwe.”+
19 Ohandi pula yo kutya, Israel ke na ngoo e shi e shii shili?+ Tete Moses okwa ti: “Ohandi mu twifa ondubo okupitila movanhu vomoiwana imwe. Ohandi mu handukifa okupitila moshiwana shihe na eendunge.”+
20 Jesaja okwa popya nouladi ta ti: “Onda monika kwaavo inava konga nge,+ nonda shiivika kwaavo inava pula kombinga yange.”+
21 Ndele okwa popya shi na sha naIsrael a ti: “Efiku keshe, onda yelulila omake ange ovanhu ovo ihava dulika nove na omitwe dikukutu.”+
